Jɔnə 8
8
Məngyě pə́ nə Ńgwam nə́ yə a tə́ Ńjîə Mə̂ghabə
1Lə́ Yeso a kɔ́ʼ ńgɛnə̂ á nkwəənə mətǐ mə́ Olifə. 2Mbî ə́ fóg, á mɛ́ məsânə a pɨ ńgɛnə̂ á Tə́kɔʼndɛ̂sê, ŋwu ntsəmə a yǐəə á mbô yə́, a tíʼ ńnáanə á ndəsê ńdzéʼkə ághóobə́. 3Ngaŋə́zéʼkə pənoŋkə pópə Pəfalasi yǐ nə́ məngyě yitsə̌ páʼ pə́ wam nə́ yə a tə́ ńjîə mə̂ghabə ńgyǐ ńgɛlə̂ a tə́əmə á mbi pó pətsəmə. 4Ə́sóŋə á mbô Yeso ńgə́, “Ndzéʼkə, pə́ waamə̂ məngyě nə́ a tə́ ńjîə mə̂ghabə. 5Pə́ ŋwaʼlə̂ á mə́m noŋkə Mosisə ńgə́, ntê məngyě zɨ́d zɨ pə́ chîə á mə́ tə́mtə nə́ yí nə́ məngɔʼ ə́ jwítə. Gho sóŋə azô lə́ ńgə́ akə̂ ńté a yə́?” 6Pó nə sóŋə anu zɨ lə́ á mə́ kwaʼlə̂ nə́ Yeso, ńjî ńgə́ mbɔʼ pó jɨ́ ndu ńnéŋ əsáʼə atû yə́. Lə́ Yeso a pə́ ńkwúʼnə á ndəsê ŋ́ŋwaʼlə̂ nə́ fîəpô əyə́. 7Ndzaŋə ándó pó nə ńtɨ́ nə́ aliʼ yi ə́wɨ̈ ḿbítə yí tsɔʼə nə́ mənu lə́, a lǒo əsê ńtɨ́ ə́sóŋə á mbô pó ńgə́, “Á mə́m pəənə́, ŋwu tsə̌ páʼ a kě nə́ təpɔŋ kə̂ ghɛlə̂ pô a peg ńchúʼə á mə́ tə́m nə́ yí nə́ ngɔʼə,” 8A sóŋ ə́lɨ́d lə́, ḿbɨ ńkə́ ńkwúʼnə á ndəsê ńtə́ ŋ́ŋwaʼlə̂ nə́ fîəpô əyǐ ngǎ yitsə̌. 9Ndzaŋ pó nə ńdzóʼ nə́ atsáb yə ə́wɨ́ lə́ ńtíʼə ńgɛnkə̂ ághɔ́b táʼ táʼə, ńchúʼ nə́ chigə pətəkaŋ páʼ pó nə ńchî nə́ ə́wə́, Yeso a nə ńtíʼ ńchîə aliʼ yə wɨ́ yí təjiʼ nə́ məngyě wə̂, a tə́əmə á mbi yə́. 10Yeso a pɨg mbɨ əjǐ ə́sóŋ nə́ məngyě wə̂ ńgə́, “Məngyě, pó ə́fó? Ŋwu tsə̌ a kě pɛ́d mbɔʼ a ghɛd gho wǔ əsáʼ?”
11Məngyě wə̂ a kwěe ńgə́, “Ngá ḿbə́ Mmaʼmbî,” ŋwu tsə̌ a kě ghɛd maŋ wǔ əsáʼ pô.
Yeso a tíʼ sóŋə á mbô yí ńgə́, “Təmbɔʼ maŋ kě kə́ ńgɛd gho wǔ əsáʼ pô, ghɛnə̂ a gho, kɔ pɨ ńkə́ ńgɛlə̂ təpɔŋə.”
Yeso lə́ Nkyaʼ Mbîə
12Yeso a kə́ ḿbɨ ńtséebə á mbô pó ə́sóŋ ńgə́, “Maŋ lə́ nkyaʼ mbîə.” Ŋwu ntsəm páʼ a zoŋ nə́ mə á kě á mə́m ndzəmə yǐ nyi pô, lə́ pə́ túg nkyaʼ nchîmbîə.
