Lik 2
2
Wiyawti Iisa
(Elloŋ Matiye 1.18-25)
1Oko wikinne maa gu weeɗiya Yaaya, ga tattuwe ka tatta ka Rooma maa gu semeetee goo Seezar Ogist, cimme beneyyi ka gemmico giimi ku kiɗaayee paracco maa ga hekemeyye. 2Gemmo ta diiliti taata pa, deero oko wikinne maa ga Kiriniyus alɗo guberner kiɗa ta Sirii. 3Giimi paracco kataa diyargeeco kookuweeco ku maa gu deeɗiy gemma. 4Ay ɗakko appe ga Yuusup kulla waciɗe min geegar ka Nazaret ma aaye kiɗa ta Galilee. Gaa kaatiɗe darre ta Beteleyem ma aaye kiɗa ta Yudee. Beteleyem pa ay darre maa gu wewɗiya Dawud, gata ma ay sultanco Yawudigeyyo tippa. Ay kaaka appe ga Yuusup kaatiɗe Beteleyem asan ga ay ka balti Dawud. 5Guu kaatiɗe gemmiti ma gatti Mariyam maa ga ɓaaje, gii icciɗe aaɗi. 6Guu sarɗe Beteleyem. Gaa iŋaa, ga wikinne ka wiyaawi asiɗe, gaa aattí wacitti. 7Gii weeɗiya miica bikirrití, gii ɗamalmiliyya ma kaɗiyye. Gii ɗeeriyya saayani, asan gu gasse ɗa were aatti daŋaye ka turaayo.
Malaykat okommayo oko maggeyyo
8Oko were kaaka pa, gu lekka maggee ma bayyatta kayni ma aandoŋ gu taraɗɗiy tameeco. 9Gaa malaykatti Mella Miltine oomiyyo. Gii bahaarantí darjanti Mella Miltine ɓeeliyyoo waŋ. Gaa ɓayaw galiyyo ta kaw. 10Gaa malaykat beneyyiyyoo gaa: «Aɗoŋ ɓaya ɗa, asan na ase na asittoŋ taasa kabarre ta daana, o gi parhane yaata oko giimi paracco. 11Aandoŋ keeke aɗe darre maa gu wewɗiya sultan Dawud, gu weetoŋ Najjaaya. Gata ay Masi, gata maa ga Mella aparre, o ga ay Miltine. 12Ku gasakka miica ma ɗamalmilenta ma kaɗiyye, gaa alɗo ɗeerenta saayani. Ay keeke appe ay latta ma garaatoŋga miica.»
13Gaa kaytiŋ kaa gi lekkiɗo dazze ta malaykatnigeyyo ma ase saripti malaykat ka omma kee, guu logoɗɗiya Mella goo:
14«Darjane ay oko Mella ma aaye uwwa ta kaw samaani,
o aapiya kiɗaati oko giimi ma gasakkica daanati.»
Maggee kataa Beteleyem
15Maa gu malaykatnigee kotti logiyya paaɗe Mella, guu yookiɗe samaani. Guu maggee beneyɗo aacco goo: «Anne Beteleyem ke deeɗineega ella ma aseero o maa ga Mella Miltine gaarine.» 16Guu yokkiɗe gu deeɗiy gassa ini Mariyam ma giiti Yuusup, o miica ka rootta ɗeerenta saayani. 17Maa gu elliyya miica, guu gemmiyya oko giimo beneyti malaykaddi maa ga beneyyiyoo ma gaartee. 18Guu giimi paracco ma giyyiya beneyco maggeyyo kaaka, ajjibiɗe. 19Mariyam pa ƴapawwiko ka gaari kooko paracco aattí, gii moyowɗiy o gi reeway. 20Guu maggee yookiɗe o gu logokka tattuwti Mellayi o gu nabbassaa oko gaari paracco maa gu elle o maa gu giyye, asan gu gaari paracco deero aleŋ maa ga malaykat taasiyoo.
