Magə 2
2
Yeso a Tsóʼə Nkweglə Yitsə̌
(Mat 9.1-8; Luk 5.17-26)
1Əlěmbî pətsə́ ə́ laŋ, Yeso a pɨ ḿbəənə̂ á Kapanawum, nkɨ ə́ nyinə̂ á mə́mə aláʼə atsəm ńgə́ a pɨ ńchîə aláʼə. 2Pɨ pə́ nɨ́ nə́ pə́ tíʼ ńgyǐ ńkyeetə̂ tə aliʼə́ á kě mə́m ndɛ̂ yi wɨ́ pɨ ńchî pô, tsɔʼə á ntsǒndɛ̂ yi wə́ apeŋ, aliʼə́ á nə ńkě ə́wɨ́ pɨ ḿbɛ́d pô. Yeso a tíʼ sóŋə Anǔəsê á mbô pó. 3Pɨ pətsə́ pɛ́n nəkwa pə́ peʼə̂ nkweglə yitsə̌ ńgyǐ nə́ yə́ á mbô Yeso. 4Ndzaŋə ándó ndú ə́ nə́ ńkě nə́ ə́wɨ́ chî təmbɔʼ pó ghɛn nə́ yi ńtégə Yeso, ńté ŋwu məsɔŋə́ á nə́ ńchî nə́ aliʼ yí wɨ́ lə́, pó kɔ́ʼə atûə nəloŋ nə́ ndɛ̂ ŋ́ŋáʼ ngɔ́lə atû Yeso, ńtíʼ ńtsóokə apaʼ páʼ nkweglə wə̂ a nə́ noŋnə̂ nə́ ə́wə́ á mbi Yeso. 5Yeso a jɨ́ mbimə́ əzɔb ńtíʼ sóŋ nə́ nkweglə wə̂ ńgə́, “Móonə mə, pə́ ləgnə̂ pətəpɔŋ pô.”
6Ngaŋə́zéʼkə pənoŋkə pətsə́ páʼ pó nə́ náanə nə́ aliʼ yi wɨ́ pó tíʼə ńkwaŋə̂ á məntɨ́ pó ńgə́, 7“Lə́ ghɛlə̂ akə̂ ŋwu nə́ a tséebə lɛ̌? Ä zɔmtə̂ lə́ Əsê! mbɔʼ əwə a ləgnə̂ pətəpɔŋ tə ńdéʼtə Əsê?”
8Tsɔʼə əghâ yi wɨ́ Yeso a jîə akwaŋə anuə á chî nə́ á məntɨ́ pó, ńtíʼ sóŋə á mbô pó ńgə́, “Lə́ ghɛlə̂ akə̂ nə́ kwaŋ mənu mɨ lɛ̌ á məntɨ́ pəənə́? 9Lə́ pwɔ́dnə zə́ənə́! á mə́ sóŋ nə́ á mbô nkweglə ńgə́, ‘Pə́ ləgnə̂ pətəpɔŋ pô,’ kəənə á mə́ sóŋ nə́ ńgə́, ‘Lǒo á əsê, ḿbyáanə mə́ta əgho ńnyinə̂?’ ” 10Maŋ yǐ nəələ̂ á mbô pɨ ńgə́, “Mɔ́ Ŋwunə a túg mətəənə á ndu mbiə á mə́ ləgnə̂ nə́ pətəpɔŋə.” Ńtíʼ ə́sóŋə á mbô nkweglə wə̂ ńgə́, 11“Maŋ sóŋə á mbô gho, lǒo á əsê ḿbyáanə mə́ta əgho ńkwə̂ á nchîndɛ̂!”
12A lǒo á əsê, tsɔʼə əghâ yi ə́wɨ́, a pyáanə mə́ta əyǐ ńnyinə̂ á mbi pó pətsəmə; anu yə́ wə́ á nə́ ńkɨʼnə̂ ŋwu ntsəm pó tíʼə ŋ́ŋáŋkə Əsê ə́sóŋə ńgə́, “Pəg kě ntê anuə ándó zɨ kə́ zə́ənə pô.”
