Matyo 11
11
Məntú mə́ Jɔn Əfɛ̂nkǐə
(Luk 7.18-35)
1Ndzaŋə ándó Yeso a nə məgtə̂ nə́ á mə́ tə́gtə nə́ ngaŋə́zoŋə́ndzəm əjí zə̂ ntsɔb pɛ̌ lə́, ə́fɛ́lə aliʼ yi wɨ́ ńgɛnə̂ mə́ zéʼkə nə́ kə́ sóŋə anǔəsê á mə́m pətɔ̂ŋ pɔ́b pə́ páatə nə́ aliʼ yə́ wə́. 2Əghâ ándó Jɔn əfɛ̂nkǐə a nə ńchî nə á nkáʼə atsáŋ ńdzóʼ mənu Yeso a ghɛd nə́ lə́ ńtíʼ ńtú ngaŋə́zoŋə́ndzəm əjíə á mbô yə́. 3Ńgə́ pó ghɛn ḿbítə yí ńgə́, “gho lə́ ŋwu páʼ a nə chî nə́ mə́ yǐ nə́ lə́, kɨ pəg tə́ ḿbyáabə ŋwu ndaʼə?”
4Yeso a kwěe ághɔ́b ńgə́, “ghɛn nə́ ə́fiʼtə̂ a Jɔn nə́ anu nə́ zóʼ nə́ ńkə́ ńdzə́ənə. 5Pəfəg pə́ zɨ́ əliʼə́, pəkɔ́ŋə́sê pə́ nyinə̂, pə́ tsóʼ ngaŋ nkaʼ, əkə̌tû ə́ zóʼ əliʼə́, pə́ júmkə pəkwûə á nəwûə, pə́ kə́ ə́sóŋə anǔəsê á mbô pəpóŋə. 6Mbwɔ́dnə ə́ chîə á mbô ŋwu páʼ atûə ajíə á kě nə̈ koʼlə̂ ńté mə pô!”
7Ndzaŋə ándó ngaŋə́zoŋə́ndzəm Jɔn nə ńtə́ nə́ ńgɛnə̂ lə́, Yeso a chúʼə mə́ tsáb nə́ ńté Jɔnə á mbô pɨ pə́ nə ńchî nə́ aliʼ yi ə́wɨ́, ə́sóŋə ńgə́, “Á nə ḿbə́ əghâ pɨ nə ńgɛn nə́ á kɔŋ məŋkwâʼlə̌ lə́, pɨ nə ńkwaŋ ńgə́ pɨ yǐ zɨ lə́ akə̂? Akəkaʼ páʼ kəfəələ á chiʼ nə́? 8Ńchî ə́lɨ́d pó tə ḿbə́ pɨ nə ńgɛn lə́ mə́ zɨ́ nə́ akə̂? A ŋwu páʼ a wê nə́ ətsəʼ pi əshîʼnə? Ngá, pɨ pö wê nə́ ətsəʼ pipə əshîʼnə pö chîə lə́ á mə́m məntɔ́ʼ mə́ pəfo. 9Fiʼtə̂ nə́ mə, pɨ nə ńgɛnə̂ apeŋ lə́ á mə́ zɨ́ nə́ akə̂? Á ntûsê? Lə́ ndə̌ŋdəŋə́. Mäŋ fiʼtə̂ áwɨ́ ńgə́ nə zə́ənə a ŋwu páʼ a tsɛ nə́ ntûsê.” 10Lə́ ŋwu páʼ pə́ nə ŋ́ŋwaʼlə̂ nə́ ńté yí ńgə́, “Mäŋ yǒ tú ntúmə mə ə́ kwá mbi əzo ńgɛn ńtsoŋkə̂ ndúmə á mbô gho.” 11Ndə̌ŋdəŋ, maŋ fiʼtə̂ áwɨ́ ńgə́ pə́ kě ŋwu tsə̌ kə́ pîə páʼ a tsɛ nə́ Jɔn pô. Chigə mɔ́ kə́nyaŋ ŋwunə á mə́mə anuə nəfoonə nəpóolə a tsɛɛlə̂ yə́. 12Ə́fɛ́d nə́ ndɛd Jɔn əfɛ̂ nkǐ tə ńkoʼ nə́ əghâ nə́, anuə nəfoonə á nəpóolə á chîə á mə́m tə́kɔʼ ngə́ʼə, ngaŋə́fɛ̂ngə́ʼ ə́ kwáalə á zɨ́d nə́ mətəənə. 13Məntúmə́sê tsɔʼə mətsəmə, pópə pənoŋkə pə́ Mosisə kə sóŋə anu ńté anuə nəfoonə nəpóolə, tə ńkoʼ nə́ ndɛd Jɔnə a nə ńgyǐ nə́. 14Lə́ mbɔʼ nə kɔŋə̂ mə́ pí nə́, Jɔn lə́ Elayija wə̂ páʼ pə́ nə sóŋ nə́ ńgə́ a yǒ yǐ lə́. 15Ŋwu páʼ a túg nə́ mətôglə a zóʼə.
16Mbɔʼ maŋ fiʼkə̂ pɨ pə́ ngoʼ pɨ lə́ nə́ akə̂? Pó chî lə́ ándó kə́yé ŋwu páʼ pó náanə nə́ aliʼə́ məta ńtíʼə ə́fóŋnə ngaŋmə́ko əzóobə́. 17Pəg kə póʼ ndəg mɔ̂ məngyě pɨ pə̂ ńkě pɛ́n pô, pəg kə́ ńdzɔb mənkǐ mə́ nəwûə, nə́ pə̂ ńkě kyéŋ pô.
