Luki 20

Sán Zyezu fǎngi yìri?

(Mat 21:23-27; Mar 11:27-33)

1Cányi bee nínge ni lǎli ni Zyezu pye ni syɛ́ɛnbèle tama lè kpɔ̀ʔɔrɔli kpaʔa ni ní i Syɛɛnjóocǎnri nyuu, a sáriga-wòlobèle kàfɔɔlɔ, ní làlwaw sɛ́bɛwelebéle, ní wolɛɛbèle kári yaà 2n sáà wi pye: «Ki joo wolo ma fǎngee félege ní mɔ kérigèle naa kpéʔele lè, ní wee wi fǎngi bee kaan mɔ ma lè?» 3A wi be yari: «Mii a wɔ́ɔ yele yíbe keelaa nibin na. Ye gi joo mii ma, 4batɛmiw Zyan da ni kpéʔele lè, nyɛ̀ʔɛni na lé wi yìri láà ba fwɔɔ syɛ́ɛnbèle ma?»

5A be i peyɛɛ gábala gi na níì jo: «Wolo ga jo nyɛ̀ʔɛni na wi yìri, wi a jo: ‹Nyàʔá na yele si da tága wi na í?› 6Wolo si ga jo syɛ́ɛnbèle má wi yìri, syɛ́ɛnbèle myɛ a wolo wábagi ní kàdɛnɛri ní, níì cán pe n tɔ̀nɔ n tága gi na ncan Zyan maa pye kanyaajoowaa.» 7A be wi yari, poro ga wi kàban-yìrigi cán í. 8A Zyezu be pye: «Fǎngee ní mii kérigèle naa kpéʔele lè, mii a wɔ́ɔ gi tɛɛtaagi tɛ̀ɛn yele na í.»

Ɛrɛzɛn sefala-syɛɛnpeebèle kàseele

(Mat 21:33-46; Mar 12:1-12)

9 # Eza 5:1 Lǎli bee ni a Zyezu fala n kàseeli naa wáa syɛ́ɛnbèle ma níì jo: «Nànwaa maa ɛrɛzɛn séʔe sámaga níì gi kàlifáa ɛrɛzɛn sefalabèle pèle ma páā woro lɛɛli kaangi woro ma, níì yiri n kári kùlaa ni n sáà mɔn yaà. 10A ɛrɛzɛnw làrilaala ga baa nan, a wi falipyewaa tun ɛrɛzɛn sefalabèle ma níì jo wi sa be pye pe woro lɛɛli kaan wi ma waa maa. A ɛrɛzɛn sefalabèle sáà wi kpúmɔn níì wi lúrugo n tórigo wowaaɔ ní. 11A wi níì falipyewaa nikwɔɔ tun yaà. A be ní sáà wee bee kpúmɔn, ní i wi teeri, níì wi lúrugo n tórigo wowaaɔ ní. 12A wi níì taanri wóo tun yaà, a be wɔ́ɔ sáà wee bee kpúmɔn n kpàli níì wi nɛnɛ. 13A ɛrɛzɛn ségi fɔ́lɔ jo: ‹Nyàʔá mii a kpéʔele? Mii a mii pìinidaanmaw tun yaà be ma, dɔ̀ʔɔ́ pe a sa fɛ̀ɛrɛ taa wee bee na.› 14A ɛrɛzɛn sefalabèle ga wi nyaa, a be gi joo peyɛɛ ma níì jo: ‹Wee naa wi nyɛ wi kɔriliiw, ye tíi wo wi kpóo koro ga pye kɔ́rigi si kòro wolo wóʔo.› 15A be wi ŋɔrigɔ n yirige ɛrɛzɛn ségi kàdoʔo ma n sáà kpóo.

Nyàʔá si ɛrɛzɛn ségi fɔ́lɔ a kpéʔele be na? 16Wi a lúru pan ba ɛrɛzɛn sefalabèle bee kpóo si ségi kàlifáa pèle nikwɔɔlɔ ma.»

