Zyan 10
10
Bànaʔaw ní bǎbèle kàseele
1«Mii a tɔ̀nɔ́ gi joo yele ma kányɛʔɛ ni, syɔ́ɔnwee wi ga ni caa lè bi jée bàkpogi ni, wi si ga jée bàkpoweeli ma í, níì lúgu kàkɔlɔgi na n jée yaà, wee bee i nyɛ kàyuuo ní wɔ́ɔ i nyɛ kàyuu-fànʔafɔlɔ. 2Wee si wi jǐn bàkpoweeli ni lè, woro wi nyɛ bànaʔaw. 3Wee bee má bàkpoweeli wélefɔlɔ bàkpogi múru, a bǎbèle wɔ́ɔ̀ wi yákpoli cán. Wi i wi tiimaa bǎbèle yiri mɛ́ɛyɛ na ní i be kɔ́ri ni yirigi bàkpogi ni. 4Wi ga pe myɛ kɔ́ri n yirige n kwɔ́ɔ, wi n kíni pe yɛ́ɛgi na ni syée. Pe n taʔa wi na ni syée wi kurugo, níì cán pe n wi yákpoli cán. 5Pe o téē taari nibɔɔn na í. Alí pe i fé nibɔnbèle na, níì cán pe ga be yákpogèle cán í.»
6Syɛ́ɛnri naa Zyezu joo lè, kàseele wi da wáa be ma. Kàjáa gee wi joo be ma lè, pe ga gi kɔ́rɔw cán í.
Zyezu wi nyɛ bànaʔacǎnw
7Gee bee na Zyezu níì be pye: «Mii a tɔ̀nɔ́ gi joo yele ma kányɛʔɛ ni, mii wi nyɛ bàkpoweeli. 8Bele be pan lè mii yɛ́ʔɛ na, poro myɛ i nyɛ kàyuubēle, ní wɔ́ɔ i nyɛ kàyuu-fànʔafɔɔlɔ. Kàjáa bǎbèle da ni lúro bele bee wàa ma í. 9Mii si wi nyɛ bàkpoweeli. Wee faala wi ga jée mii ni lè, wee bee a syɔɔ. Woro a ra jǐn sáā lúrugu da yirigi, sáā nyàácànga taagi da káa. 10Kàyuuo kapanni nyúngo gi nyɛ kàyuugi, ní kpóoli, ní kálagili. Mii si n pan koro ga pye mii bǎbèle í ba sìi taa, sìíwee pe a taa lè wi pye be ma sìiteleo.
11Mii wi nyɛ bànaʔacǎnw. Bànaʔacǎnw si n yére gi ni bi kùu wi bǎbèle nyùnzyɔɔrɔ kéele na. 12Kàjáa syɔ́ɔnwee wi bǎbèle nàʔá lè sàra na, wi o nyɛ bànaʔateleo í, bǎbèle si wɔ́ɔ o nyɛ wi wòolo í, lǎlee ni wi ga kàsologo wéle n nyaa lè ki i maa, wi n bǎbèle yaʔa níì fàn. Kàsologi n ba ni be nɛnɛ ni có, pe n fàn n cariga. 13Gee na wi fàn lè, koro gi nyɛ ncan wi i bǎbèle nàʔá sàra na. Pe kéeli ga téè wári wi na í. 14Mii si wi nyɛ bànaʔacǎnw. Mii n mii bǎbèle cán, a mii bǎbèle wɔ́ɔ̀ mii cán, 15#Mat 11:27; Luk 10:22 àmɛɛ Tofɔw mii cán lè á mii wɔ́ɔ̀ Tofɔw cán. Mii n yére gi ni bi kùu mii bǎbèle nyùnzyɔɔrɔ kéele na. 16Bǎbèle pèle si ní i yaà mii ma, pe o nyɛ bàkpogi naa wòolo í. Ki n yɛlɛ mii í wɔ́ɔ sa bele bee kɔ́ri pan. Poro a wɔ́ɔ ba mii yákpoli cán, lǎli bee ni pe myɛ a ba pínɛ pye bàtogo nibin, bànaʔaɔ nibin si wɔ́ɔ pye be na.