13Pəfalasi pə́ tíʼ ə́sóŋə á mbô yi ńgə́, “Əghâ nə́, mbɔʼ gho tə́ ə́sóŋə anu ńté pə́ mbɨ əzo, lə́ pə́ ńgə́ anu páʼ gho sóŋ nə́ lə́ kě ndə̌ŋdəŋ pô.”
14Yeso a kwěe ńgə́, “Maŋ pǎtə ńtə́ ə́sóŋə anu ńté mbəəmə lə́, anu maŋ sóŋ nə́ lə́ ndə̌ŋdəŋ ńté ńgə́ maŋ jîə aliʼ páʼ maŋ lǒo nə́ ə́wə́, ńkə́ ńjîə aliʼ páʼ mäŋ ghɛn nə́ ə́wə́. Nə́ kě jîə aliʼ páʼ maŋ lǒo nə́ ə́wɨ́ pô, ńkě kə́ ńjîə aliʼ páʼ mäŋ ghɛn nə́ ə́wɨ́ pô. 15Nə̈ lə́gə məsáʼ lə́ ándó pɨ pə́ mbîə, lə́ maŋ pə́ ńkě əsáʼ ŋwü lə́gə pô. 16Lə́ təmbɔʼ maŋ pěʼ ńtə́ ńdə́g əsáʼ, tə ḿbə́ ndə́gsáʼə mə lə́ ndə̌ŋdəŋə́, ńté ńgə́ lə́ kě tsɔʼə maŋ lə́gə pô, maŋ lə́gə lə́ pəg yi páʼ a tú nə́ mə. 17Á mə́m məntəgə́ mɨ́, pə́ ŋwaʼlə̂ ə́wɨ́ ńgə́ anu páʼ pɨ pə́ pɛ̌ pə́ sóŋ nə́ lə́ ndə̌ŋdəŋə́. 18Mäŋ sóŋə anu ńté lə́ mbəəmə mə, lə́ Tǎ páʼ a tú nə́ mə a kə̈ sóŋə anu ńté lə́ mə.”
19Pó tíʼ ḿbítə yí ńgə́, “Tǎ əgho a chî lə́ ə́fó?” Yeso a kwěe ńgə́:
“Nə́ kě mə jî pô ńkě Tǎ mə kə́ ńjî pô,” Təmbɔʼ nə pěʼ ńjîə mə, tə ḿbə́ nə́ kə́ ńjîə Tǎ mə.
20Yeso a nə ńtséebə anu zɨ lə́ əghâ ándó a nə̈ ńdzéʼkə nə́ á Tə́kɔʼndɛ̂sê, ḿbáatə atɔ́gə ndɛ̂ páʼ pə́ nə́ ńdɔʼkə̂ nə́ mənkwum mə́ akáŋə́sê ə́wə́. Lə́ ŋwu tsə̌ a pə́ ńkě yí wam pô ńté ńgə́ ndɛd əjǐ nə ńkě koʼ pô.
Təmbɔʼ nə́ kě Ghɛnə̂ Aliʼ páʼ Mäŋ Ghɛn nə́ Əwɨ́ pô
21Yeso a kə́ ḿbɨ ə́sóŋə á mbô pó ńgə́, “Maŋ yǐ ghɛnə̂ a mə, nə́ tíʼ ńnáŋə mə kə́káŋə́, ńtíʼ ńkwúkə á mə́m təpɔŋ əwəənə́. Aliʼ páʼ mäŋ ghɛn nə́ ə́wɨ́ təmbɔʼ nə́ kě ə́wɨ́ yǐ pô.”
22Pəjus pó tíʼ ḿbítə ńgə́, “A yǐ jwítə mbɨ əjǐ jwítə nə́, ndzaŋ páʼ a pěʼ nə́ sóŋ ńgə́, Aliʼ páʼ a yǐ nə́ ghɛn ə́wɨ́ təmbɔʼ pɛn kě ə́wɨ́ yǐ pô lə́?”
23A sóŋə á mbô pó ńgə́, “Nə́ lǒo lə́ ndu ndəsê ghɛnə̂, maŋ pə́ ńdǒ lə́ nəpóolə atǐə. Pɨ lə́ pɨ pə́ mbî pəənə́, lə́ maŋ pə́ ńkě lə́ ŋwu mbî pô. 24Maŋ nə ə́fiʼtə̂ áwɨ́ ńgə́ nə́ yǒ kwúkə á mə́m pətəpɔŋ pə́ənə́, nə́ yǒ kwúkə á mə́m pətəpɔŋ pɨ́ tə ńdéʼtə nə́ pí ńgə́, ‘maŋ lə́ yə́.’ ”
25Pó pítə yí ńgə́, “Gho lə́ əwə?”