Yeso a Fóŋə Lebi
(Mat 9.9-13; Luk 5.27-32)
13Yeso a pɨ ḿbəənə̂ a nkaŋ əfooghɨ Galiliə, apoŋə ŋwu məsɔŋə́ a yǐəə á mbô yə́, a tíʼ ńchúʼə á mə́ zéʼkə nə́ ághóobə́. 14Ndzaŋə a nə ńtə́ nə́ ńnyinə̂ ńgɛnə̂ lə́, ńdzə́ənə Lebi mɔ́ Alfɔsə a náanə aliʼə́ kwáalə nchubə aláʼ yə́. Yeso a sóŋə á mbô yí ńgə́, “Zoŋə̂ mə” Lebi a lǒo á əsê ńdzoŋə̂ yə́.
15Əghâ ándó Yeso a nə́ ńtə́ nə́ ńjîə məjîə á ndɛ̂ Lebi lə́, ngaŋə́kwáalə́ nchubə aláʼ pópə ngaŋə́ghɛlə təpɔŋ tə nɨ́ ə́ nə ńtə́ ńjîə məjî pópə Yeso ḿbá ngaŋə́zoŋə́ndzəm əjíə, ńté ńgə́ pɨ pi nɨ́ nə́ pə́ nə ńdzoŋə̂ yə́. 16Ngaŋə́zéʼkə pənoŋkə pətsə́ páʼ pó nə́ ḿbə́ nə́ Pəfalasi ə́ jɨ́ ndzaŋ páʼ Yeso a nə ńtə́ nə́ ńjîə məjî pó ngaŋə́ghɛlə təpɔŋ ḿbá ngaŋə́kwáalə́ nchubə aláʼ lə́, ńtíʼ ḿbítə ngaŋə́zoŋə́ndzəm əjí ńgə́, “Lə́ ghɛlə̂ akə̂ a jîə məjî pópə ngaŋə́kwáalə́ nchubə aláʼ ḿbá ngaŋə́ghɛlə təpɔŋə?”
17Yeso a zóʼə atséebə azɔ́b ńtíʼ ńkwěe ághɔ́b ńgə́, “Pɨ páʼ pó tə́ nə́ ńtyantə̂ pə́ kě a ntsóʼ loonə̂ pô, lə́ loonə̂ pɨ páʼ pó tə́ nə́ ńgoonə̂. Maŋ kě yǐ lə́ á mə́ fóŋ nə́ pɨ pó tɨ́ nə́ ndə̌ŋdəŋ pô, maŋ yǐ lə́ á mə́ fóŋ nə́ ngaŋə́ghɛlə təpɔŋə.”
Apítə Ńté Achaʼtə́sênjiə
(Mat 9.14-17; Luk 5.33-39)
18Əghâ ándó ngaŋə́zoŋə́ndzəm Jɔn pó Pəfalasi ə́ nə ńtə́ nə́ ńgɛlə̂ Achaʼtə́sê nji lə́, pɨ pətsə́ pó yǐ ḿbítə Yeso ńgə́, “Lə́ ghɛlə̂ akə̂ ngaŋə́zoŋə́ndzəm Jɔn pópə ngaŋə́zoŋə́ndzəm Pəfalasi ə́ ghɛlə̂ achaʼtə́sênji, əzô ngaŋə́zoŋə́ndzəm pə́ ńkě ghɛlə̂ pô?”
19Yeso a kwěe ághɔ́b ńgə́, “Nə́ kwaŋ ńgə́ mbɔʼ ngaŋmə́ko tǎdndzɔʼə́ ghɛlə̂ achaʼtə́sênji páʼ tǎdndzɔʼə́ a chî nə́ pó po? Ndzaŋə ándó tǎdndzɔʼə́ a chî nə́ pó po lə́, təmbɔʼ pó kě ə́lɨ́d ghɛd pô. 20Lə́, ndɛd yǒ koʼ páʼ pə́ yǒ nə́ kwáalə tǎdndzɔʼə́ á mbô pó, pó tíʼ ńgɛlə̂ achaʼtə́sênjiə.”
