Abhagharatia 6
6
Tötöörraninga bhamurë
1Abhakumya bharikyëtö, hano mwamaaha murikyënyu asarri, bhëënyu bhano mokotangatwa na Umwika, momokaani, ni-igha mumukyöri bhohaabhu igho. Kasi mwiyangarre motakaashaashwa mobhe na eteemo kya iyaaye. 2Mwangoranenga imirigho ighyënyu, iyö yo enshera iya okokora bhono amaraghërryö agha Kiristo ghakutuna.#6:2 Maaha mo-ketabho ikya Yohana 13:34. 3Mbe, ömöntö wowonswe igho ono akwimaaha igha naana ubhwera okokera abhandë, uyö taana ubhwera bhwobhwonswe bhoora hë. Ömöntö kya uyö, nkwingʼaina arë. 4Kasi kera ömöntö aiyitaahe umwene eteemo iyaaye. Hano oraanyoore na-mangʼana amaiya akokora, hayö aratora ukwikumya ko amangʼana amaiya ghayö akokora, atakairengʼania na ghano abhandë bhakokora. 5Ko bhoora ni-igha, kera ömöntö naryeteeka umurigho ughwaye umwene.
6Ömöntö ono akwëghibhwa engʼana iya Waryobha, keno anyöörrë, atwenera-ko umwëghya uwaaye, amösërëëninga.
7Motakaingʼaina, Waryobha takushabhurwa hë. Keno ömöntö akwëmya, nkyo areghesa. 8Ömöntö ono akokora bhono oronamba urwa ubhusheema ubhwa ömöbhërë rukutuna igha akore, uyö no-bhosarëku areghesa ukurwa ko-ronamba ruyö. Kasi ono akokora bhono Umwika Ömöhörëëru uwa Waryobha akutuna, uyö nareghesa öbhöhöru ubhwa amakora ghonswe igho, ukurwa ku-Mwika uwa Waryobha. 9Mbe, ku bhuyö ni-igha, totakaarosa okokora amangʼana amaiya, ko bhoora hano toraaghömërri, ntoreghesa bhuuya hano enkaagha iya okoghesa irihika. 10Mbe, tokorrenga abhantö bhonswe igho amangʼana amaiya, hano wanyoora toona umweya ughwa okokora igho, ekenene nko-bhakumya bharikyëtö.
Amaraghërryö agha okomarërrya
11Momaahe amaandeko aghaane amanene ghayö mbandëkëëyë na okobhoko ukwane öni umwene. 12Abhantö bhayö bhakobhasingʼirrya igha mosaarwe, keno bhakutuna no-kosookwa na Abhayahudi. Bharatuna bhaibhashe, okore bhatakaanyankibhwa na Abhayahudi, ko okoghera iya amangʼana ghano bhakoraareka agha omosarabha ughwa Kiristo. 13Engʼana iyëndë ni-igha, abhantö bhayö bhasaarwa, tebhakoghoota amaraghërryö ghonswe igho hë. Keno bhakutuna, ni-igha bhëënyu mosaarwe okore bhaikumiri engʼana iyö iya kinyamöbhërë. 14Kasi öni tinkutuna mbe na engʼana iya ukwikumirya hë, kasi nu-kukwa ukwa Omonene uwëëtö Yëësu Kiristo ko-mosarabha. Ko koghera iya ukukwa ukwaye, amangʼana ghonswe igho agha ko-kebhara kono teghaana ubhwera ku-öni hë. Öbhömënyi ubhwane ubhwa kare, bhwakwa hamwë na Yëësu ko-mosarabha. 15Okosaarwa handë ukwanga okosaarwa, ghonswe igho teghaana ubhwera bhwobhwonswe bhoora hë. Ëkëntö ekenene, no-kobhombwa bhohya na Waryobha.#6:15 Maaha mo-ketabho ikya 2 Abhakörintö 5:17. 16Omorembe na ikyabhera ikya Waryobha, bhebhe ko-bhantö bhonswe igho bhano bhakoghootana na obhoheene bhuyö, bhayö mbo abhantö abha Waryobha.
17Mbe ukusimirya reero, ömöntö wowonswe igho atakaannyankya ghwiki, ko bhoora amaköru ghano naatemwa amaghena na ebhesaamörë, neneenagho kö-möbhërë ughwane, ko okoghera iya okokorra Yëësu Kiristo emeremo.
18Abhakumya bharikyëtö, örööbhö urwa Omonene uwëëtö Yëësu Kiristo robhe hamwë na bhëënyu. Amina.
Currently Selected:
Abhagharatia 6: ssc
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.