Yaaya 4

Iisa wagaa ma daate ta Samaari

1-3Guu Pariziyennigee giyyiɗe kadar ga Iisa batasayya giimi maani ƴiila min oko Yaaya o jobookeetee kulla ƴiiliy ma maanuwe ku Yaaya. Ma seene pa, ga Iisa saa ma kayaati batisiye ɗa giimi, ay jobookeetee ka ma batasayya. Maa ga Iisa giyyiɗe kadar gu giimi beneyya goŋŋa, ga wace min kiɗa ta Yudee, gaa yokowɗo kiɗa ta Galilee.

4Gaa yokaa pa Galilee, illa ga ƴelaa ma botol ka kiɗa ta Samaari. 5Gaa sarɗe geegar kaƴi aɗe maa gu kolaa goo Sisar ma aaye katta ganti Yakub, maa ga berewwiyee oko runti kee Yuusup min tippa. 6Ay iŋaa appe kulla maa ga beeniti Yakub maa ga caree alɗo. Maa ga Iisa rakawɗe pa min turguwwi, ga ase nunta biiti beenu kaaka wikinne ka gaayilti.

7-8Wikinne maa ga Iisa nabaɗɗo kaaka pa, gu jobookeetee katee darre ta Sisar gu deeɗiyo giɗa tiyaw. Gii lekkiɗo Samaaritenniŋga ma ase ɗabbiti ammo. Maa gi asiyya gassa, gaa innicca gaa: «Biraw ɗe ammi na aar̰iɗo.» 9Gii tiiliyyee gee: «Kii ma ki ay Yawudince. Ayme ki enewɗino naa ma ay gima ta Samaari kii na biram ammi ki aar̰iɗo?» Gita pa beneyye goŋŋa asan gu Yawudigee ma giimi ku Samaari gi galawwiyoo ɗa#4.9 Giimi ku Samaari, ay Samaaritennigee. Guta pa ay giimi ku amsenta, Yawudigee sokke beenannico ma Asiriyennigee, guu weeɗiy pe Samaaritennigee guta kotti. Guta pa jagiya wikirco ka lollikiti Mellayi kayco. Dee geewa were kayaati dambu maa gu kolaa goo Garizim gu lollokɗiya iŋaa Mella, min maa gu deeɗo lollika Zerizalem, o gu amassiy ka awaadigee ku Mellayi ma ku zorro..

10Gaa Iisa tiilitti gaa: «Ka ibinca ɗa birawti Mellayi, o gimu keeke ma enaate ammi ku aar̰iti. Ka ebenɗiya ampane kee, ay kaŋ pe soo ma enaa, gaa biritte ammi ma beraayo hayaatane oko giimo.» 11Gii daate beneyyiyyee gee: «Miiɗi keeke, ki lekka ɗa rambaaye ka cimmiti ammo, o beenu siƴƴa. Ki gasakkay taŋaa ammi kotti ma beraayo hayaatane oko giimo? 12Kaakatini kee Yakub ay gata ma mirniiga beenu keeke, o ga gata saa kulla ma kayaati o rontee o gaaruwtee aar̰e amtee. Ki pa leewe ki walaŋ ki ƴiila e?» 13Gaa Iisa tiilitti gaa: «Gaa gimu aar̰e amtee beenu keeke, gu ibini deewa payya. 14Gimu soopa ma ar̰aa ammi maa ga naa beree, gu ibini deewa ɗa payya ta kaw, asan gu ammi maa na beree deewee ammi ma sorotta diiman o gu beree hayaatane ma gakamma ɗa ta kaw.» 15Gii daate beneyyiyyee gee: «Miiɗi keeke, biraw ɗe ammi kotti ku maa gu ibini alɗino dee ɗa o na alɗo asa ɗa payya ɗabbiti iŋee.»