Lǎli ni syɛ́ɛnbèle syɛ́ɛnri bee lóʔo lè, a be jo: «Gee bee ga yɛlɛ gi kpéʔele nyáana í.» 17#Ŋún 118:22 A Zyezu i be wéle níì jo: «Syɛ́ɛnree di sɛ́bɛ lè níì jo:

‹Kàdɛnɛgee kpaafaanbèle da cée lè,

koro ki baa pye kpáagi jɛ̀ɛ́nnɛ kadɛnɛzelige,›

nyàʔá gi nyɛ syɛ́ɛnri bee kɔ́rɔ? 18Syɔ́ɔnwee faala wi ga too kàdɛnɛgi bee na lè, wi a kabagi. Wee na si ki ga too lè, ki a wee bee pulɔlɔ mɛnɛ mɛnɛ.»

Nyǔnyi lɔ́rɔ ti a ra sàrá Sezari ma lè

(Mat 22:15-22; Mar 12:13-17)

19Lǎli bee wonijanna ni a làlwaw sɛ́bɛwelebéle ní sáriga-wòlobèle kàfɔɔlɔ i kanmaa caa bi wi cò, kàjáa pe maa ni fɛ̀ɛgí syɛ́ɛnbèle na. Pe maa gi cán poro má wi kàseeli bee wáa n kaan. 20A be kòro ni kanmaa caa Zyezu na, níì jànvaafɔbèle pèle tórigo pe sa peyɛɛ gbéʔele syɛɛnsinbéle, koro ga pye pe Zyezu taa cò wi nyɔ́ɔgi syɛ́ɛnrɛ báriga ni bi kaan kútiijoow ma, ní tári fɔ́lɔ fànʔa ma. 21A be sáà wi yíbe níì jo: «Tamafɔw, wolo n gi cán mɔ syɛ́ɛnri ní mɔ tamani n sín, mɔ o syɔɔnwaa yirigi wàa ni í, kàjáa mɔ tɔ́ɔ i be tama kányɛɛgi na Kolocɔlɔɔ kôdanʔari ni. 22A gi yɛlɛ lé wolo í da nyǔnyi lɔ́rɔ kaangi Sezari ma láà, wàlá ki ga yɛlɛ í?»

23Amɛɛ si wi be sícilimi cán lè, a wi be pye: 24«Ye deniye kaan naa mii ma mii í wéle. Wìí syɔ́ɔn yɛ́ʔɛ ní wi mɛ́ɛgi gi gee wáliw na?» A be jo: «Sezari wii.» 25A wi be pye: «Koro na gee gi nyɛ lè Sezari wógi, ye gi kaan Sezari ma. Gee si gi nyɛ lè Kolocɔlɔɔ wógi, ye gi kaan Kolocɔlɔɔ ma.» 26Pe fanʔa ga taa bi wi cò wi nyɔ́ɔgi syɛ́ɛnrɛ na syɛ́ɛnbèle nyɛ́nɛ na í. A be i káama wi syɛɛnlurugori na wi kaan poro ma lè, a be pyèri.

Yíbege, kúbèle nyán-yirile kéele na

(Mat 22:23-33; Mar 12:18-27)

27 # Kap 23:8 Sadusebèle pe gi nyuu lè níì jo kúbèle a nyán í, a poro pèle pan n baa wi yíbe 28#Làlw 25:5 níì jo: «Tamafɔw, Mowizi maa gi sɛ́bɛ n yaʔa wolo ma níì jo: Nànwaa ga kùu níì wi cɔɔ̀ yaʔa wi ga pyà taa í, fwɔɔ wi senyɛnw í céw bee láa, koro ga pye wee wi kùu lè wi yòdaʔayi í pye beè. 29Nànbēle kɔrɔsiin si maa pye yaà senyɛ̀nnɛ. A wozeliw cɔlɔɔ láa ní baa kùu, pyà sìndaa ni. 30A siin wów wi láa, 31a taanri wów wɔ́ɔ baa wi láa. A pe myɛ kɔrɔsiinw wi láa n kpàra níì kùu, wi ga pyà taa pe wàa faala ma í. 32A céw náa baa kùu. 33Koro na kúbèle ga baa nyán, nǎnbèle bee ni wìí wóo wi a pye céw bee? Níì cán pe myɛ kɔrɔsiinw maa wi láa n sɔ̀lɔ.»

