Máakúsʉ 4
4
Saghʼ-ləghaa lə̂ mbi zə̂u
(Mat 13.1-15; Lks 8.4-10)
1Yěso lə pou nkə́ ncí mə́ njyéʼ pye no Sê nkaŋ lətʉŋ-nci Galilêi, ə lâʼ tô ńkə́itə́ mbəʉ zʉ́, ə́ fú nzáa tə a kə̂u ńnyáŋ cər kənyúʼ yi ə́ lə pə́ cər nci. Lâʼ cʉ̂ʼ nkə́itə́ kâŋ nci. 2A lə pə́ ndâghʼ saghʼ-ləghaa* ńjyéʼ gháp məno tə nzáa, ə́ mə́ ndâʼ lə́ páp ngô: 3«Pei zʉ́ʼtə́ ńzúʼ, cǒ ŋuu lǎʼ ngwǒ nkâʼ zʉ́ leʼé có maʼ mbi zə̂u, 4ə́ kə́u mǎʼ wó, məcó məmbəm pfûŋtə laŋə́-ndə̂u, pəshʉ̌ŋ tô ntsûʼtə́ mî. 5Məcó məmbəm pfûŋtə lə̂ yʉʼ məghǒ, ə́ ntóghʼ nsáʼ ńté no kâa ndesé lə zâa yé yʉʼ wó. 6Mə́nəu pôu ńtə́ kwaʼ shʉʼʉ, ə́ ntǒu məzə̂u mi ə́ sáʼ lei, ə́ zə̂u, ńté no kâa məŋaŋə měi lə zâa yé sê. 7Məcó məmbəm pfûŋtə cər mə́kǎp-kǎp, ə́ sáʼ, ə́ mbǒŋ gháʼate. Mə́kǎp-kǎp wei ghʉ̂ nkóʼ, ə́ fámə́ məzə̂u mei tə kâa zə̂m yé. 8Məcó məmbəm pfûŋtə lə̂ yʉʼ ndesé shʉʼʉ, ə́ sáʼ, ə́ ngə́ kwaʼ shʉʼʉ, ə́ nzə́m. Có ləcʉŋə́ ghi ŋə́ məmbəm mə̂m-tárə́, có ŋə̂ mə̂m-ntoghʼó, có ŋə̂ yé məmbəm nkʉ». 9Yěso lə tsár tə ngí lyəghʼtə́, ə́ ndáʼ ngô: «Ŋuu yi a ghwǒ mətuŋú lə̂ ndághʼ ńzúʼ no, â tsúŋú zûʼ.»
Yěso laghʼ pə́ saghʼ-ləghaa ńjyêʼ pye zə̂u ńté hó?
10Ə lâʼ sêi ńdə́r, pye pi gháp lə cî mbə̂ mbəʉ Yěso gháp pə ngaŋə-jyêʼ-no* yé ntsap pwô lə̂ ləghə̂m cʉ̂ʼ nzəm, ə́ ntúŋú yé no ńté saghʼ-ləghaa*. 11A lâʼ lə́ páp ngô: «Pə́ lə ghʉ pei kûʼ lə̂ njí məno Ləfou Sê mi ə́ pə́ ləlwǒ, lə́ ə́ ngwǒ lə́ pəcó pye, mə́i gháp zûʼ záp pə́ cər pəsaghʼ-ləghaa; 12ńjí ńgó ə́ leitə́ yə́rə́,
“gháp pə̂ nâŋ yʉʼ, lə́u mə́ ntsuŋú njwô gháp po,
ə́ mə́ nzûʼ yʉʼ, lə́u mə́ ntsuŋú nzûʼ gháp po.
Ə́ tə́i ndə̌iʼ pə́ yə́rə́ po, mə́i mboʼ gháp pəʉ lə̂ mbó Sê,
a lyə́ghʼə məfaa ghap#4.12 Esa 6.9-10!”»