16Gaa Iisa leeɗiti gaa: «Addo ka deeɗiya kolla mitte ku asiɗo.» 17Gii gita pa tiiliyyee gee: «Na lekka ɗa miiɗi.» Gaa Iisa beneyyitti gaa: «Ay seene appe ka leeɗaw kaaka lekka ɗa miiɗi, 18asan ka sokke miiɗi beeƴa, o miiɗi maa ka nowoɗɗe keeke haŋka kulla ay mitte ɗa. Oko keeke pa, ka beneyye ma seene.» 19Gii daate tiiliyyee gee: «Miiɗi, naa ellam goŋŋa, ki ay nabiinice. 20Kookuweetini koo Samaaritennigee aabidiya Mella oko damba taata, a kuŋ Yawudigee pa kuu ga were ka aabiditi Mellayi aaye geegar ka Zerizalem.» 21Gaa Iisa tiilitti gaa: «Daate, amannu oko beneytu keeke. Wikinne akka asa maa ku alɗiya aabida ɗa payya Mella Baaba oko damba taata, o ga ay Zerizalem ɗa ka kulla. 22Kuŋ giimi ka Samaari aabaddaa Mella maa ku ibina ɗa samaane, nii Yawudigee soopa aabaddaa Mella maa ni ibina samaane, asan gi najjiyti Mellayi delaa ƴa omma min Yawudigeyyo. 23Wikinne soopa asaa, o ga ase paaɗe haŋka, maa gu giimi asiyya aabida Mella Baaba ma gaayo ta Ruuhanti o ma seeniti, asan ga Mella aŋka giimi ma aabaddaa pe goŋŋa aɗe. 24Mella ay Ruuhane, o gu giimi ma aabaddaa pa kulla, aŋka gu aabidiyya ma gaayo ta Ruuhanti o ma seeniti.» 25Gii daate beneyyiyyee gee: «Na lekka kabarre kadar ga Masi, gata maa ga Mella aparre, akka asa, ga asinniigu gaara gaartee Mellayi paracco.» 26Gaa Iisa tiilitti gaa: «Ay naata keeke appe ma beneyyate ay Masi.»

27Gaa wikinne maa gu beneyɗo kaaka pa, gu jobookeetee kulla asiɗe min giɗaawi lawwi ku tiyaawi. Guu ajjibiɗe maa gu elliyya ga beneyya ma daate. Gaa alɗo lekka ɗa ya gimu kaƴi kulla min oko jobookeetee ma inniya gaa: «Ki aŋkiti ini me?», e baŋ gaa: «Ayme ki beneyɗo ma daate teete?» 28Gii daate uttiyyee oko kuɗigití iŋaa, gii yookiɗe darriti gi deeɗiyo taasa oko giimo gee: 29«Asoŋ ƴa ku asiyya ella gimu kinne ma gaarawgu gaartaw paracco maa na leelo! Walaŋ pe ga deewa Masi?» 30Guu giimi oomiɗe min darriti, gu deeɗiya ella Iisa.

31Wikinne maa gi daate yookiɗe darriti gi deeɗiyo taasa oko giimo kaaka, gu jobookeetee pa malmallaa goo: «Garaawatini, asu tee ɗe?» 32Gaa gata pa tiiliyyoo gaa: «Na lekka tiyaw maa ku ibina ɗa.» 33Guu jobookeetee enewɗo zeneeco goo: «Alka lekka soo gimu ma itiriyee tiyaw e?» 34Gaa Iisa beneyyiyyoo payya gaa: «Tiyawtu, ay na leeɗiy gaari maa ga ma n̰akamminoo aŋka, o na gaamiyya lubbi maa ga berewwiyaw. 35Ku beneyya kuu gi seɗɗo marakkiti koyyee pooɗi. Naata soopa beneyyatoŋ naa ku elloŋgu ƴa ganna neero, o gu aŋka paaɗe seɗɗo. 36Gimu ma seɗekka gasakkaca appe hagganti, o ga temekkay korƴo ku maa ga gassicca hayaatane ma gakamma ɗa ta kaw. Ay goŋŋa pe ga gimu ma lowokka o ma seɗekka parhinɗo serco sawa. 37Masal keeke pa beneyye gaa: Gimu kaƴi ƴa lowokka o kaƴi pa seɗekka. Ay seene. 38Na n̰aamitoŋ seɗɗiti oko gaan maa ku alɗe lobokka ɗa. Giimi daare pa lubbe, kuu asiɗe jiira oko lubbico maa gu leewe paaɗe.»

