Luk 17
17
Arazir kuraba, nɨghnɨzir gavgavim gasɨghasɨsi
(Matyu 18:6-7; 18:21-22; Mak 9:42)
1 #
Matyu 18:6-7; Mak 9:42 Iesus kamaghɨn uan suren gumazibav gei, “Gumazir nguazimɨn ikiava igharaz darazigh amima me arazir kurabagh amiba, mevzika! Me kuram iniam! Arazir kuraba guizbangɨra otifi, ezɨ arazir kurabagh amima da otivir gumazim, kɨ ghaze, Noka! Nɨ kuram iniam! 2A ikɨva borir katam arazir kuratam an akagham, kamaghɨn ia a inighɨva dagɨam an fɨrim ikeghɨva a isɨ ongarim mɨkɨnightɨ, an aremeghtɨ deragham. 3#Ofa Gami 19:17; Aghuzir Akaba 17:10; Matyu 18:15; Jems 5:19Kamaghɨn amizɨ ia deravɨra uari bagh gan.
“Egh nɨn aveghbuam arazir kuratam damightɨma, nɨ pamtem a mɨkɨm suam, nɨ da atakigh. Egh a navim giraghtɨma, nɨ an arazir kuraba gɨn amada. 4Egh a 7plan dughiabar arazir kurabar nɨ damighɨva, egh a 7plan dughiabar uamategh nɨ bagh izɨ kamaghɨn mɨkɨmam, ‘Kɨ navim gɨra,’ eghtɨ nɨ an arazir kuraba gɨn amadagh.”
Iesus nɨghnɨzir gavgavimɨn arazim mɨgei
5 #
Mak 9:24
Ezɨ aposelba kamaghɨn Iesus mɨgei, “Nɨ en nɨghnɨzir gavgavim damightɨ an ekefegh!”
6 #
Matyu 17:20; 21:21; Mak 9:23; 11:23 Ezɨ a kamaghɨn me mɨgei, “Ian nɨghnɨzir gavgavim suvigh zuravarim mastetɨn ovɨzitamɨn mɨn ikɨtɨma, ia temer kam mɨkɨm suam, ‘Nɨ uabɨ asigh egh biba sara mangɨva ongarimɨn uabɨ ekaragh,’ eghtɨ a ian akam baragham.”#17:6 Mastetɨn ovɨzim, a bar sufi.
Iesus ingangarir gumazimɨn arazim mɨgei
7Egha Iesus ua kamaghɨn mɨgei, “Ian tav ingangarir gumazitam an azenimɨn ingari o sipsipbar gari. Ingangarir gumazim azenibar ikegh izɨtɨma, eghtɨ a suam, nɨ izɨ daperagh damɨ? Puvatɨ. Ia kamaghɨn mɨgeir puvatɨ. 8#Luk 12:37Gumazir dapanim kamaghɨn mɨkɨmam, nɨ na bagh dagheba isamigh uan inim kegh da tuigh faragh na danightɨ kɨ dar amam, eghtɨ nɨ gɨn damɨ. 9A ingangarir gumazim amizir bizir kaba bagha a mɨnabagham, o puvatɨgham? Puvatɨ. 10#Matyu 25:30; Rom 3:12; 1 Korin 9:16-17; Filemon 1:11Ezɨ ia uaghan God damuasa ia mɨkemezir biziba ia bar dagh ami, egh ia suam, E pura ingangarir gumazir kuraba, ingangarir Ekiam e ganɨngiziba e pura dagh ami.”
Iesus 10plan gumazir lepa itiba akɨrizɨ me ua dera
11 #
Luk 9:51-52; 13:22; Jon 4:4 Iesus Jerusalemɨn ghuava, Samaria ko Galilin Distrighɨn tɨzimɨn zui. 12#Ofa Gami 13:46Egha a nguibar mamɨn aven zuima, 10pla lepa itir gumaziba a bato. Me mong saghon tuivighav ikia,#17:12 Lepan arɨmariar fomɨra Baibelɨn dughiamɨn ikezim ighara. Ezɨ datɨrɨghɨn itir lepan arɨmariam a igharaghav ami. Fomɨra ikezim, pura mɨkarzir ghurghurim gumazir namnabar otifi. Egha uaghan bizir igharaziba sara posi. 13#Ofa Gami 13:45-46tiarim akara an dei, “Iesus, Gumazir Ekiam, en apangkufigh.”
14 #
Ofa Gami 13:2; 14:1-32; Matyu 8:4; Luk 5:14 Ezɨ a men apigha kamaghɨn me mɨgei, “Ia mangɨva, uari isɨva Godɨn ofa gamir gumazibar akagh.” Ezɨ me me bagha ghua tuavir arɨzimɨn men mɨkarziba zuegha dera.
15Ezɨ men mav, uabɨn garima an arɨmariam gɨvazɨma a uamategha izava pamtemɨn Godɨn dia egha an ziam fe. 16Egha Iesusɨn suemningɨn boroghɨn nguazim girɨgha fuagha, Iesus a gamizir bizim bagha a mɨnaba. A Samarian gumazimra.
17Ezɨ Iesus kamaghɨn azara, “Ezɨ kɨ ti 10plan gumazir kaba akɨris, o puvatɨ? Ezɨ 9pla managh iti? 18Ezɨ Judan gumazitam ua iza, Godɨn ziam fe, o puvatɨ? Gumazir saghuiamɨn izezim uabɨra izava Godɨn ziam fe.”