Yěso pə̌ nkeʼtə saghʼ-ləghaa lə̂ no mbi zə̂u
13Yěso pôu ndâʼ lə́ páp ngô: «Tə káa pei zúʼ wéi wo saghʼ-ləghaa* gháʼa, ə́ pǒu zûʼ pəcó pə́ gháʼá? 14Ŋuu yi a pi zə̂u, a pi gháʼá tsâr Sê. 15Pəcó pye pə́ ghíʼ nkaŋ laŋə́ yi mbi zə̂u pfuŋtə́ mə́u. Gháp kə́ nděi tə nzúʼ tsâr Sê, Sə́tə tô fú məntə̂ʉ páp ńkwarə́ zěi. 16Pəcó pye pə́ ghíʼ yʉʼ məghǒ yi mbi zə̂u pfuŋtə́ mə́u. Gháp kə́ ndéi tə nzúʼ tsâr Sê, ə́ ndǎghʼ lətsei ḿpfú zěi, 17lə́ kâa nyêr gháp zěi, ə̂ lâr məŋaŋə məntə̂ʉ páp, ə́ nyéʼ nkápə záp mə́u kapə́, pə́ lei tə njí lə̂ ntyé gháp, ə́ ŋə́ gháp ngwôʼ ńté no Sê, gháp tôghʼ mêʼ pə̂i-ntə̂ʉ záp. 18Pəcó pye pə́ ghíʼ mə́kǎp-kǎp yi mbi zə̂u pfuŋtə́ cər wó. Gháp zûʼ tsâr Sê, 19ə́ ncí ndə̂ nzûŋ nzəm məzə̂u ndəu-nzʉ̂, ə nkâp gháp pə məfuʼ mbə̂u lə̂ mbə̂u pə̂ fútə gháp, zə̂u pêi tsəm naa fə́mə́ tsâr Sê, lə́u ə́ zə̂m yé ntǎa po. 20Pəcó pye pə́ ghíʼ ndesé shʉʼʉ yi mbi zə̂u pfuŋtə́ mə́u. Gháp zûʼ tsâr Sê, ə́ mpfú zěi, ə́ nzə́m məntǎa. Tâʼ ləcʉŋə́ ŋə̂ məmbəm mə̂m-tárə́, ə có ŋə̂ məmbəm mə̂m-ntoghʼó, ə có ŋə̂ yé məmbəm nkʉ.»
Saghʼ-ləghaa lə̂ no lâm
(Lks 8.16-18)
21Yěso pou nkə́ ncí ndáʼ lə́ páp ngô: «Ŋuu pə̌ ncûʼ lâm ndághʼ ńtô lə̂ nkêʼ pye, ə́ mbou ndâghʼ nkaa ńkə́ptə́ kəʉ ntâghʼ ncʉŋ nkə̌u mo? Lə́u a wo tághʼ pə́ ndəu ləʼtə zěi péh? 22Ńté no zə̂u tsəm yi ə́ lwǒ mpfu táa kwǎr mbi lâʼ ntə̌ʉ-nəu, zə̂u tsəm yi ə́ pǒu mbə́ pə́ cər ntsəm mpfu táa kwǎr cər nkeʼ. 23Ŋuu lə̌i ngwó mətuŋú lə̂ ndághʼ nzúʼ no, a tsúŋu nzúʼ.»
24Yěso kə̂ ncí nkʉ́ʼʉ́ ndáʼ lə́ páp ngô: «Pei laghʼə́ tû zéi lə̂ no yi pei zûʼ zěi. Sê ghʉ̌ kə́ lǎghʼ pə́ fəiʼ yi pei laghʼ fə̂iʼ zə̂u, ə́ fəiʼ zéi tə pǒu kʉʼʉ có mə́u ńŋə́ lə́ pei. 25Ńté no ŋuu lə̌i ngwó zə̂u, mə́i pə́ wo kʉʼʉ có mə́u, lə́ ŋuu póu ndə̌iʼ ghwo yé có po, mə́i pə́ wo mpfú tə mbaa məyʉʼ yi a yǎa ngwǒ.»
Saghʼ-ləghaa lə̂ mbi zə̂u yi ə sǎʼ pə́ zʉ́
26Yěso kə̂ ncí ndáʼ ngô: «Ləfou Sê* pə́ ghíʼ ŋuu yi a maʼ mbi zə̂u nkâʼ zʉ́, 27ə́ mbou ngwó nuŋ yé lətwûʼ ndé, ə́ mə́ʉ njyê leʼé tsəm, mbi zə̂u cʉ̂ʼ sáʼ, ə́ mə́ ngúʼ, lə́u a jî yé ghíʼ zěi ghʉ̌ mboŋə́ ghúʼ po. 28Ndesé zə́ghʼə́-zʉ́ lə́ ghʉ mbi zə̂u sâʼ, ə́ ngúʼ mbou nzə́m. 29Məzʉ̂ lei tə ntə̂ʉ, ngaŋə nkâʼ kə̂u nkâʼ, ə́ njǐ lə̂ mbyé, ńté ńgó mpfu mbyê məzʉ̂ kuʼ mə́.»
