Jɔnə 18
18
Ndzaŋə Ándó pə́ nə Ńgwam nə́ Yeso
(Mat 26.47-56; Mag 14.43-50; Luk 22.47-53)
1Əghâ ándó Yeso a nə məgtə̂ nə́ á mə́ chaʼtə̂ nə́ Əsê lə́ pópə ngaŋə́zoŋə́ndzəm əjí ghɛn ńtúmə á mɔ́ tə́chwáŋ nkǐ yitsə̌ páʼ pə́ nə̈ fóŋ nə́ ńgə́ Kidlɔnə. Nkáʼ məjî yitsə̌ nə ńchîə aliʼ yə wɨ́, Yeso pópə ngaŋə́zoŋə́ndzəm əjí tíʼ ńkwúnə á mə́m ə́wə́. 2Judasə ŋwu páʼ a nə fi nə́ Yeso lə́, a kə́ ńjî nkáʼ yi ə́wɨ́ ńté ńgə́ Yeso a zá ńjwánə ə́wɨ́ pópə ngaŋə́zoŋə́ndzəm əjíə. 3Judasə a tíʼ ńgɛnə̂ á mə́m nkáʼ məjî wə̂ pópə ənɔ ngaŋə́maʼə́ntso, ḿbá pɨ pó nə ḿbyáb nə́ tə́kɔʼndɛ̂sê á Jɛlusalɛmə. Pɨ pɨ lə́ nə ńtú pətə́kɔʼ pə́ ngaŋə́pêsê pópə mətû mə́ Pəfalasi, pó nə ńtúg əpú ntsoolə, ḿbá pəlam pópə pətɔsəlamə. 4Lə́ Yeso a pə́ ńjîə anu atsəm páʼ a chî nə́ á mə́ laŋ nə́ a mbɨ yə́, ńtíʼ ə́fɛ́d ńgyǐəə á mbi ə́sóŋə á mbô pó ńgə́, “Nə́ náŋə lə́ wə́?”
5Pó kwěe a yí ńgə́, “Yeso mɔ́ Nazalɛlə.”
Yeso a sóŋə á mbô pó ńgə́, “Maŋ lə́ yə́.”
Judas ŋwu páʼ a nə fi nə́ Yeso lə́, a nə ńtɨ́ pó po. 6Əghâ ándó Yeso a nə sóŋ nə́ á mbô pó ńgə́, “Maŋ lə́ yí lə́,” pó pɨ nə́ ndzəm ńgwukə̂ á ndəsê. 7Yeso a pɨ ńkə́ ḿbítə ághɔ́b ńgə́, “Lə́ əwə ŋwu páʼ pɨ náŋ nə́?”
Pó kwěe yí ńgə́, “Yeso mɔ́ Nazalɛlə.”
8Yeso a kwěe ághɔ́b ńgə́, “Maŋ pɛ́dtə fiʼtə̂ áwɨ́ ńgə́ maŋ lə́ yə́.” Lə́ələ́ á pə́ ńgə́ təmbɔʼ pɨ tə́ náŋə lə́ mə, nə́ ghɛd pɨ pɨ pó ghɛnə̂. 9A nə sóŋə anu zɨ lə́ ńjî ńgə́ anu páʼ a nə ḿbɛ́d nə́ tə ə́sóŋə á yǐ ḿbə́ ndə̌ŋdəŋ ńgə́, “Tǎ! maŋ kě tsɔʼə táʼ ŋwunə á mə́m pɨ pə̂ gho nə fɛ̂ nə́ nə́ maŋ lə́ péŋkə pô.”
10Saamun Pita a nə ńtúg ŋwíŋ ntsoolə, ə́sɔŋə̂ zə́ələ́ á mə́m ngwâ yí, ńtíʼ ńdɔgə̂ zɨ́d ńdə́g nətôglə nə́ apoʼə Mbêsê yi Ngweŋ zə́, yi nə́ təənə. Əlɛ́nə apoʼ yi wɨ́ nə ḿbə́ lə́ Malikus. 11Yeso a sóŋə á mbô Pita ńgə́, “Néŋ ŋwíŋ ntso əzo á mə́m ngwâ yə́! Gho kwaŋ ńgə́ maŋ kě yǐ nô ndɔ́ŋ ngə́ʼ páʼ Tǎ mə a fɛ̂ nə́ á mbô maŋ?”
