Lukasə 24

Ndzaŋ Yeso a nə Ńjúmnə nə́ á Nəwûə

(Mat 28.1-10; Mag 16.1-8; Jɔn 20.1-10)

1Á nə ḿbə́ chigə mɛ́ məsânə nə́ á ntsɛɛmbiə alě á mə́m ngab lə́, pəngyě pə̂ pó lɔg məghɔ́d mə́ azagə́ yə əshîʼnə mə̂ páʼ pó nə ńtsoŋkə̂ nə́ lə́, ńgɛn nə́ mə́ələ́ á nəse. 2Ńtíʼ ńjɨ́ ńgə́ pə́ kabkə̂ ngɔʼ páʼ ə́ nə ńkə́bkə nə́ ntso nəse, 3ńtíʼ ńkwúnə á nəse ḿbə́ ńkě akwûə Mmaʼmbî Yeso jɨ́ pô. 4Ndzaŋ pó nə ńtɨ́ nə́ ńtə́ ńkwaŋə̂ anu yəwə́ á tə́ ńkɨʼnə̂ ághɔ́b lə́, mbyâŋnə zɛ́n pɛ̌ ə́ ghabkə̂ ə́fɛ́lə á mbi pó ńgwê ətsəʼ pi ŋwaŋkə̂ nə́ ńtíʼ ńtə́əmə á nəpɛnə́ pó. 5Pəngyě pə̂ pə́ pɔ́g ńtíʼ ńkwúʼtə ńkə́bkə məshî móobə́ á ndəsê. Mbyâŋnə zə̂ ə́ tíʼ ə́sóŋ nə́ pó ńgə́, “Lə́ ghɛlə̂ akə̂ nə́ chwaalə̂ ŋwu páʼə a chî nə́ á mbîə á mə́m pəkwûə? 6(A kě aliʼə́ nə́ chî pô, a júmnə nəwûə), wə́ʼtə nə́ anuə a nə ə́sóŋ nə́ nə́ pɨ əghâ páʼə a nə ḿbɛ́d nə́ Galiliə. 7‘Pə́ yǐ shib ə́fɛ̂ Mɔ́ Ŋwunə á mbô ngaŋə́ghɛlə təpɔŋə, pə́ kwumtə̂ yə́, əlě teelə́ ə́ ghə́ laŋə̂ a pɨ ńjúmnə nəwûə.’ ”

8Pəngyě pə̂ pə́ tíʼ ńgwə́ʼtə anu Yeso a nə ə́sóŋ nə́ á mbô pó, 9Ńdǒo á nəse wə̂ ńkwə̂ ńtíʼ ə́fiʼtə̂ ndɛn mənu wə̂ tsɔʼə ətsəmə á mbô ngaŋə́zoŋə́ndzəm Yeso zə̂ ntsɔb mɔʼə́ pópə apuʼə pəənə. 10Pəngyě pɨ pə́ nə ḿbə́ lə́ Mɛɛlə Magdalɛn pó Jwana ḿbɨ ḿbə́ nə́ Mɛɛlə mǎpə Jɛmsə. Pópə apuʼə pəngyě pó nə ńchî nə́ aliʼ yə wɨ́ pó nɔd ə́fiʼtə̂ mənu mɨ́d məənə́ á mbô məntú mə́ Yeso mə̂. 11Pó pə́ ńkě atséebə pəngyě pə̂ pí pô ńté ńgə́ á nə ə́fîə pə́ ənukə́taŋə á mbô pó. 12Pita a pə́ ńdǒo á əsê ńkə ndə̌ ńgɛnə̂ á nəse; ńkwúʼnə á əsê ńjɨ́ tsɔʼə ətsəʼ pə́ nə ńdə́m nə́ yí ə́wə́, ńkě ajûtsə́ pɨ ńjɨ́ pô. Ńtíʼ ə́sɛdnə̂ ńtə́ ńkwə̂ ńnyinə̂ ńkwaŋə̂ anu páʼə á laŋ nə́.