Saghʼ-ləghaa lə̂ cǒ mbə̂u mbi zə̂u yi pə́ fûŋ ńgó Mutâadə*
(Mat 13.31-32; Lks 13.18-19)
30Yěso kə̂ ncí ndáʼ ngô: «Mboʼ paghʼə lâghʼ hó ḿbyé fəiʼ lə̂ no Ləfou Sê*, mboʼ paghʼə lâghʼ warə́ saghʼ-ləghaa* ḿbyé fəiʼ zěi? 31Ə́ pə́ ghíʼ mbyəghʼ cǒ mbə̂u tə́shú yi pə́ fûŋ ńgó Mutâadə*. Pə́ ghí mǎʼ zěi, ə́ khwôghʼ ndéi məmbi zə̂u mə́tsəm ndəu ndesé. 32Lə́ pə́ póu ndêi tə máʼ, ə́ sâʼ, ə́ ngúʼ ńdéi məzə̂u ngárə mə́tsəm, ə́ ntóghʼtə́ pətə́koʼ mbô tə ə́ pə̂ yi mboʼ pəshʉ̌ŋ tô ḿbáʼ mənkaa máp mə́u.»
33Yěso lə laghʼ pə́ pəsaghʼ-ləghaa tə nzáa ghíʼ pwo ńjyêʼ pye zə̂u, ə́ mbou njyêʼ yə́rə́ lə̂ mbə̂u yi mboʼ ŋuu ntsəm zûʼ. 34Kâa a lə pə́ ndâʼ yé gháp no tə́ lǎghʼ pə́ saghʼ-ləghaa* ńdâʼ, ə́ mbou ncʉ́ʼ nkéʼtə́ zə̂u tsəm ńdáʼ ngaŋə-jyêʼ-no* lə̂ záp pəpáp yʉʼ.
Yěso ghʉ̂ fə̂m záʼa
(Mat 8.23-27; Lks 8.22-25)
35Ə́ pou nkə́ mbə́ pə̂ mpfu-ngwʉ̂ leʼé wêi, Yěso lâʼ lə́ ngaŋə-jyêʼ-no* yé ngô: «Paghʼə tə́u ńdə́r lə̂ cǒ njʉŋə́ lətʉŋ-nci.» 36Ngaŋə-jyêʼ-no* yé nyêr lâʼ nkaŋ nci, ə́ ncʉ́ʼ nkwátə́ Yěso cər kənyúʼ yi a lə nyáŋ cər wó, ə́ ngǐ lǎghʼ yé pə́ tə́u, pəcó pye laghʼ məcó məkənyúʼ ńtsə́ʉ nzəm páp. 37Tâʼ tə́koʼ fə̂m jî lə̂ ncʉ́ʼ yʉʼ, nci cʉʼʉ, mələ̂ʉ nci zêʼ ńkə́u cər kənyúʼ tə ə́ cʉ̂ʼ mə́ ndóghʼə loghʼə́, 38Yěso nyâŋ nzəm, ə́ njóʼó lə̂ tôu-tû mə́ ndé, ngaŋə-jyêʼ-no* yé jye yé, ə́ ndǎʼ ngô: «Ə́ Nde, koo o pə́ njwô ghíʼ paghʼə wo nkwʉ́tə́ wó lo áa?» 39Yěso jyê, ə́ sáʼ fə̂m gháp nci, ə́ ndáʼ lə̂ nci ngô: «Nâʼ!» Ə fə̂m lêi-lěi nzáʼá, ə nci nâʼ tə lə́u nkə́ mbyér mə́ ncʉ́ʼʉ yé po. 40A túŋu ngaŋə-jyêʼ-no* yé ngô: «Pei fǔ mbôghʼ gháʼa hó ndwuŋ wo? Pei kə́ ghwô pə̂i-ntə̂ʉ mô?» 41Gháp fû nkʉ́ʼʉ́ mbóghʼ tə ncʉ́ʼ mə́ ntúŋu təcər páp ngô: «Ŋuu wo gháʼa mbə̂ yé pə̂ wǒ tə fə̂m gháp nci zûʼ ntsʉ yé?»