21“Ŋwu tsə́ a kě apagə atsəʼ yə fï lɔgə̂ ńtɛ̂ atsəʼ yə lɛn ə́wɨ́ pô, təmbɔʼ a ghɛd ə́lɨ́d, apagə atsəʼ yə fî zə́ a yǐ ńtsɔ́ʼnə yə́ á mə́mə atsəʼ yə lɛn zə́ mbɨ ḿbeg ngɔ́lə atsəʼ yə lɛn wə́ ə́ gháʼ ńtsɛɛlə̂ ándó wɨ́d nə ńchî nə́. 22Ŋwu tsə́ a kě kə̈ ńtwáamə məloʼ mimə fî ńnéŋə á mə́m ngwub pə́ néŋ nə́ məloʼ ə́wɨ́ páʼ ə́ lɛn nə́ pô, mbɔʼ a ghɛd ə́lɨ́d məloʼ mimə wɨ́ mə́ yǐ sá ngwubə, ńtíʼ ńkwɛdnə̂, ngwub yi wɨ́ ə́ pə́gə zə́ələ́. Ngá, pə̈ néŋə məloʼ mimə fî lə́ á mə́m ngwub yi fîə.”
Apítə Ńté Alěláʼə́sê
(Mat 12.1-8; Luk 6.1-5)
23Á nə́ ḿbə́ Alěláʼə́sê yitsə̌ Yeso pópə ngaŋə́zoŋə́ndzəm əjí tə́ ńdaŋə̂ á mə́mə alíʼə ngəsáŋ yətsə́, ndzaŋə ándó ngaŋə́zoŋə́ndzəm əjí nə́ ńtə́ nə́ ńnyinə̂ á mbeelə́ lə́, ńchúʼə á mə́ lagtə̂ nə́ ətsoʼ ngəsáŋə́. 24Pəfalasi pó sóŋə á mbô yí ńgə́, “Zə́ənə, lə́ ghɛlə̂ akə̂ ngaŋə́zoŋə́ndzəm əzô ə́ faʼə̂ anu páʼ á kě nə́ koʼnə̂ á mə́ faʼ nə́ Alěláʼsê pô?”
25Yeso a kwěe ághɔ́b ńgə́, Nə́ kě kə́ fóŋə anu páʼ Debilə a nə́ ńgɛd nə́ əghâ páʼ nji nə́ ńdzáŋ nə́ yí pópə ngaŋə́ko əjí pó tə́ ńnáŋə məjîə á mə́ jî nə? 26Á nə́ ḿbə́ ndɛd páʼ Abyata a nə́ ḿbə́ nə́ Mbêsê yi Ngweŋ lə́, Debilə a kwúnə á ndɛ̂sê ńtwáamə apéenə məkálə́ pə́ nə fɛ̂ nə́ á mbô Əsê ńkɔ́lə yə́, páʼ noŋkə á nə́ nɨd nə́ ńgə́ mbɔʼ lə́ kɔ́d tsɔʼə Mbêsê. Debilə a nə mbɛn ńjî tə ńtû ə́fɛ̂ yətsə́ á mbô ngaŋmə́ko əjíə.
27Yeso a tíʼ ə́sóŋə á mbô pó ńgə́, “Pə́ nə́ ńtsoŋkə̂ Alěláʼə́sê lə́ a mbô ŋwunə, pə́ nə́ ńkě lə́ ŋwunə á mbô Alěláʼə́sê tsoŋkə̂ pô. 28Lə́ələ́ pə́ ńgə́ Mɔ́ Ŋwu lə́ mmaʼmbî lə́, ńkə́ ḿbə́ lə́ yə alěláʼə́sê.”
Currently Selected:
Magə 2: azo
Highlight
Share
Copy
Want to have your highlights saved across all your devices? Sign up or sign in