Yeso a kwěe ághɔ́b ńgə́, “Tsɔʼə anu páʼ mäŋ sóŋ nə́ á mbô pɨ ə́fɛ́lə á nəchwaakənə́; 26Maŋ chî nə́ mənu mimə nɨ́ nə́ á mə́ lɔg nə́ ńnéŋ əsáʼ wə́ atû pəənə́. Lə́ yí wə̂ páʼ a nə ńtú nə́ mə lə́ ŋwu ndə̌ŋdəŋə́, maŋ kə̈ fiʼtə̂ á mə́m mbî lə́ tsɔʼə anu páʼ a sóŋ nə́ á mbô maŋə.”
27Ətû pɔ́b nə ḿbə́ ńkě lá ńté anu páʼ a nə̈ sóŋ nə́ ńté Tǎ lə́ pô. 28Yeso a tíʼ ə́sóŋə á mbô pó ńgə́, “Əghâ ándó pɨ yǒ nə́ ŋ́ŋáŋkə Mɔ́ Ŋwunə atǐ nə́ yǐ jî ńgə́ maŋ lə́ Ŋwu Páʼ Maŋ Pə́ Nə́, nə́ yǐ jî ńgə́ maŋ kě anu yətsə́ nə́ məmá mətɨ faʼə̂ pô, mäŋ sóŋə lə́ tsɔʼə anu páʼ Tǎ a zéʼkə nə́ mə əwə. 29Lə́ ŋwu páʼ a tú nə́ mə a chî pəg yə́, a kě mə mɛdtə̂ ńgə́ maŋ chîə á ngǎ maŋ pô, ńté ńgə́ maŋ zá ńgɛlə̂ mənu páʼ mə̈ ghɛd nə́ mbɨ əjǐ pɔŋə̂.”
30Ndzaŋə ándó a nə ńtsáb nə́ atsáb zɨ lə́ pɨ pipə nɨ́ nə́ pó néŋ ntɨ́ nə́ yə́.
Ndzaŋ Təmbɔʼ Ndə̌ŋdəŋ Əgho á Fógə Gho á Mə́mə Apoʼə
31Yeso a tíʼ ə́sóŋə á mbô Pəjus pó néŋ nə́ ntɨ́ nə́ yí ńgə́, “Təmbɔʼ nə́ mɛdnə̂ á mə́mə atséebə mə, tə ḿbə́ pɨ lə́ chigə ngaŋə́zoŋə́ndzəmə mə 32nə́ yǒ jîə ndə̌ŋdəŋə́, lə́ ndə̌ŋdəŋ wɨ́d wə̂ á yǐ nə́ ə́fógə áwə́ənə́ á mə́mə apoʼə.”
33Pó kwěe yi ńgə́, “Pəg fɛ́d lə́ mə́m əla Ablaamə, pəg kě kə́ pə́ əpoʼə á mbô ŋwu tsə̌ pô. Gho tíʼ ńdǎ lə́ ə́lɛ́ á mə́ sóŋ nə́ ńgə́, Nə́ yǒ kě pɨ pə́ əpoʼ pô?”
34Yeso a sóŋə á mbô pó ńgə́, “Lə́ ndə̌ŋdəŋ maŋ sóŋ nə́ á mbô pɨ ńgə́ ŋwu ntsəm páʼ ä ghɛd nə́ təpɔŋ lə́ apoʼə á mbô təpɔŋə. 35Apoʼə a kě yǐ mɛdnə̂ á mə́m əla wɨ́d wə́ pô, lə́ móonə a pə́ ḿbə́ lə́ əla wɨ́d wə́ tə ḿmɛdnə̂. 36Təmbɔʼ Mɔ́ Əsê a fógə áwə́ənə́ á mə́m ndɛ̂ apoʼ nə́ jî ńgə́ nə láʼ kě apoʼ pɨ faʼ pô. 37Maŋ jî ńgə́ pɨ fɛ́d lə́ á mə́m əla Ablaamə, lə́ ḿbə́ ńtə́ ńdoonə̂ á mə́ jwítə nə́ mə ńté ńgə́ atséebə mə á kě anu yətsə́ á mbô pɨ kwú pô. 38Maŋ sóŋ lə́ anu páʼ maŋ jɨ́ nə́ á mbô Tǎ mə, lə́ nə́ pə́ ńkə́ ə́faʼə̂ lə́ anu páʼ pɨ nə ńdzóʼ nə́ á mbô tǎ əwəənə́.”