34A Zyezu be pye: «Nǎnbèle ní cébèle i cèpɔrigi kpéʔele dulunyanw naa ni. 35Kàjáa dulunyanwee wi maa lè, bele Kolocɔlɔɔ córo lè pe n nyɔɔ n yɛlɛ ní wee bee taala ní lè, ní wɔ́ɔ̀ yɛlɛ ní nyán-yirili ní kúbèle nínge ni lè, nǎnbèle bee ní cébèle bee a ba ra cèpɔrigɔ kpéʔele í. 36Pe a ní gbǎn kùu í, níì cán pe i nyɛ àmɛɛ nyɛ̀ʔɛni tundunbéle nyɛ lè, pe wɔ́ɔ i nyɛ Kolocɔlɔɔ pìibēle, ní wɔ́ɔ i nyɛ nyán-yirili pìibēle. 37#Yir 3:6 Mowizi tiimaa n gi fílige n tɛ̀ɛn níì jo kúbèle a ba nyán, níì cán sɛ́bɛw tɛ́ɛgee ni wi tiipiigi kéele sɛ́bɛ lè, wi n Kàfɔw yeri nɛɛ bee ‹Abirahami Kolocɔlɔɔ, ní Izaaki Kolocɔlɔɔ, ní Zyakɔbi Kolocɔlɔɔ.› 38Kúbèle wóo ban wi nyɛ Kolocɔlɔɔ í, niweebèle wóo wi nyɛ Kolocɔlɔɔ, níì cán pe myɛ i nyɛ woweebèlē ní Kolocɔlɔɔ ma.»

39A làlwaw sɛ́bɛwelebèle pèle wi yari: «Tamafɔw, mɔ n tɔ̀nɔ n sámaga n joo.» 40Pe ga níì soro bi wi yíbe keelaa faala na í.

Kirisi ní Davidi

(Mat 22:41-46; Mar 12:35-37)

41A Zyezu be pye: «Mɛ̀ɛ́ gi nyɛ be si i gi nyuu níì jo: Kirisi i nyɛ Davidi jáa? 42#Ŋún 110:1 Davidi tiimaa n gi joo Ŋúnuyi sɛ́bɛ ni níì jo:

‹Kàfɔw n gi joo mii Kàfɔw ma níì jo:

Ba tɛ́ɛn mii kàliige ma

43fwɔɔ bi taa mii í ba mɔ nigoobèle kpéʔele

mɔ tɔ́lɔyi yataʔaga.›

44Amɛɛ si Davidi wi yeri lè Kàfɔw, mɛ̀ɛ́ wi a gbǎn ní pye wi jaà bi sɛ́ɛ?»

Zyezu n jo paa kɔ̀rɔsíi làlwaw sɛ́bɛwelebéle na

(Mat 23:1-36; Mar 12:38-40)

45Lǎli ni syɛ́ɛnbèle myɛ be líiyi cáan ni lúro wi ma lè, a wi wi pìitamabèle pye: 46«Yaa yeyɛɛ kɔ̀rɔsíi làlwaw sɛ́bɛwelebéle na. Ncan pe i caa bàā burogboloyi nii da nyaari, ní wɔ́ɔ i caa syɛ́ɛnbèle í da poro syáanri syɛɛnkpoʔolomi tɛ́ɛyɛ ni, ní i sɔ̀ngí poro í da tɛ̀ɛ́n kòrikpoloyi na sérikpaayi ni, ní wɔ́ɔ i caa bàā tɛ̀ɛ́n kpɔ́ɔmi tɛ́ɛyɛ ni sáā sériw lìile líi. 47Pe si wɔ́ɔ i lɔgucebèle kɔ́lɔ yárira nɔ̀ʔɔrɔ ni líi, ní i Kolocɔlɔɔ nyɛ́ɛri ni mɔngi jàngó bi peyɛɛ dɛ̀ɛn syɛ́ɛnbèle na pe jo poro i nyɛ syɛɛnsinbéle. Bele bee kútii a ba kpɔ́ʔɔ sɔ̀lɔ.»

Currently Selected:

Luki 20: CB10

Highlight

Copy