Abhagharatia 4
4
1Mbe, engʼana eno nkutuna mbatëëbhi ni-igha, enkaagha yonswe igho eno ukunyoora omoryamwandö akërëngë moona, nkobha arë kya omoghorwa, nokaanyoora igha umwandö ghonswe igho nu-ghwaye. 2Enkaagha iyö yonswe igho, umuri uwa umwandö uyö, nkunyoora örë arëngë mo-mabhoko agha abhanaghya na abhaimërërri abha ëbhëntö ibhyaye, okohekera enkaagha eno suwaabho yaarenga aghambirë. 3Kora bhëëtö bhonswe ni-igho twaarë, enkaagha eno waanyöörrë Kiristo ataraasha, m-baghorwa twaarenga ko mangʼana agha amasambwa ghano ghakotonga ekebhara keno.#4:3 M-baghorwa twaarenga ko mangʼana agha amasambwa ghano ghakotonga ekebhara keno. Ensonga iyaamo iyëndë ni-igha, abhaghorwa abha seteemo isya ko-kebhara kono. 4Kasi hano enkaagha yaahëkëëyë-ho, Waryobha akatoma Omoona uwaaye ono yaabhaayë ömöntö kya bhëëtö, yaaibhööywë enkaagha iya öbhöghööti ubhwa amaraghërryö agha Mosa. 5Yaamötömirë, okore atunguri abhaghorwa abha amaraghërryö agha Mosa. Yëësu yaatutungurya, okore bhëëtö bhonswe igho, tobhe abhaana abha Waryobha.
6Ko bhoora bhëëtö bhoono m-baana abha Waryobha törë, Waryobha yaatoma Umwika uwa Omoona uwaaye mo-senkoro isyëtö. Umwika uyö we akoghera torabherekera Waryobha igha, “Abha,” ensonga iyaamo ni-igha, “Taata.” 7Mbe, bhoono bhëënyu tëmökërëngë abhaghorwa ghwiki hë, kasi m-baana abha Waryobha mörë. Ku bhuyö, murinyoora umwandö ghono Waryobha yaatoorra-ho abhaana abhaaye.
Pauro arabheeha Abhagharatia
8Bhëënyu kare hayö, temwamanyirë Waryobha hë, m-baghorwa mwaarë, abha ëbhëntö bheno bhetarë Waryobha. 9Kasi bhoono igho, momanyirë Waryobha, umwene wonswe nabhamanyirë bhököngʼu. Mbe, bhoono N-kwakë mukutuna ukukyorra okoghoota amangʼana agha kare ghaara agha amasambwa ghano ghakotonga ekebhara keno?#4:9 Amasambwa ghano ghakotonga ekebhara keno. Ensonga iyaamo iyëndë ni-igha, seteemo isya ko-kebhara kono. Amasambwa ghayö, teghaana ubhwera bhobhonswe bhoora hë. Kasi ghwiki nkutuna mörë mobhe abhaghorwa abha amangʼana ghayö? 10Nkoghooterra mökërë sinyangi isya Ikiyahudi? Moraghoota sinsikö nyabhorebhe isya iwiiki, imyëri nyabhorebhe bheena imyoka nyabhorebhe igha, ni-ibhya sinyangi isya okosooka Waryobha! 11Nkoobhoha ndë igha, okaanyoora emeremo ighyane ghyonswe igho ighya okobhanyankera, gheratora okoheta bhosa igho!
12Abhakumya bharikyëtö, nkobhasaasaama ndë igha, mobhe abhatöönööni kya öni, ko bhoora öni wonswe kare haara n-kya bhëënyu igho naarë. Kasi, temwankörëëyë obhoghogho bhwobhwonswe igho hë. 13Nkuhiita mörë ekembere haara igha öbhörööyë ubhwane mbo bhwaaghërrë nkanyoora umweya ughwa okobharaarekera Amangʼana Amaiya. 14Nokaanyoora ni-igho naarë, temwansërrë handë ukunyanga hë. Kasi keno mwaakörrë nukunyikërrya kya bhono mokaaikërëëyi maraika uwa Waryobha handë Kiristo Yëësu umwene. 15Mwaashömëëywë, kasi bhoono ghwiki n-kë kebhaayë? Nkoghamba ndë obhoheene igha, enkaagha eera mokaatörrë ukwiha amaiso aghëënyu mongʼaane. 16Kasi, bhoono mbaayë umubhisa uwëënyu ko bhoora nkobhatëëbhya amangʼana agha obhoheene?
