Ruuka 16
16
Ëkërëngyö ikya umwimërërri
1Yëësu yaarëngëëyi abheegha abhaaye ëkërëngyö igha, “Yaare-ho umwamë uwöndë, ono yaarë na umwimërërri uwa ëbhëntö ibhyaye. Umwimërërri uyö, akashongerwa ku-mwamë uyö igha, nkunyamora arë ëbhëntö ibhya umwamë uyö. 2Ku bhuyö umwamë uyö, akabherekera umwimërërri uwaaye, akamöbhöörya igha, ‘M-mangʼana kë, ghano nkwighwa bharakoghamba? Ndeetera hano amangʼana agha ubhwimërërri ubhwaho, ko bhoora töghëndërri ukwimererra ëbhëntö ibhyane hë.’
3“Umwimërërri uyö, akaibhöörya igha, ‘Bhoono iyakë ndaakore? Umwamë ono, anduusiri ko-meremo. Singuru isya okorema, tenenasyo hë, na okosabherra, nkosooka ndë. 4Bhoono mmanyirë bhono ndaakore, okore hano ndaakënyibhwi emeremo, abhantö bhansërëëninga mu-mighi ighyabho.’
5“Ku bhuyö umwimërërri uyö, akabherekera abhantö bhonswe igho, bhano bhaarë na isiirë ku-mwamë uyö kyö ömwë ömwë. Akabhöörya uwa mbere igha, ‘Isiirë eno onayo ko-monene uwaane, n-kerengere kë?’ 6Akamohonshora igha, ‘Isiirë iyaane, na-mapiipa righana, agha amaghuta agha Ëmëzëituuni.’ Umwimërërri akamötëëbhya igha, ‘Ghegha ekarataasi eno yandëkirwë-ko isiirë iyaaho, wikare hano, wandeke-ko bhöngöbhöngö igha, isiirë yaaho, m-mapiipa merongo etaano igho.’ 7Ho ghwiki umwimërërri uyö, yaabhöörri uwöndë igha, ‘Uwe we isiirë iyaaho, n-kerengere kë?’ Akamohonshora igha, ‘Isiirë iyaane, m-maghonera righana rimwë, agha engano.’ Umwimërërri akamötëëbhya igha, ‘Ghegha ekarataasi eno yandëkirwë-ko isiirë iyaaho, wandeke-ko igha, m-maghonera merongo monaane.’
8“Hano umwamë uyö yaaighuurë amangʼana ghayö, akakumya umwimërërri uyö atarë uwa heene, ko-bhongʼaini bhono yaakörrë. Ko bhoora abhantö abha ko-kebhara kono, mbaana obhongʼaini, hano bhatighinkanerana abheene ko abheene, ko-mangʼana agha ko-kebhara kono, okokera abhantö abha Waryobha. 9Öni ndabhatëëbhya igha, mwikorre obhosaani kö-bhëntö bheno moonabhyo ko-kebhara kono, okore hano bherehwa, mösërëënibhwi mö-bhöhöru ubhwa amakora ghonswe igho.
10“Ömöntö wowonswe igho uwa heene ku ukwimererra engʼana enke, nkobha arë uwa heene, kora ku-bhwimërërri ubhwa amangʼana amanene. Ni-ighoigho ono atarëngë omoheene ku ukwimererra engʼana enke, te-moheene ku-bhwimërërri ubhwa amangʼana amanene hë. 11Hano motaabhe abhantö abha heene kö-bhëntö ibhyënyu ibhya ko-kebhara kono, nawë araabhahaane ëbhëntö ibhya heene ibhya mu-ryobha? 12Hano motaabhe abhantö abha heene ku ukwimererra ëbhëntö ibhya uwöndë, nawë araabhahaane ibhyënyu abheene?
13“Taaho omoghorwa ono araatore okokorra emeremo abhanene bhabhërë, ko-nkaagha ëmwë. Hano araakore igho, naraareghe ömwë, ahanshe uwöndë. Handë aghootane na ömwë, asere uwöndë. Ighoigho na kö-bhëënyu bhonswe, timwikarre ubhutuni ubhwa ëbhëntö, na eno moratuna okokorra Waryobha emeremo.”
14Hano Abhafarisaayo bhaaighuurë amangʼana ghayö, bhakamosera, ko bhoora bhaarenga bhahanshirë bhököngʼu seehera. 15Yëësu akabhatëëbhya igha, “Mo-bhantö, bhëënyu moraikora igha, m-bantö abha heene mörë, kasi Waryobha, namanyirë ghano gharëngë mo-senkoro isyënyu. Ko bhoora amangʼana ghano abhantö bhakukumya, ngo amanyënyëëri ku-Waryobha.