17Kéelee na mii Tóow tàmagi le ní mii ní lè, loro li nyɛ àmɛɛ mii a niyɛɛ gaan kùúw ma lè, koro ga pye si ní niyɛɛ zyɔɔ wi ma. 18Syɔɔn faala a mii kaan kùúw ma í, mii tiimaa wi yére gi ni bi kùu. Fànʔa i nyɛ mii ma bi niyɛɛ gaan kùúw ma, fànʔa si ní i nyɛ mii ma bi niyɛɛ zyɔɔ wi ma. Tundunri bee mii Tóow kaan mii ma níì jo mii í di kpéʔele.»
19Amɛɛ Zyezu syɛ́ɛnri bee joo lè, a tílala níì jée Zyefubèle nínge ni. 20Pe pèle saʔa maa jo: «Màdeo i nyɛ wi ni, wi n cúro. Nyàʔá na yele lúro wi ma?» 21A pèle jo: «Syɛ́ɛnri naa wi joo lè, màdebēle syɔ́ɔn fánʔa o nyɛ di na bi gbǎn di joo í. A màdeo a gbǎn fúunbéle paʔala lé?»
Zyefubèle n Zyezu cée
22Pe maa ni kpɔ̀ʔɔrɔli kpaʔa kàlifaala fɛ́tii kpéʔele Zyerusalɛmi ma ki maa pye wéeri làla ni. 23A Zyezu sáà jée kpɔ̀ʔɔrɔli kpaʔa kàcoolo ni, ni nyaari Salomɔn kpáali láara ni. 24Lǎli bee ni a Zyefubèle fala n sáà wi màʔa, níì wi pye: «Làlìí ni mɔ a wolo fúnyi télege wolo na? Kapye mɔ wi nyɛ Kirisi, ki n yɛlɛ mi gi joo mi fílige wolo ma.»
25A Zyezu be yari: «Mii maa téè gi joo yele ma, yele si ga tága gi na í. Kérigèle gele mii kpéʔele lè mii Tóow mɛ́ʔɛ na, gele bee i mii séeraw kpéʔele. 26Yele si ga sèʔê tága í, níì cán yele o nyɛ mii bàala í. 27Mii bǎbèle n mii yákpoli cán, a mii wɔ́ɔ̀ be cán. Pe i taari mii na. 28Mii n sìibangwɔɔw kaan be ma. Pe a tée kùu bi nyaa í. Syɔɔn faala a gbǎn be kíle yirige mii kɔ́gi ni í. 29Mii Tóow wi be kaan mii ma lè, wi n kpɔ́ʔɔ n sɔ̀lɔ yáriri myɛ na. Syɔɔn si a wɔ́ɔ gbǎn be kíle yirige woro kɔ́gi ni í. 30Mii Tóow ní mii ní wolo i nyɛ nibin.»
31Lǎli bee ni a Zyefubèle fala n níì kàdɛnɛrɛ jóo níì jo bi wi wábagi kpóo. 32A Zyezu be yari: «Mii n kacàngēle saʔa kpéʔele yele nyɛ́nɛ na, gele ge yìri mii Tóow ma lè. Lìí si li nyɛ ge ni wobeeli, á ye jo ye a mii wábagi?» 33#Lev 24:16 A Zyefubèle wi pye: «Kacǎngèle bee làa kéele na ban wolo jo wo a mɔ wábagi í, fwɔɔ Kolocɔlɔɔ mɛ́ɛgi kálagila kéele na. Níì cán mɔ wee wi nyɛ lè syɔɔn, mɔ n miyɛɛ gbéʔele Kolocɔlɔɔ.»