Iisa gu oyee seme
21Gaa maa gu weeɗiya gu leeɗe meeni poppoɗi, gaa wikinne maa gu taharriyyee asiɗe. Guu oyyiyyee seme goo Iisa. Seme kooko pa ay maa ga malaykat beneyyittiigu oko yaati min maa gi alɗe ecekka ɗa missa aaɗi.
Iisa gu garaa girti Mellayi
22Gaa wikinne asiɗe maa gi Mariyam deeɗica lee aadane maa gu hukumnigee ku Kitamniti Muusa enee ku maa gi deeɗo samaane unti Mellayi#2.22 Kitamniti Muusa beneyye gee, gii daati weero miica metta gi deewa ɗa samaane unti Mellayi namma gi leeɗo orooruwee pooɗi meene. Ku maa gi deeɗo payya samaane unti Mellayi pa, gi deeɗo sooƴa saɗikaŋgee seera. Elloŋ Soƴoowee ku Saɗikaŋgeyyo 12.1-8.. Guu gayyeetee miici kaatikki girti Mellayi geegar ka Zerizalem ku maa gu deeɗiya gaara oko Mella Miltine, 23asan ga kitipiyenta aacco hukumnigeetee Mella Miltine: «Bikirgee paracco ku miɗitta deewa duwenta oko Mella Miltine#2.23 Elloŋ Oomiti min Masir 13.2 o Gemmico Giimi ku Isirayel 18.16..» 24Gii Mariyam ma Yuusup kaatiɗe kulla Zerizalem gu deeɗo sooƴa saɗikane aleŋ maa gu hukumnigeetee Mella Miltine enee. Kaaka pa gu sooƴa saɗikane ma hamam seera e baŋ pa ma gugguu seera#2.24 Elloŋ Soƴoowee ku Saɗikaŋgeyyo 12.8..
Beneyyiŋgeetee Simeyon
25Lekka Zerizalem gimu kaƴi aɗe maa gu semeetee goo Simeyon. Gata pa ay gimu ɗayaŋ o ga karmayya Mella. Gaa ocoɗɗiya min tippa gimu ma akkiy daddiba giimi ku Isirayel#2.25 Elloŋ Esaya 40, 61.2. o gi Ruuhanti Mellayi aaye ma gata. 26Gii gaariyyee gee ga mataa ɗa gaa elliya ɗa ɗe goŋŋa Masi, gata maa ga Mella Miltine akka n̰aama. 27Gii Ruuhanti Mellayi kaatikkiki Simeyon girti Mellayi. Oko wikinne kaaka pa, gu gayyeetee Iisa katawkiki gu deeɗiya gaara unti Mellayi, asan ga ay bikirre aleŋ maa gu hukumnigee ku Kitamniti Muusa enee. 28Gaa Simeyon icciyya miica pittee, gaa logiyya Mella gaa:
29«Haŋka pa Miltu, ga maa ki beneyye aseero paaɗe butulti.
Duwaw paaɗe oko naa lubaakacum
na maatiɗo ma aapiya,
30asan na elliya saa ma iɗiitaw gimu maa ki n̰aame
ga asinni najjiya,
31najjiyo maa ki hassalle oko giimi paracco.
32Gata pa ay bahaarane
ku maa gu giimi ku ballee paracco ku kiɗaati ibinɗum
o ga akkiy cipila gimcam ku Isirayel#2.32 Elloŋ Esaya 42.6, 49.6, 52.10..»
33Gaa tatti o yaati Iisa ajjibiɗe oko beneyyiŋgeetee Simeyon kotti maa ga beneyya ma gaartee miici. 34Gaa Simeyon baarikiɗiy o ga beneyyiti oko Mariyam yaati Iisa gaa: «Mella apiriya miica keeke ku maa ga deeɗiyo botol ka masilco oko giimi maani ku Isirayel o oko daare pa, ga deeɗiyo botol ka najjiyco. Gaa asiyyooga gaara Mella oko giimo, guu ku maani pa asiyya pooca. 35Gaa asicca bayanna unco giimo mooyico giimo ta gubbenta galbigeeco. Kaŋ pa, daate, gi diigane akkiteeca raɗɗa galbante aleŋ kuu gu wacawwite ma seepane.»
