YouVersion Logo
Search Icon

Magə 7

7
Ndzéʼkə Pətǎ pə́ Pətǎ
(Mat 15.1-9)
1Pəfalasi pópə ngaŋə́zéʼkə Pənoŋkə pətsə́ páʼ pó nə ńdǒo nə́ á Jɛlusalɛm pó tíʼ ńtɨ́ ńdíblə Yeso. 2Pó tíʼ ńjɨ́ ńgə́ ngaŋə́zoŋə́ndzəm Yeso yitsə̌ ə̈ jîə məjî nə́ mbô mə́ tə sogə̂, lə́ələ́ pə́ ńgə́ pó kě mɨ́d sog nə́ ndú Pəfalasi pó sóŋ nə́ ńgə́ pə́ sog pô.
3Ńté ńgə́ Pəfalasi pópə Pəjusə ə̈ zoŋə̂ lə́ noŋkə pətǎ pə́ pətǎ pɔ́b páʼə á sóŋ nə́ ńgə́: Mbɔʼ pó kě məjî jî tə ńdéʼtə pó sog mbô mɔ́b ndzaŋ páʼ noŋkə á nɨd nə́ pô. 4Mbɔʼ pó kwə̂ á məta, pó kě ajú jî pô, tə ńdéʼtə pó chwaglə̂ akwubə azóobə́. Pó kə̈ ńdzoŋə̂ pətsə́ pənoŋkə pə́ nɨ́ nə́ ándó mə́ sog nə́ məndɔ́ŋ pópə məkəŋ, nə́ əkáŋ páʼ pə́ tsoŋkə̂ nə́ nə́ atəənə́ kɔ́pa.
5Pəfalasi pópə ngaŋə́zéʼkə Pənoŋkə pó tíʼ ḿbítə Yeso ńgə́, “Lə́ ghɛlə̂ akə̂ ngaŋə́zoŋə́ndzəm əzô ə́ kě pənoŋkə páʼ pətǎ pə́ pətǎ pə́g pə́ nə́ fɛ̂ nə́ á mbô pəg zoŋə̂ pô? Pó kě mbô mɔ́b ə́sogə̂ ḿbɔŋə̂ jîə məjî pô!”
6Yeso a kwěe ághɔ́b ńgə́, “Ntú Əsê Izaya a nə ńkoʼnə̂ á mə́ ŋwaʼlə̂ nə́ mənu páʼ Əsê a nə sóŋ nə́ ńgə́ pɨ lə́ ngaŋmə́fɨgə. Pɨ lə́ ngaŋmə́fɨg tsɔʼə ndzaŋ páʼə a nə ŋ́ŋwaʼlə̂ nə́ ńgə́:
‘Pɨ pɨ lɛ pó ghóʼkə mə lə́ nə́ əkwub ntso əpóobə́,
lə́ məntɨ́ mɔ́b mə́ pə́ ńchî ndi ə́ sag nə́ maŋə.
7Pó ghóʼkə mə lə́ tsɔʼə kətaŋə,
pö zéʼkə lə́ pənoŋkə páʼ ŋwunə a noŋkə̂ nə́
ándó á pə́ pə́ pənoŋkə pə́ Əsê lə̂!’ ”
8“Pɨ myaʼ pənoŋkə pə́ Əsê ńtíʼə ńdzoŋə̂ pənoŋkə pə́ ŋwu mbîə.”
9Yeso a pɨ ə́sóŋə á mbô pó ńgə́, “Nə́ túg ndú yi əshîʼnə á mə́ myaʼ nə́ məntəgə́ mə́ Əsê ńjî ńgə́ nə́ tíʼə ńdzoŋə̂ pənoŋkə pə́ aláʼ pə́ənə́. 10Ńté ńgə́ Mosisə a nə sóŋ ńgə́, ‘Zóʼnə tǎ əgho pó mǎ əgho,’ lə́ ŋwu ntsəm páʼə a tsáb nə́ təpɔŋ ńté tǎ əyǐ kəənə mǎ əyǐ, pə́ shib ńjwítə yə́. 11Lə́ nə́ pə́ ńdzéʼkə ńgə́ mbɔʼ ŋwunə a túgə ajú mbɔʼ a lɔg ńkwáalə tǎ əyǐ kəənə mǎ əyǐ, ḿbə́ sóŋ ńgə́, ‘Lɛ̌ Kɔbanə’ (páʼə ä sóŋ nə́ lə́ ńgə́, lɛ̌ ajúmə Əsê). 12Lə́ələ́ pə́ ńgə́ nə́ kě pɨ ńchîə á mə́ mɛdtə̂ nə́ yə́ a faʼə̂ anu yətsə́ á mbô tǎ əyǐ kɨ mǎ əyǐ pô. 13Lɛ̌ lə́ ndzaŋ nə́ myaʼ nə́ atséebə Əsê ńté noŋkə aláʼ əwɨ nə̈ zéʼkə nə́ pɨ ə́wə́. Mənu mimə nɨ́ nə́ mə́ kə́ ńchî ə́wə́ ándó mɨ́d mɨ páʼ nə̈ faʼ nə́.”
