Ruuka 9

Yëësu aratoma abhatomwa abhaaye ikömi na abhabhërë

(Mataayo 10:5-15; Maariko 6:7-13)

1Yëësu yaabhërëkëëyë abhatomwa abhaaye ikömi na bhabhërë. Akabhahaana ubhwera na obhotoro ubhwa ukwata amasambwa ghonswe igho ko-bhantö, na ukuhwënia abharööyë. 2Akabhatoma bhaghende okoraarekera abhantö amangʼana agha Obhokama ubhwa Waryobha na ukuhwënia abharööyë. 3Akabhatëëbhya igha, “Motakaamanora ëkëntö ko-roghendo urwënyu, nekaabha inyimbo, ensaho, ibhyakorya, kora seehera, handë ingibho iyëndë iya kabhërë. 4Na mu-nyumba yoyonswe igho eno bharaabhasërëëni mosohe, mwikare-mo, kohekera urusikö rono murirwa mu-kishishi kiyö. 5Na umughi ghoghonswe ghono abhantö abha muyö bhataabhasërëëni, murwe-mo na okokongʼonta urutu urwa ko-maghörö aghëënyu,#9:5 Okokongʼonta urutu urwa ko-maghörö aghëënyu. Ensonga iyaamo nu-kwöryökya igha, Waryobha angirë abhantö abha hayö, ko bhoora bhaangirë abhatomwa abhaaye. okore robhe ekemanyërryö ikya ukwanga ukwabho.”

6Ho bhoono abheegha bhayö bhaatanööyë, bhakaheta mu-bhishishi bhararaarekera abhantö Amangʼana Amaiya agha Obhokama ubhwa Waryobha, na ukuhwënia abharööyë kera ahasë.

Amangʼana ghararoghania Herode omotwe

(Mataayo 14:1-12; Maariko 6:14-29)

7Hano Herode Antipa ömötöngi uwa Ghariraaya yaaighuurë amangʼana ghonswe igho ghano Yëësu yaakoranga, omotwe ughwaye ghokaroghana. Ngwaaroghaini ko bhoora abhantö abhandë mbaaghambanga igha, “Yëësu we Yohana, hayö naryökirë ukurwa mo-bhaku.” 8Abhandë igha, “Ömörööti Ëriya, we abhööshökirë.” Na ghwiki abhandë bhakaghamba igha, “Nö-mörööti uwa kare, we aryökirë.”

9Kasi Herode Antipa umwene akaibhöörya igha, “Yohana naamökëngirë righöti. Kana uyö n-nawë nkwighwa amangʼana agha amakono aghaaye?” Ku bhuyö, Herode yaaighombanga bhököngʼu amaahane na Yëësu.

Abhantö okoheteera ëbhëkwë bhitaanobharahaanwa ibhyakorya na Yëësu

(Mataayo 14:13-21; Maariko 6:30-44; Yohana 6:1-14)

10Mbe, abhatomwa bhayö, bhakakyora ku-Yëësu, bhakamötëëbhya ghonswe igho ghano bhaakörrë. Hayö ho yaabhatangatirë abheene igho hagharë, ukughya mu-mughi ghono ghwaabherekerwanga igha Bhëtisaida. 11Kasi hano rikomo irya abhantö ryaamanyirë igha ni-iyö aghëëyë, rekamosoorana. Akabhasërëënia bhuuya. Akasimya ököbhëëghya amangʼana agha Obhokama ubhwa Waryobha. Akahwënia abharööyë bhano bhaarë na inyonta iya ukuhwënibhwa.

12Hano omoghoroobha ghwaahikirë iryobha reraghya okoghwa, abheegha ikömi na bhabhërë bhayö bhakaasha ku-Yëësu bhakamötëëbhya igha, “Bhoono uwe otahaatera abhantö bhano, bhaghende mu-bhishishi na mö-mëghöndö gheno ghërëngë haangʼë hano, okore bhaitonere ibhyakorya na ahasë aha okoraara, ko bhoora hano mwi-sisi törë.”

13Yëësu akabhahonshora igha, “Bhëënyu mobhahaane ibhyakorya.”

Bhakamötëëbhya igha, “Bhëëtö tetoona hano ibhyakorya bheno bheraabhaise hë. Toona emekaate etaano na sinswë ibhërë igho! M-maheene nkutuna örë igha, toghende toghorre abhantö bhangʼana hano ibhyakorya?” 14Ekerengere ikya abhashaasha abheene igho bhano bhaare-ho, kyaaheteeranga abhantö ëbhëkwë bhitaano.

