Matayi 27

UYesu kwa Pilati, umusungansi wa shiLoma

1Vazile lelo lwe kushiye shanzanche, pe vonti navashiputʼavapiti navasongo vahahomana vahayangagʼizya kumugogʼuYesu. 2Vahamukunga vahamukwesela kwa Pilati umusungansi. We vahamupa.

Ukufwa kwa Yuda

3IlelʼuYuda wʼamwaniliye, lwʼawenyʼukuti valonzile vatili tukumugoga, pʼumwoyo ahavava, pʼahagalusyʼimpiya zila izya feza amashumi gatatu kuvashiputʼavapiti nakuvasongo, 4ahati: Ntazilʼamalandu, she naniliyʼamavanda amasitamalandu, avene nyene vahati: Zye tutuvuli nazyo zyenezyʼiswe? Zye zyaho wenewe kunukwo. 5Pʼuwenʼahazitaga pansi mwa tempeli impiya zinizi, ahepa ahayinyonga. 6Pʼavashiputʼavapiti vahasevʼimpiyʼizi, vahati: Mwiho ukuzyiha mumbogoso ya mpiya zya mwa tempeli, she zya ṿipalazi zinizi. 7Ilelo lwe vayangine vahitinkana, vahavalʼukukala nawo umumatansonta insi yakwe, vahati yikuva ya kusyila mumwʼavajeni. 8Mwe mumwo insi yiyo vakuti insi ya ṿipalazi izina lyakwe nakushinishʼuku. 9Mwe zilunjisile mumwo zizyo zyʼahayangʼuYelemiya umukuvwi, lwʼahati:

Vasenzite zye mpiya zya feza zizyo amashumi gatatu, izya vukazi vwa kumukalʼumukalwa, we vahamukala kuvana-Yisilayili,

10zye valifile pansi ya mumatansonta, inza she lilyo andajizizyʼuMwene.

UYesu kwa Pilati

11-14: Mal. 15,2-5. Luk. 23,2; 3. Yoh. 18,29-38.

11UwenʼuYesu ahimilila pamusungansi, pʼumusungansi ahamuvuzilizya ahati: We mwene wa vaYuda iwe? UYesu ahamula ahati: Mwe mumwo mwe wayanga. 12Ilelo lwe vakumulonjelela navashiputʼavapiti navasongo pʼatahamula nalimo. 13PʼuPilati ahamuvuzilizya ahati: Sutakwiṿwʼiwe zye vakukulonjelela? 14Uwenʼahasita nukwamula nalimʼizwi. Pʼahasukumila nkani umusungansi.

15-26: Mal. 15,6-15. Luk. 23,13-25. Yoh. 18,39–19,1.

15Shima pachaka pʼumusungansi ali numwiho uwa kuvatavulila woka uwa mumunyololo wenga vamuseva vuvo. 16Ilelo pamwaha wuyo pʼalipo woka uwa mumunyololo umukumusʼulombwa, izina lyakwe ali wʼuBalaba. 17Ayazile lelo vavunginʼavantu, pʼahavavuzilizya ahati: Mwatinji imbatavulilaje alikwi, ingavangʼuBalaba ingavangʼuYesu we vakumutaha nilya Chilisiti? 18Shʼavamanyile ukuti lugulumwo vwelele lwe vakumulonjelela. 19Lwʼatendime pashitengo sha kulonjela, pʼumushi wakwe ahatumʼintumʼiya kuti: Uyandajʼiwe utamulevenzyajʼumuntʼumugolosʼuno, shʼandisizye munjozi kushiye. 20Avene nyene navashiputʼavapiti navasongo vahasonjelezya nzilʼavantu impuga yonti ukuti vamulanduzyajʼuBalaba, nkandʼuwenʼuYesu vamuloṿwaje. 21Uwenʼumusungansi ahavamula ahavavuzya ahati: Ve vavili vanava mwatinji mbatavulile alikwi? Avene vahati: UBalaba. 22UwenʼuPilati ahavavuzya ahati: Intuvuli nawʼuYesu, we vakuti wʼuChilisiti? Vonti vahati: Umuhomele pashihovenkanyo. 23Uwene nyene ahati: Atazile mulandu vuli? Avene pe vahonjezyʼukuzumʼahalanga vahati: Umuhomele pashihovenkanyo. 24IlelʼuPilati lwʼayazile vatakumwitiha, nkandi vakwonjezyʼukuhalambana, pʼahasendʼaminzi ahasukusula munyove she vakwenyʼavantʼimpuga yonti, ahati: Ine ne muzelu, amavanda ga muntʼumugolosu wununo. Zyinyu mwenemwe kunukwo. 25Pe vahamulʼavantʼimpuga yonti vahati: Amavanda gakwe gatwinzilajʼiswe navana vitu. 26PʼahavatavulilʼuBalaʼoa. Nkandi uwenʼuYesu ahavapa ava kumusyempa ava kumuhomela pashihovenkanyo.