Á Alaŋə́ á Ndú Emɔsə

(Mag 16.12, 13)

13Tsɔʼə alě yi wɨ́ lə́, pó pətsə́ pə́ pɛ̌ ə́ fɛ́d ńtə́ ńgɛnə̂ aláʼ yətsə́ pə́ fóŋ nə́ nə́ Emɔsə, ndi nə́ sag tə ńkoʼ pəmád pɛ́nə asaambɛ̂ á mə́ fɛ́d nə́ Jɛlusalɛm. 14Pó tíʼə ńnyinə̂ ńtséebə ə́sóŋə anuə atsəm páʼə á kə laŋ nə́. 15Ndzaŋə ándó pó nə̈ ńnyi nə́ ńtséebə mənu məənə́ á tətɨ pó lə́, Yeso a yǐ nə́ nkɔ̌ʼmbɨ əyí ńtéekə ághɔ́b pó po tíʼə ńnyinə̂ ńgɛnə̂. 16Pó nə ńdzə́ənə yí ḿbə́ ńkě yí leŋ pô, ńté ńgə́ pə́ nə ḿmaʼ ndzəmə́ á əmə́g pó. 17Yeso a pítə ághɔ́b ńgə́, “Nə́ chígə́ ńnyinə̂ ə́sóŋə pə́ akə̂ anuə á tətɨ pɨ lɛ̌?” Pó kə ńgwam mbɨ əzɔb ńtɨ́ nə́ afɨnə á məshî pô. 18Táʼ ŋwunə á mə́m pó páʼ əlɛ́n yí ə́ nə ḿbə́ nə́ Klopasə a pítə yí ńgə́, “Gho lə́ ndaʼ ngɨ páʼə a chî nə́ Jɛlusalɛm ńkě jî mənu mə̈ laŋ nə ə́wɨ́ nə́ əlě pɨ?”

19Yeso a pítə ághɔ́b ńgə́, “Akə̂ mənuə?” Pó kwěe ńgə́, “Mənu mə̈ laŋ nə́ ńté Yeso Mɔ́ Nazalɛlə.” Ŋwu nə́ a nə ḿbə́ lə́ ntûsê, ńtyantə̂ nə́ atséebə yí pópə ngɛdmə́nu əyə́ á mbi Əsê pópə ŋwu ntsəmə. 20Pətə́kɔʼ pə́ ngaŋə́pêsê pópə mətû mə́ aláʼ mɨ́d mə̂ mə́ kə fɛ̂ yí pə́ ghɛn ə́sáʼ əsáʼ əyí ńtíʼ ə́sóŋ ńgə́ pə́ jwítə yə́, pə́ tíʼ ńgɛn ńkwumtə̂ yí nə́ atǐə apagləpaglə. 21Lə́ pəg nə́ ḿbə́ ńkwaŋ ńgə́ lə́ ŋwunə a nə ńchî nə́ á mə́ tsóʼ nə́ atûə pɔ́ pə́ Islɛlə. Mbaapə ə́lɨ́d lə́, lɛ̌ əlě teelə́ əghâ nə́ páʼ anu yəwə́ á nə ńdɔg nə́ aliʼə́. 22Á mə́ pɨ nə́ peg, pəngyě pətsə́ á tətɨ pəg pə́ pɨ ńgyǐ ə́fiʼtə̂ áwə́g nə́ nkɨʼnənu ńgə́ pó pěʼ ńgɛnə̂ á nəse yə́ á mɛ́ məsânə ə́sɛ̂n, 23ḿbə́ ńkě akwûə ají zɨ́ pô, ńtíʼ ńgyǐ ə́fiʼtə̂ áwə́g ńgə́ pó pěʼ ńdê ndzəəmə atəəmə́tɨ́ ńdzɨ́ pətseŋpə́ndɛ́pə́sê pó sóŋ nə́ pó ńgə́ a chîə mbîə. 24Ngaŋmə́ko əzə́g yitsə̌ ə́ pə́ ńgɛnə̂ á nəse ńkə́ ńdzɨ́ chigə ndzaŋ pəngyě pə̂ pó pěʼ nə́ ə́sóŋ lə́, lə́ ḿbə́ ńkě yí zɨ́ pô.