18Jɔnə a nə ńgyǐ ńkě ajú tə́ ńjîə pô ńkě kə́ ńtə́ ńnô pô, pə́ sóŋ ńgə́ “a túgə pɛ̌sê.” 19Mɔ́ Ŋwunə a pɛn ńgyǐ ńtə́ ńjîə ńkə́ ńtə́ ńnô, pə́ sóŋ ńgə́, “lə́ ngaŋ lwaʼə, ḿbə́ apɛ̌ləmə́loʼə, ńkə́ ḿbə́ ngaŋəko ngaŋə́kwáalə́ nchubə aláʼ pópə ngaŋə́ghɛlə təpɔŋ.” Pə́ jîə ayáŋə Əsê lə́ ńdaŋ lə́ nə́ mənu páʼ a ghɛd nə́.
Ngə́ʼ ə́ Chîə Atû Əláʼ ə́ kě nə́ Kwúblə pô
(Luk 10.13-15)
20Yeso a tíʼ ńchúʼə á mə́ kwantə̂ nə́ əláʼ ətsəm páʼə á nə ḿbɛ́d nə́ tə ńgɛd əkɨʼnəmə́nu ə́wɨ́ ńté ńgə́ pó nə ńkě məntɨ́ mɔ́b kwúblə ə́fɛ́lə á mə́m təpɔŋ əghɔb pô. 21“Kolazin, ngə́ʼ yi ngweŋ ə́ chîə á atû pəənə́, Bɛdsada, ngə́ʼ yi ngweŋ ə́ chîə á atû pəənə́. Əkɨʼnə mənu páʼ pə́ nə ńgɛd nə́ á mbô pɨ lə́, mbɔʼ pə́ nə ńgɛd lə́ á mbô pɨ pə́ Tayile pó Sidɔn, tə ḿbə́ pó nə ńkɔ́g ńkwúblə məntɨ́ mɔ́b ə́fɛ́lə á mə́m təpɔŋ əghɔb tə ńgwê ətsəʼ ngə́ʼ ńkə́ ə́fuʼə̂ apûə. 22Lə́ mäŋ fiʼtə̂ áwɨ́ ńgə́, Əsê a yǒ túgə akóolə́mə́lə́ŋə á mbô Tayile pó Sidɔnə á alě asáʼə́məsáʼ tsɛɛlə̂ áwə́ənə́. 23Lə́ pɨ ngaŋ Kapanawum, pɨ nə ńtə́ ńdoonə̂ á mə́ kɔ́ʼkə nə́ mbɨ əzəənə́ á nəpó? ngá, pə́ yǐ maʼə̂ áwə́ənə́ á mə́mə aláʼə pəkwû pə́ əsê. Təmbɔʼ pə́ nə ńgɛd əkɨʼnəmə́nu pə́ nə ńgɛd nə́ á mbô pɨ lə̂ á Sodom, tə ḿbə́ wə́ələ́ á pěʼ ḿbɛ́d tə ńkoʼ ə́sɛ̂nə̌. 24Lə́ mäŋ fiʼtə̂ áwɨ́ ńgə́ Əsê a yǒ kó mələ́ŋ mə́ pɨ pə́ Sodomə alě asáʼə́məsáʼ tsɛɛlə̂ áwə́ənə́!”
Yǐ nə́ á Mbô Maŋ Ńjwitə̂
(Luk 10.21, 22)
25Əghâ yi wɨ́, Yeso a sóŋ ńgə́, “Tǎ, mäŋ fɛ̂ ndǎ əzo, gho páʼ gho túg nə́ nəpó pó ndəsê ńté ńgə́ gho lyáŋ mənu məənə́ á mbô pɨ pə́ yáŋ nə́ ńkə́ ńjî ənuə, ńtíʼ ńkyaʼə̂ mə́ələ́ á mbô kə́yé pɔ̂nkə̂. 26Ndə̌ŋdəŋə́ ḿbə́ Tǎ, lə́ ndzaŋə á nə ḿbɔŋ nə́ gho ńgə́ gho ghɛd ə́lə́ələ́.
27Tǎ mə a fɛ̂ ajúmə atsəmə á mbô maŋə; ŋwu tsə̌ a kě mɔ́ jî pô tə ńdéʼtə Tǎ, ŋwu tsə̌ a kě Tǎ kə́ ńjî pô tə ńdéʼtə móonə, ḿbɨ ḿbá pɨ páʼ móonə a tsɔ́ʼ nə́ ńgə́ mbɔʼ a nəələ̂ yə́ á mbô pó.
28Yǐ nə́ á mbô maŋə pɨ pətsəm páʼ pɨ̈ faʼ nə́ tə́shúnə́, apeʼə a kə́ ńtə́ ńdɛlə̂ áwə́ənə́, maŋ yǐ ghɛd nə́ jwitə̂. 29Wê nə́ akəʼlə́ mə á ndě pəənə́, ńdzéʼə á mbô maŋə; ńté ńgə́ maŋ pwɔ́dnə ńkə́ ńtsóokə mbəəmə mə. Pɨ yǐ laŋ ə́lɨ́d ntɨ́ əwɨ́ ə́ tíʼ ńjwitə̂. 30Ńté ńgə́ akəʼlə́ mə á pwɔ́dnə, apeʼə mə á kə́ ńdzaŋkə̂.”
Currently Selected:
Matyo 11: azo
Highlight
Share
Copy
Want to have your highlights saved across all your devices? Sign up or sign in