Giimi maani ku kiɗa ta Samaari amanna oko Iisa

39Samaaritennigee maani min darre ta Sisar dowwiy galbigeeco oko Iisa asan gi daate beneyyiyoo gee: «Gimu kinne gaarawgu gaartaw paracco maa na leelo.» 40Ay ɗakko appe gu Samaaritennigee asiyya gassa Iisa gu asiya malmila goo ga nuntayo. Gaa nuntiɗe ma guta meeni seera. 41Maa ga Iisa beneyyiyyoo, guu giimi maani ta kaw duwɗiy payya galbigeeco oko gata ma ay Masi. 42Guu beneyyitti oko daatti goo: «Haŋka ni dowwiy ɗa galbigeetini oko gata ma beneyte ka maa ka jeppini, innasoopa ni dowwiy kulla, asan ni giyyiya saa pe ga niita ma deytini o ni leelo pe kabarre ma tirta kadar ga ay Najjaayaco giimi paracco ku dunuune teete.»

Iisa rayyaddaa runti lubaaka ka tatta ka hakuumati

43Maa ga Iisa nuntiɗe kiɗa ta Samaari meeni seera, gaa ƴiiliɗe payya kiɗa ta Galilee. 44Gaa gata saa ma kayaati beneyyiɗe gaa: «Nabiinice gu giimi ku darriti bakammiki ɗa.» 45Innasoopa, maa ga asiɗe Galilee, gu giimi joobiya samaane, asan gu elle gaari ku ajjibiti ma garaaca gudiranti. Gaari kotti pa, ga leyyiy laalane ta Pakti ma deero Zerizalem. Giimi ku Galilee kotti pa, kulla katee oko laalane taata. 46Gaa yookiɗe darre ta Kana ma aaye Galilee, were maa ga sawilɗiy ammi gu deeɗe mirmi ku mor̰mor̰oskeyyo.

Gaa lekkiɗo lubaaka tatta ka hakuumati, maa ga runti parayya geegar ka Kaparnawom. 47Maa ga gimu kaaka giyyiɗe kadar ga Iisa wace min kiɗa ta Yudee ga asiɗe kiɗa ta Galilee, gaa kaatiyyee darre ta Kana ga deeɗiyee beneyya gaa: «Miiɗi keeke, ban̰n̰u ɗe aɗeŋ Kaparnawom, ki deeɗiya rayyida runtu ma parayya ta tirta teete katta muuti.» 48Gaa Iisa beneyyiyyee gaa: «Kuu elle ɗa aɗe goŋŋa garaawi ku ajjibiti ma garaaca gudiranti Mellayi, gu galbigeetoŋ ku dowway ɗa oko naata.» 49Gaa lubaaka ka tatta ka hakuumati tiiliyyee oko Iisa gaa: «Miiɗi keeke, asu aɗeŋ girtu omma min maa ga runtu alɗe mataa ɗa missa.» 50Gaa Iisa beneyyiyyee gaa: «Haŋka ki yooku paaɗe gircum. Runcum rayyide.»

Gaa miɗi kaaka amanniɗe oko beneyti Iisa maa ga beneyyiyee, gaa yookiɗe. 51Gaa ta sokkonta maa ga sarɗe geegar ka Kaparnawom, gu lubaakeetee joobiyya butuuli guu beneyyiyyee goo: «Runcum rayyide.» 52Gaa gata pa inniɗiy gaa: «Ay wikinne ŋawwa maa ga rayyidiɗe?» Guu guta pa tiiliyyee goo: «Ay mooko ma duhur.» 53Maa ga giyyiyya beneyco kaaka pa, ga leelo kabarre kadar ga ay wikinne kaaka saa maa ga Iisa beneyyiyyee gaa: «Runcum rayyide.» Ay ɗakko appe ga duwicca galbanti oko Iisa. Guu gimtee ku giiri kulla paracco duwɗiy galbigeeco oko Iisa.

54Ay keeke appe ay latta ka ajjibiti ka seertiŋ, maa ga Iisa leelo wikinne maa ga yookiɗe min kiɗa ta Yudee gaa asiɗe payya kiɗa ta Galilee.

Currently Selected:

Yaaya 4: mmy

Highlight

Copy