Matayi 25
25
Ishiholanyo sha valindʼishumi
1Pʼuvumwene vwa kumwanya vulive fwe ngatʼavamwali ishumi, ve vasenzitʼinyale zyavo, vahavuhʼukumutanganʼumusendamwantanda. 2Nkandi vasano vali vapukupuku, vasano vali ninjele. 3Avapukupukʼiva inyale zye vahasenda, nkandʼamafuta ge vatahasenda. 4Avenʼavanjele vahasenda namafuta munsupa poka ninyale zyavo. 5Lwʼahaṿile umusendamwantanda, pe vahasupila vahakata nutulo vonti. 6Ilelo pavusiku pahati pe lihavilishilwa ilya kuti: Yenyi, umusendamwantanda! Simuvushʼukumutangana. 7Pe vahavuha vontʼavamwali vanava, vahayananyʼinyale zyavo. 8Pʼavapukupuku vahavavuzyʼavanjele vahati: Simutupanjʼamafuta ginyu, shʼinyale zyitu zyamakuzima. 9Avanjele nyene vahamula vahati: Ndali. She ngavanga pe gakusova swenti naswe namwe. Nkandi simuvale muyikalile. 10Ilelo lwe vavazilʼukukala, pʼumusendamwantanda ahafiha, avene ve vayisenginye vahinjila nawo ukulyʼiṿwa pavusendelo, kushilyango kuhigalilwa. 11Pisinda pe vahinza vope navamwalʼavamwavo vala vahati: Mwene, mwene, utwigulile. 12Uwenʼahamula ahati: Nalyoli, nkuvavuzyʼine nkuti: Ntavamanyilʼimwe. 13Mwe mumwo mudamule, she mutamanyile isiku nahavalilizyo.
Ishiholanyo sha ṿwuma
14-30: Luk. 19,12-27.
14She zihonzizye fwe ngati zya muntu wʼakushula ukutali wʼahavita avanyamata vakwe, ahavaleshelʼiṿwuma ṿwakwe. 15Woka ahamuleshelʼitalanta zisano, woka zivili, woka yoka, inza she vavaliyʼinjele. Pʼahavuha nzila ukushula. 16Uwene nyene wʼaposheleyʼitalanta zisano, ahavalʼukuyitantanya, pʼahalonkʼizinji zisano. 17Vovulo nuno waposheleye zivili, wopʼahalonkʼizinji zivili. 18Uwene nyene wʼaposheleye yoka wʼahavala nayo, ahahana pansi, ahazyihʼulupiya lwa mwene wakwe. 19Lwe padila nkani lelo, pʼahinzʼumwene wa vanyamata vanava, ahati: Simumbazizyaje. 20Pʼahapalamilʼuno wʼaposheleyʼitalanta zisano ahaziviha poka nitalantʼizyamwavo zisano ahati: Mwene, wampiyʼitalanta zisano, yenya, ndonsilʼizyamwavo italanta zisano. 21Pʼumwene wakwe ahamuvuzya ahati: Hinza, we munyamata we mwinza we mutungamu. Wali we mutungamu panyinsi, nkukuviha pampiti. Yinjilaga kuluseshelo lwa mwene waho. 22Wope nuno wʼaposheleyʼitalanta zivili ahapalamila, ahati: Mwene, wampiyʼitalanta zivili, ndonsilʼizyamwavo italanta zivili. 23Pʼumwene wakwe ahamuvuzya ahati: Hinza, we munyamata we mwinza we mutungamu. Wali we mutungamu panyinsi, nkukuviha pampiti. Yinjilaga Uluseshelo lwa mwene waho. 24Wope nuno wʼaposheleyʼitalanta yoka ahapalamila, ahati: Mwene, she nkumanyile ukuva we muntu we muhali, ukutondola namwʼutatoteye, ukuṿuna namwʼutapesile. 25Pe nkatetemʼine, nkavalʼukuzyihʼitalanta yaho. Yenya, alʼishi ishijela shaho. 26Uwenʼumwene wakwe ahamula ahati: We munyamata we muvivʼiwe we muhata! Wamanyilʼukuti nkutondola namwe ntatoteye, nkuṿuna namwe ntapesile? 27Pe wali nishonu lelo ukuvaninchilizyʼimpiya zyane ve vakuyitantanya? Shinishi lelo she ninzile pe nkwe nsendaje ishane nishilonkwa shakwe. 28Pʼahati: Simusendajʼitalanta yakwʼino, mumupanjʼuno wʼali nitalantʼishumi. 29She vonti ve vali naṿwo yimo, vakwonjelezelwʼumwonji ṿivatangalile. Avene nyene ve vate naho nahamo ve vakusompolwa nahuho he vali naho. 30Uwenʼumunyamatʼumuvivi nyene, mumutaje mushisi sha kuluvazu; Mwe ziliva mumwo zye nkuta ntupu nululumanyo lwa mino lutupu.