Amaraghërryö na Obhokama ubhwa Waryobha
(Mataayo 11:12-13, 5:31-32; Maariko 10:11-12)
16“Amaraghërryö agha Mosa na amaandeko agha abharööti, mbyaabhatangatirë igho, okohekera ko-nkaagha iya Yohana Omobhatiisya. Ukusimirya hayö, Amangʼana Amaiya agha Obhokama ubhwa Waryobha, nkoraarekwa gharë, na abhantö bhonswe igho, nkokangʼasërribhwa bharë igha, bhasohe-mo.#16:16 Abhantö bhonswe igho, nkokangʼasërribhwa bharë igha, bhasohe-mo. Ensonga iyaamo iyëndë ni-igha, abhantö bhonswe igho bharaisohya-mo kwa nguru. 17N-këtöbhu risaarö na ekebhara ukurwa-ho, kasi akatabhë nkakaabha kake aka amaraghërryö agha Mosa, tekaaru-ho hë.
18“Hano umushaasha araabhorre mokaaye, amare atete uwöndë, uyö no-bhosooraare oraanyoore akörrë. Na umushaasha ono araatete omokari ono yaabhorrwa, uyö wonswe, no-bhosooraare oraanyoore akörrë.”
Ëkërëngyö ikya umwamë na ömötöbhu Raazaaro
19Yëësu akarëngya igha, “Yaare-ho umwamë uwöndë, ono yaaryanga ëbhëntö ibhiiya sinsikö syonswe igho. Yaatooranga singibho sinshiiya isya erangë këësërö isya öbhöghöri öbhököngʼu. 20Mu-kihiita ikya umwamë uyö, yaare-ho ömötöbhu uwöndë ono yaabherekerwanga igha Raazaaro. Raazaaro uyö, yaarë na ebheronda ömöbhërë ghonswe igho, 21kora sësëësë, nsyashanga semeena ebheronda ibhyaye. Raazaaro yaaighombanga ahaanwe ebhesansa ibhya ibhyakorya bheno bhyaaghwanga ukurwa ko-meeza iya umwamë uyö, ko bhoora yaaighwanga umweko.
22“Enkaagha ekahekera-ho, ömötöbhu Raazaaro akakwa. Abhamaraika bhakamuhira mu-ryobha, haangʼë na Ibhurahimu. Umwamë uyö wonswe, akakwa, akabheekwa. 23Mbe, umwamë uyö, akabha aranyanka bhököngʼu mu-kyaro ikya abhaku#16:23 Ikyaro ikya abhaku. Maaha mo-faharaasa. iyö yaarë. Hano akogharamera ighörö, akamaaha Ibhurahimu kwa ahare, na Raazaaro arëngë haangʼë nawe. 24Akamobherekera bhököngʼu igha, ‘Taata Ibhurahimu, otanyabhera. Nkunyanka ndë bhököngʼu mo-morro mono. Tatoma Raazaaro aashe ashabhi ensonga iya ikyara ikyaye mo-manshë, aghatöönyi kö-rörëmë urwane, okore rokende.’
25“Kasi Ibhurahimu akamohonshora igha, ‘Moona uwaane, uhiite igha waanyöörrë amangʼana amaiya mö-bhöhöru ubhwaho, na Raazaaro, akanyoora amaghogho. Kasi bhoono umwene hano, nkösërëënibhwa arë, na uwe nkunyanka örë hayö. 26Ghwiki mbe Waryobha, yaatoora-ho rirooma rinene ghatëghatë iya bhëëtö na bhëënyu, okore ömöntö atakaamboka aashe iyö, handë uwa iyö, ukuusha eno.’
27“Umwamë uyö akatëëbhya Ibhurahimu igha, ‘Ë taata uwëëtö, nkaakosaasaama, tatoma Raazaaro ka wëëtö haara ko-taata, 28akaani abhamura abhëëtö bhataano, bhatakaasha kuusha hano ku-nyaanyi eno.’
29“Kasi Ibhurahimu akamohonshora igha, ‘Abhamura abhëënyu bhayö, mbaana amaandeko agha Mosa, na agha abharööti, bhaghaitegherre.’
30“Umwamë uyö, akamohonshora igha, ‘Ti-igho hë Ibhurahimu, kasi ömöntö uwa ukurwera mo-bhaku eno, hano araabhahekeere, mbaraahongore ëbhëbhë ibhyaho.’
31“Ibhurahimu akamohonshora igha, ‘Hano oraanyoore igha bhamura abhëënyu bhayö, tebhakoghoota amaandeko agha Mosa na agha abharööti, kora ömöntö nakaaryoka mo-bhaku, tebhaikërri hë.’ ”
Currently Selected:
Ruuka 16: ssc
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