Ukuhomelwa kwa Yesu

27-30: Mal. 15,16-19. Yoh. 19,2; 3.

27Pavasikali va musungansi vahamusendʼuYesu, vahavala nawo munyumba ya vulonzi, vahamuzinjililʼimpuga zyonti zya vamwavo. 28Vahamuzulʼamenda gakwe, vahamuzwihʼinkanzu inchemamu. 29Vahatava nishipambwi sha lwangwa, she vahamuviha kwitwe, vahamupa nitete munyove ya kumulilo, vahamusugamilila, vahamuseha vahati: Vakukulamuha we mwene wa vaYuda. 30Vahamuswila namati havili vahasenda nitete, vahamuhoma pitwe. 31Ilelo lwe vamazilʼukumuholela vovulo, pe vahamuzulʼinkanzu yiyo, vahamuzwihʼamenda gakwe nohavili, pe vahavala nawo ukumuhomela pashihovenkanyo.

32Ilelo lwe vakufuma pe vahahomana nawʼumuntu wa mu-Kileni wʼizina lyakwe ali wʼuSimoni. We vahamuṿijilizya vahati: Umunyatulilʼishihovenkanyo shakwe. 33Ilelo lwe vavazilʼukufiha nawo pe vakuti pe pa-Goligata, lye likuti pe Palupanga, 34pe vahamupʼipele lya mampensa lye vasanginye ninṿongo ilya kumungʼwesya. Uwene nyene lw azimanyile mwilomu pʼahasitʼukungʼwela. 35Ilelo lwe vamuhomeleye pashihovenkanyo, pe vahilihʼishili ukugavanʼamenda gakwe, ukuti zilunjihaje zye ziyanzilwe numukuvwi lwʼahati: Vahayigavanyʼamenda gane havili kunkanzu yane vahilihʼishili. 36Pe vahatendama pupo vahamusunga. 37Kumwanya kwitwe kwe vahahomelʼuvusimbe vwa malandu gakwe: wuyo wʼuyesu umwene wa vayuda. 38Vahavahomela poka nawo paṿihovenkanyo vwavo navagogavantu vavili, woka kumuhono wakwe uwa kumulilo, woka kumuhono wakwe uwa kumumongo. 39Avene nyene vonti ve vahapitililaga pupo, valimusamula vahayinzyʼamatwe gavo, 40vahati: We umanyilʼukumongolʼi-tempeli nukuyizenga havili kumanda gatatu, uyipohaje wenewe weka. Inga we Mwana wa Mulungu uyihaje pashihovenkanyo. 41Vope navashiputʼavapiti navamanyakalata navasongo vahamuholela vahati: 42Avamwavo avaposile shima, ali nishonu lelo ukuyipoha weka! Wuyo wʼumwene wa Yisilayili ayishe pansi pashihovenkanyo, naswe tumwitihaje. 43Asuvilaga kwa Mulungu, amupohaje shinishi ingʼakasime wuyo. Shʼayanzile atili: Ne Mwana wa Mulungʼine. 44Vope navagogavantu, ve vahomelilwe poka nawo paṿihovenkanyo vope vahamuliga zizyo.

