Lucas 14
14
Jesús tyëktso'oky tu'uk jaa'y mati' ki'ix pa'am tmëët
1Tu'kpoo'kxë'nxëëw'it Jesús nyijkxy kaypyë fariseo niwintsënëntüjpy, jäjpts y'ijjty ni'ey fariseostëjjk jä'yë Jesús t'ijxtë ttuntë. 2Mëët jya'jty tu'uk yaa'ytyëjjk mati' y'ijjty tëj kyixpëjkëjxnë tukkë'yë nyikkëjjx. 3Nits Jesús tyëktëëy pawaa'n yëk'ixpëjkpëttëjjk mëët Fariseostëjjk:
—¿Oy pa'amjaa'y nyëktsoojkë'n poo'kxë'nxëëw'it ok kä'ä y'oyë? 4Jäts jä' jaa'y amöny'aayë jä'yë tyankëjxtë. Nits Jesús kyë'këjjxy tmajjtsy jä' pa'amjaa'y, jäts tyëktsoojky, nits tpakkäjxnë 5Nits Fariseostëjjk tnëëjmjaay
—Ku miits nitu'ukën m'uu'nk ok mkaaj kyunaxt jutjötypy poo'kxë'nxëëw'it, ¿kä'ä xjuut'të't jätyë?
6Nippën ojts kyawinmaa'nypyaaty ntsoj y'atso'otë't.
Xëëw'eewyëttëjjk mati' waatsoytyë
7Ku Jesús t'ijxy, ntsoj jä' jaa'y mati' y'ijjty tëj yëkwaatsowtë kaypyë, jup'am jä' nitukkë'yë nyatsyökyë tsyëënëtë't, jakëjxts Jesús ojts jaa'y najj tkajpxwijjy:
8Ku pën mwaatsowëtë't maj jaa'y y'amäjtskëtë, kä'ä tsëënpyäjjt xpëktë't mati' amäjtsk'eepyë myu'awinkon, ntsoj ku jya'att jatu'uk myuku'uk mati' jawäänë nimëjj, 9jäts pën mwaatsoojjë'p mniminëtë't nits mnëë'mxë't: Mo'o ya'at jaa'y mtsëënpyäjjt. Jäts mijts kutso'oy kuwanë mnëjkxt tsënääpyë jaa'yjyëxkë'm. 10Ku pën mwaatsowëtë't xëëw'eepyë tsëënëtë jëxkë'mnäxy, kuts mniminë't pën mwaatsoojjë'p, jäts mnëë'mxë't: Muku'uk, nax mtsëënë yam jup'am. Najjts miits xpaat'të't wintsë'ëjk'ajjt jaa'y wyinkujjky nii'xyë'n jäm wyä'në wyaatsoyëtë. 11Jä'ku pën kë'm nakyäjxtaajkë'p kä'äts jä oo'ktëy yyëkmëjj'ijxt, pënts tuta'aky jaa'y'eepy, jä'äts oo'ktëy yëkmëjjpë'mp. 12Ninyajj tnëëjmjaay jä' yaa'ytyëjjk mati' y'ijjty tëj wyaatsoyë:
—Ku jaa'y xyëkkaywya'any xyëk'uukwa'any, kä'ä xwaatso'ot pënjäty mmëëtnamyaajyë'p, mmuku'uktëjjk, mpamuku'uk, ok kumeenyjyaa'y mati' mmu'awinkontsënääpy; jä'ku, ku jä' jaa'y xyëëwtu'ntë't, ninyajjts jä' mwaatsowë't, tëts wyä'në najj myëkmukopety. 13Nit ku jaa'y xyëkkaywya'any xyëk'uukwa'any, waatsow ayoopëjaa'y, mati' kyë' ka'ijtp, mati' kayo'yp, mati' ka'ijxp; 14najjts mijts oy jotkujjk. Jä'ku kä'äts jä' mmukopättë't, najjts mijts mjuu'ny xpaatt, jä' xëëw ku oyjyaa'ytyëjjk jyükypyëktë't.
