Matayi 10
10
Avapositili ishumi navavili nimbombo yavo
1-15: Mal. 6,7-13. Luk. 9,1-5.
1Pʼahavunganihʼavasundikwa vakwe ishumi navavili, ahavapʼamaha aga kuvinjilʼimpepʼinkandamanu naga kukantulilʼimpungo zyonti nuvupotwe vwonti.
2-4: Mal. 3,14-19. Luk. 6,12-16. Yoh. 1,40-49.
2Amazina ga vapositili ve valʼishumi navavili ge ganaga: Umutanzi uSimoni we vatili wʼuPeteli, nuAndeleya umuzuna wakwe, nuYakobu umwana-Zebedayi, nuYohani umuzuna wakwe, 3nuFilipu nuBalitolomayi nuToma, nuMatayi musonkolamusonko, nuYakobu umwana-Alifayi, nuLebayi we vatili wʼuTadayi, 4nuSimoni uwa mu-Kana, nuYuda uwa mu-Kalyoti wʼamwaniliye ulwa pisinda. 5Avishumi navavilʼava vʼahavasontelezyʼuYesu ahavalajizya ahati:
Mutajendaje mwidala lya vakunzi,
namunkaya ya vaSamaliya mutahinjile.
6Nkandi kungʼonzi zya nyumba ya Yisilayili zye zitezile, kwe muhavale nyene. 7Lwe mukujenda muhakumusyaje ukuti vwinzilʼuvumwene vwa kumwanya, vuli papipi, 8muhazuzuvushizyʼavavinu, muhazyusye navafwe, muvatelefwajʼavamambombo, muhavinje nimpepʼimbivi. Yenyi mbapiye vwelele, namwe muhavapanje vwelelʼimwe. 9Mutalonkajʼusahabu nufeza nihela zya kuviha mumalamba ginyu. 10Mutavanje nishiṿunda mwidala namashati gavili nindyato nindisa. Shʼumuvomṿi akuhondela ukuposhelʼiṿwa kulya ṿwakwe. 11Inga muvazilʼukufiha munkaya yoka—inga mpiti nga nyinsi—mwe muhamulondole mumwo wengʼahondeye, ilelo muhadile kukwakwe muhafishe pala pe mukusogola. 12Inga lwe mukwinjila munyumba, pe muhavalamushe avamunyumba. 13Inga yihondeye pʼuvwihalo vwinyu vukuyinzilʼinyumba yavo. Nkandʼinga yitahondeye pʼuvwihalo vwinyu vukuvagalushila mwenemwe. 14Umuntu lwʼakusita nukuvaposhela nukutejelezyʼamazwi ginyu, pe muhafume munyumbʼino namunkaya yiyo, muhakunyuntajʼulusuto lwa kuṿinama ṿwinyu. 15Nalyoli nkuvavuzyʼine nkuti: Pisiku lya vulonzi pʼizya va mu-Sodomu nizya va mu-Gomola ziliva mpupusu kuzya nkaya yiyo.
16Yenyi she nkuvatuma fwe ngʼonzi pahati pamapumpi. Muve mwe vasheṿu lelo fwe njoha, havili muve mwe vazelu fwe nkunda.
17-22: Mal. 13,9-13. Luk. 21,12-17.