34 #
Ŋún 82:6
A Zyezu be yari: «Ki o yaà wozɛbɛgɛ ní yele làlwaw sɛ́bɛ ni ì, àmɛɛ Kolocɔlɔɔ gi joo lè níì jo: ‹Yele i nyɛ kolocɔlɔbèlē›? 35Amɛɛ gi nyuu lè làlwaw sɛ́bɛ ni níì jo, bele na Kolocɔlɔɔ da wi syɛ́ɛnri tɛ̀ɛn lè, pe i nyɛ kolocɔlɔbèlē (wolo si n gi cán yafyɛn a gbǎn Kolocɔlɔɔ syɛ́ɛnri fàli í), 36mii wee Kolocɔlɔɔ nyɛ́nɛ n wòlo lè n tun naa dulunyanw ni, a yele baa jo, mii i Kolocɔlɔɔ mɛ́ʔɛ kálagi, ncan mii n jo mii i nyɛ wi jaà! 37Kérigèle mii kpéʔele lè, kapye yele n gi nyaa ke o nyɛ mii Tóow wòʔolo í, ye a kɔ́ tága mii syɛ́ɛnri na í! 38Yele si ga gi cán ncan mii Tóow kapyegèlē mii kpéʔele, àlí ki ga pye yele a tága mii syɛ́ɛnri na í, ki n yɛlɛ ye tága gele bee na, koro ga pye yele í gi fílige cán bi cán Tofɔw i nyɛ mii ni, mii si wɔ́ɔ i nyɛ Tofɔw ni.»
39Lǎli bee ni a be ní i caa bi Zyezu cò, kàjáa pe fanʔa ga taa í, a wi yiri be níngi ni, 40#Zyan 1:28 n lúru n kári Zyuridɛnw jelige na níìgēle, tɛ́ɛgee ni Zyan da sélì pye ni syɛ́ɛnbèle batize lè, n sáà kòro nɛɛ bee bi làlaa kwɔ́ɔ. 41A syɛ̀ɛnnɛ saʔa i syée yaà wi ma. A bele bee i gi nyuu níì jo: «Alí Zyan da kakpɔɔgaa faala kpéʔele í. Koro ní ki myɛ ní, gee wi da ni nyuu lè nǎnw naa kéele na, ki myɛ tɔ̀nɔ́ i nyɛ kányɛʔɛ.» 42A syɛ̀ɛnnɛ saʔa tága wi na nɛɛ bee.
Currently Selected:
Zyan 10: CB10
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.
Zyan 10
10
Bànaʔaw ní bǎbèle kàseele
1«Mii a tɔ̀nɔ́ gi joo yele ma kányɛʔɛ ni, syɔ́ɔnwee wi ga ni caa lè bi jée bàkpogi ni, wi si ga jée bàkpoweeli ma í, níì lúgu kàkɔlɔgi na n jée yaà, wee bee i nyɛ kàyuuo ní wɔ́ɔ i nyɛ kàyuu-fànʔafɔlɔ. 2Wee si wi jǐn bàkpoweeli ni lè, woro wi nyɛ bànaʔaw. 3Wee bee má bàkpoweeli wélefɔlɔ bàkpogi múru, a bǎbèle wɔ́ɔ̀ wi yákpoli cán. Wi i wi tiimaa bǎbèle yiri mɛ́ɛyɛ na ní i be kɔ́ri ni yirigi bàkpogi ni. 4Wi ga pe myɛ kɔ́ri n yirige n kwɔ́ɔ, wi n kíni pe yɛ́ɛgi na ni syée. Pe n taʔa wi na ni syée wi kurugo, níì cán pe n wi yákpoli cán. 5Pe o téē taari nibɔɔn na í. Alí pe i fé nibɔnbèle na, níì cán pe ga be yákpogèle cán í.»
6Syɛ́ɛnri naa Zyezu joo lè, kàseele wi da wáa be ma. Kàjáa gee wi joo be ma lè, pe ga gi kɔ́rɔw cán í.
Zyezu wi nyɛ bànaʔacǎnw
7Gee bee na Zyezu níì be pye: «Mii a tɔ̀nɔ́ gi joo yele ma kányɛʔɛ ni, mii wi nyɛ bàkpoweeli. 8Bele be pan lè mii yɛ́ʔɛ na, poro myɛ i nyɛ kàyuubēle, ní wɔ́ɔ i nyɛ kàyuu-fànʔafɔɔlɔ. Kàjáa bǎbèle da ni lúro bele bee wàa ma í. 9Mii si wi nyɛ bàkpoweeli. Wee faala wi ga jée mii ni lè, wee bee a syɔɔ. Woro a ra jǐn sáā lúrugu da yirigi, sáā nyàácànga taagi da káa. 10Kàyuuo kapanni nyúngo gi nyɛ kàyuugi, ní kpóoli, ní kálagili. Mii si n pan koro ga pye mii bǎbèle í ba sìi taa, sìíwee pe a taa lè wi pye be ma sìiteleo.