Nabiiniŋga Anna
36-37Gii lekkiɗo kulla nabiiniŋga kaƴi aɗe, maa gu semeeti goo Anna. Gita pa ay runti Panuwel ma ay ka balti Aser. Ma mittí maa gi icce wikinne ka gumussuwtí pa, gu nunte ƴilaakee paysara, gaa maatiɗe. Gii nuntiɗe kur̰aar̰a gi sarɗe ƴilaakee orooruwee poppoɗi o pooɗi. Gii baabaŋguwɗe ta tirta. Gii aabidiyya Mella paato o aandoŋ girti, ma samkiyo o ma lolliko. 38Gita pa kulla ase saripco gayyeetee Iisa wikinne maa gu garawɗiya oko Mellayi. Gii lewɗe barkinti maani oko Mellayi saananti miica kaaka. Gii beneyɗiyo ma gaartee miica kaaka oko giimi paracco ma ocokke ku maa gu giimi ku Zerizalem gassiɗiy kayyeeco.
Gayyeetee Iisa yokaa Nazaret
39Maa gu gayyeetee Iisa gaamiyya paratti maa ga Mella Miltine beneyye hukumnigeetee, guu yookiɗe geegarco ka Nazaret kiɗa ta Galilee. 40Gaa miica maɗawɗo o ga deewa ka ta ƴiila niyyenta. Gaa alɗo unenta ma ibino ta gaaro o ga gidaanuwti Mellayi aayee.
Iisa aaye ma aalimnigee girti Mellayi
41Kulla ƴila aɗe, gu gayyeetee Iisa kataa geegar ka Zerizalem laalanco Yawudigeyyo maa gu kolaa goo Pak. 42Maa gu ƴilaakeetee Iisa deeɗe orro o seera, guu gayyeetee kaatikkiki laalanti Zerizalem ma guta aleŋ ta aadanco Yawudigeyyo. 43Maa gi laalane ƴiiliɗe gu yokowɗo girco pa, ga Iisa mare Zerizalem. Gayyeetee pa leelo ɗa kabarre. 44Guu lewɗe goo walaŋ ga Iisa aaye ma gicco maa gu torgowɗe sawa ka. Maa guu tan̰n̰iɗe meene kaƴi, guu alɗiya ella ɗa. Guu diiliɗe gu deyeɗɗiya aacco giimo, guu enewɗiy gimco o lanjigeeco. 45Guu alɗiya gassa ɗa namma gu yookiɗe Zerizalem ma diyyo. 46Gaa oko meene ma daa ta subba pa, gu gassiyya aatti girti Mellayi, gaa nowotte kiɗaati ɗaɗɗakkico aalimnigee ku Kitamniti Muusa, ga yereɗɗiy o ga enay. 47Guu giimi paracco ma geewaa ajjabɗe ta kaw oko ibinti ta tiiliti taata. 48Maa gu gayyeetee elliyya, guu ajjibiɗe ta tirta. Gii yaati beneyyiyyee gee: «Runtu, ayme ki leeɗiniiga liyawcum keeke? Taccum o naata, maa ni deyeɗɗum ni ɓaye nii baŋ ga me pe ma leyyum.» 49Gaa Iisa tiiliyyoo gaa: «Ayme ku deyeɗɗino? Ku lekka ɗa kabarre kadar ga lubbiti Tattu ay kanni e?» 50Guu guta pa alɗiya ibina ɗa beneyti kaaka.
51Gaa Iisa yookiɗe ma guta Nazaret. Gaa oyyiɗe jobbico gayyeetee. Gii yaati moyowɗiy o gi reeway galbanti ka gaari paracco ma ƴiile. 52Gaa Iisa maɗawɗo o gi ibinti ta gaaro gayaa ka gi gayawɗo, o ga deewayo daanayo oko Mellayi o oko giimo.
Currently Selected:
Lik 2: mmy
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.
