Lik 23

Iisa gu katawki unti Guberner Pilat

(Elloŋ Matiye 27.1-2,11-14, Mark 15.1-5, Yaaya 18.28-38)

1Gaa min iŋaa, wikirco taattuweeco Yawudigeyyo ku parlanti, gu giimi waciɗe paracco, guu kaatikkiki Iisa unti Pilat. Pilat pa ay guberner maa gi hakuuma ta Rooma n̰akamme hikimiyti iŋaa kiɗa ta Yudee. 2Gaa iŋaa gu diiliɗe gu gagaɗɗe gaari oko Iisa goo: «Ni gassiya gimu keeke, gaa esekkayooca oko gimtini, o gaa gu addo pilka ɗa miiri oko tattuwe ka tatta kee Seezar, o ga gata saa leewe gaa ga ay Masi, sultan maa ga Mella aparre.» 3Gaa Pilat inniyya gaa: «Kii ay sultanco Yawudigeyyo e?» Gaa Iisa tiiliyyee gaa: «Ay kii saa ma beneyyiya keeke.» 4Gaa Pilat beneyyiyyoo oko taattuweeco soƴoowee ku saɗikaŋgeyyo o oko giimi ku maani kotti gaa: «Gimu keeke na gassiyee ɗa ya er̰n̰e.» 5Guu giimi pa beneyyiɗe saa pe ma raɗɗa ta ƴiila goo: «Gata esekkayooca oko giimo ma giraaniti. Gaartee kooko pa ga diiliy min kiɗa ta Galilee, gaa ƴiiliɗe oko kiɗa parattí ta Yudee. Haŋka pa ga aseero namma ya iŋee wikirtine.»

Iisa gu katawkiki unti sultan Erod

6Maa ga Pilat giyyiya beneyco giimo kaaka ma gaarti Galilee, gaa inniɗe gaa: «Gata gimu keeke ay ka Galilee e?» 7Maa gu beneyyiyyee oko Pilat kadar ga Iisa ay ka Galilee ma hikimiyenta ma Erod, gaa Pilat n̰aamiyya Iisa wikirti Erod. Erod pa aaye Zerizalem wikinne kaaka. 8Gaa Erod gi deeɗiyee daanee ta tirta maa ga elliyya Iisa, asan ga domokke maa ga aŋaɗɗe elliti saanane ka gaartee maa gu giimi beneyko o ga ocokke ga leeɗo latta ka ajjibiti ga elliɗo. 9Gaa enewɗiya maani maani, Iisa soopa tiiliyee ɗa ya beneyyi kaƴi. 10Oko wikinne kaaka pa gu taattuweeco soƴoowee ku saɗikaŋgeyyo o aalimnigee ku Kitamniti Muusa aaye iŋaa. Guu gagaɗɗe gaari suura oko Iisa. 11Gaa Erod ma asaakargeetee noƴoɗɗe gaari oko Iisa o gu leewiki liyaw gonek ka. Ay ma noƴƴico ta gaaro taata appe, gu issiyyee kaɗiŋgee samaane ta kaw. Gaa Erod yookiyyeega payya oko Pilat. 12Min omma pa ga Erod ma giiti Pilat gi galawwiyo ɗa, a oko meene taata soopa gu deero lanjigee.

Pilat beraa Iisa gu paapiyya

(Elloŋ Matiye 27.15-26, Mark 15.6-15, Yaaya 18.39–19.16)

13Gaa Pilat timmiɗiy taattuweeco soƴoowee ku saɗikaŋgeyyo o ajaawaŋgee o giimi ku maani. 14Gaa beneyyiyyoo gaa: «Ku itirnawga gimu keeke kuu ga esekkayooca oko giimo. Naa inniyya untoŋ, naa alɗiye gassa ɗa soo ya er̰n̰e maa ga negekke min oko gaari maa ku bowoɗɗiyee. 15Erod kulla yookineega asan ga gassiye ɗa er̰n̰e. Gimu keeke saa negekke ɗa pe niŋgo ma arakke muutu. 16-17Kaaka pa na r̰ocokka ka, naa cappiyyee.»

