Matyo 15
15
Ndzeʼkə́ Pətǎ pə́ Pətǎ
(Mag 7.1-13)
1Pəfalasi pətsə́ pópə ngaŋə́zéʼkə pənoŋkə tíʼ ńdǒ Jɛlusalɛm ńgyǐ ḿbítə Yeso ńgə́, 2“Lə́ ghɛlə̂ akə̂ ngaŋə́zoŋə́ndzəm əzô kě pənoŋkə páʼ pətǎ pə́ pətǎ pə́g pə́ nə fɛ̂ nə́ á mbô pəg zoŋə̂ pô? Pó kě mbô mɔ́b sogə̂ ḿbɔŋə̂ jîə məjî pô!”
3Yeso a kwěe ághɔ́b ńgə́, “Lə́ kə́ ńgɛlə̂ akə̂ nə́ kě məntəgə́ mə́ Əsê zoŋə̂, ńdzoŋə̂ pə́ mbóomə aláʼ əwəənə́? 4Ńté ńgə́ Əsê a nə sóŋ ńgə́, ‘Ghóʼkə tǎ əgho pó mǎ əgho,’ ńkə́ ḿbɨ́ ńkə́ sóŋ ńgə́, Ŋwu ntsəm páʼ a tsáb nə́ təpɔŋ ńté tǎ əyǐ kəənə mǎ əyǐ pə shib ńjwítə yə́. 5Lə́, nə́ pə́ ńdzéʼkə ńgə́ mbɔʼ ŋwunə túgə ajú mbɔʼ a fɛ̂ nə́ tǎ əyǐ kɨ mǎ əyǐ ḿbə́ ḿbɨ fiʼtə̂ ághɔ́b ńgə́ a pɛ́dtə ńdaʼnə̂ mə́ fɛ̂ nə́ á mbô Əsê, 6lə́ələ́ pə́ ńgə́ a pěʼ ńkě chîə mə́ ghóʼkə nə́ tǎ əyǐ nə́ ajú yə wɨ́ pô. Lɛ̌ ndzaŋ nə myaʼ nə́ məntəgə́ mə́ əsê ńdzoŋə̂ a mbóomə aláʼ əwɨ lə̂. 7Pɨ ngaŋmə́fɨg! Izaya a nə ńkoʼnə̂ páʼ a nə fɛ̂ nə́ nkɨ Əsê ńté áwɨ́ ńgə́!
8Pɨ pɨ pə̈ ghóʼkə mə lə́ nə́ əkwub ntsoolə,
lə́ məntɨ́ mɔ́b mə́ pə́ ńchî ndi sag nə́ maŋə.
9Pó ghóʼkə mə lə́ tsɔʼə kətaŋə,
pö zéʼkə lə́ pənoŋkə páʼ ŋwunə a noŋkə̂ nə́ ándó pə́, pə́ pə́ pənoŋkə pə́ Əsê lə̂.”
Mənu Mbɔʼ mə́ Ghɛd Ŋwunə a kě a Mbi Əsê Ŋwaʼ pô
(Mag 7.14-23)
10Yeso a tíʼ fóŋə apoŋə pɨ zə̂ á yǐ ḿbáatə yə́ a sóŋə á mbô pó ńgə́, “Jwə́ʼtə nə́ ńtsoŋkə̂ ńdzóʼə, atûə azə́ənə́ a léenə! 11Ajú páʼ ŋwunə a jî nə́ a ntso yí, lə́ kě zə́ələ́ ä ghɛd nə́ ńgə́ kɔ a ŋwaʼə̂ a mbi Əsê pô. Ajú páʼ ä ghɛd nə́ ńgə́ kɔ ŋwunə a ŋwaʼə̂ a mbi Əsê lə̂ mənu páʼ mə̈ fɛ́d nə́ a ntso yə́.”
12Ngaŋə́zoŋə́ndzəm əjí tíʼ ńgyǐəə á mbô yí ḿbítə ńgə́, “gho jî ńgə́ pə Falasi pə́ pěʼ ńté ndzaŋ ndě nə anu gho pěʼ nə́ ə́sóŋ lə́?”