25Yeso a tíʼ ə́sóŋə á mbô pô ńgə́, “Nə́ lánə ńgəənə̂ lɛ ə́lɛ́, ntɨ́ ə́wɨ́ ə́ pɨ ńkə́ ńdyə́ənə á mə́ pí nə́ anu páʼ məntúmə́sê mə́ nə sóŋ nə́. 26Yi Ńtsəʼ nə́ a nə ńkě chîə á mə́ jɨ́ nə́ ndɛn ngə́ʼə nə́ ə́ pɔŋə̂ kwúnə á nəfɔ yí?” 27Yeso a pyádnə ə́fiʼtə̂ mənu mətsəmə á mə́mə aŋwaʼlə Əsê ńté nkɔ̌ʼmbɨ yə́, ńchúʼ nə́ aŋwaʼlə Mosisə tə ḿməg əŋwaʼlə məntúmə́sê tsɔʼə ətsəmə.

28Ndzaŋ pó nə ńtíʼ nə́ ńkwúnə aláʼ pó nə ńgɛn nə́ ə́wɨ́ lə́, Yeso a ghɛlə̂ ándó a pəənə̂ ńtóokə tóokə nə́. 29Lə́ pó tíʼə něe yí ńgə́ pó po ghɔ́ŋ ńté ńgə́ əghâ nkwanə́ ə́ nə ńkoʼə̂, alě mbîə á tíʼə ḿměe yə́. A tíʼ ńgɔ́ŋ pó po. 30Ndzaŋ pó po nə ńnáanə á təpɛlə ajîə məjî lə́, a pyáanə á apéenə məkálə́, ə́fɛ̂ ndǎ á mbô Əsê ḿbagtə̂ ázɨ́d ńtíʼə əfɛ̂ á mbô pó. 31Əghâ yi wɨ́, əmə́g mɔ́b mə́ ŋwaʼə̂, pó leŋə̂ yə́, a tíʼ ḿbéŋə yə́ á əmə́g pó. 32Pó tíʼ ḿbítə mə́ mbɨ mɔ́b ńgə́, “Ndzaŋə a pěʼ nə ńtə́ ńnyinə̂ ńtséebə nə́ pɔ̌ ḿbyádnə ə́fiʼtə̂ anuə aŋwaʼlə Əsê á sóŋ nə́ lə́, á kě chîə ándó móg ə́ tə́ ńkɛ́lə á mbɨ pɔ̌?” 33Ńtíʼ ə́sad ńdǒo á əsê tsɔʼə əghâ yi wɨ́ ḿbəənə̂ á Jɛlusalɛmə. Ńtíʼ ńjɨ́ ngaŋə́zoŋə́ndzəm əjí zə̂ ntsɔb mɔʼə́ pópə əpuʼ pɨ ə́ chîə aliʼə́ mɔʼə́. 34Pó tíʼ ə́sóŋ ńgə́, “Lə́ ndə̌ŋdəŋə́, Mmaʼmbîə a júmnə tə ńnɨd mbɨ əjǐə á mbô Saamunə.” 35Pɨ pɨ́d pɨ pɛ́n pɛ̌ pó tíʼ ə́fiʼtə̂ anuə á laŋ nə́ á mbɨ pó á alaŋə́, ńkə́ ḿbɨ́ ḿbə́ nə́ ndzaŋ pó pěʼ nə́ ńdeŋə̂ Yeso əghâ a pěʼ nə́ ḿbagə̂ á apéenə məkálə́.

Yeso a Ghabkə̂ Ńjáʼə á Mbi Ngaŋə́zoŋə́ndzəm Əjíə

(Mat 28.16-20; Mag 16.14-18; Jɔn 20.19-23; Məf 1.6-8)

36Ndzaŋ pɨ pə́ pɛ́n pɛ̌ pó nə ḿbɛ́d nə̈ ə́fiʼtə̂ anu jɨ lə́, Yeso a ghabkə̂ ńjáʼə á tətɨ pó ńtíʼ ə́sóŋ nə́ pó ńgə́, “Mbwɔ́dnə ə́ chîə á mə́m pəənə́.”

37Pó ghognə̂ ḿbɔ́g lɛ tətətə, ńtíʼə ńkwaŋə̂ ńgə́ pó jɨ́ lə́ pɛ̌sê. 38Yeso a pə́ ə́sóŋə á mbô pó ńgə́, “Áwɨ̈ lə́ jwaʼə̂ akə̂? Nə́ túg əpítə á ntɨ́ pɨ lə́ ńté akə̂? 39Náŋ nə́ mbô mə pópə məkoolə mə, lə́ maŋ nə́ nkɔ̌ʼmbəəmə mə. Kwum nə́ mə ńdzə́ənə, pɛ̌sê a kě na mbɨ pópə əkwəŋə́ ándó maŋ lɛ̌ túg pô.”