Mənu mə̈ Ghɛd nə́ Ŋwunə a kě Ŋwaʼə̂ pô
(Mat 15.10-20)
14Yeso a tíʼ ə́fóŋə apoŋə pɨ zə̂ ngǎ yitsə̌ ə́sóŋə á mbô pó ńgə́, “Jwə́ʼtə nə́ anu mäŋ sóŋ nə́, atûə azə́ənə́ á kə́ ńchígə́ ńdá ə́wə́. 15Ajú tsə́ á kě ə́wɨ́ chî páʼə á lǒo nə́ á apeŋ mbɔʼ ŋwunə a jîə á ghɛd ńgə́ kɔ a ŋwaʼ pô. Ajú páʼə ä ghɛd nə́ ńgə́ kɔ ŋwunə a ŋwaʼ lə̂ mənu páʼ mə̈ fɛ́d nə́ á mə́m yə́.” 16Ŋwu ntsəm páʼə a túg nə́ mətôglə, a zóʼə.
17Əghâ ándó a nə mɛdtə̂ nə́ apoŋə pɨ zə̂ ńgɛnə̂ ndɛ̂ lə́, ngaŋə́zoŋə́ndzəm əjí pó pítə yí nə́ anu páʼə atséebə́nə́múʼ zəənə́ ä sóŋ nə́. 18Yeso a sóŋə á mbô pó ńgə́, “Nə́ kě ənu kə́ jîə ə́ tsɛ pətsə́ pɨ, nə́ kě jî ńgə́ ajûtsə́ á kě ə́wɨ́ chî təmbɔʼ á lǒo á ndzəmə apeŋ ńkwúnə á mə́m ŋwu ńgɛd ńgə́ kɔ ngaŋə a ŋwaʼ? 19Ńté ńgə́ á kě lə́ á ntɨ́ yí kwúnə pô, á kwúnə lə́ á nəpəm yí ńtíʼə fɛ́lə á mbɨ yə́.” (Yeso a lɔg ə́lɨ́d lə́, á mə́ sóŋ nə́ ńgə́ məjî mətsəm mə́ ŋwaʼə̂ á mə́ jî nə́.)
20A ghɛn nə́ mbiə á mə́ sóŋ nə́ ńgə́, “Ajú páʼə ä fɛ́d nə́ á mə́m ŋwu lə́ ajú páʼə ä ghɛd nə́ a kě ŋwaʼə̂ pô. 21Ńté ńgə́ əkwaŋ mənu təpɔŋ ətsəm ə̈ fɛ́lə lə́ á mə́m ntɨ́ ŋwunə ńtíʼə ńgɛlə̂ ńgə́ a jîə akwɛlə, ńdzəələ̂, ńjwítə, ńjîə mə̂ghabə. 22Ńtúgə tɔ́gndě nə́ ajúmə ŋwu ndaʼə, ńtúg ntɨ́ təpɔŋə á mə́ fɨg nə́ pəənə, ńgɛlə̂ mənu mə́ nəféŋə, mə́ ŋwéetə nə́ pəənə, mə́ tsəŋ nə́ əlɛ́n ŋwunə, akɔ́ʼkə mbəəmə, pó mə ghəənə̂ nə́. 23Mənu mə́ təpɔŋ mɨ mətsəm mə̈ fɛ́lə lə́ á mə́m ŋwu, ńtíʼə ńgɛlə̂ ngaŋə a kě ŋwaʼə̂ pô.”
Mbimə́ Məngyě Yitsə̌
(Mat 15.21-28)