19 #
Matyu 9:22; Mak 5:34; Luk 7:50 Egha Iesus kamaghɨn a mɨgei, “Nɨ dɨkavigh mangɨ. Nɨn nɨghnɨzir gavgavim nɨ gamizɨ, nɨ dera.”
God Bizibagh Ativamin Dughiam izam
(Matyu 24:23-28; 24:37-41)
20 #
Jon 3:3; 18:36 Dughiar mamɨn Farisin gumaziba Iesusɨn azara, “God Bizibagh Ativamin Dughiam manadɨzoghɨn izam?”
Ezɨ Iesus men akam ikaragha ghaze, “Ia oragh, God Bizibagh Ativamin Dughiamɨn arazaraziba ia uan damazibar dar ganighan kogham. 21#Mak 13:21; Luk 17:23; Rom 14:17Eghtɨ gumazitam kamaghɨn mɨkɨman kogham, ‘A kara,’ o ‘A muna.’ Ezɨ God Bizibagh Ativamin Dughiam, a ian navir averiamɨn aven iti.”#17:21 Gumazir maba kamaghɨn akar otevir kam giragha ghaze, “Ia oragh. God Bizibagh Ativamin Dughiam, ian aven iti.”
22 #
Jon 17:12
Egha Iesus uan suren gumazibav gei, “Dughiam izɨtɨma, ia Gumazamizibar Otarim izamin dughiam bagh gansɨ damuva avegham. 23-24#Matyu 24:23-27; Mak 13:21; Luk 17:21; 21:8Gumazamiziba ia mɨkɨmam, ‘Ara muna!’ o ‘Ara kara!’ Ezɨ ia fo, Gumazamizibar Otarim izamin dughiam an onɨmarimɨn mɨn taghtagham. Eghtɨma an angazangarim bar overiamɨn ruaghatevimning uagharam aningɨn tagham. Eghtɨ ia ivemar men akaba gɨn mangan markɨ. 25#Mak 8:31; 9:31; Luk 9:22A faragh bizir avɨriba bagh mɨzazim inigham. Eghtɨ datɨrɨghɨn dughiar kamɨn itir gumazamiziba an aghuagham.
26 #
Jenesis 6:5-8; 7:1-24; Matyu 24:37 “Ezɨ bizir Noan dughiamɨn otiviziba, da uaghan Gumazamizibar Otarim izamin dughiamɨn otivam. 27#Jenesis 7:6-24Gumazamiziba dagheba ko dɨpaba apava, uarir ikiava mamaghɨra ikia ghua, Noa uan kurimɨn ghuavanabozir dughiamɨn, aperiam iza bar me kuavareme.
28 #
Jenesis 18:20--19:25
“Ezɨ Lotɨn dughiamɨn kamaghɨra, gumazamiziba dagheba ko dɨpaba apava, dagɨaba bagha biziba amagava, dagh ivezava, dagheba oparava dɨpenibar ingari. 29Ezɨ Lot Sodom ataghizir dughiamɨn, avim ko dagɨar isiba amozimɨn mɨn overiamɨn ikegha sua izaghira bar moghɨra me kuavareme.
30 #
2 Tesalonika 1:7
“Gumazamizibar Otarim azenara izighiramin dughiamɨn, biziba uaghan kamaghɨram otivam. 31#Jenesis 19:17; 19:26; Matyu 24:17-18; Mak 13:15-16Eghtɨ dughiar kamɨn nɨ tina uan dɨpenimɨn pɨn itir avughsazir danganimɨn ikeghɨva, egha uan biziba ataghizɨ da aven iti, nɨ da bagh magɨrɨ da inian markɨ. Kamaghɨra, tina azenibar iti, a bizitam bagh nguibamɨn mangan markɨ. 32#Jenesis 19:26Nɨ Lotɨn amuim gɨnɨghnɨgh! 33#Matyu 10:39; 16:25; Mak 8:35; Luk 9:24; Jon 12:25Gumazamizir manam na bagh uan ikɨrɨmɨrim ateghɨva, uan ikɨrɨmɨrim iniam. 34#Matyu 24:40-41; 1 Tesalonika 4:17Kɨ ia mɨgei, dɨmagarir kamɨn taning uaning inigh mɨsiar vamɨra dakutɨ, God tav inighɨva tav ategham. 35-36Eghtɨ amizir pumuning uaning inigh maziaba rɨghɨrɨghtɨma, God tav inighɨva tav ategham.”#17:35-36 Baibelɨn fofozir gumazir maba ghaze akar otevir mam uaghan kagh iti. Akar otevir kam kamakɨn, “Gumazir pumuning azenimɨn ikɨtɨ, God aningɨn tav inigh egha tav ategham.” Nɨ deragh foghsɨ, Matyu 24:40ɨn gan.
37 #
Jop 39:30; Matyu 24:28 Ezɨ me an azara, “Ekiam managhɨra?”
Ezɨ a men akam ikaragha ghaze, “Gumazir kuaba managh iti naghɨn, taragiaba uari akuvagham.”
Currently Selected:
Luk 17: AruBib20
Highlight
Share
Copy
Want to have your highlights saved across all your devices? Sign up or sign in
The Bible in Aruamu: Old Testament and New Testament: © 2020 Pioneer Bible Translators
This work is licensed under the Creative Commons Attribution Share-alike 4.0 license. http://creativecommons.org/licenses/by-sa/4.0/
New Testament is a revision of: The New Testament in Aruamu: © 2004 Bible Society of Papua New Guinea and Pioneer Bible Translators