Pə́ Lɔgə̂ Yeso Ńgɛnə̂ á Mbi Anasə
12Akwɛlə ngaŋə́maʼə́ntso ḿbá nətû zɔ́b ḿbɨ́ ḿbə́ nə́ pɨ pó nə̈ ḿbyáb nə́ Tə́kɔʼndɛ̂sê waamə̂ Yeso ńtíʼ ńkwúlə yə́. 13Pó peg ńdɔgə̂ a yí ńgɛnə̂ á mbi Anasə, ńté ńgə́ a nə ḿbə́ lə́ nchǐ Kaifasə, páʼ a nə ḿbə́ nə́ Mbêsê yi Ngweŋ á ngoʼ wɨ́d wə̂. 14Lə́ nə ḿbə́ Kaifas páʼ a nə tə́gtə nə́ Pəjus ńgə́ a pɔŋ ńgə́ táʼ ŋwunə a kwû ńté atûə ŋwu ntsəmə.
Pita a Kǐ Ńgə́ Yí kě Yeso Jî pô
(Mat 26.69, 70; Mag 14.66-68; Luk 22.55-57)
15Saamun Pita pó táʼ ndzoŋdzəm Yeso yitsə̌, pó tíʼə ńdzoŋə̂ ághɔ́b ńgɛnə̂ aliʼ páʼ pó nə ńdɔg nə Yeso ńgɛnə̂ ə́wɨ́ lə́. Mbêsê yi Ngweŋə́ a nə ḿbyádnə ńjîə yitsə̌ ndzoŋdzəm Yeso wə̂, a tíʼ ńgɛnə̂ atətá Mbêsê yi Ngweŋ pó Yeso, 16pita a tə́əmə á ntsǒndɛ̂ apeŋə́. Yitsə̌ táʼ ndzoŋdzəm Yeso páʼ Mbêsê yi Ngweŋə́ a nə ḿbyádnə nə́ ńjîə yí lə́, a tíʼ ə́fɛ́lə apeŋ ńtsáb pó mɔ̂ məngyě a nə ńtɨ́ nə́ á ntsǒnkáʼ ńtíʼ ńdɔgə̂ Pita ńkwú nə́ yə́. 17Mɔ̂ məngyě wə̂ a nə ńtɨ́ nə́ á ntsǒnkáʼ lə́ a sóŋə á mbô Pita ńgə́, “Gho kě lə́ táʼ ndzoŋdzəm ŋwu yǐ pô?”
Pita a kwěe yí ńgə́, “Maŋ kě lə́ táʼ ŋwu əyǐ pô.”
18Əghâ yi ə́wɨ́ ngaŋə́faʼ Mbêsê yi Ngweŋ pópə pɨ pó nə ḿbyáb nə́ Tə́kɔʼndɛ̂sê lə́, ə́ nyagtə̂ móg ńtɨ́ ńdíblə ńtə́ ńdzɔ́gə, ńté ńgə́ əfə́g nə ńchîə apeŋə́. Pita a nə ńchî pó po ńkə́ ńtɨ́ ńtə́ ńdzɔ́gə ajíə.