17Mwandaje lelo navantu, she valivatwalʼimwe mumabalaza, havili valivasyempʼimwe mumasinagogi gavo. 18Mulikweselwa kuvahombe nakuvamwene pe pazyane. Izyo zivanje lusimishizyo kuli vuvo nakuvakunzi. 19Apene nyene inga vakuvakungʼimwe vovulo, pe mutakutanaje ṿwe muliyanga nazye muliyanga. She muliposhela pahavalilizyo huho izya kuyangʼimwe. 20She mutaliyanga mwemwe, nkandi uMupepo wa So nyene aliyanjila mumwinyʼimwe. 21Umuntu alimwanilila umunine ukuti agogwaje, nuyise umwana wakwe vovulo, vope navana valivagalulila avapafi vavo valivagoga. 22Vontʼavantu valivapatʼimwe she muli nizina lyanʼine. Nkandʼuno wʼakujimbilila nakuvusilo wʼalipona. 23Apenʼinga vakuva-ṿwima munkayʼino pe muhashimbilile muyamwavo. Nalyoli nkuvavuzyʼine nkuti: UMwanamuntu aliyinza lwe mushili nukumalilizyʼinkaya zyonti mwa Yisilayili umu. 24Umusundikwa atakulusyʼuvupiti umusambilizi wakwe, numunyamata atakulusyʼuvupiti umwene wakwe. 25Inga numusundikwa ali fwe musambilizi wakwe, wope pe vovulo, inga numunyamata ali fwe wumwene wakwe, wope pe vovulo. Ingʼumuhatanyumba vamupiyʼilya Belizibuli, pe vati vavaleshe lelo avanyumba yakwe?
26-33: Luk. 12,2-9.
26Mutavogopaje lelʼimwe. She twontʼutu twenga tugwinchililwe twe tuligwinkulilwa, twonti nutwa kukwilu tulimanyihʼapazelu. 27Zyenga nkuvavuzya kukwilu, muhaziyanjʼapazelu. Zyenga mukunongʼonelwa mumakutwi, muhazikumusyaje pamwanya panyumba. 28Mutavogopaje vuvo ve vakugogʼumuvili weka, ve vapositwʼukugogʼumwoyo. Nkandi mulusyajʼukumunyila wuyo wʼali namaha ga kuloṿwʼumwoyo numuvili mugehena. 29Indundulu zivili zitakukalwa nihela yoka? Pope nimo itakulagala pansi shisitakumanya uSo winyu. 30Imwe nazye nsisi zyonti zya kwitwe zivazilwe. 31Ilelo mutatetemaje. She muzilusizyʼuvugomu nazye ndundulʼinyinji. 32Uno wengʼakuyiyanga kukwane lwe vakwiṿwʼavantu, we nane ndiyiyanga kukwakwe lwʼakwiṿwʼuTata wʼali kumwanya. 33Nkandʼuno wengʼakuyihana kukwane lwe vakwiṿwʼavantu, we nane ndiyihana kukwakwe lwʼakwiṿwʼuTata wʼali kumwanya.
34-36: Luk. 12,51-53.
34Mutasivaje ukuti ninzilʼukuvihʼuvwihalo munsʼumʼine. Ntinzilʼukuvihʼuvwihalo ndali, ndesite ye mpalala nye. 35She ninzilʼukuvalwisyʼavantu: Umwanʼumwanaṿuli nuyise, numwa-nʼumulindu nunyina, havili numuhamwana nunyinaṿwala. 36Vope navamunyumba ya muntu valila valugu vakwe. 37Uno wʼakuvakunda nuyise nunyina ukulusya kulʼine wʼahondeye kukwane. Havili wʼakuvakunda navaṿuli vakwe numulumendo numulindu ukulusya kulʼine atahondeye kukwane. 38Wope nuno wengʼatakuyivegazyʼishihovenkanyo shakwe nukundandata mwisindʼine, wʼatahondeye kukwane. 39Uno wʼakupulumusyʼuvulanzi vwakwe wʼakuvutezya, nkandʼuno wʼavutezizyʼuvulanzi vwakwe pe pazyane, wʼakuvupulumusya. 40Uno wengʼakuvaposhelʼimwe wʼakumposhelʼine, uno wengʼakumposhelʼine, wʼakumuposhela wuyo wʼantumilʼine. 41Uno wengʼumukuvwi akumuposhela she mukuvwi, wʼaliposhelʼamalipilo ga mukuvwi. Wope nuno wengʼumugolosu akumuposhela she mugolosu, wʼaliposhelʼamalipilo ga mugolosu. 42Wope wʼamungʼwesizye woka uwa vansʼiva lwe lupindi lwoka ulwa minzʼamahata she musundikwa, nalyoli nkuvavuzyʼine nkuti: Amalipilo gakwe atalitegwa.
Currently Selected:
Matayi 10: NYi1965
Highlight
Share
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