Ukufwa kwa Yesu

45Pe nishisi shihagwa insi yonti, shihanda pahavalilizyo ha mutanda, shihaval ukufiha pahavalilizyo ha vusano navune 46Ahalinga pahavalilizyo ha vusano navunʼuYesu ahavilishilʼizwʼipiti ahati: Eloyi, Eloyi, lama sebakatani? Lye likuti: We Mulungu wane, We Mulungu wane, undesile shonu? 47Vamo nyene ve vali pupo lwe vakwiṿwʼizwʼili, pe vahati: akumwitʼuEliya. 48Pe woka ahashimbila luvilo luvilo ahasenda ahenda, hʼahatonteha mwʼasiki, ahahafwiha kwitete ahamungʼwesya. 49Avenʼavamwavo nyene vahati: Leshi, twenyʼingʼakwinzʼukumupohʼuEliya. 50UwenʼuYesu ahavuyizya nohavili, ahakutʼizwʼipiti, pʼahaleshelʼumupepo wakwe.

51Pe numwenda we vapituye mwa tempeli ahazepunkana, ahataliha kumwanya ahapela pansi, ahayipelʼukuva gavili, ninsi yihayinga namayalavwe gahazepunkana, 52nimbipa zihiguha, nagavili ga vafinjile ve vakasitʼutulo gahazyuha ge minji. 53Vahalinga lwʼazyusilʼuwene, pe vahafuma mumbipa, vahava! ukwinjila munkayʼimfinjile vahavitushizyʼavinji. 54Avene nyene numupiti wa vasikali navamwavo ve vahamusungagʼuYesu, lwe vawenyi nukuyingʼinsi nazyonti zye zipezilwe, pe shihavagwilʼishitetemwi ishipiti nkani, vahati: Nalyoli ali Mwana wa Mulungu wununo. 55Valipo pupo navantandʼahapuga, ve vahenyʼapatali, ve valanditʼuYesu ukufuma nawo mu-Galilayi, ve vahamuvombelagʼimbombo. 56Vali nuMaliya wa mu-Magadala, nuMaliya unyina wa vaYakobu nuYosefu, nunyina wa vana va Zebedayi.

Ukusyilwa kwa Yesu

57-61: Mal. 15,42-47. Luk. 23,50-55. Yoh. 19,38-42.

57Lwe vwiliye shamazuva, pʼahalolehʼumuntʼumulonsi wa mu-Alimatiya, wʼali wʼuYosefu izina lyakwe, wʼayipezilʼukuva musundikwa wa Yesu wope. 58Vahavala kwa Pilati, ahalaumuvili wa Yesu. PʼuPilati ahalajizyʼahati: Simumupanje. 59PʼuYosefu ahasendʼiṿimba, ahalipinya namendʼamazelu. 60Ahavalʼukuliviha mumbipa yakwe wuyo impwa, ye vadivile mwiyalavwe. Ahagalagasyʼivwʼipiti, ahaliviha kushilyango sha mbipa, pʼahavala. 61Avene nyene avaMaliya wa mu-Magadala nuMaliya uwamwavʼula, vahatendama pupo vahalungamana nimbipa. 62Iliya ndavi lelo pisiku lye likulandata pa lya kuyananizya, pe vahavungana vonti pa Pilati navashiputʼavapiti navaFalisayi, 63vahayanga nawo vahati: Mwene, tukumbusilʼizwi limo lya washifumbʼula lyʼayanzile lwe sutʼalipo, pʼatili: Ndizyuha lwe gashilinkinʼamanda gatatu. 64Uhomelezyaje lelo vamo ava kusunjilila kumbipa ukufiha pisiku lya vutatu, ukuti vatahinzʼavasundikwa vakwe kumwiva havili kuvantu kuyanga ilya kuti: Azyusile kuvafwe. Ilelo pʼizya shifumbo izya mwisinda zinizi pe zivanje zilusizye uvupiti nintanzi zila. 65UwenʼuPilati ahitiha ahati: Alʼiva lelʼavasikali. Muvale lelo musungajʼimbipa inza she mwe mumanyile mwenemwe. 66Pe vahavala vahasunjililʼimbipa, vahavita nulusimishizyo pivwe pupo navantu va kusunjilila.

Currently Selected:

Matayi 27: NYi1965

Highlight

Copy