40Ndzaŋə ándó a tsáb nə́ ə́lɨ́d lə́, ńtíʼ ńnəələ̂ ághɔ́b nə́ mbô mí pópə məko míə. 41Ndzaŋ pó nə ńkě nə́ kə́ ḿbɛ́d ḿbí ńté akɔŋtə pópə nkɨʼnənu wɨ́d ghɛn lə́, Yeso a pítə ághɔ́b ńgə́, nə́ túgə ajûtsə́ təmbɔʼ pə́ jîə aliʼə́ nə́? 42Pó fɛ̂ akəmə əshû yə náŋnə nə́ á mbô yə́, 43a kwá ńkɔ́d tsɔʼə á mbi pó. 44Ńtíʼ ə́sóŋə á mbô pó ńgə́, “Lɛ̌ mənu maŋ nə ə́sóŋ nə́ áwɨ́ əghâ pɛn nə ḿbɛ́d nə́ ńchîə. Anuə atsəm pə́ nə ŋ́ŋwaʼlə̂ nə́ ńté mə á mə́m pənoŋkə pə́ Mosisə, nə́ aŋwaʼlə məntúmə́sê pópə aŋwaʼlə Salmsə, á yǐ ə́shib lɔgə̂ aliʼə́.”

45A tíʼ ńdánə ńtsɔ́ʼə atûə azɔ́b ńgə́ pó zóʼə atséebə Əsê. 46A sóŋə á mbô pó ńgə́, “Lɛ̌ anu pə́ nə́ ŋ́ŋwaʼlə̂ nə́, Yi ńtsəʼ nə́ a yǐ shib ńjɨ́ ngə́ʼə, əlě teelə́ ə́ ghə́ laŋə̂ a júmnə á nəwûə, 47ńtíʼ ńdaŋ nə́ əlɛ́n əyí, ḿbyádnə ə́sóŋə anǔəsê ńgə́ pɨ pə́ kwúblə məntɨ́ mɔ́b, ḿmɛdtə̂ pətəpɔŋ pɔ́b ńjî ńgə́ Əsê a yǐ ńdəgnə̂ əfankəmə́nu əpɔ́b, ńchúʼə á Jɛlusalɛm ńtíʼ ńgɛn ńkoʼ nə́ mbî ntsəmə. 48Pɨ jɨ́ mənu məənə́, ńkə́ ḿbí ńgə́ lə́ ndə̌ŋdəŋə́. 49Maŋ yǐ túmə ajú páʼ tǎ mə a laʼnə̂ nə́ á mbô pəənə́, lə́, pyáb nə́ á Jɛlusalɛm tə mətɨ mə́ yǒ ńdǒo á nəpó ńtsóolə á mbɨ pəənə́.”

Ndzaŋ Yeso a nə Ńkɔ́ʼ nə́ Ńgɛnə̂ á Nəpóolə

(Mag 16.19, 20; Məf 1.9-11)

50Yeso a lɔgə̂ ághɔ́b ə́fɛ́d pó po láʼ ńgɛnə̂ á Bɛtani, a ŋáŋkə mbô míə atǐ ə́fɛ̂ mbwɔ́dnə nə́ pó. 51Ndzaŋə a nə ńtə́ nə́ ə́fɛ̂ mbwɔ́dnə nə́ pó lə́, a nə ḿmɛdtə̂ ághɔ́b pə́ tíʼ ńdɔgə̂ yí ńkɔ́ʼ ńgɛnə̂ á nəpóolə. 52Pó ghóʼkə yí, məntɨ́ mɔ́b mə́ lwɛ́nkə nə́ tə́kɔʼə akɔŋtə, pó tíʼ ḿbəənə̂ á Jɛlusalɛmə. 53Pó kə̈ zá ńchîə tsɔʼə Tə́kɔʼndɛ̂sê ńgóʼkə Əsê.

Currently Selected:

Lukasə 24: azo

Highlight

Copy