Matayi 16
16
UYesu akuhana lwe valavilʼishimanyilo
1-12: Mal. 8,11-21.
1Pe vahapalamila kukwakwe navaFalisayi navaSadusayi ukumulinga, vahamuvuzilizya ukuti avaloleshezyajʼishimanyilo shoka she shikufuma kumwanya. 2Uwenʼahamula ahati: Shamazuva pe mukuti yasha she kushemime kumwanya. 3Havili shanzanche pe mukuti njala ntupu umusanyʼuno she kumwanya kukushemama nukuvinduha. Mwe valumilenga mwe mumanyinsinye she kuli kumwanya, iṿwenʼiṿimanyilo iṿwa kumanyila mumwʼumwahʼumupiti, amwe ṿwe mutakuṿi-manyinsanya? 4Avantu vashinishʼiva avanyala avavembu vakwanzʼishimanyilo. Vataliyaga nashimʼishimanyilo isha kusukumila nkandi isha Yona sheka. Pʼahavaleha pupo ahavala.
Akupilila uvwantonko vula vasundikwa
5Ilelo avasundikwa lwe vavala kushipuma kwisyila pe valuṿilwʼukusendʼamakati. 6UwenʼuYesu ahayanga navo ahati: Mwenye nkani, mwandajʼiṿiluzizyo ṿwa vaFalisayi niṿwa vaSadusayi. 7Pʼavene muhati zyavo vahati: She tutapayilʼamakati. 8UwenʼuYesu lelo lwʼaziwenyi, pʼahati: Zye muhasiva zyashi mwe va lwitihʼulupupusu, she mutapayilʼamakati? 9Mushili nashinishi injele musyaye? Muluṿilwe namakati gasanu gala ge valiyʼavantu 5,000, niṿiseje ṿwe mwavunganisilʼutwalila ukuti ṿwali vulive? 10Muluṿilwe namakati gasanu nagavili gala ge valiyʼavantu 4,000, niṿitundu ṿwe mwavunganisilʼutwalila ukuti ṿwali vulive? 11Mutakuzimanyinsanya vuli ukuti ntakutahʼamakati lwe nkuti mwandajʼiṿiluzizyo ṿwa vaFalisayi niṿwa vaSadusayi? 12Pe vahamanyinsanya ukuti atakutahʼiṿiluzizyo ṿwa makati, nkandi zye nsambilizyo zya vaFalisayi nizya vaSadusayi.
UPeteli akwitihʼukuti uYesu wu Chilisiti
13-20: Mal. 8,27-30. Luk. 9,18-21.
13UwenʼuYesu nyene lwʼavazilʼukufiha munsi ya mu-Kesaleya Filipi, pʼahavavuzilizyʼavasundikwa vakwe ahati: Avantu lwe vakumuyangʼuMwanamuntu, pe vakuti wʼunanu? 14Avene vahati: Vamo vakuti we Yohani umwozyi, vamo vakuti we Eliya, vamo vakuti we Yelemiya, vamo vakuti mukuvwi uwamwavo. 15Uwenʼahati: Imwe lelo, mukuti ne nanu? 16PʼuSimoni Peteli ahamula ahati: We Chilisiti iwe, we Mwana wa Mulungu wʼalipo. 17PʼuYesu ahamula ahati: We musangalusu we Simoni Bali-Yona, she zinizi zyʼatakuvuzizyʼumuvili namavanda ndali, nkandi zyʼakuvuzizyʼuTata wane wa kumwanya. 18Nane nkukuvuzya lelo nkuti: Nawe we Peteli we liyalavwe, ilelʼine piyalavwe linili pe ndizengʼishivanza shane, ṿwope naṿwe ṿilyango ṿwa kuvuzimu ṿitalishipota. 19Nkukupa niṿwigulilo ṿwa shinamwene sha kumwanya. Shonti shengʼukushikungʼiwe pansʼipa, she shikukungwa nakumwanya. Shope shengʼukushisatulʼiwe pansʼipa, she shikusatulwa nakumwanya. 20Pʼahavahandanizya nkanʼavasundikwa vakwe ahati: Mutamuvuzyaje numʼumuntu ukuti we wʼuChilisiti.
UYesu akukuvwa ukufwa nukuzyuha kwakwe
21-28: Mal. 8,31–9,1. Luk. 9,22-27.
21Pʼahanda pupʼuYesu ahavalanganizyʼavasundikwa vakwe ahati: Pakuti mbale mu-Yelusalemu mwe valinizizya nkani navasongo navashiputʼavapiti navamanyakalata, mwe valingoga, pisiku lya vutatu nyene pe ndizyuha havili. 22PʼuPeteli ahasavuha nawo, ahajenda nukumuhandanizya ahati: Zijendelʼukutali Mwene, zye zitahakwagaje ndali! 23Uwene ahamusyetushilʼuPeteli ahati: Galushilaga mwisinda we Setano! Iwe we shipunulo kukwane. Shʼutakusivʼizya kwa Mulungu, ukusiva zye zya vantu vwelelʼiwe.
Ulwito lwa kuyihana weka
24PʼuYesu ahavavuzyʼavasundikwa vakwe ahati: Inga wokʼakuti imulandate mwisindʼine, wʼayihanaje, nishihovenkanyo shakwe ayivegazye, pʼandandatʼine. 25Shʼuno wʼakwanzʼukupulumusyʼuvulanzi vwakwe, wʼakuvutezya. Nkandʼuno wʼakuvutezyʼuvulanzi vwakwe pe pazyane wʼakuvupulumusya. 26Nashengʼumuntʼayilonsile yontʼinsi, pʼikumuvosya shonu, ingʼatezizyʼuvulanzi vwakwe? Niṿwa kuvuhombola, aṿwaje kwi iṿwa kuhombolʼuvulanzi vwakwe? 27ShʼuMwanamuntu pʼaliyinza navahavizya vakwe muvupiti vwa Yise, pʼalivalipilʼavantu vonti zye ziyanine nimbombo zyavo unʼiyakwe unʼiyakwe. 28Nalyoli nkuvavuzyʼine nkuti: Imwe mwe mwimiliye panapa, vamo vatalimanyʼukufwa lwe mutamuwenyi sutʼuMwanamuntu ukwinza muvumwene vwakwe.
Currently Selected:
Matayi 16: NYi1965
Highlight
Share
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
