Matyê 19
19
No yi Yěso pə̌ ndǎʼ ńté no lâa ndə̂
(Mks 10.1-12)
1Yěso lə ŋə́ mwo məntǎghʼ mbó pye tə nyér, ə́ fú cər paghʼə-ngoŋ Galilêi nkwâr, ə́ ndǎghʼ sʉ̂ yi Yudêi ńdə́r, lə̂ cǒ njʉŋə́ nci Yuudêŋ. 2Lâʼ tsə̂ʉ nzəm zʉ́ tə nzáa. A kə̂u wó ngʉ́ pəghou nou páp shwítə.
3Ə pye lə̂ nou pəfalísia* tô záp, nkwáʼtə́ Yěso, ə́ ntúŋú yé ngô: «Tə ə́ pə́ ghíʼi ləpə̌ʉ* zághʼə pə̂i ńgó ŋuu zúŋ ngwě ye tə mbaa lə́ zarə́ no yi a fǎa zěi?» 4Yěso túŋu gháp ngô: «káa pei pə́ fûŋ ŋwaʼa Sê nzúʼ mo? Pə́ lə ŋwaʼá ngô: “Ə́ lə fú ləjǐ, Sê pôu ŋuu mbiŋə gháp məngyě.”» 5Pə́ lə kə́ ncí ŋwáʼá ngô: «Ŋuu mbiŋə ghʉ̌ fǎghʼ mbəʉ ye lə́ tə́ ye gháp mə́ ye, ə́ wǒ lǎr mbəʉ ye lə́ ngwě ye, gháp zʉ́ təmtə ńcʉ́ʼ tâʼ ŋuu. 6Ə̂ lêi yə́rə́, gháp zʉ́ kə́ mbyêr gháp pye pə́pwô, gháp cʉ́ʼ mbə́ pə́ tâʼ ŋuu. Ghíʼ ə́ kə́ mbə́ yə́rə́ lə̂, ŋuu-məsoŋ páa lə̂ fâghʼ zə̂u yi Sê lar mə́.»
7Pəfalísia* túŋú yé ngô: «Tə ńté hó, Mə̌usə̂i lə lâʼ ńgó pə ŋə́ ŋwaʼa lə́ məngyě lə̂ ndághʼ ńzǔŋ yé?» 8Yěso pwôr lə́ páp ngô: «Mə̌usə̂i lə lâʼ yə́rə́, ńté no a lə jwó ńgó pei tə̂i tû mbó Sê tə ə́ lei. Ə́ pə́ yə́rə́, a pə́i ńgó pei zúŋ pəngyě péi, mə́i ə́ lə fú ləjǐ káa pə̂ yé yə́rə́. 9Məŋ ndaʼ wéi, ŋuu lə̌i nzûŋ ngwě ye tə́ ghó a ghʉ məghap, ə́ nzôʼ cǒ, mə́i ngaŋ ghʉ gháʼá məghap.»
10Ngaŋə-jyêʼ-no Yěso* ghʉ ndáʼ lə́ zʉ́ ngô: «Ə́ lə̌i mbə́ yə́rə́, mə́i mboŋə́ ghíʼ mboʼ pə́ nyâŋ tə́ zôʼ.» 11Yěso pwôr lə́ páp ngô: «Pye pə́tsəm lə̂ kâa kûʼ gháp lə̂ mbə́i yo no. Lə́ Sê kə̌ mə́ ngʉ́, ə́ có ntâʼ pye kuʼ mə́u. 12Məzə̂u mi ə́ ghʉ pye nyâŋ tə́ zôʼ pə́ tə nzáa: Ə́ wo lə́ pəcó pye, káa gháp kûʼ gháp lə̂ nzóʼ tə fú pə̂ leʼé lə́jí, ə́ ngwó lə́ pəcó, mə́i pye-mə́soŋ lə́ lə ghʉ̌, mbóu ngwǒ lə́ pəcó, mə́i gháp lə pə́i lə̂ ngʉ́ yə́rə́, ńté no Ləfou Sê*. Ŋuu yi a ghwǒ lə̂ mbə́i yo no, â pə́i.»
Yěso gháp pə ghéghé ghəpə́
(Mks 10.13-16; Lks 18.18-30)
13Ə́ pə̂ ndâghʼ ghəpə́ ńtô mbi Yěso ńgó â zápə́ mbô lə́ páp, ə́ sʉ́ʉtə́ Sê. Lə́ ngaŋə-jyêʼ-no* yé pə̂ ntôʼ gháp. 14Yěso lâʼ ngô: «Pei nyér ghəpə́ gháp tó nkwátə́ ghâa, koo pei kə̂ʼtə gháp, ńté ləfou Sê* pə́ pə́ yi pye pi gháp pə́ ghíʼ páp.» 15Ə́ ndǎʼ yə́rə́, ńzápə́ mbô mé lə́ páp, tə ə́ kuʼ a fû yʉʼ wó ndə́r.