39Pó kwěe á mbô yi ńgə́, “Tǎ əwəg lə́ Ablaamə.”
Yeso a sóŋə á mbô pó ńgə́, “Təmbɔʼ pɨ nə ḿběʼ ḿbə́ lə́ pɔ́ pə́ Ablaam, tə ḿbə́ pɨ nə faʼə̂ anu páʼ Ablaamə a nə faʼ nə́.” 40Lə́ nə́ pə́ əghâ nə́, nə́ pə́ ńtə́ ńdoonə̂ á mə́ jwítə nə́ mə, á ŋwu páʼ a nə fiʼtə̂ nə́ áwɨ́ nə́ ndə̌ŋdəŋ páʼ a nə́ ńdzóʼ nə́ á mbô Əsê, lɛ̌ kě anuə ándó Ablaam a nə̈ ə́faʼ nə pô! 41Nə́ faʼə̂ lə́ anu páʼ tǎ əwəənə́ ä faʼ nə́.
Pó sóŋə á mbô yí ńgə́, “Pə́ nə ńkě áwə́g lə́ nə́ mə̂ghabə pî pô, pəg túg lə́ tsɔʼə táʼ Tǎ páʼ a pə́ nə́ Əsê.”
42Yeso a sóŋə á mbô pó ńgə́, “Təmbɔʼ Əsê a pěʼ ḿbə́ lə́ Tǎ əwɨ tə ḿbə́ nə́ kɔŋə̂ mə, ńté ńgə́ maŋ nə ńdǒo lə́ á mbô Əsê ńgyǐəə aliʼə́ nə́. Maŋ nə ńkě lə́ a ngǎ maŋ yǐ pô, lə́ nə ńtú Əsê ńtúmə mə. 43Lə́ ghɛlə̂ akə̂ nə́ kě chî təmbɔʼ nə́ zóʼə anu páʼ mäŋ sóŋ nə́ pô? Lə́ ńté ńgə́ təmbɔʼ nə́ kě wam məntɨ́ mi ńdzóʼə atséebə mə pô. 44Pɨ lə́ pɔ́ pə́ tǎ əwɨ dɛbəələ, nə́ kə́ ńdoonə̂ lə́ tsɔʼə á mə́ faʼ nə́ ándó páʼ tǎ əwəənə́. Ə́fɛ́lə á nəfɛdnə́, tǎ əwəənə́ a nə ḿbə́ lə́ ńjwítə pəənə. A kě kə́ láʼə tə́əmə əlá ndə̌ŋdəŋ pô, ńté ńgə́ ndə̌ŋdəŋ a kě nə́ yí chî pô. Ndzaŋ páʼ ä tsɨd nə́ ntsɨd lə́ ä faʼə̂ lə́ tsɔʼə anu páʼ á koʼnə̂ nə́ á mbô yə́, ńté ńgə́ lə́ ngaŋntsəələ ńkə́ ḿbə́ tǎpə ngaŋntsɨd ntsəmə. 45Lə́ ńté ńgə́ mäŋ tséebə ndə̌ŋdəŋə́, lə́ nə́ pə́ ńkě ntɨ́ nə́ maŋ néŋ pô. 46Lə́ əwə ŋwunə á mə́m pɨ təmbɔʼ a sóŋ ńgə́ maŋ lə́ ńgɛd təpɔŋə? Təmbɔʼ mäŋ fiʼtə̂ áwɨ́ lə́ nə́ ndə̌ŋdəŋə́, lə́ pə́ ńgɛlə̂ akə̂ nə́ kě ntɨ́ nə́ maŋ néŋə? 47Ŋwu páʼ a chî nə́ pó Əsê a zóʼə atséebə Əsê, anu páʼ á ghɛd nə́ nə́ kě atséebə Əsê zóʼ lə́, ńté ńgə́ nə́ kě lə́ á mbô Əsê lǒo pô.”
