Lukasi 1
1
1Kunguno vingi vagemaga kutunga mhola ya genaya 2hogene gakwilaga mugati niswe, kitisi venava vatuganikilaga hovene kufuma mbuki vavagi vasangilwaho 3na vatumami va Muhayo; sisyo napimaga ati sisoga nene mwene, hanuma nagikomizye gose sisoga kufuma 4mbuki, kukutonela veve Teofilo, muhanya, kigele umaniche hanayene ya mihayo iyo wahembekilwe.
5Mu nsiku zyamwa Herode, mutemi wa Uyahudi, wavagiho muhozya, lina lyakwe Zakaria, wʼivanza lyamwa Abia, wavagi na mukima ku vanike vʼigongo 6lyamwa Aroni, lina lyakwe Elizabeti. Na vose vavili vavagi vagololoku hambele na Mulungu, na hovene vasimizage mu mikumo yose na ngʼhama zyose zyamwa Guku vuduhu kimelo. 7Na vavagi vakavile na mwana, kwisi Elizabeti wavagi mugumba, na vose vavili vanamhalukile muno.
8Alisi yakwilaga, aho wavagi alivezya milimo ya vuhozya hambele na Mulungu ha ludima lwʼivanza lyakwe, 9kavale kamugwilaga, ha kitilwe cha vahozya, kuzukizya mugazu na kwingila mwisengelo lyamwa Guku 10kuzukizya mugazu; na mbuto yose ya vanhu vavagi valilomba hanze. 11Alisi malaika wamwa Guku wigelaga kuwakwe, 12imile ha mulila gwa hakuhozezya. Na aho Zakaria wamuvonaga, wakangagwa na wogohaga. 13Alisi malaika wamuwilaga, Uleke kogoha, Zakaria, kwisi kulomba kwako kwadegelekagwa; na mukima wako, Elizabeti, akukuvyalila mwana mugosya, na ukumupa lina Yohana. 14Na veve ukuvi na kudeha na kwihalala, na vingi vakukudehela kuvyalwa kwakwe. 15Kwisi akuvi muhanya hambele na Guku, na uyu kunwa ngʼo mvinyo ninga kinwiwa cha kukolwa, na akokaziwa na Roho Nsondo vukumbu mu nda yamwa nina, 16na akuvapilucha vingi va vana vʼIsraeli kumwa Guku 17Mulungu wavo, na akutongela hambele nawe mu roho na mu nguzu yamwa Elia kuyipilucha myoyo ya vavava ku vana na vʼivengwe ku ngelo ya vagololoku kumuvezezya Guku vanhu vavezelezivilwe kuwakwe. 18Na Zakaria wamuwilaga malaika, Na lumehoki nkugamanicha genaya? kwisi ndi munamhala na mukima wane wagikuluhile. 19Na malaika witavukaga na wamuwilaga, Nene ndi Gabrieli, homwene ndimaho hambele na Mulungu, na natumizivilwe kuyomba naʼho na kukupozezya mhola nsoga yeniyi. 20Na lolaga, veve ukuvi kameme na kukovola nglo kuyomba kusika lusiku lwenulo genaya galikwila, kunguno ukayisanizizye 21mihayo yane, hoyene yilafikile mwitungo lyayo. Na vanhu vamulindilaga Zakaria, na vakumaja kunguno ya kukendela kwakwe mwisengelo. 22Na aho wafumaga, wavagi akakovolile kuyomba navo, na vamanikaja ati wavuvonaga wigele mwisengelo; na wavapalizaja muno na wadilaga kameme. 23Na yakwilaga aho nsiku zya kutumama kwakwe zyamalile, wajaga ku numba yakwe.
24Alisi hanuma na nsiku zyenizyo mukima wakwe Elizabeti wavagi na mwitungo, na wivisaga myezi 25itano na wayombaga, Syenisyo Guku wanitilaga mu nsiku zyenizi, wandolaga kuyinja nsoni yane mu vanhu.