Yëësu akatëëbhya abheegha abhaaye igha, “Mobhatëëbhi bhaikare sentegha isya abhantö merongo etaano etaano.” 15Bhakakora kya bhono yaabharaghërrëëyi, abhantö bhonswe igho bhakaikara.

16Yëësu akaghegha emekaate etaano ghiyö na sinswë ibhërë. Akagharamera mu-ryobha, akakumya Waryobha, akabhotorabhotora emekaate na sinswë siyö, akahërrya abheegha abhaaye, okore bhatwenere abhantö bhayö. 17Abhantö bhonswe igho bhakarya, bhakeeghota. Abheegha abha Yëësu bhakakomania ebhesansa ibhya ibhyakorya bheno bhyaatamirë, bhakanyoora ebhekapo ikömi na bhibhërë.

Peetero araghamba igha Yëësu n-Kiristo

(Mataayo 16:13-19; Maariko 8:27-29)

18Urusikö urwöndë, Yëësu na abheegha abhaaye bhaarenga bhaiyahööyë. Yëësu yaasaasaamanga Waryobha. Akabhabhöörya igha, “Abhantö bharaghamba igha nö-öni wë?”

19Bhakamohonshora igha, “Abhandë nkoghamba bharë igha, nu-uwe Yohana Omobhatiisya. Abhandë igha, nu-uwe Ëriya. Kora bhaaho abhandë bhano bhakoghamba igha, uwe nö-mörööti uwa kare, we yaryökirë.”

20Yëësu akabhabhöörya igha, “Bhoono bhëënyu bho, iyakë mokoghamba?”

Peetero akamohonshora igha, “Uwe nu-uwe Kiristo! Nu-uwe waatomwa na Waryobha!”

21Yëësu akabhakaania bhatakaatobhora engʼana iyö.

Yëësu arashumaashera urwa mbere engʼana iya ukukwa na ukuryoka ukwaye

(Mataayo 16:20-28; Maariko 8:30–9:1)

22Hano yaamarrë okobhakaania, akabhatëëbhya igha, “Öni Omoona uwa Ömöntö ni-igha nnyoore inyaanyi, kora nangwe na abhaghaaka abha Ikiyahudi, abhanene abha abhasëngëri, na abhëëghya abha amaraghërryö agha Mosa, bhayö mbarighira, niitwe. Kasi urusikö urwa katatö m-maheene nindiryoka.”

23Hano Yëësu yaamarrë okoghamba amangʼana ghayö, akabhatëëbhya bhonswe igho igha, “Ömöntö wowonswe ono akutuna okonsoorana, ni-igha aikaane umwene, aikërri ukunyoora inyanko iya okonsoorana#9:23 Aikërri ukunyoora inyanko iya okonsoorana. Mu-Kiyunaani ni-igha, aiteeke omosarabha ughwaye andwe nyuma. sinsikö syonswe igho. 24Mbe, ömöntö wowonswe ono akwironerra, uyö nairëkëëyë. Na ömöntö wowonswe ono araairekere ukughira iya öni, uyö naitörri. 25Ömöntö nakaanyoora ëbhëntö bhyonswe igho ibhya ko-kebhara kono, kasi aisiki umwene igho, n-kë oraanyoore akörrë? 26Ömöntö ono akoommaahera sënsöni öni na amangʼana aghaane, uyö we öni Omoona uwa Ömöntö ndemaahera sënsöni ku-bhuhika ubhwa Taata, hano ndiisha ukurwa mu-ryobha, hamwë na abhamaraika abhahörëëru.

27“No-bhoheene nkobhatëëbhya igha, mo-bhantö bhano bhaimërëëyë hano, bhaamo abhandë bhano bhatarikwa igho, bhatarööshë Obhokama ubhwa Waryobha.”

Yëësu araisyörya ekesosa

(Mataayo 17:1-8; Maariko 9:2-8)

28Hano syaahööyë sinsikö monaane ukurwa haara Yëësu yaaghambirë amangʼana ghayö, Yëësu akaghegha Peetero, Yohana na Yaakobho, akariina nabho ku-nguku, okore asaasaame Waryobha. 29Hano yaahikirë iyö, akasimya okosaasaama Waryobha. Enkaagha eno yaasaasaamanga, ituubho iyaaye ekaisyörya. Singibho isyaye sekarabherra shaa, sekamekameka bhököngʼu. 30Hayö na hayö igho, bhakabhooshokera-ho na abhantö bhabhërë, bhakabha bharashumaasha na Yëësu. Abhantö bhayö m-Mosa na Ëriya bhaarë. 31Bhaamekamekanga emerengaari gheno bhaarë naghyo. Bhaashumaasheranga kya igho Yëësu araahekerani ghaara Waryobha yaamutunire-ko ukukwera Yërusarëëmu. 32Ko-nkaagha iyö waanyöörrë Peetero na bharikyaye bhaihiriibhwi. Hano bhaabhöökirë bhakamaaha Yëësu aramekameka emerengaari gheno yaarë naghyo. Bhakamaaha na abhantö abhabhërë bhaimërëëyë haangʼë nawe.