13Yeso a kwěe ághɔ́b ńgə́, “Atǐə atsəm páʼ lə́ nə ńkě nə́ Tǎ mə nəpó pǐ pô, pə́ yǐ tsɔ́ʼə ázə́ələ́.” 14Mɛdtə̂ nə́ ághóobə́! Lə́ pəfəg páʼ pə́ kwá nə́ mbi pəfəgə́. Təmbɔʼ əfəgə́ a kwá mbi əfəg pó yí pətsəm wǔəə á apɛ́lə.
15Pita a sóŋ ńgə́, “Fiʼtə̂ áwə́g nə́ anu páʼ atséebə́nə́múʼ zəənə́ ä sóŋ nə́.”
16Yeso a pítə ághɔ́b ńgə́ “Əpɨ́ ətû kě kə́ ńdá? 17Nə jî ńgə́ ajúmə atsəmə a kwú nə́ a ntso ŋwu a ghɛnə̂ nəpəm yí ńtíʼ fɛ́lə a mbɨ yí? 18Lə́ mənu mətsəm mə̈ fɛ́d nə́ a ntso ŋwu mə̈ fɛ́lə lə́ a ntɨ́ yə́. Ḿbə́ lə́ mənu mə̈ ghɛd nə́ ŋwunə a kě a mbi Əsê ŋwaʼə̂ pô. 19Ńté ńgə́ əkwaŋ mənu təpɔŋ ətsəm ə́ fɛ́lə lə́ a ntɨ́ ŋwunə ńtíʼə ńgɛlə̂ ńgə́ a jwítə, ńjîə mə̂ghabə, nyinə̂, ńdzəələ̂, ńtsɨ́d ntsəələ atû ŋwunə, ńtsəŋ əlɛ́n ŋwunə. 20Lɛ̌ mənu mə̈ ghɛd nə́ ŋwunə a kě mbi Əsê ŋwaʼə̂ pô. Lə́, mə́ jî nə́ məjî tə sog mbô mə́ kě ghɛlə̂ ńgə́ kɔ ŋwunə a ŋwaʼə̂ a mbi Əsê pô.”
Mbimə́ Məngyě Yitsə̌
(Mag 7.24-30)
21Yeso a fɛ́lə aliʼ yi wɨ́ ńgɛnə̂ mboʼ Tayile po Sidɔnə 22Məngyě kanan yitsə̌ a nə ńchî nə́ mboʼ wɨ́d wə̂ a yǐəə á mbô yí ńkyéŋ sóŋ ńgə́, “Kó mələ́ŋə mə Mmaʼmbî! Mɔ́ Debid! Pɛ̌sê a chîə á mbɨ móonə mə yi məngyě ḿbyádnə̈ ńjwaʼə̂ yə́.”
23Lə́, Yeso a pə́ ńkě yí kwíʼnə ńkwěe pô. Ngaŋə́zoŋə́ndzəm əjí ə́ pə́ ńgyǐ ḿbóʼmbô nə́ yi ńgə́, “Kəmə̂ yə́ a ghɛnə̂! a tə ńdzoŋə̂ ńkyéŋə ńjwaʼ əliʼə́ á ndzəm pɛnə̂!”
24Yeso a kwěe ághɔ́b ńgə́, “Pə́ nə ńtúmə mə lə́ tsɔʼə á mbô məmbéŋ mə́ ndzɛd mə́ Islɛl mə́ péŋ nə́.”
25Məngyě yi wə́ a yǐ ńkwə́ʼtə á mbi Yeso ə́sóŋ ńgə́, “Mmaʼmbî, kwáalə mə!”
26Yeso a kwěe yí ńgə́, “Á kě koʼnə̂ á mə́ kwá nə́ məjî mə́ pɔ̂nkə̂ ḿmaʼ nə́ məngwû pô.”
27Məngyě yi wə́ a sóŋ ńgə́, “Lə́ anuə ḿbə́ Mmaʼmbî, lə́ á lǒo məngwû, mə́ jî əpag məjî ə́ lǒo nə́ á ndu təpɛlə tǎ əghɔb ńgwukə̂.”