Currently Selected:
Máakúsʉ 4: NLA
Highlight
Share
Copy
Want to have your highlights saved across all your devices? Sign up or sign in
Máakúsʉ 4
4
Saghʼ-ləghaa lə̂ mbi zə̂u
(Mat 13.1-15; Lks 8.4-10)
1Yěso lə pou nkə́ ncí mə́ njyéʼ pye no Sê nkaŋ lətʉŋ-nci Galilêi, ə lâʼ tô ńkə́itə́ mbəʉ zʉ́, ə́ fú nzáa tə a kə̂u ńnyáŋ cər kənyúʼ yi ə́ lə pə́ cər nci. Lâʼ cʉ̂ʼ nkə́itə́ kâŋ nci. 2A lə pə́ ndâghʼ saghʼ-ləghaa* ńjyéʼ gháp məno tə nzáa, ə́ mə́ ndâʼ lə́ páp ngô: 3«Pei zʉ́ʼtə́ ńzúʼ, cǒ ŋuu lǎʼ ngwǒ nkâʼ zʉ́ leʼé có maʼ mbi zə̂u, 4ə́ kə́u mǎʼ wó, məcó məmbəm pfûŋtə laŋə́-ndə̂u, pəshʉ̌ŋ tô ntsûʼtə́ mî. 5Məcó məmbəm pfûŋtə lə̂ yʉʼ məghǒ, ə́ ntóghʼ nsáʼ ńté no kâa ndesé lə zâa yé yʉʼ wó. 6Mə́nəu pôu ńtə́ kwaʼ shʉʼʉ, ə́ ntǒu məzə̂u mi ə́ sáʼ lei, ə́ zə̂u, ńté no kâa məŋaŋə měi lə zâa yé sê. 7Məcó məmbəm pfûŋtə cər mə́kǎp-kǎp, ə́ sáʼ, ə́ mbǒŋ gháʼate. Mə́kǎp-kǎp wei ghʉ̂ nkóʼ, ə́ fámə́ məzə̂u mei tə kâa zə̂m yé. 8Məcó məmbəm pfûŋtə lə̂ yʉʼ ndesé shʉʼʉ, ə́ sáʼ, ə́ ngə́ kwaʼ shʉʼʉ, ə́ nzə́m. Có ləcʉŋə́ ghi ŋə́ məmbəm mə̂m-tárə́, có ŋə̂ mə̂m-ntoghʼó, có ŋə̂ yé məmbəm nkʉ». 9Yěso lə tsár tə ngí lyəghʼtə́, ə́ ndáʼ ngô: «Ŋuu yi a ghwǒ mətuŋú lə̂ ndághʼ ńzúʼ no, â tsúŋú zûʼ.»
Yěso laghʼ pə́ saghʼ-ləghaa ńjyêʼ pye zə̂u ńté hó?
10Ə lâʼ sêi ńdə́r, pye pi gháp lə cî mbə̂ mbəʉ Yěso gháp pə ngaŋə-jyêʼ-no* yé ntsap pwô lə̂ ləghə̂m cʉ̂ʼ nzəm, ə́ ntúŋú yé no ńté saghʼ-ləghaa*. 11A lâʼ lə́ páp ngô: «Pə́ lə ghʉ pei kûʼ lə̂ njí məno Ləfou Sê mi ə́ pə́ ləlwǒ, lə́ ə́ ngwǒ lə́ pəcó pye, mə́i gháp zûʼ záp pə́ cər pəsaghʼ-ləghaa; 12ńjí ńgó ə́ leitə́ yə́rə́,
“gháp pə̂ nâŋ yʉʼ, lə́u mə́ ntsuŋú njwô gháp po,
ə́ mə́ nzûʼ yʉʼ, lə́u mə́ ntsuŋú nzûʼ gháp po.
Ə́ tə́i ndə̌iʼ pə́ yə́rə́ po, mə́i mboʼ gháp pəʉ lə̂ mbó Sê,
a lyə́ghʼə məfaa ghap#4.12 Esa 6.9-10!”»