Lik 2
2
Wiyawti Iisa
(Elloŋ Matiye 1.18-25)
1Oko wikinne maa gu weeɗiya Yaaya, ga tattuwe ka tatta ka Rooma maa gu semeetee goo Seezar Ogist, cimme beneyyi ka gemmico giimi ku kiɗaayee paracco maa ga hekemeyye. 2Gemmo ta diiliti taata pa, deero oko wikinne maa ga Kiriniyus alɗo guberner kiɗa ta Sirii. 3Giimi paracco kataa diyargeeco kookuweeco ku maa gu deeɗiy gemma. 4Ay ɗakko appe ga Yuusup kulla waciɗe min geegar ka Nazaret ma aaye kiɗa ta Galilee. Gaa kaatiɗe darre ta Beteleyem ma aaye kiɗa ta Yudee. Beteleyem pa ay darre maa gu wewɗiya Dawud, gata ma ay sultanco Yawudigeyyo tippa. Ay kaaka appe ga Yuusup kaatiɗe Beteleyem asan ga ay ka balti Dawud. 5Guu kaatiɗe gemmiti ma gatti Mariyam maa ga ɓaaje, gii icciɗe aaɗi. 6Guu sarɗe Beteleyem. Gaa iŋaa, ga wikinne ka wiyaawi asiɗe, gaa aattí wacitti. 7Gii weeɗiya miica bikirrití, gii ɗamalmiliyya ma kaɗiyye. Gii ɗeeriyya saayani, asan gu gasse ɗa were aatti daŋaye ka turaayo.
Malaykat okommayo oko maggeyyo
8Oko were kaaka pa, gu lekka maggee ma bayyatta kayni ma aandoŋ gu taraɗɗiy tameeco. 9Gaa malaykatti Mella Miltine oomiyyo. Gii bahaarantí darjanti Mella Miltine ɓeeliyyoo waŋ. Gaa ɓayaw galiyyo ta kaw. 10Gaa malaykat beneyyiyyoo gaa: «Aɗoŋ ɓaya ɗa, asan na ase na asittoŋ taasa kabarre ta daana, o gi parhane yaata oko giimi paracco. 11Aandoŋ keeke aɗe darre maa gu wewɗiya sultan Dawud, gu weetoŋ Najjaaya. Gata ay Masi, gata maa ga Mella aparre, o ga ay Miltine. 12Ku gasakka miica ma ɗamalmilenta ma kaɗiyye, gaa alɗo ɗeerenta saayani. Ay keeke appe ay latta ma garaatoŋga miica.»
13Gaa kaytiŋ kaa gi lekkiɗo dazze ta malaykatnigeyyo ma ase saripti malaykat ka omma kee, guu logoɗɗiya Mella goo:
14«Darjane ay oko Mella ma aaye uwwa ta kaw samaani,
o aapiya kiɗaati oko giimi ma gasakkica daanati.»
Maggee kataa Beteleyem
15Maa gu malaykatnigee kotti logiyya paaɗe Mella, guu yookiɗe samaani. Guu maggee beneyɗo aacco goo: «Anne Beteleyem ke deeɗineega ella ma aseero o maa ga Mella Miltine gaarine.» 16Guu yokkiɗe gu deeɗiy gassa ini Mariyam ma giiti Yuusup, o miica ka rootta ɗeerenta saayani. 17Maa gu elliyya miica, guu gemmiyya oko giimo beneyti malaykaddi maa ga beneyyiyoo ma gaartee. 18Guu giimi paracco ma giyyiya beneyco maggeyyo kaaka, ajjibiɗe. 19Mariyam pa ƴapawwiko ka gaari kooko paracco aattí, gii moyowɗiy o gi reeway. 20Guu maggee yookiɗe o gu logokka tattuwti Mellayi o gu nabbassaa oko gaari paracco maa gu elle o maa gu giyye, asan gu gaari paracco deero aleŋ maa ga malaykat taasiyoo.
