Maliko 1

1Uvwando vwʼIvangeli lya Yesu Chilisiti uMwana wa Mulungu.

UYohani umwozyi nukukumusya kwake

2-8: Mat. 3,1-12. Luk. 3,1-18. Yoh. 1,19-30.

2Inza she lisimvilwe mwa Yesaya umukuvwi:

Yenya, nkukutumilʼuhavizya wane

uwa kulongolela kwilongolela kukwaho,

wʼaliyananyagʼidala lyaho.

3Izwi lya muvilishizi mulwugwa likuti:

Simuyananye nidala lya Mwene,

mugolosye nutuswatuho twakwe.

4Ali mulwugwa uYohani ahavozyʼavantu, ahakumusyʼulwozyo lwa lupinduho lwe lukuti mukuposhelʼuvuswila vwa malandu. 5Ilelo vahafuma mumwavo ukuvala kukwakwe insi yonti ya Yudayi nava mu-Yelusalemu vonti, ahavozya mwijenje mwa Yolidani, vahaṿumbulʼamalandu gavo. 6UwenʼuYohani ahazwalagʼinkanzu ya vusepe vwa ngamila, ahayifungagʼilamba lya luhova mumusana. Ahalyanga numakanta nuvwushi vwa nzushi. 7Ahakumusyʼinongwa ahati: Mwisinda mumwane mwʼakwinzʼuno wʼandusizye namahʼine, we ntahondeye nukwinama ukusatulʼutuhova twa mundyato zyakwe ine. 8Ine mbozizye nage minzi, uwene nyene alivozezya nawʼuMupepʼuMufinjile.

Ukwozelwa kwa Yesu

9-11: Mat. 3,13-17. Luk. 3,21. 22. Yoh. 1,31-34.

9Ilelo pe mumanda gugo, pʼuYesu ahafuma mu-Nazaleti ya mu-Galilayi, ahavala kwa Yohani, wʼahamwozya mwa Yolidani. 10Naluvilo lwʼakufuma muminzi, pʼahaga kumwanya kukwiguha, ahagʼuMupepo ahamwishila ngati nkunda. 11Nizwi likufuma kumwanya likuti: We Mwana wane unkundwa, we nkuseshela kulʼiwe.

Ukulingwa

12PʼuMupepo atahahava ukumusogozya ukumutwala mulwugwa. 13Mwe mulwugwa mwʼahalindʼamandʼamashumi gane. PʼuSetano ahamulinga. Ahizya niṿikoko ṿwa mwilala. Navahavizya vahamuvombelagʼimbombo.

UYesu akwandʼimbombo yakwe

14-20: Mat. 4,12-22. Luk. 4,14. 15. 5,1-11.

14Ayazile lelo vamulemilʼuYohani, pʼuYesu ahavala muGalilayi ahakumusyʼinongwa izya kupulumushila mumwo izya Mulungu, 15ahati: Umwaha ayinzile, uvumwene vwa Mulungu vwinzile, vuli papipi. Simupindushe, mwitishʼinongwa zyʼIvangeli.

Ukwitwa avasundikwa vakwʼavalanzi

16Ilelo lwʼakupitilila papipi kushipuma sha sumbi wa muGalilayi, pʼahavaga nuSimoni nuAndeleya umuzuna wa Simoni lwe vakutajilʼulwelo lwavo mwa sumbi. She vali vaṿuṿi. 17PʼuYesu ahavavuzya ahati: Simundandate mwisinda, nkuvapelʼukuva mwe vaṿuṿi va vantu. 18Pe vahalela pupʼinyelo zyavo luvilo luvilo, vahamulandata wuyo. 19Ilelo lwʼapitiliye hansi, pʼahavaga nuYakobu umwana-Zebedayi numuzuna wakwʼuYohani lwe vakusopʼinyelo zyavo mwivoti. 20Vope luvilo ahavita. Pe vahaleha mwivoti nuyise Zebedayi navapambombo, vahamulandata wuyo.

UYesu akumupozya mua mpepʼimbivi mu-Kapelinahumu

21-28: Luk. 4,31-37.