Yěso pə̌ nkeʼtə saghʼ-ləghaa lə̂ no mbi zə̂u
13Yěso pôu ndâʼ lə́ páp ngô: «Tə káa pei zúʼ wéi wo saghʼ-ləghaa* gháʼa, ə́ pǒu zûʼ pəcó pə́ gháʼá? 14Ŋuu yi a pi zə̂u, a pi gháʼá tsâr Sê. 15Pəcó pye pə́ ghíʼ nkaŋ laŋə́ yi mbi zə̂u pfuŋtə́ mə́u. Gháp kə́ nděi tə nzúʼ tsâr Sê, Sə́tə tô fú məntə̂ʉ páp ńkwarə́ zěi. 16Pəcó pye pə́ ghíʼ yʉʼ məghǒ yi mbi zə̂u pfuŋtə́ mə́u. Gháp kə́ ndéi tə nzúʼ tsâr Sê, ə́ ndǎghʼ lətsei ḿpfú zěi, 17lə́ kâa nyêr gháp zěi, ə̂ lâr məŋaŋə məntə̂ʉ páp, ə́ nyéʼ nkápə záp mə́u kapə́, pə́ lei tə njí lə̂ ntyé gháp, ə́ ŋə́ gháp ngwôʼ ńté no Sê, gháp tôghʼ mêʼ pə̂i-ntə̂ʉ záp. 18Pəcó pye pə́ ghíʼ mə́kǎp-kǎp yi mbi zə̂u pfuŋtə́ cər wó. Gháp zûʼ tsâr Sê, 19ə́ ncí ndə̂ nzûŋ nzəm məzə̂u ndəu-nzʉ̂, ə nkâp gháp pə məfuʼ mbə̂u lə̂ mbə̂u pə̂ fútə gháp, zə̂u pêi tsəm naa fə́mə́ tsâr Sê, lə́u ə́ zə̂m yé ntǎa po. 20Pəcó pye pə́ ghíʼ ndesé shʉʼʉ yi mbi zə̂u pfuŋtə́ mə́u. Gháp zûʼ tsâr Sê, ə́ mpfú zěi, ə́ nzə́m məntǎa. Tâʼ ləcʉŋə́ ŋə̂ məmbəm mə̂m-tárə́, ə có ŋə̂ məmbəm mə̂m-ntoghʼó, ə có ŋə̂ yé məmbəm nkʉ.»
Saghʼ-ləghaa lə̂ no lâm
(Lks 8.16-18)
21Yěso pou nkə́ ncí ndáʼ lə́ páp ngô: «Ŋuu pə̌ ncûʼ lâm ndághʼ ńtô lə̂ nkêʼ pye, ə́ mbou ndâghʼ nkaa ńkə́ptə́ kəʉ ntâghʼ ncʉŋ nkə̌u mo? Lə́u a wo tághʼ pə́ ndəu ləʼtə zěi péh? 22Ńté no zə̂u tsəm yi ə́ lwǒ mpfu táa kwǎr mbi lâʼ ntə̌ʉ-nəu, zə̂u tsəm yi ə́ pǒu mbə́ pə́ cər ntsəm mpfu táa kwǎr cər nkeʼ. 23Ŋuu lə̌i ngwó mətuŋú lə̂ ndághʼ nzúʼ no, a tsúŋu nzúʼ.»
24Yěso kə̂ ncí nkʉ́ʼʉ́ ndáʼ lə́ páp ngô: «Pei laghʼə́ tû zéi lə̂ no yi pei zûʼ zěi. Sê ghʉ̌ kə́ lǎghʼ pə́ fəiʼ yi pei laghʼ fə̂iʼ zə̂u, ə́ fəiʼ zéi tə pǒu kʉʼʉ có mə́u ńŋə́ lə́ pei. 25Ńté no ŋuu lə̌i ngwó zə̂u, mə́i pə́ wo kʉʼʉ có mə́u, lə́ ŋuu póu ndə̌iʼ ghwo yé có po, mə́i pə́ wo mpfú tə mbaa məyʉʼ yi a yǎa ngwǒ.»
Saghʼ-ləghaa lə̂ mbi zə̂u yi ə sǎʼ pə́ zʉ́
26Yěso kə̂ ncí ndáʼ ngô: «Ləfou Sê* pə́ ghíʼ ŋuu yi a maʼ mbi zə̂u nkâʼ zʉ́, 27ə́ mbou ngwó nuŋ yé lətwûʼ ndé, ə́ mə́ʉ njyê leʼé tsəm, mbi zə̂u cʉ̂ʼ sáʼ, ə́ mə́ ngúʼ, lə́u a jî yé ghíʼ zěi ghʉ̌ mboŋə́ ghúʼ po. 28Ndesé zə́ghʼə́-zʉ́ lə́ ghʉ mbi zə̂u sâʼ, ə́ ngúʼ mbou nzə́m. 29Məzʉ̂ lei tə ntə̂ʉ, ngaŋə nkâʼ kə̂u nkâʼ, ə́ njǐ lə̂ mbyé, ńté ńgó mpfu mbyê məzʉ̂ kuʼ mə́.»