Mbêsê yi Ngweŋ a Pítə Yeso nə́ Əpítə Ətséebə
(Mat 26.59-66; Mag 14.55-64; Luk 22.66-71)
19Mbêsê yi Ngweŋə́ a tíʼ ḿbítə Yeso nə́ əpítə ətsáb ńté ngaŋə́zoŋə́ndzəm əjí pópə ndzeʼkə́ əjǐə. 20Yeso a kwěe yí ńgə́, “Maŋ pɛ́dtə ńtséebə á əshîsaŋ á mbô mbîə, maŋ nə ńdzá ńdzéʼkə á mə́m məláʼ mə́ Əsê mə́ Pəjus pópə Tə́kɔʼndɛ̂sê, aliʼ páʼ Pəjus tsɔʼə pətsəm pó yǐ nə́ ńkyeetə̂ ə́wə́, maŋ kě anu yətsə́ á nəlyaŋnə́ kə́ sóŋə pô. 21Lə́ ńté anu akə̂ páʼ gho pítə nə́ mə nə́ əpítə ətsáb pəənə? Pítə pɨ páʼ pó pɛ́d nə́ tə ńdzóʼə atséebə mə, anu páʼ maŋ nə sóŋ nə́ á mbô pó, pó jîə zə́ələ́.”
22Əghâ ándó a nə sóŋ nə́ anu zɨ lɛ̌ lə́, táʼ ŋwunə á mə́m ngaŋə́pyáabə tə́kɔʼndɛ̂sê a nə ńtɨ́ nə́ aliʼ yi ə́wə́ a ləbə̂ Yeso nə́ apô ají ńtíʼə ḿbítə yí ńgə́, “Lɛ̌ ndzaŋ páʼ gho kwěe nə́ a Mbêsê yi Ngweŋ?”
23Yeso a kwěe yí ńgə́, “Təmbɔʼ maŋ pěʼ ńtsáb təpɔŋ á mbô yí, gho fiʼtə̂ á ŋwu ntsəmə aliʼə́ nə́ nə́ anuə təpɔŋ páʼ maŋ sóŋ nə́, maŋ pə́ ńtsáb lə́ anuə á koʼnə̂ nə́, tə ḿbə́ gho pɨ ńdəbə̂ mə lə́ ńté akə̂?”
24Anasə a tíʼ ńtúmə Yeso páʼ pə́ pɛ́d nə́ ńkwúd mbô mí nə́ məŋkɛlə́ á mbô Kaifasə a nə ḿbə́ nə́ Mbêsê yi Ngweŋ lə́.
Pita a Pɨ ńkə́ Ńkǐəə Yeso
(Mat 26.71-75; Mag 14.69-72; Luk 22.58-62)
25Əghâ yi ə́wɨ́ Saamun Pita a tɨ́ ńtə́ ńdzɔ́gə mógə́, pə́ pítə yí ńgə́, “Gho kě lə́ táʼ ndzoŋ ndzəm ŋwu wə̂ yitsə̌ pô?”
A kǐə yí ə́sóŋ ńgə́, “Maŋ kě lə́ táʼ pô.”
26Táʼ ngaŋəfaʼ Mbêsê yi Ngweŋ yitsə̌ ḿbə́ ndim ŋwu páʼ Pita a nə ńdə́g nə nətôglə jí lə́, a pítə Pita ńgə́, “Maŋ pěʼ ńkě áwɨ́ ŋwu nə́ á mə́m nkáʼ Olif zɨ́?” 27Ngǎ yitsə̌ Pita a pɨ ńkə́ ńkǐə, əghâ yi wɨ́ aŋkəʼə́ á tɔ́ŋə.
Yeso a Mbi Payilɛlə
28Pəjus pó tíʼ ńdɔgə̂ Yeso á ndɛ̂ Kaifas ńgɛn nə́ yə́ á ntɔ́ʼ Gɔbnɔ Pəloman. Lə́ nə ḿbə́ chigə mɛ́ məsânə. Pó nə ńkě ághóobə́ á ntɔ́ʼ kwú pô, ńté ńgə́ pó nə ńkě kɔŋə̂ á mə́ tadkə̂ nə mbɨ əzɔb pô. Ńté ńgə́ pó nə ńtə́ ńdoonə̂ á mə́ jî nə́ məjî mə́ Ndzáʼkə. 29Payilɛlə a tíʼ ə́fɛ́lə á ntɔ́ʼ ńtéekə ághóobə́ apeŋə́, ḿbítə ńgə́, “Nə sóŋ ńgə́ ŋwu nə́ a wǔ lə́ akə̂ anu lóo?”