28Yeso a tíʼ ńkwěe yí ńgə́, “Məngyě nə́ gho túgə tə́kɔʼ mbimə́! anu gho lɔ nə́ lə́, pə́ yǐ faʼə̂ ázə́ələ́ á mbô gho.” Tsɔʼə əghâ yi wɨ́, mɔ́ əyǐ wə̂ a yáŋə.
Yeso a Tsóʼ Pɨ pi Nɨ́ nə́
29Yeso a fɛ́lə aliʼ yi wɨ́ ńdaŋə̂ á mbɛnə́ mə́ nkǐ Galili ńtíʼ ńkɔ́ʼə á ndu nkwəənə ńnáanə á ndəsê. 30Apoŋə pəənə a yǐəə á mbi yí nə́ pəkə́neʼə́ntá pópə pəfəg, nə́ pəkɔ́ŋə́sê, nə́ pəchípóʼ, ḿbɨ ḿbə́ nə́ ntê pəghɔ pətsəm ńnoŋkə̂ məko yə́ a tsóʼə ághóobə́. 31Á nə ńkɨʼnə̂ ŋwu ntsəm ndzaŋ pó nə ńjɨ́ nə́ pəchípóʼ pə́ tə́ ńtséebə, pəkɔ́ŋə́sê pə́ yáŋə, pəkə́neʼə́ntá pə́ tə ńnyinə̂, pəfəg pə́ tə́ ńjɨ́ əliʼə́. Po tíʼ ńgóʼkə Əsê pɔ́ pə́ Izlɛlə.
Yeso a Zə́g Pɨ Tɔsə Nəkwa
(Mag 8.1-10)
32Yeso a fóŋ ngaŋə́zoŋə́ndzəm əjí ə́sóŋ nə́ pó ńgə́, “Maŋ kó mələ́ŋ mə́ pɨ pəənə́. Pə̌gpo pɛ́d tə ńchî lɛ̌ əlě teelə́ ajúmə á pə ńkě ə́wɨ́ chî təmbɔʼ pó jî pô. Maŋ kě kɔŋə̂ mə́ ghɛd nə́ pó ghɛn nə́ nji pô, tə ḿbə́ mbɔʼ pó yǒ ńgwǔ njiə alaŋə́.”
33Ngaŋə́zoŋə́ndzəm əjí ə́ pítə yí ńgə́, “Pɛn yǐ lɔg məjî lə́ ə́fó á kɔŋ məŋkwâʼlə̌ ghɛn mbɔʼ pə́ zə́gə apoŋə pɨ zɨ ə́wə́?”
34Yeso a pítə ághɔ́b ńgə́, “Nə túgə apéenə məkálə́ ntáʼ zɛ́n ə́shíʼə́?” Pó kwěe yí ńgə́, “Ntáʼ zɛ́nə asaambɛ̂ pópə pɔ́ pə́ ntáʼ pə́ əshûə.”
35Yeso a tíʼ ńgɛd apoŋə pɨ zə̂ a náanə á ndəsê. 36A tíʼ ńkwáalə apá zə̂ ntáʼə asaambɛ̂ pópə əshû zə̂ ə́fɛ̂ ndǎ á mbô Əsê ḿbagtə̂ ájɨ́d ə́fɛ̂ á mbô ngaŋə́zoŋə́ndzəm əjí pó tíʼ ə́fɛ̂ á mbô pɨ pipə wə́. 37Pó pətsəm jî tə ńdzɛ́d, ngaŋə́zoŋə́ndzəm əjí ə́ tíʼ ńdagtə̂ əpag ə́ nə ḿbɛ́d nə́ ə́ lwɛ́nkə mənka mɛ́n asaambɛ̂. 38Mbyâŋnə ə́ nə ńjî nə́ məjî mimə wɨ́ lə́ nə ḿbə́ pó tɔsə nəkwa, lə́ pə́ pə́ ńkě pəngyě pópə pɔ̂nkə̂ sháŋ pô.
39Yeso a tíʼ ńgɛd apoŋə pɨ zə̂ a ghɛnə̂, a kwúnə á mə́mə aŋkənúʼə́ ńgɛnə̂ mboʼ Magadanə.
Currently Selected:
Matyo 15: azo
Highlight
Share
Copy
Want to have your highlights saved across all your devices? Sign up or sign in