24Yeso a fɛ́lə aliʼ yi wɨ́ ńgɛnə̂ á əlá aláʼə Tayile pó Sidɔnə, ńkwúnə á ndɛ̂ yitsə̌, ḿbə́ ńkě kɔŋ ńgə́ ŋwu tsə́ a jî ńgə́ a chî ə́wɨ́ pô, ndú yitsə̌ ə́ pə́ ńkě ə́wɨ́ chî mbɔʼ a lyáŋ mbɨ əjǐ pô. 25Məngyě yitsə̌ páʼə ajwiə təpɔŋ a nə ńchî nə́ á mbɨ mɔ́ əyǐ yi məngyě, a zóʼə anu ńté Yeso ńgyǐ ńgwǔəə á məko yə́. 26Məngyě yi wə́ a nə ńkě lə́ Jus pô, pə́ nə ḿbîə yi lə́ aláʼə Fonisya á chî nə́ Silya. A tíʼ ḿbóʼmbô nə́ Yeso ńgə́ a kəmə̂ pɛ̌sê á mbɨ mɔ́ əyǐ yi məngyě. 27Yeso a pə́ ńkwěe yí ńgə́, “Tíʼ pɔ̂nkə̂ pə́ jî tə́ ńdzɛ́d záʼə. Ńté ńgə́ á kě koʼnə̂ á mə́ kwá nə́ məjî mə́ pɔ̂nkə̂ ḿmaʼ nə́ məngwû pô.”
28Məngyě wə̂ a kwěe ńgə́, “Lə́ anuə ḿbə́ Tǎ,” lə́, á lǒo məngwû mə́ noŋnə̂ nə́ á nətɛ́n nə́ təpɛlə pó jî əpuʼ məjî mə́ pɔ̂nkə̂.
29Yeso a tíʼ sóŋə á mbô yí ńgə́, “Nə́ ntê akwe zɨ, mbɔʼ gho kwə̂ gho. Pɛ̌sê yi wə́ a fɛ́lə á mbɨ mɔ́ wə̂.”
30A tíʼ ńkwə̂ á ngyaʼ yí ńdzə́ənə́ mɔ́ əyǐ wə̂ a noŋnə̂ á əkwu páʼ pɛ̌sê wə̂ a pɛ́d nə́ tə ə́fɛ́lə á mbɨ yə́.
Yeso a Tsóʼə Ŋwu tsə́ Páʼə a nə Ḿbə́ nə́ Akə̌tû ńkə́ Ḿbə́ Chípóʼə́
31Yeso a tíʼ ə́fɛ́lə á əlá aláʼə Tayile, ńdaŋə̂ Sidɔn ńtsóolə á ndú Əfooghɨ Galiliə, ńdaŋə̂ mboʼ Dəkapoli 32Pɨ pətsə́ pó yǐ nə́ akə̌tûə, ŋwu tsə́ páʼə a nə̈ ńtsáb nə́ kə́káŋ, ńtíʼ ḿbóʼmbô nə́ Yeso ńgə́ a noŋkə̂ apô ajíə á ndu yə́. 33Yeso a tíʼ ə́fógə ŋwu wə̂ á mə́m ənɔ, ńdɔgə̂ yí ńgɛnə̂ aliʼ yitsə̌ tsɔʼə pó yí pə́ pɛ̌. Ńtíʼ ńnéŋ pəfî pə́ mbô píə á mətôglə yí, ńtwitə̂ mətwê ńkwumə̂ alə́əmə ají ə́wə́. 34Ńnáŋ nəpó, ńtíʼ ḿbyádnə ńtsámnə ə́sóŋ nə́ ŋwu wə̂ ńgə́, “Efata” (páʼə á sóŋ lə́ ńgə́, “ŋáʼnə!”)
35Tsɔʼə əghâ yí wɨ́ mətôglə mə́ ŋwu yi wɨ́ mə́ ŋáʼnə, alə́əmə ajíə á kyakə̂, a chúʼə á mə́ tsáb nə́ əshîʼnə. 36Yeso a kwantə̂ ághɔ́b ńgə́ kɔ pó fiʼtə̂ ŋwu tsə̌, lə́ ndzaŋə a ghɛn nə́ nə́ mbiə á mə́ kwantə̂ nə́ ághɔ́b lə́, lə́ ndzaŋ pó ghɛn nə́ nə́ mbiə á mə́ lyaʼtə̂ nə́. 37Anu yəwə́ á nə́ ḿbyádnə ńkɨʼnə̂ ŋwu ntsəm páʼə a nə ńdzóʼ nə́. Pó sóŋ ńgə́, “A faʼə̂ anuə atsəm əshîʼnə! A kə́ ńgɛlə̂ əkə̌tû ə́ zóʼ əliʼə́, pəchípóʼ pə́ tséebə!”

Currently Selected:

Magə 7: azo

Highlight

Share

Copy

None

Want to have your highlights saved across all your devices? Sign up or sign in

Video for Magə 7