11Mii wi nyɛ bànaʔacǎnw. Bànaʔacǎnw si n yére gi ni bi kùu wi bǎbèle nyùnzyɔɔrɔ kéele na. 12Kàjáa syɔ́ɔnwee wi bǎbèle nàʔá lè sàra na, wi o nyɛ bànaʔateleo í, bǎbèle si wɔ́ɔ o nyɛ wi wòolo í, lǎlee ni wi ga kàsologo wéle n nyaa lè ki i maa, wi n bǎbèle yaʔa níì fàn. Kàsologi n ba ni be nɛnɛ ni có, pe n fàn n cariga. 13Gee na wi fàn lè, koro gi nyɛ ncan wi i bǎbèle nàʔá sàra na. Pe kéeli ga téè wári wi na í. 14Mii si wi nyɛ bànaʔacǎnw. Mii n mii bǎbèle cán, a mii bǎbèle wɔ́ɔ̀ mii cán, 15#Mat 11:27; Luk 10:22 àmɛɛ Tofɔw mii cán lè á mii wɔ́ɔ̀ Tofɔw cán. Mii n yére gi ni bi kùu mii bǎbèle nyùnzyɔɔrɔ kéele na. 16Bǎbèle pèle si ní i yaà mii ma, pe o nyɛ bàkpogi naa wòolo í. Ki n yɛlɛ mii í wɔ́ɔ sa bele bee kɔ́ri pan. Poro a wɔ́ɔ ba mii yákpoli cán, lǎli bee ni pe myɛ a ba pínɛ pye bàtogo nibin, bànaʔaɔ nibin si wɔ́ɔ pye be na.
17Kéelee na mii Tóow tàmagi le ní mii ní lè, loro li nyɛ àmɛɛ mii a niyɛɛ gaan kùúw ma lè, koro ga pye si ní niyɛɛ zyɔɔ wi ma. 18Syɔɔn faala a mii kaan kùúw ma í, mii tiimaa wi yére gi ni bi kùu. Fànʔa i nyɛ mii ma bi niyɛɛ gaan kùúw ma, fànʔa si ní i nyɛ mii ma bi niyɛɛ zyɔɔ wi ma. Tundunri bee mii Tóow kaan mii ma níì jo mii í di kpéʔele.»
19Amɛɛ Zyezu syɛ́ɛnri bee joo lè, a tílala níì jée Zyefubèle nínge ni. 20Pe pèle saʔa maa jo: «Màdeo i nyɛ wi ni, wi n cúro. Nyàʔá na yele lúro wi ma?» 21A pèle jo: «Syɛ́ɛnri naa wi joo lè, màdebēle syɔ́ɔn fánʔa o nyɛ di na bi gbǎn di joo í. A màdeo a gbǎn fúunbéle paʔala lé?»
Zyefubèle n Zyezu cée
22Pe maa ni kpɔ̀ʔɔrɔli kpaʔa kàlifaala fɛ́tii kpéʔele Zyerusalɛmi ma ki maa pye wéeri làla ni. 23A Zyezu sáà jée kpɔ̀ʔɔrɔli kpaʔa kàcoolo ni, ni nyaari Salomɔn kpáali láara ni. 24Lǎli bee ni a Zyefubèle fala n sáà wi màʔa, níì wi pye: «Làlìí ni mɔ a wolo fúnyi télege wolo na? Kapye mɔ wi nyɛ Kirisi, ki n yɛlɛ mi gi joo mi fílige wolo ma.»