Isiku lya vulonzi
31Apene nyene lwʼaliyinzʼuMwanamuntu muvupiti vwakwe navahavizya vakwe vonti, pʼalitendama pashitengo shakwe sha vumwamu. 32Pʼavantu inkolo zyonti valivungana kuminso gakwe. Pʼuwenʼalivatapulanya inza shʼumudimi akuzitapulanya ingʼonzi ninduvi. 33Pʼingʼonzi aliziviha kumuhono wakwʼumulilo, izyenʼinduvi aliziviha kumumongo. 34PʼaliyangʼuMwene kuva kumuhono wakwʼumulilo aliti: Simwinzajʼipa mwe valotwa va Tata imwe, mupwanʼuvumwene vwʼuMulungu avayananizizye mwenemwe, atalisile pala pʼiyalizilwʼinsi. 35She lwe nali ninzala pe muhandetelʼiṿwa kulya, lwe nali nishinyoto pe muhangʼwesyʼaminzi, lwe nali ne mujeni pe muhamposhela munyumba zyinyu, 36lwe nali ishitali pe muhanzwihʼamenda, lwe nkavinaga pe muhinzʼukumṿula, lwe nali mujela pe muhansyungula. 37Pe valiyamulʼavagolosu valiti: Mwene, shali twakuwenyi shʼuli ninzala, tuhakuletelʼi-ṿintu, amwe shali nishinyoto tuhakungʼwesya? 38Shali twakuwenyi she we mujeni, tuhakuposhela munyumba zyitu, amwe shʼuli ishitali tuhakuzwihʼamenda? 39Shali twakuwenyi shʼuvinile amwe shʼuli mujela, tuhinza ukukuṿula? 40Pʼuwe-nʼuMwene aliyamula aliti: Nalyoli nkuvavuzyʼine nkuti: Yonti yenga mumuvombeye woka muvamwitu nashenga vansi, ye mumbombeye nenene. 41Pe vope navakumuhonʼumumongo aliyanga navo aliti: Simwepe panapʼipa mwe vantipʼimwe, simuvale kumwoto wa shima we vapembelilwe numukwalanzi navahavizya vakwe. 42She lwe nali ninzala pe mutahandetelʼiṿwa kulya, lwe nali nishinyoto pe mutahangʼwesyʼine, 43lwe nali ne mujeni pe mutahamposhela munyumba zyinyu, lwe nali ishitali pe mutahanzwihʼamenda, lwe nkavinaga, lwe nkavanga mujela, pe mutahamṿula. 44Pe vope valiyamula valiti: Mwene, shali twakuwenyi shʼuli ninzala, shʼuli nishinyoto, she we mujeni, shʼuli ishitali, shʼuvinile, shʼuli mujela, ukuti tutahinzʼukukuvombela? 45Pʼuwene aliyamula aliti: Nalyoli nkuvavuzyʼine nkuti: Shima lwe muhasitʼukumuvombela woka muvamwitʼavansi nkanʼiva, pe muhasitʼukumbombela nenene. 46Pʼavene vanava valivala kwe kusundwʼisunde lya shimashima.
Currently Selected:
Matayi 25: NYi1965
Highlight
Share
Copy
Want to have your highlights saved across all your devices? Sign up or sign in
Nyiha New Testament © British and Foreign Bible Society, 1965.