Iisa gu oyee seme
21Gaa maa gu weeɗiya gu leeɗe meeni poppoɗi, gaa wikinne maa gu taharriyyee asiɗe. Guu oyyiyyee seme goo Iisa. Seme kooko pa ay maa ga malaykat beneyyittiigu oko yaati min maa gi alɗe ecekka ɗa missa aaɗi.
Iisa gu garaa girti Mellayi
22Gaa wikinne asiɗe maa gi Mariyam deeɗica lee aadane maa gu hukumnigee ku Kitamniti Muusa enee ku maa gi deeɗo samaane unti Mellayi#2.22 Kitamniti Muusa beneyye gee, gii daati weero miica metta gi deewa ɗa samaane unti Mellayi namma gi leeɗo orooruwee pooɗi meene. Ku maa gi deeɗo payya samaane unti Mellayi pa, gi deeɗo sooƴa saɗikaŋgee seera. Elloŋ Soƴoowee ku Saɗikaŋgeyyo 12.1-8.. Guu gayyeetee miici kaatikki girti Mellayi geegar ka Zerizalem ku maa gu deeɗiya gaara oko Mella Miltine, 23asan ga kitipiyenta aacco hukumnigeetee Mella Miltine: «Bikirgee paracco ku miɗitta deewa duwenta oko Mella Miltine#2.23 Elloŋ Oomiti min Masir 13.2 o Gemmico Giimi ku Isirayel 18.16..» 24Gii Mariyam ma Yuusup kaatiɗe kulla Zerizalem gu deeɗo sooƴa saɗikane aleŋ maa gu hukumnigeetee Mella Miltine enee. Kaaka pa gu sooƴa saɗikane ma hamam seera e baŋ pa ma gugguu seera#2.24 Elloŋ Soƴoowee ku Saɗikaŋgeyyo 12.8..
Beneyyiŋgeetee Simeyon
25Lekka Zerizalem gimu kaƴi aɗe maa gu semeetee goo Simeyon. Gata pa ay gimu ɗayaŋ o ga karmayya Mella. Gaa ocoɗɗiya min tippa gimu ma akkiy daddiba giimi ku Isirayel#2.25 Elloŋ Esaya 40, 61.2. o gi Ruuhanti Mellayi aaye ma gata. 26Gii gaariyyee gee ga mataa ɗa gaa elliya ɗa ɗe goŋŋa Masi, gata maa ga Mella Miltine akka n̰aama. 27Gii Ruuhanti Mellayi kaatikkiki Simeyon girti Mellayi. Oko wikinne kaaka pa, gu gayyeetee Iisa katawkiki gu deeɗiya gaara unti Mellayi, asan ga ay bikirre aleŋ maa gu hukumnigee ku Kitamniti Muusa enee. 28Gaa Simeyon icciyya miica pittee, gaa logiyya Mella gaa:
29«Haŋka pa Miltu, ga maa ki beneyye aseero paaɗe butulti.
Duwaw paaɗe oko naa lubaakacum
na maatiɗo ma aapiya,
30asan na elliya saa ma iɗiitaw gimu maa ki n̰aame
ga asinni najjiya,
31najjiyo maa ki hassalle oko giimi paracco.
32Gata pa ay bahaarane
ku maa gu giimi ku ballee paracco ku kiɗaati ibinɗum
o ga akkiy cipila gimcam ku Isirayel#2.32 Elloŋ Esaya 42.6, 49.6, 52.10..»
33Gaa tatti o yaati Iisa ajjibiɗe oko beneyyiŋgeetee Simeyon kotti maa ga beneyya ma gaartee miici. 34Gaa Simeyon baarikiɗiy o ga beneyyiti oko Mariyam yaati Iisa gaa: «Mella apiriya miica keeke ku maa ga deeɗiyo botol ka masilco oko giimi maani ku Isirayel o oko daare pa, ga deeɗiyo botol ka najjiyco. Gaa asiyyooga gaara Mella oko giimo, guu ku maani pa asiyya pooca. 35Gaa asicca bayanna unco giimo mooyico giimo ta gubbenta galbigeeco. Kaŋ pa, daate, gi diigane akkiteeca raɗɗa galbante aleŋ kuu gu wacawwite ma seepane.»