33Hano abhantö abhabhërë bhayö bhaatanoranga ukurwa ku-Yëësu hayö, Peetero akatëëbhya Yëësu igha, “Omonene uwëëtö, m-buuya bhëëtö tobhe hano. Tohaghaashe hano ibhighutu bhitatö, ëkëmwë ikyaho, ikyëndë ikya Mosa na ikyëndë ikya Ëriya.” Peetero yaaghambirë igho, kasi atamanyërrëëyi keno yaaghambanga.

34Enkaagha iyö Peetero yaaghambanga igho, risaarö rekaasha rekabhakundikirya. Abheegha bhayö bhakoobhoha. 35Engamba ekarwera mu-risaarö muyö, ekaghamba igha, “Ono we Omoona uwaane, we nshaaghööyë ku bhuyö mumwitegherre.” 36Hano engamba iyö yaahööyë, abheegha bhakamaaha Yëësu atighaayë umwene. Ghayö ghonswe igho bhaarööshë hayö, tebhaatëëbhëri ömöntö wowonswe oora ko-nkaagha iyö hë.

Yëësu araata risambwa irya ëndööri

(Mataayo 17:14-18; Maariko 9:14-27)

37Nyinkyo yaako, Yëësu hamwë na abheegha bhatatö bhayö, bhakaika ukurwa ku-nguku. Rikomo rinene irya abhantö rekaturungʼana Yëësu. 38Mo-bhantö muyö, yaare-mo ono yaaghambirë bhököngʼu igha, “Nkaakosaasaama ore umwëghya, otaamaahera omoona uwaane umumwëmwë ono. 39Omoona ono aana risambwa. Nkömöröönianga rere akora ikituri, kora aghwa ëndööri, rihuro rimurwa mu-munywa. Nkumunyankya rërë igho, tirikumutigha bhöngö hë, kasi nkumutigha rërë kwa nyanko aana amashamaaro. 40Naasaasaamirë abheegha abhaaho igha bharyate, kasi tebhaatörrë hë.”

41Yëësu akaghamba igha, “Bhëënyu abhantö abha rekora reno, na-bhantö abhaghogho mörë, kora temoona umukumo hë. Nëngëndërrya ukwikarana na bhëënyu ndabhaghömërrya okohekera rööhë? Ndeetera hano omoona uwaaho uyö.”

42Hano umumura uyö yaaghyanga ku-Yëësu, akaghwësibhwa hansë na risambwa, akaghwa ëndööri. Kasi Yëësu akahamera risambwa riyö, rekarwa, akamuhwënia, akamukyörya ku-suwaabho.

43Abhantö bhonswe igho hano bhaarööshë obhotoro obhonene ubhwa Waryobha bhuyö, bhakaroghoora bhököngʼu.

Yëësu arashumaashera urwa kabhërëengʼana iya ukukwa na ukuryoka ukwaye

(Mataayo 17:22-23; Maariko 9:30-32)

Enkaagha iyö bhaaroghorranga ghayö Yëësu yaakörrë, umwene akatëëbhya abheegha abhaaye igha, 44“Engʼana eno ndaabhatëëbhi bhoono igho, mughitegherre bhuuya. Öni Omoona uwa Ömöntö nendaanyeerwe inikö, ntoorwe mu-bhitaano ibhya abhabhisa abhaane.”

45Amangʼana ghayö Yëësu yaabhatëëbhëri, tebhaghamanyërrëëyi hë, ghaarenga ghabhisirwë ko-obho, okore bhatakaaghamanya. Kasi bhakoobhoha ökömöbhöörya ensonga iya ghayö yaaghambirë.

N-nawë omonene okokera abhandë?

(Mataayo 18:1-5; Maariko 9:33-37)

46Abheegha abha Yëësu bhakanyeerana senkaani igha, nawë omonene okokera bharikyaye.