21Pe vahajenda vahavalʼukufiha mu-Kapelinahumu. Ilelo pisabati pʼahinjila musinagogi, ahavasambilizya. 22Pe zihavahola muhati zyʼahavavuzyaga, she lwʼahavasambilizya pʼalolehagʼuwene ukuva we muhatamaha, atahayanga fwe vamanyakalata. 23Pe vahitushilʼali musinagogi yavo umuntu wa mpepʼinkandamanu akupongomoha 24akuti: Tuli vuli naswe nawe we Yesu wa mu-Nazaleti? Uyinzilʼukututupula, tukumanyilʼiswe, she we Mufinjile wa Mulungʼiwe. 25UwenʼuYesu ahayipilila ahati: Pumaga, ufume mumuntʼuno! 26Pʼimpepʼinkandamanu ihamusunkulanya mwonti mwonti umuntʼuno, yihafuma lwʼipongomosilʼizwʼipiti. 27Pe vahatentwa vonti vahavuzilizanya vahati: Zili vuli zinizi? Zye nongwʼimpwa! Shʼali namaha ga kuzipililʼimpepʼinkandamanu, izyene pe zikumwitiha. 28Pʼuwene ahakumuha luvilo luvilo munsi zyonti zye zipalamiye kuya mu-Galilayi.

UYesu akupozyʼunyinaywala wa Peteli navanjʼavinji

29-34: Mat. 8,14-17. Luk. 4,38-41.

29Naluvilo lwʼafuma musinagogi, pʼahavala munyumba ya vaSimoni nuAndeleya. Mwʼahinjila poka navaYakobu nuYohani. 30Uwene nyenʼunyinaṿwala wa Simoni vahaga ali muvulili, shʼinzegema yamuhominye. Naluvilo vahamuvuzyʼuYesu. 31Pʼuwene ahapalamila ahamulemʼumuhono ahamuvusya. Pʼinzegema yihamuleha luvilo luvilo. Pʼuwenʼahavavombela.

32Shamazuva lelo, lwʼizuva lyaswa, pe vahaleta kukwakwe vonti navapotwe navʼimpepʼimbivi zivinjiye. 33Avamunkaya yiyo vonti vahavungana kushilyango. 34Uwenʼahavazuzuvushizyʼavapotwe vonti ve vali nuvuvinu uvwinji, ahazivinga nimpepʼimbivi zye nyinji. Ahazilesya lwʼimpepʼimbivi zitili tuyanje. She zyamumanyile.

UYesu akuyeleleha ukuputa nukwepa mu-Kapelinahumu

35-39: Luk. 4,42-44.

35Shanzanche ahalavilʼuYesu lwe kushilʼukusha kunzi, ahavala mulwugwa mwʼahaputa. 36Avene nyenʼavaSimoni navamwavo vahavalʼukumwanza. 37Ilelo lwe vamwazile, pe vahati: She vonti vakukwanza. 38Uwenʼahati: Tuvale mwonti namunkaya zyamwavo mupipʼumu, mwope nkumusyajʼinongwa, she zye zizyo ninziye. 39Pʼahavalʼukukumusya mumasinagogi gavo munsi yonti ya mu-Galilayi nukufumwʼimpepʼimbivi.

Ukupola kwa wamambombo

40-45: Mat. 8,2-4. Luk. 5,12-16.

40Pʼahapalamila kukwakwʼumuntʼuwamambombo. Wʼahasugamila pansi ahalambilizya kukwakwe ahati: Ingʼukasime pʼuli namaha iwe ukumpozya. 41UwenʼuYesu ahamupepelezya muhati yakwe, ahagolosyʼumuhono, ahamupalamansya mumuvili, ahati: Nkasime, polaga. 42Pe luvilo luvilo amambombo gakwe gahepa, ahapola. 43PʼuYesu ahamupilila nkani, ahamushimbizya luvilo luvilo, 44ahati: Wandaje lelo, utamuvuzyaje numʼumuntu. Nkandi valaga, uyilolesye kuwashiputo, umutwalile niṿwa kufinjila iṿwa kupolʼiwe, ṿwʼalajizizyʼuMose. Ṿwe yivanje iṿwa kumanyila mumwʼavene. 45Uwenʼumuntu wununo nyene, wʼahavala ukuzikumusya nkani nukuziyanga mwonti mwonti inongwa zinizi. PʼuwenʼuYesu ahapotwʼukwinjilʼapazelu munkayʼino, ilelo pʼahava mwe mulwugwa. Pʼavantu vahafuma mwonti mwonti, vahavala pʼuwenʼali.

Currently Selected:

Maliko 1: NYi1965

Highlight

Copy