Mëjjxëëw y'ijxpäjjt
15Ku najj jaa'y tmatootë, nits tu'uk mati' jäm y'ijjty tsënääpy kaytyaajk'am tnëëjmjaay Jesús:
—¡Mëjjotkujjk jä' pën ka'ypy uukp ku mëjjxëëw tyunë't jäm maj Yës Teety yyëkkuttüky
16Nits Jesús nyëë'mxë:
—Tu'kyaajjë tu'uk yaa'ytyëjjk tyëkni'oy'ëëy tu'uk mëjj a'ux, jäts nimay jaa'y twaatsooy. 17Kuts a'ux'awts tpaajty nits tyumpë tpakkejjxy jäts t'aswaamukt pënjäty y'ijjty tëj twaatsoy, jäts tyumpë ojts jaa'y tnëmkëjjxë: Min m'a'uxëtë, tëj a'ux y'oyë. 18Nits nitukkë'yë jaa'y mää'kxë'n t'amatootë. Muttu'uk wyaany: Njuypnyë'm ëjts nkam jä'äts ëjts n'as'ijxwämpy miits okmää'kxtë kä'ä ëjts nnëjkxwa'any. 19Jatu'uk wyaany: Njuypnyë'm ëjts muwoxk yuntë nkaaj, jä'äts ëjts nyëkyuumatswämpy. Miits okmää'kxtë kä'ä ëjts nnëjkxwa'any. 20Jatu'uk y'atsooy: Amäjtsk'eepnyë'm ëjts, miits okmää'kxtë kä'ä ëjts nmata'aky jäts nnëjkxt. 21Najjts muttumpë najjyë wyimpijtnë jäts wyintsën tukkë'yë twankëjjxjaay, nits jä' xëëwtumpë y'ampëjjky jäts tyumpë tnëëjmjaay: Jottakkoy nëjkx tuu'äjpy, ok tu'ktëjk'akujjky, waatsow ayoopëttëjjk, pënjäty kyë' ka'ijtp, kayo'ypy, ka'ijxp. 22Jawäänë y'ijjty nits tyumpë nyëë'mxë: Wintsën, tëj ëjts ntüny naa'xkë'n tëj mpawa'any, awa'atsnë'mts jäjp kaytyaajk. 23Nits wintsën tnëëjmjaay tyumpë: Nëjkx tu'kmëjjtuu', tu'kpatuu' waatsow nitukkë'yë pënjäty mpätypy nits myi'ntë't kaypyë, kunë'm ëjts ntëjjk y'utst. 24Ëjts ixyam wamp jäts nittu'uk kyakka'yty pënjäty ëjts jawyiin nwaatsoow.
Ntsoj tsyipë Jesús npattuu'yo'ojyë'n
25Nimay y'ijjty jaa'y Jesús pyawittityë; nits tu'kyaajjë Jesús wya'kwimpijjty jäts tnëëjmjaay pyattuu'yo'ypyëttëjjk: 26Pën ëjts xpattuu'yo'oywyamp, nits kä'ä ëjts jawäänë mëjk xtsöky, naa'xkë'n tsöky tyeety, tyaak, tyo'oxytyëjjk, y'uu'nktëjjk, y'ajjtsy, tsyë', ok naa'xkë'n kë'm nyatsyökyë, kä'ä jä' myata'akt nits ëjts xpattuu'yo'oyty. 27Pën kë'm kryus tkappakkëypy nits ëjts xpattuu'yo'oyty, kä'ä jä' myata'akt nits ëjts xmuttu'nt. 28Ku nitu'ukën miits xniwinmayë mtëjjk xyëk'oyëwya'antë ¿kä'ä jawyiin x'a'ijxë nii'xyë'n meeny tyu'nt, nits x'ijxt pën jäjp meeny xmëëtë nits tëjjk ta'awaatë't? 29Ok ku nikoj xjatsoo'nta'akt nits kä'ä x'okyëk'awaajt'eenyë't, pënts jä' t'ijxtë'p jä'äts tnixi'ikëtë'p tnittaayëtë'p. 30Jäts wya'antë't: Tëj yë' jaa'y tyëjjk tjayëk'oyë'y'axajjy, kä'äts tëj myayë. 31Ok ku tu'uk yëkkuttujkpë nyëjkxwa'any tsiptumpë, ¿Kä'ä jä' jawyiin t'a'ijxë pën wyintso'op ni'ii'px miijl myutsip'eepyë jäts nimajjk miijl jä'yë tsyip'attänääpyë? 32Ku t'ijxt nits kä'ä yëkmata'akë't, ku wyä'në myutsip'eepyë najyakkäm myiny, nits tpakkäxt tu'uk kukkexy'eepyë jäts tsip t'as'akkajpxtukt. 33Najjts miits pën kamajtstu'utyë'm xjawëtë tukkë'yë tijjäty mmëët'të, kä'ä mmata'aktë't nits ëjts xpattuu'yo'oyty.
Ku kaan tsyäjknë
34«Oy yë' kaan» kuts yë' tsyäkt, ¿ntsots yë' y'ijxë jatu'kyaajjë nyëktuu'në'n? 35Nikyo'oktunë't yë' nits naajx mpëëjmjaa'yë'n, ok pu'uty nyëktuu'në'n: Ixyuupy yë' nyëjkxnë't. Pënjäty ya'at aaw ayuujk tmatootë'p, winjawëtë yëkxon.
Currently Selected:
Lucas 14: LUKMya
Highlight
Share
Copy
Want to have your highlights saved across all your devices? Sign up or sign in
Evangelio de Lucas en Mixe de Yalalag, Oaxaca, México © Sociedad Bíblica de México, A.C.