Yeso pó Ablaamə
48Pəjus pó kwěe yi ńgə́, “Gho kwaŋ ńgə́ pəg kě koʼnə̂ á mə́ sóŋ nə́ ńgə́ gho lə́ ŋwu Samalitan ńkə́ túg pɛ̌sê a mbɨ gho.”
49Yeso a kwěe ńgə́, “Maŋ kě pɛ̌sê túg pô, lə́ ḿbə́ ńdzóʼnə a Tǎ mə, lə́ nə́ pə́ ńkě mə zóʼnə pô” 50Maŋ kě náŋə nəgháʼ nə́ mbəəmə pô, ŋwunə chî ə́wɨ́ páʼ a náŋ nə́ áwə́ələ́, mbɔʼə a kě sáʼ əsáʼ maŋ wǔ pô. 51Mäŋ sóŋə lə́ ndə̌ŋdəŋə́ á mbô pɨ ńgə́, “təmbɔʼ ŋwu ntsəm páʼ a zóʼ nə́ atséebə mə a yǒ kě kwû pô.”
52Pəjus pó sóŋə á mbô yí ńgə́, “Nə́ pə́ əghâ nə́ pə́ jî ńgə́ gho túgə pɛ̌sê a mbɨ gho. Ablaamə a nə ńkwûə, məntúmə́sê mə́ kə́ ńkwúkə, lə́ gho pə́ ńtíʼə̈ ńdoonə̂ á mə́ sóŋ nə́ ńgə́, Ŋwu páʼ a lɔʼkə̂ nə́ atséebə azô a yǒ kě nəwû jwə́ʼ pô 53Gho loonə̂ lə́ á mə́ sóŋ nə́ ńgə́ gho tsɛɛlə̂ tǎ əwəg Ablaamə, páʼ a nə ńkwû nə́, məntúmə́sê mətsəm mə́ kə́ ńkwúkə! Gho kwaŋ ńgə́ gho lə́ əwə?”
54Yeso a kwěe ághɔ́b ńgə́, “Təmbɔʼ maŋ pěʼ ńtə́ ńdoonə̂ nəgháʼ nə́ mbəəmə, tə ḿbə́ nəgháʼ yi ə́wə́ a kě nə́ anu yətsə́ chî pô. Ŋwu páʼ a fɛ̂ nə́ nəgháʼ nə́ maŋ lə́ Tǎ mə, ŋwu páʼ pɨ sóŋ nə́ ńgə́ lə́ Əsê əzɨ lə́. 55Lə́ nə́ pə́ ńkě yí jî pô, maŋ pə́ ńjîə yə́. Lə́ təmbɔʼ maŋ pə́ ə́sóŋ ńgə́ maŋ kě yi jî pô, tə ḿbə́ maŋ lə́ ngaŋntsəələ ándó pəənə́, lə́ maŋ jîə yí ńkə́ ńdɔʼkə̂ atséebə ajíə. 56Tǎ əwɨ Ablaamə a nə ńtə́ ńkɔŋtə̂ ńgə́ a chîə á mə́ zɨ́ nə́ alěmbîə mə. A nə ńdzə́ənə zɨ́d ńkə́ ńkɔŋtə̂.”
57Pəjus pó tíʼ ə́sóŋə á mbô yí ńgə́, “Gho kě ngoʼ məghə́m mɛ́n tâ kə́ koʼə̂ pô, ḿbə́ ə́sóŋ ńgə́ gho nə ńdzə́ənə Ablaamə?”
58Yeso a sóŋə á mbô pó ńgə́, “Mäŋ sóŋə áwɨ́ nə́ ndə̌ŋdəŋ ńgə́, záʼ pə́ jî tə́ pîə Ablaam lə́, Maŋ Pə́ chî ə́wə́.”
59Pó tíʼ ḿbyá məngɔʼ ńdoonə̂ á mə́ tə́mtə nə́ yí ə́wə́, lə́ Yeso a lyáŋ mbɨ əjǐ ńtíʼ ə́fɛ́lə a yə́ á mə́m Tə́kɔʼndɛ̂sê.
Currently Selected:
Jɔnə 8: azo
Highlight
Share
Copy
Want to have your highlights saved across all your devices? Sign up or sign in