47Yëësu akamanya amaitegherro aghaabho ghano bhaaitegherranga mo-metwe ighyabho. Ku bhuyö akaghegha omoona omoke, akamwimërrya haangʼë nawe. 48Akabhatëëbhya igha, “Ömöntö ono araasërëëni ömöntö omoke kya omoona ono, ko okoghera iya öni, noraanyoore nö-öni asërëënëri. Na ömöntö ono araansërëëni, nkunyoora arë asërëënëri Waryobha ono yaantoma, ko bhoora ömöntö omoke bhököngʼu, mö-bhëënyu muyö bhonswe igho, uyö we omonene okokera bhonswe igho.”

Ono atakobhanyeera senkaani no-robhareka urwënyu arë

(Maariko 9:38-40)

49Yohana akatëëbhya Yëësu igha, “Omonene uwëëtö, twaarë törööshë ömöntö araata amasambwa ko obhotoro ubhwa iriina iryaho, tokamokaania, ko bhoora atarëngë hamwë na bhëëtö.”

50Yëësu akamohonshora igha, “Motakaasha okomokaania, ko bhoora ömöntö ono atakobhanyeera senkaani, uyö hamwë arë na bhëënyu.”

Abhasamaaria bhano bhataasërëënëri Yëësu

51Hano enkaagha iya Yëësu iya okogheghwa ukughya mu-ryobha yaahikirë haangʼë, ho yaarööshë igha atanore ukughya Yërusarëëmu. 52Akatoma abhahiri abha amangʼana bhamotangatere, bhakaghya bhakasoha mu-kishishi ikyëndë ikya Abhasamaaria, okore bhamösëëmëri ahasë aha okoraara. 53Kasi abhantö abha mu-kishishi kiyö, tebhaamösërëënëri hë, ko bhoora Yëësu yaaghyanga Yërusarëëmu.

54Hano Yaakobho na Yohana abheegha abha Yëësu bhaarööshë amangʼana ghayö, bhakabhöörya Yëësu igha, “Kana Omonene uwëëtö, ni-igha tosabhe omorro ghwike ukurwa mu-ryobha ghobhasiki, [kya bhoora Ëriya yaakörrë]?”#9:54 Maaha mo-ketabho ikya 2 Abhakama 1:10, 12, 14.

55Yëësu akabhaisyörrya, akabhahamera, [akabhatëëbhya igha, “Bhëënyu temomanyirë m-bantö abha eteemo kë mörë, 56ko bhoora öni Omoona uwa Ömöntö te-bhantö naasha kusikya hë, kasi naasha okore ntööri abhantö.”]#9:54-56 Amangʼana ghano gharëngë mo-bhebhandërryö kya bheno […] ni-igha, tegharëngë mo-senakara isyëndë isya Ikiyunaani. Bhakaghya mu-kishishi ikyëndë.

Abhantö bhano bhakutuna okosoorana Yëësu

(Mataayo 8:19-22)

57Enkaagha eno Yëësu yaaghendanianga na abheegha abhaaye ko-nshera, ömöntö uwöndë akamötëëbhya igha, “Nendaakosooranenga, hasë honswe igho, hano ukughya!”

58Kasi Yëësu akamohonshora igha, “Nyamobhwe, mbaana amaina aghaabho agha okoraara-mo, na ibhinyönyi, mbeena amasu. Kasi öni Omoona uwa Ömöntö, teneena ahasë aha okotoora orobharu urwane hë.”

59Yëësu akatëëbhya ömöntö uwöndë igha, “Nshö onsoorane.”

Ömöntö uyö akamohonshora igha, “Omonene, tigha kanga ngende mbeeke taata, mmare niishe.”#9:59 Amaandeko agha Ikiyunaani ngaandëkirwë igha, tigha tangata ngende okobheeka taata. Kasi tiyaaghambirë igha suwaabho m-mörööyë yaarë handë igha yaarenga akuurë hë. Ku bhuyö ensonga yaamo ni-igha yaatunanga aghi okokora ighyaye. Ne-meremo ighyaye ghyaamötönëri tokosoorana Yëësu kwamötönëri hë.

60Kasi Yëësu akamohonshora igha, “Tigha abhantö bhano bhatakwighwera Waryobha, bhabheekane abheene ko abheene. Kasi uwe kaghi oraarekere abhantö amangʼana agha Obhokama ubhwa Waryobha.”

61Ömöntö uwöndë uwa katatö, akatëëbhya Yëësu igha, “Ore Omonene, nendaakosooranenga, ahasë honswe igho. Kasi untighe tangata ngende ndaghe abha yeeka.”

62Yëësu akamohonshora igha, “Ömöntö wowonswe ono asimiri okorema na sengʼombe, hano araamaaherre nyuma, uyö taingʼarëëyë okobha mo-bhokama ubhwa Waryobha hë.”

Currently Selected:

Ruuka 9: ssc

Highlight

Copy