18Guu giimi cayyikiɗe paracco goo: «Deyya gimu keeke! Barabas pa, ki cappaniiga min daŋayi!» 19Barabas pa, gu baamiya daŋayi oko naŋgo ma deero geegarri o ma gaari ku diyaawi gimi. 20Mileŋ ga Pilat pa aŋakke ga cappiyyee oko Iisa, ga ɗilliyooga payya beneyti oko giimi ku maani kotti. 21Guu guta soopa cayyikiyyee saa pe goo: «Paapiya kuruwayi! Paapiya kuruwayi!» 22Gaa ma daa ta subba, ga Pilat inniɗiy payya gaa: «Gimu keeke leewe ini me gaarta ku miɗɗa? Naa, gassiyee ɗa niŋgo ma arakke muutu. Kaaka pa na r̰ocokka ka, naa cappiyyee.» 23Guu cayyakɗo kanco missa ma raɗɗa ta ƴiila goo: «Paapiya kuruwayi!» Gii ma cayyikico taata, ga kanco deeɗe. 24Gaa Pilat oyyiɗe ga leeɗiyooga latta maa gu enee. 25Gaa cimmiyyooga Barabas maa gu enee kee min daŋayi, gata maa gu bakamme daŋayi oko naŋgo ma deero geegarri o ma gaari ku diyaawi gimi. Gaa biriyyooga Iisa ku maa gu leeɗeega latta maa gu aŋka.

Iisa gu papaa kuruwayi

(Elloŋ Matiye 27.32-44, Mark 15.21-32, Yaaya 19.17-24)

26Wikinne maa gu katawɗiki Iisa paapiti, gu waagikkiki miɗi kaƴi aɗe maa gu semeetee goo Simo ka geegar ka Siren#23.26 Geegar ka Siren pa aaye kiɗa ta Libi. ma asaa min renta. Guu baamiyya gu gagiyyeega kuruwa maa gu deeɗiya paapa Iisa, gaa joboɗɗiya Iisa. 27Guu giimi maani joboɗɗiya Iisa o daati kulla ma erecca o gu laatayya saananti. 28Gaa Iisa ribiliyyoo oko daati kotti gaa beneyyiyyoo gaa: «Daati ku Zerizalem, aɗoŋ erca ɗa oko naa! Ercoŋ soo ta kayyeetoŋ o oko rontoŋ, 29asan ga wikinne akka asa maa gu giimi asiɗo beneyya goo: “Baarikenta ay daati ma ay doolee, o daati maa gu aɗicco icce ɗa kaytiŋ miici o gu puucco gasse ɗa waƴƴo.” 30Oko wikinne kaaka, “gu giimi akkiyoo beneyya oko dambabbo goo: Suubani! o oko jappappo pa goo: Gubbini#23.30 Elloŋ Ozee 10.8.!” 31A gaa ettu ka ɓayta ka kulla gu leyye miɗɗa goŋŋa, ga ettu ka aaƴinta pa gu leewaa pe goo me?» 32Guu itirɗe kulla giimi seera maa gu akkiy dee sawa ma Iisa. Guta pa ay giimi ma leewa miɗɗa.

33Wikinne maa gu sarɗe were maa gu joraa goo ‘Gugur̰uti Kayaati’, guu paapiyya Iisa kuruwayi o gu paapiy ku seera koo ma leewa miɗɗa, kulla kaƴi aɗe ma kuruwati, ka kaƴi tiyaawati Iisa o ka kaƴi ma ta n̰ugilati. 34Gaa oko asaakargee ma paapiya ga inniyyooga Mella gaa: «Baaba, saamiyayo asan gu ibinya ɗa latta maa gu leewa.» Guu asaakargee eddiɗiy kaɗiŋgeetee ma liyaw ta jollo jolloti. 35Guu giimi maani waraɗɗe iŋaa gu elelɗo. Guu taattuweeco Yawudigeyyo noƴoɗɗe gaari oko Iisa goo: «Gata najjiye giimi daare. Haŋka pa, ga najjiyu paaɗe ziiti, gaa ay Masi aɗe goŋŋa maa ga Mella aparre.» 36Asaakargee kulla ma aaye iŋaa, noƴokkee gaari. Guu sappiyyee katta, o gu biryee mirmi ku saɗamta. 37Guu beneyɗe goo: «Kii ay sultanco Yawudigeyyo aɗe goŋŋa, ki najjiyu paaɗe ziicum.» 38Uwwa min kayaati Iisa pa gu atakke ettu ɓeterter maa gu ketepeyyiyee goo: Keeke ay Sultanco Yawudigeyyo.

