Matayo 28

Mpiunoto e Yeso

(Marko 16:1–8; Luka 24:1–12; Yoana 20:1–10)

1Kore payie eidipai Sabato, etinyikua siran, nelo Maria Magadalena o nochi Maria nkae aaing'uraa nkurarei.

2Kore ta nkata nabo, nelotu nkikirikiroto kitok e nkop, amu lmalaika la Laitoriani otodowua eing'uaa chumata, nelo inie netii ilo soit neibeleleng'oo, newuenie. 3Kore nkung'urata enye neinyinyukore nkiwuang'ata, neibor nkilani enyena ana nkidis naibor. 4Neikirikira sikarini, nenang nkop netuwuanai ana ltung'ana ootuata tankaraki naurie ninye.

5Nejoki ꞉lmalaika nenia tomonok, <<Emiguretu, amu kayielo ajo Yeso otechoki iyieitata. 6Meti ene amu, ketipiwua ana natejo apa. Wootu entodol ng'oji neiteperieki apa. 7Enchom naa entesioi entiliki looiteng'eni lenyena, nchere, etipiwua ninye too lootuata, naa keituruk tekue ntae alo Galilaya, te inie idoldol ninye. Kaidipa naa taata atiliki ntae.>>

8Neipung nabokata aaing'uaa nkurarei te ngureticho o te ng'ida sapuk oleng, nekuet aaliki looiteng'eni lenyena. 9Kore te inia kata, netumore ꞉Yeso ninche nejoki, <<Eserian!>> Nenyikaki ꞉ninche, neibung nkejek enyena, negil kung aasai ninye. 10Nejoki ꞉Yeso ninche, <<Emiurieicho, enchom entiaki lalachera lainien mechomo Galilaya, naa te inie aadol nanu ꞉ninche.>>

Lkilikuai loo sikarini

11Kore etii ntomonok nkoitiei aapuoito, nchoo lbata loo sikarini nebaki lkerenket neliki lkutuaa laa laitainok la lasar ntoki pooki nataase. 12Kore payie eiturrurro laitainok kutuaa la lasar tenebo o lpayiani, nedung nkiguana payie eicho sikarini ropiyiani kumo, 13nejoki, <<Entejo inji, <Looiteng'eni lenyena ootuo kuarie ewuon kilura nepurroo ninye.> 14Naa tenebaki ele rerei lkitok oitoreicho, nikilej iyioo ninye, nikiworu ntae nyamali.>> 15Neya ꞉ninche ropiyiani, neas ana naiparakaki, neibulaa ele rerei too Lyiaudi o taata.

Eipaayie ꞉Yeso Looiteng'eni

(Marko 16:15–18)

16 # Mat 26:32; Mrk 14:28 Kore lolo ooiteng'eni tomon o obo, nepuo ilo donyuo oti Galilaya oiparaka apa Yeso ninche mechomo. 17Kore payie edol ꞉ninche ninye, negil kung aasai, kake neing'ach lbata lenche. 18Nelotu Yeso anyikaki ninche, nejoki, <<Kaaichooki nkitoria pooki te chumata o to nkop, 19#Asat 1:8enchom naa entaa lochon pooki looiteng'eni lainien, impatisasa ninche ta nkarna e Papa o ne Nkerai o ne Ltau Sinyati, 20ninteng'ening'en ninche meibung'a pooki naitanapa ntae, naa katii nanu tenebo o ntae mperot pooki metabaki nkiting'oto e ng'amata e ana kop.>>

Currently Selected:

Matayo 28: saq

Highlight

Copy