Saghʼ-ləghaa lə̂ cǒ mbə̂u mbi zə̂u yi pə́ fûŋ ńgó Mutâadə*
(Mat 13.31-32; Lks 13.18-19)
30Yěso kə̂ ncí ndáʼ ngô: «Mboʼ paghʼə lâghʼ hó ḿbyé fəiʼ lə̂ no Ləfou Sê*, mboʼ paghʼə lâghʼ warə́ saghʼ-ləghaa* ḿbyé fəiʼ zěi? 31Ə́ pə́ ghíʼ mbyəghʼ cǒ mbə̂u tə́shú yi pə́ fûŋ ńgó Mutâadə*. Pə́ ghí mǎʼ zěi, ə́ khwôghʼ ndéi məmbi zə̂u mə́tsəm ndəu ndesé. 32Lə́ pə́ póu ndêi tə máʼ, ə́ sâʼ, ə́ ngúʼ ńdéi məzə̂u ngárə mə́tsəm, ə́ ntóghʼtə́ pətə́koʼ mbô tə ə́ pə̂ yi mboʼ pəshʉ̌ŋ tô ḿbáʼ mənkaa máp mə́u.»
33Yěso lə laghʼ pə́ pəsaghʼ-ləghaa tə nzáa ghíʼ pwo ńjyêʼ pye zə̂u, ə́ mbou njyêʼ yə́rə́ lə̂ mbə̂u yi mboʼ ŋuu ntsəm zûʼ. 34Kâa a lə pə́ ndâʼ yé gháp no tə́ lǎghʼ pə́ saghʼ-ləghaa* ńdâʼ, ə́ mbou ncʉ́ʼ nkéʼtə́ zə̂u tsəm ńdáʼ ngaŋə-jyêʼ-no* lə̂ záp pəpáp yʉʼ.
Yěso ghʉ̂ fə̂m záʼa
(Mat 8.23-27; Lks 8.22-25)
35Ə́ pou nkə́ mbə́ pə̂ mpfu-ngwʉ̂ leʼé wêi, Yěso lâʼ lə́ ngaŋə-jyêʼ-no* yé ngô: «Paghʼə tə́u ńdə́r lə̂ cǒ njʉŋə́ lətʉŋ-nci.» 36Ngaŋə-jyêʼ-no* yé nyêr lâʼ nkaŋ nci, ə́ ncʉ́ʼ nkwátə́ Yěso cər kənyúʼ yi a lə nyáŋ cər wó, ə́ ngǐ lǎghʼ yé pə́ tə́u, pəcó pye laghʼ məcó məkənyúʼ ńtsə́ʉ nzəm páp. 37Tâʼ tə́koʼ fə̂m jî lə̂ ncʉ́ʼ yʉʼ, nci cʉʼʉ, mələ̂ʉ nci zêʼ ńkə́u cər kənyúʼ tə ə́ cʉ̂ʼ mə́ ndóghʼə loghʼə́, 38Yěso nyâŋ nzəm, ə́ njóʼó lə̂ tôu-tû mə́ ndé, ngaŋə-jyêʼ-no* yé jye yé, ə́ ndǎʼ ngô: «Ə́ Nde, koo o pə́ njwô ghíʼ paghʼə wo nkwʉ́tə́ wó lo áa?» 39Yěso jyê, ə́ sáʼ fə̂m gháp nci, ə́ ndáʼ lə̂ nci ngô: «Nâʼ!» Ə fə̂m lêi-lěi nzáʼá, ə nci nâʼ tə lə́u nkə́ mbyér mə́ ncʉ́ʼʉ yé po. 40A túŋu ngaŋə-jyêʼ-no* yé ngô: «Pei fǔ mbôghʼ gháʼa hó ndwuŋ wo? Pei kə́ ghwô pə̂i-ntə̂ʉ mô?» 41Gháp fû nkʉ́ʼʉ́ mbóghʼ tə ncʉ́ʼ mə́ ntúŋu təcər páp ngô: «Ŋuu wo gháʼa mbə̂ yé pə̂ wǒ tə fə̂m gháp nci zûʼ ntsʉ yé?»
Currently Selected:
:
Highlight
Share
Copy
Want to have your highlights saved across all your devices? Sign up or sign in