30Pó kwěe a yí ńgə́, “Təmbɔʼ a pěʼ ńchîə anuə təpɔŋ yitsə̌ ghɛd pô, tə ḿbə́ pəg pěʼ ńkě nə́ yə́ á mbô gho yǐ pô.”
31Payilɛlə a sóŋə á mbô pó ńgə́, “Lɔg nə́ yə́ á ngǎ pɨ sáʼ əsáʼ əyí ńdzoŋ pəpɨ́ pənoŋkə.”
Pəjus pó kwěe a yí ńgə́, “Pəg kě mətɨ túg təmbɔʼ pəg sáʼ əsáʼ ŋwu ńjwítə yí pô.” 32Zəənə́ á nə ńdɔgə̂ aliʼ lə́ á mə́ lwɛ́nkə nə́ anu Yeso a nə sóŋ nə́ ńté ndzaŋ mbô nəwû páʼ a yǐ nə́ kwûə.
33Payilɛlə a sɛdnə̂ ńkwúnə á mə́m ntɔ́ʼ ńtíʼ ə́fóŋə Yeso ḿbítə ńgə́ “Gho lə́ əfo Pəjus?”
34Yeso a kwěe yí ńgə́, “Lə́ azô akwaŋə á zə̂ ńté mə kɨ gho zóʼ lə́ á mbô pɨ pipə́ ndaʼə?” 35Payilɛlə a kwěe ńgə́, “Maŋ pɛn ḿbə́ lə́ ŋwu Pəjusə?” Lə́ fɛ̂ pɨ pô, pópə pətə́kɔʼ pə́ ngaŋə́pêsê ə́fɛ̂ gho á mbô maŋə. Gho lánə ńgɛd lə́ lɛ̌?
36Yeso a sóŋ ńgə́, “Nəfoonə mə lə́ kě yi nə́ mbî zɨ pô, təmbɔʼ nə́ pěʼ ḿbə́ lə́ yi nə́ mbî zɨ, tə ḿbə́ ngaŋə́faʼə mə pěʼ ḿbóʼnə ńgə́ kɔ pə́ waamə̂ mə. Lə́ nə́ pə́ əghâ nə́ nəfoonə mə nə́ kě lə́ á mbîə nə́ lǒo pô.”
37Payilɛlə a sóŋ ńgə́, “Lə́ pə́ ńgə́ gho lə́ əfo?”
Yeso a kwěe yí ńgə́, “Gho koʼnə̂ á mə́ sóŋ nə́ ńgə́ maŋ lə́ əfo. Pə́ nə ḿbîə mə ńté lə́ anu zɨ́d zəənə́, maŋ kə́ ńgyǐəə á mbî ńté lə́ anu yə ə́wə́, á mə́ fiʼtə̂ nə́ ndə̌ŋdəŋə́. Ŋwu ntsəmə a chî nə́ á mə́m ndə̌ŋdəŋə́ ä jwə́ʼtə á mbô maŋə.”
38Payilɛlə pítə a yí ńgə́, “Ndə̌ŋdəŋ lə́ akə̂?” Əghâ ándó a pítə nə́ zɨ lə́ ə́fɛ́d ńgɛnə̂ á mbô Pəjus sóŋ nə́ pó ńgə́, “Maŋ kě awǔənu yitsə̌ nə́ yí zɨ́ pô, 39lə́ nə́ pə́ ńtúgə noŋkə ńgə́ təmbɔʼ á pə́ nə́ ndɛd Akɔŋtə Ndzáʼkə maŋ fógə táʼ ngaŋətsáŋ ḿmɛdtə̂. Nə́ kɔŋ ńgə́ maŋ mɛdtə̂ a əfo Pəjus ghɛn?”
40Pó yɛ́ɛlə ńgə́, “Ngá, lə́ kě ŋwu nə́ pô, fɛ̂ pə́ Balabasə!” Lə́ Balabasə a nə ḿbə́ ḿbə́ lə́ túʼ ndzə̌lə.
Currently Selected:
Jɔnə 18: azo
Highlight
Share
Copy
Want to have your highlights saved across all your devices? Sign up or sign in