39Gaa kaƴi min oko giimi ma leewa miɗɗa ku seera koo maa gu papee ma gata, n̰eleɗɗiya gaa: «Kii maa kii ki ay Masi! Najjiyu paaɗe ziicum o ki najjiyni nii kulla.» 40Gaa ka kaƴi soopa makkiyyee oko giiti gaa: «Kii keeke ɓayakka aɗɗe Mella ɓa, kii kulla deegeyye aleŋ tanti teete aɗe? 41Keeta ɗe gi diiganteŋ ay butultí asan ga ay kee melleeco ma deyekkica. A gata pa bala ga negekke ɗe ya maatiki.» 42Gaa leeɗiyee oko Iisa gaa: «Mooyino meene maa kii asee asa aleŋ sultan.» 43Gaa Iisa tiiliyyee gaa: «Na beneyyamca seene, meente keeke aɗe ki kataa ma naa jenniti.»

Muutti Iisa

(Elloŋ Matiye 27.45-56, Mark 15.33-41, Yaaya 19.28-30)

44Gii paato deeɗe gaayile cakkat, gii warriɗe min ɓeeliti. Gaa namtuwe taggicca kiɗa parattí namma ya usurti. 45Gaa oko wikinne kaaka maa gi paato taggiɗe, gii kaɗiyye ta yaata ma caɗawwiya girti Mellayi peetiɗe durgee seera min ɗaɗɗakiti. 46Gaa Iisa kolliɗe ma raɗɗa gaa: «Baaba, na beramca ruuhantu piccum.» Maa ga beneyyiya beneyti kaaka pa gaa jootiɗe. 47Maa ga tattuwco asaakargee ku Rooma elliyya latta kaaka ma deero, gaa logoɗɗiya Mella, gaa beneyyiɗe gaa: «Ay ma seene pe ga gimu keeke ɗayaŋ.» 48Maa gu giimi ku maani kotti ma aaye oko diyaw taata elliyya ma deero, gaa paracco gu laatayɗo namma gu tamanɗiy gorgumeeco, guu yookiɗe gerraco. 49Guu lanjigeetee Iisa paracco o daati ma ezekkiya min kiɗa ta Galilee waraɗɗe arro ka gu elelɗiya latta kaaka ma deero.

Iisa gu esekkaa mooniti

(Elloŋ Matiye 27.57-61, Mark 15.42-47, Yaaya 19.38-42)

50-51Gaa lekkiɗo miiɗi maa gu semeetee goo Yuusup. Gata kaaka pa, ay ka Arimatee geegarco Yawudigeyyo. Gata pa, ay giico taattuweeco Yawudigeyyo ma caɗaa parlane, ga alɗe oyya ɗa soo ma latta maa gu gittee bodowwiki. Gata gu gaartee samaane o ga ɗayaŋ unti Mellayi. Gaa ocoɗɗica mulunniti Mellayi. 52Ay gata appe ma kaate ga deeɗiya inna Pilat ku maa ga biriyyeega ziiti Iisa. Gaa Pilat oyyiyyee. 53Gaa Yuusup beeriyya ziiti Iisa min kuruwayi, gaa kappiniyya ma kapanne, gaa deeɗiya issa moone maa gu caree kolkilenta were ma ay dambee. Moone taata pa gu esekkiti ɗa missa kaytiŋ gimu. 54Meene taata pa ay meenco Yawudigeyyo maa gu hassalɗica meene ta nambiti. Gita pa delaa katta. 55Daati ma ezekkiya Iisa min Galilee pa jobokkiya kulla Yuusup. Guu ellicca moone, o gu elliya kulla baŋ gu issiya goo me ziiti Iisa. 56Guu yookiɗe giiri gu asiyya amsa sewen ma itir ma nobokka daana ku maa gu deeɗe kokkiƴa oko ziiti. A mileŋ gi meene ta nambiti pa ase, gu nambe asan gu hukumnigeeco toɗokkiyo lubbi.

Currently Selected:

Lik 23: mmy

Highlight

Copy