Nabiiniŋga Anna
36-37Gii lekkiɗo kulla nabiiniŋga kaƴi aɗe, maa gu semeeti goo Anna. Gita pa ay runti Panuwel ma ay ka balti Aser. Ma mittí maa gi icce wikinne ka gumussuwtí pa, gu nunte ƴilaakee paysara, gaa maatiɗe. Gii nuntiɗe kur̰aar̰a gi sarɗe ƴilaakee orooruwee poppoɗi o pooɗi. Gii baabaŋguwɗe ta tirta. Gii aabidiyya Mella paato o aandoŋ girti, ma samkiyo o ma lolliko. 38Gita pa kulla ase saripco gayyeetee Iisa wikinne maa gu garawɗiya oko Mellayi. Gii lewɗe barkinti maani oko Mellayi saananti miica kaaka. Gii beneyɗiyo ma gaartee miica kaaka oko giimi paracco ma ocokke ku maa gu giimi ku Zerizalem gassiɗiy kayyeeco.
Gayyeetee Iisa yokaa Nazaret
39Maa gu gayyeetee Iisa gaamiyya paratti maa ga Mella Miltine beneyye hukumnigeetee, guu yookiɗe geegarco ka Nazaret kiɗa ta Galilee. 40Gaa miica maɗawɗo o ga deewa ka ta ƴiila niyyenta. Gaa alɗo unenta ma ibino ta gaaro o ga gidaanuwti Mellayi aayee.
Iisa aaye ma aalimnigee girti Mellayi
41Kulla ƴila aɗe, gu gayyeetee Iisa kataa geegar ka Zerizalem laalanco Yawudigeyyo maa gu kolaa goo Pak. 42Maa gu ƴilaakeetee Iisa deeɗe orro o seera, guu gayyeetee kaatikkiki laalanti Zerizalem ma guta aleŋ ta aadanco Yawudigeyyo. 43Maa gi laalane ƴiiliɗe gu yokowɗo girco pa, ga Iisa mare Zerizalem. Gayyeetee pa leelo ɗa kabarre. 44Guu lewɗe goo walaŋ ga Iisa aaye ma gicco maa gu torgowɗe sawa ka. Maa guu tan̰n̰iɗe meene kaƴi, guu alɗiya ella ɗa. Guu diiliɗe gu deyeɗɗiya aacco giimo, guu enewɗiy gimco o lanjigeeco. 45Guu alɗiya gassa ɗa namma gu yookiɗe Zerizalem ma diyyo. 46Gaa oko meene ma daa ta subba pa, gu gassiyya aatti girti Mellayi, gaa nowotte kiɗaati ɗaɗɗakkico aalimnigee ku Kitamniti Muusa, ga yereɗɗiy o ga enay. 47Guu giimi paracco ma geewaa ajjabɗe ta kaw oko ibinti ta tiiliti taata. 48Maa gu gayyeetee elliyya, guu ajjibiɗe ta tirta. Gii yaati beneyyiyyee gee: «Runtu, ayme ki leeɗiniiga liyawcum keeke? Taccum o naata, maa ni deyeɗɗum ni ɓaye nii baŋ ga me pe ma leyyum.» 49Gaa Iisa tiiliyyoo gaa: «Ayme ku deyeɗɗino? Ku lekka ɗa kabarre kadar ga lubbiti Tattu ay kanni e?» 50Guu guta pa alɗiya ibina ɗa beneyti kaaka.
51Gaa Iisa yookiɗe ma guta Nazaret. Gaa oyyiɗe jobbico gayyeetee. Gii yaati moyowɗiy o gi reeway galbanti ka gaari paracco ma ƴiile. 52Gaa Iisa maɗawɗo o gi ibinti ta gaaro gayaa ka gi gayawɗo, o ga deewayo daanayo oko Mellayi o oko giimo.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2019, Wycliffe Bible Translators, Inc. All rights reserved.