Môu ngwəsəu ngaŋə-zə̂u
(Mks 10.17-31; Lks 18.18-30)
16Cǒ ŋuu ghʉ̂ ntó mbəʉ Yěso, ə́ ntúŋú yé ngô: «Cícye, tə mboʼ məŋ ngʉ̂ zarə́ no shʉʼʉ tə ngwô ləcwôr tə me?» 17Yěso túŋu yé ngô: «Ńté hó o túŋu ghâa no lə̂ no shʉʼʉ? Ŋuu shʉʼʉ pə̌ pə́ tâʼ môʼ. O lə̌i mə́ nkôŋ nkə́u cər Ləfou Sê, o kûʼtə məntǎghʼ mé.» 18Ŋuu wêi túŋu ngô: «Ə̂ marə́ məntǎghʼ? Yěso pwôr ngô: Koo jwî ŋuu, koo ghʉ̂ məghap, koo jû, koo záp sôu tû ŋuu. 19Ŋə̂ məkuʼ tə́ gho gháp mə́ gho, kǒŋ fə̌r gho ŋuu-məsoŋ ghíʼ o kôŋ tû-mbəʉ zô.» 20Môu ngwəsəu wêi lâʼ lə́ zʉ́ ngô: «Məŋ ndə̌i nkə́ ŋə̂i pə́ ghíʼ məntǎghʼ mêi mə́tsəm pə́ ndǎʼ. Hó có pyér mə́ mbûŋ ghâa?» 21Yěso pwôr lə́ zʉ́ ngô: «O lə̌i mə́ ndôu lə̂ mbə́ tə́ lǒʼ, o wô fə̂i məzə̂u mi o ghwǒ mə́tsəm, ə́ ŋə́ nkâp lə́ pəpûŋ, ə́ ndáʼ ngwô məzə̂u lətəi-ndwuŋ tʉ̌-lə́pû. Wo ngʉ̌ yə́rə́, ə́ mbə̌ʉ ntó ńtsə́ʉ nzəm məŋ.» 22Môu ngwəsəu wêi zûʼ tsâr zêi, ə́ záŋə yé gháʼate, ńté no a lə ghwô məzə̂u lətəi-ndwuŋ gháʼate.
23Yěso lâʼ lə́ ngaŋə-jyêʼ-no* yé ngô: «Məŋ ndâʼ wéi, kwaʼ lə́nə́ʉ, ngô: Ə́ təi mbó ngaŋə zə̂u lə̂ nkə́u cər Ləfou Sê. 24Məŋ ngwo kə́ cí ntsúŋú lâʼ wéi ńgó, ə́ zaŋə mbó shwô lə̂ só lə̂ ngwʉ̂ lyaghʼə, ə́ nděi ngaŋə-zə̂u lə̂ nkə́u cər Ləfou Sê.» 25Ngaŋə-jyêʼ-no* yé zûʼ no zêi, ə́ fû nkəʼə́ gháp gháʼate, gháp lâʼ ńgó tə ə́ lə̌i mbə́ gháʼa, wǒ lâʼ ncwór? 26Yěso nâŋ gháp tə ndâʼ ngô: «Ə́ tsə pə́ pye-mə́soŋ, ə Sê kuʼ lə̂ ngʉ́ zə̂u tsəm.» 27Pyêh lâʼ lə́ Yěso ngô: «Tə paghʼ lə nyêr zə̂u tsəm, ə́ ntsə́ʉ nzəm gho gháʼa, tə zághʼ no táa pə́ gháʼá?» 28Yěso pwôr ngô: «Cʉ́ʼ məŋ ndáʼ wéi kwaʼ lə́nə́ʉ, pə́ táa kə́u cər ngoŋ shwî, Môu Ŋuu* nyáŋ lə̂ lwoŋ ləfou yé yi ghwǒ ləghûʼ, pei pye ntsap pwô lə̂ ləghə̂m pi pei lə tsə́ʉ nzəm məŋ, kə́ nyâŋ zéi lə̂ məlwoŋ ntsap pwô lə̂ ləghə̂m, ə́ fêʼ pye Ísə́lahêl, məngər ntsap pwô lə̂ ləghə̂m. 29Wǒwó yi a lə nyér məndə̂ mé, ə́ nyér pəfə̌r pé pi mbiŋə mbaa pi pəngyě, kəʉ pə́ tə́ ye, kəʉ pə́ mə́ ye, kəʉ pə́ ghəpə́ yé, kəʉ pə́ mənkâʼ mé, ńté ləjôghʼ zâa, a táa pǒu ghwǒ mé məzə̂u mpfu nkʉ, ə́ kə́ cí ghwǒ ləcwôr tə me. 30Lə́ lələʉ pəluŋ-mbi mpfu wo, táa cʉ́ʼ pəlyəghʼ-nzəm, lələʉ pəlyəghʼ-nzəm mpfu wo táa pə́ pəluŋ-mbi.»
Currently Selected:
Matyê 19: NLA
Highlight
Share
Copy
Want to have your highlights saved across all your devices? Sign up or sign in