17Abhëëghya bhaara, nkokora bharë omotono, okore bhabhaghashani. Engʼana eno bhakobhatonerra, ni-igha mwikërri amëëghyö aghaabho ghano ghakokangʼasërrya okoghoota seteemo isya Ikiyahudi. Kasi engʼana iyö ti-nshiiya hë. Bharatuna igha, bhabharuusi ku-öni, okore mobhatighinkanerenga. 18Engʼana inshiiya no-kobha na omotono ughwa okokora amangʼana amaiya. Mobhe na omotono ughwa okokora igho nkaagha syonswe igho, nokaanyoora öni ntaaho. 19Abhaana abhaane, kya bhoora omokari uwa enda akunyanka na ebhesa ko-nkaagha iya ukwebhora, öni wonswe ni-ighoigho nkwiyighwa. Nendaaghëndërri ukwiyighwa igho, okohekera hano eteemo iya Kiristo eremaahekana mo-teemo iyëënyu. 20Nkutuna ndë bhököngʼu igha, n-hano nkaabhayë hamwë na bhëënyu ko-nkaagha eno, hanga nkaaisyörri nshumaashe na bhëënyu kinyabhohaabhu igho, ko bhoora temanyirë kya bhono mörë hë!
Ëkërëngyö ikya Hajiri bhaana Saara
21Möntëëbhi, bhëënyu bhano mukutuna mobhe abhaghorwa abha amaraghërryö agha Mosa, kasi momanyirë bhono amaraghërryö ghakoghamba? 22Yandëkirwë mo-Maandeko Amahörëëru igha, Ibhurahimu yaarenga na abhaana bhabhërë, ömwë ko omokari omoghorwa,#4:22a Omokari omoghorwa. Ensonga iyaamo ni-igha, Hajiri, nyakuwaabho Ishimaëri. uwa kabhërë ko omokari ömötöönööni.#4:22b Omokari ömötöönööni. Ensonga iyaamo ni-igha, Saara, nyakuwaabho Isaaka. 23Omoona uwa omokari omoghorwa oora, uyö we yaaibhööywë kö-sëëmyö iya kinyabhantö. Kasi omoona ono omokari ömötöönööni yaaibhööyë, uyö wa riraghano irya Waryobha yaarë. 24Toratora ökörëngya ko amangʼana ghayö igha, abhakari abhabhërë bhayö, n-kya simuuma ibhërë. Iya mbere, ne-eera yaakörëëywë ku-nguku iya Sinai, iyö n-kya Hajiri, abheebhorwa abhaaye mo-bhoghorwa bheebhorrwa ko okorengʼaana na amaraghërryö agha Mosa. 25Hajiri, n-kya inguku iya Sinai eno ërëngë ku-kyaro ikya Arabhia. Ghwiki natuubhaini kya umughi ughwa Yërusarëëmu bhono ghörë ko-kebhara kono, ko bhoora abhantö abha Yërusarëëmu iya bhoono igho, mbakërëngë mo-bhoghorwa ko okorengʼaana na amaraghërryö agha Mosa. 26Kasi umughi ughwa Yërusarëëmu ughwa mu-ryobha, nu-mughi ömötöönööni,#4:26 Nu-mughi ömötöönööni ghutuubhaini kya Saara, omokari uwa Ibhurahimu, ono ataarë omoghorwa. ghuyö ngwo maayö uwëëtö. 27Ko bhoora yandëkirwë mo-Maandeko Amahörëëru igha,
“Ushomerwe uwe omoghomba ono atakaaibhööyë,
kirirrya uwe ono otakarömirwë ebhesa,
ko bhoora abhaana abha omokari ono yaatighwa hayö umwenemwene,
m-baaru okokera abha ono aana umushaasha.”#4:27 Maaha mo-ketabho ikya Isaaya 54:1.
28Mbe, bhoono abhakumya bharikyëtö, momanye igha, m-baana abha Waryobha mörë ko okoghera iya riraghano iryaye, kya bhono Isaaka yaarë. 29Kasi bhoono kya bhoora ku-sinsikö seera, omoona ono yaaibhööywë na omokari omoghorwa, kö-sëëmyö iya kinyabhantö yaanyankëri omoona ono yaaibhööywë ko obhotoro ubhwa Umwika Ömöhörëëru. Reero eno honswe amangʼana ni-ighoigho gharë. 30Kasi Amaandeko Amahörëëru iyakë ghakoghamba? Nkoghamba gharë igha, “Rughya omokari omoghorwa ono hamwë na omoona uwaaye, ko bhoora omoona uwa omoghorwa, taatore okorya umwandö hamwë na omoona uwa omokari ömötöönööni hë.”#4:30 Maaha mo-ketabho ikya Okosemoka 21:10. 31Mbe, ku bhuyö abhakumya bharikyëtö, bhëëtö tëtörëngë abhaana abha omoghorwa hë, kasi na-abha omokari ömötöönööni törë.
Currently Selected:
Abhagharatia 4: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.