Matayo 14

Lkiye le Yoana Laipatisani

(Marko 6:14–29; Luka 9:7–9)

1Kore te inia kata, nening larikoni le Galilaya oji Erode mbaa naaipirita Yeso, 2nejoki laisiaayiak lenyena, <<Ele dei Yoana Laipatisani, otipiwua taatua lootuata! Naa tankaraki inia, payie easicho ngolon e nking'asia taatua ninye.>> 3#Luka 3:19,20Amu kore apa ꞉Erode, naa keibung'a Yoana neen nkaik o nkejek enyena, nepik atua jila tankaraki Erodias, nkitok e Pilipo lalache lenye. 4#Lal 18:16, 20:21Amu kejokita apake ꞉Yoana ninye, <<Meichiaakino tiniya nkitok e lalache lino ewuon eichu.>> 5Kore ake eyieuta Erode near Yoana metua, neurie ltung'ana, amu kore apa ꞉ninche, kedol Yoana ana loiboni le Nkai.

6Kore payie ebaki mparri naparruni inoto e Erode, nerany ntito e Erodias te nkiji ee ltung'ana, neiting'id Erode. 7Nenya ꞉ninye lmumai tekue Nkai ajo keicho ntoki pooki naomon tankaraki inia. 8Kore eidipa ꞉ng'otonye aitaarriyiana, nejo ꞉inia tito, <<Nchooki tene nkue e Yoana Laipatisani, te ncharaa.>> 9Neisinanio Lkinkii Erode, kake kore tankaraki nayieu neyanyit lmuma oaatama duo o tankaraki ltung'ana ooboitiere te misa, neitanapicho meichori inia natoomonua, 10Neirruaaya lkilikuai metudung'uni nkue e Yoana te jila. 11Nedung'uni, neyauni te ncharaa, neichori ꞉inia tito, neyaki ꞉ntito ng'otonye. 12Nepuonu loiteng'eni le Yoana, neya sesen lenye, nenukaa. Naa kore payie epuonu netii Yeso, neliki mbaa naataasate.

Eitiemua ꞉Yeso ltung'ana nkalupuni imiet

(Marko 6:30–44; Luka 9:10–17; Yoana 6:1–13)

13Kore payie ening Yeso nenia baa, nelo aing'uaa inie te meli o loochi ooiteng'eni lenyena, aawueni to ng'oji neliyio aa ninche aapeny. Kake kore tankaraki natining'o ꞉lturrurri inie nechomo, nechep mpaso aairukurukore ninye tee nkejek eing'uaa lkerenketi lenche. 14Kore payie edou ꞉Yeso te meli, nedol lturrur kitok, neing'erru, neichiunyie ltamoyia lenche.

15Kore payie eaku teipa nepuonu looiteng'eni lenyena netii aajoki, <<Lkees ene ng'oji, nemuto. Terewa ltung'ana mechomo nkang'ite payie epuo aainyiang'aki ate ndaa.>>

16Newoliki ninche ajoki, <<Meyiere payie epuo. Enchoo ntae ninche ndaa!>>

17Newoliki aajoki, <<Meitoki hoo ikiata tene, mara ake mukateni imiet o sinkirri oare.>> 18Nejoki, <<Eyakaaki tene!>> 19Neitanap ltung'ana metowuana too nkujit. Neitoki arrapu nenia mukateni imiet o sinkirri pukura oare, neimariri chumata, nemayian. Naa kore payie egil nenia mukateni, neicho looiteng'eni lenyena, neitabaki ꞉ninche ltung'ana. 20Nenya ꞉ltung'ana pooki ndaa neimu, nerrapu ꞉looiteng'eni nkikapuni tomon o oare naabore ng'urrot e naatelekunye aaya. 21Kore ꞉lolo oaatama ndaa naa lewa nkalupuni imiet, metii ntomonok o nkera.

Etoporoyie Yeso nkeper e nkare

(Marko 6:45–52; Yoana 6:15–21)

22Neitanap ꞉Yeso ta nkata nabo looiteng'eni lenyena metijing'a meli aaituruk aalang'aki likae kokun, esacharita ꞉ninye lturrurri. 23Kore payie eidip atasachai ninche, nelo adir lowua aomon apeny, kake kore payie eaku teipa, ewuon ake etii ninye inie apeny. 24Nchoo naduo meli, eidipa ninye achomo ng'oji neodo taatua nkare, alam nchepata e mpaso, neirran ꞉laing'ok le nkare tankaraki lkutati onang'are.

25Kore etinyikua siran, nelotu Yeso netii ninche epororita nkeper e mpaso tee nkejek. 26Kore payie edol ꞉looiteng'eni lenyena aajo nkeper e mpaso epororita, neguretu nejo, <<Milika ana,>> nebuak to ngureticho.

27Kake nejoki ꞉Yeso ninche nabokata, <<Entogolo ltauja linchi! Nanu dei ele! Emiurieicho!>>

28Newoliki ꞉Petero ajoki, <<Laitoriani tanaa iyie ele, tiakaaki maeu nitii aporu nkare.>> 29Nejoki, <<Wou!>>

Nedoyio taa ꞉Petero te meli, neporoo nkare alo netii Yeso. 30Kake kore payie edol lkutati, neguretu, neng'asu aimil, nebuak aichir ejo, <<Laitoriani ntejeuaaki!>> 31Neitorioo Yeso nkaina enye ta nkata nabo, neibung ninye. Nejoki, <<Oi iyie oata nkurukoto kini, aanyo pii ing'ach?>> 32Naa kore payie eidip ninche aatidir meli, neichunye lkutati. 33Kore lolo pooki otii atua meli nesai ninye ejo, <<Kedede taa, ira iyie Nkerai e Nkai.>>

34Kore payie elang ninche, nelang'aki nkop e Genesaret, ta mbata e ndoyioroto e ndama e mpaso. 35Kore payie eyielou ꞉ltung'ana le inie aajo Yeso ilo, neirruaaya lomon lubot pooki e inia kop. Neyau ꞉ltung'ana ltamoyia netii ninye, 36neomon meichoo ltamoyia meiseyie ake sarkudai lo lkila lenye, naa kore pooki oiseyie neichiu.

Currently Selected:

Matayo 14: saq

Highlight

Copy