25A Zyezu be yari: «Mii maa téè gi joo yele ma, yele si ga tága gi na í. Kérigèle gele mii kpéʔele lè mii Tóow mɛ́ʔɛ na, gele bee i mii séeraw kpéʔele. 26Yele si ga sèʔê tága í, níì cán yele o nyɛ mii bàala í. 27Mii bǎbèle n mii yákpoli cán, a mii wɔ́ɔ̀ be cán. Pe i taari mii na. 28Mii n sìibangwɔɔw kaan be ma. Pe a tée kùu bi nyaa í. Syɔɔn faala a gbǎn be kíle yirige mii kɔ́gi ni í. 29Mii Tóow wi be kaan mii ma lè, wi n kpɔ́ʔɔ n sɔ̀lɔ yáriri myɛ na. Syɔɔn si a wɔ́ɔ gbǎn be kíle yirige woro kɔ́gi ni í. 30Mii Tóow ní mii ní wolo i nyɛ nibin.»
31Lǎli bee ni a Zyefubèle fala n níì kàdɛnɛrɛ jóo níì jo bi wi wábagi kpóo. 32A Zyezu be yari: «Mii n kacàngēle saʔa kpéʔele yele nyɛ́nɛ na, gele ge yìri mii Tóow ma lè. Lìí si li nyɛ ge ni wobeeli, á ye jo ye a mii wábagi?» 33#Lev 24:16 A Zyefubèle wi pye: «Kacǎngèle bee làa kéele na ban wolo jo wo a mɔ wábagi í, fwɔɔ Kolocɔlɔɔ mɛ́ɛgi kálagila kéele na. Níì cán mɔ wee wi nyɛ lè syɔɔn, mɔ n miyɛɛ gbéʔele Kolocɔlɔɔ.»
34 #
Ŋún 82:6
A Zyezu be yari: «Ki o yaà wozɛbɛgɛ ní yele làlwaw sɛ́bɛ ni ì, àmɛɛ Kolocɔlɔɔ gi joo lè níì jo: ‹Yele i nyɛ kolocɔlɔbèlē›? 35Amɛɛ gi nyuu lè làlwaw sɛ́bɛ ni níì jo, bele na Kolocɔlɔɔ da wi syɛ́ɛnri tɛ̀ɛn lè, pe i nyɛ kolocɔlɔbèlē (wolo si n gi cán yafyɛn a gbǎn Kolocɔlɔɔ syɛ́ɛnri fàli í), 36mii wee Kolocɔlɔɔ nyɛ́nɛ n wòlo lè n tun naa dulunyanw ni, a yele baa jo, mii i Kolocɔlɔɔ mɛ́ʔɛ kálagi, ncan mii n jo mii i nyɛ wi jaà! 37Kérigèle mii kpéʔele lè, kapye yele n gi nyaa ke o nyɛ mii Tóow wòʔolo í, ye a kɔ́ tága mii syɛ́ɛnri na í! 38Yele si ga gi cán ncan mii Tóow kapyegèlē mii kpéʔele, àlí ki ga pye yele a tága mii syɛ́ɛnri na í, ki n yɛlɛ ye tága gele bee na, koro ga pye yele í gi fílige cán bi cán Tofɔw i nyɛ mii ni, mii si wɔ́ɔ i nyɛ Tofɔw ni.»
39Lǎli bee ni a be ní i caa bi Zyezu cò, kàjáa pe fanʔa ga taa í, a wi yiri be níngi ni, 40#Zyan 1:28 n lúru n kári Zyuridɛnw jelige na níìgēle, tɛ́ɛgee ni Zyan da sélì pye ni syɛ́ɛnbèle batize lè, n sáà kòro nɛɛ bee bi làlaa kwɔ́ɔ. 41A syɛ̀ɛnnɛ saʔa i syée yaà wi ma. A bele bee i gi nyuu níì jo: «Alí Zyan da kakpɔɔgaa faala kpéʔele í. Koro ní ki myɛ ní, gee wi da ni nyuu lè nǎnw naa kéele na, ki myɛ tɔ̀nɔ́ i nyɛ kányɛʔɛ.» 42A syɛ̀ɛnnɛ saʔa tága wi na nɛɛ bee.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Kolocɔlɔɔ Syɛ́ɛnri © Bible Society of Côte d'Ivoire, 2008.