26Alisi mu mwezi gwa mkaga malaika Gabrieli watumizivagwa na Mulungu ku kaya ya mu Galilaya, lina lyayo Nazareti, ku muhala homwene walahagwa na mugosya, lina lyakwe Yosefu, wʼigongo lyamwa Davidi, na lina lya muhala lyavagi Maria. 27Na malaika wingilaga kuwakwe na wahaya, 28Wagisiwa, veve wavonelwa kisa, Guku ali hamohene naʼho veve wadosiwa mugati na vakima. 29Alisi uyu wakangagwa kunguno ya muhayo ugu, 30na wiganikaga lugisi ki lwenulu. Na malaika wamuwilaga, Uleke kogoha Maria, kwisi wavonaga kisa hambele na Mulungu. 31Na lolaga, veve ukuvi na mwitungo na ukuvyala Mwana, na ukumupa lina Yesu. 32Akuvi muhanya na akwitanwa Mwana wa Mwenuyu ali kwigulya, na Guku Mulungu akumupa 33isumbi lya vutemi lyamwa Davidi, vava wakwe, na akuvi mutemi wʼigongo lyamwa Yakobo kusika hanahana, na vutemi wakwe kuvi na mhelo nglo. 34Alisi Maria wamuwilaga malaika, Lumehoki cheniki kikukwila kungi ndi musimbe? 35Na malaika witavukaga na wamuwilaga, Roho Nsondo akwiza kwigulya naʼho, na nguzu zya Mwenuyu ali kwigulya zikukukinganizya veve, kunguno yeniyi cheniki kisondo kikuvyalwa kikwitanwa Mwana wa Mulungu. 36Na lolaga, muduguyo Elizabeti mwene wavile na mwitungo gwa mwana mugosya mu vugikulu wakwe, na mwezi gwenugu guli gwa mkaga ku mwenuyu homwene witanagwa mugumba; 37kwisi haduhu muhayo mugaka hambele na Mulungu. 38Alisi Maria wayombaga, Lolaga nene ndi mukumba wamwa Guku, yinkwilile kitisi veve wayombaga.
39Alisi Maria wavukaga mu nsiku zyenizyo na wajaga wanguwangu kwigunguli lya malugulu ku kaya ya mu 40Yuda, na wingilaga mu numba yamwa Zakaria na wamugisaja Elizabeti. 41Na yakwilaga, aho Elizabeti walwigagwa lugisi lwamwa Maria, kana kadumukaga mu nda yakwe. 42Na Elizabeti wokazivagwa na Roho Nsondo, na wahamukaga na muzwi muhanya, wahaya, Veve wadosiwa luvango mugati na vakima, na chadosiwa luvango kisolo cha nda yako! 43Na lumehoki yilinkwilila ati nina wamwa Guku wane aliza kuwane? 44Kwisi lolaga, aho muzwi gwa lugisi lwako gwasikaga ha matwi gane, kana kadumukaga mu kwihalala mu nda yane. 45Na welukilwa mwenuyu wasanizaja ati, genaya wawilagwa na Guku gakukwila.
46Na Maria wayombaga,
Myuye yane yilimukumucha Guku,
47Na roho yane yilimudehela Mulungu, Mupizya wane;
Kwisi wavulolaga vupina wa mukumba wakwe.
48Kwisi lolaga, kufuma lelo va mavuvyalwa gose vakunitana welukilwa;
49Kunguno Mwenekili nguzu wanitilaga muhayo muhanya,
50Na lina lyakwe lili isondo,
Na kigongo chakwe kiliho ku mavuvyalwa na mavuvyalwa ku venavo valimogoha.
51Wavezaja nguzu ku kukono kwakwe,
Wavasambazaja venava vikulilizaja venekili mu miganiko ga myoyo yavo.
52Wavingaja vahanya ku masumbi gavo,
Na wavakulilizaja venavo vagwa moyo.
53Wavigutaja va nzala na tusoga,
Na vasavi wavingaja vuduhu kinhu.
54Wamugwasaja mukumba wakwe Israeli mu ukizukila kigongo chakwe,
55Kitisi wavawilage vansiswe Abrahamu na vuvyalwa wakwe kusika hanahana.
56Na Maria wikalaga hamohene nawe myezi idatu;
haho wasyokaga hangi ku numba yakwe.
57Alisi itungo lyegelaga kumwa Elizabeti avyale, na wavyalaga mwana mugosya. 58Na aho vazenganwa vakwe na vaduguye vigagwa ati Guku wakivezaja kigongo kihanya kuwakwe, vadehaga hamohene nawe. 59Na yakwilaga ha lusiku lwa mnane vizaga kumutahiri mwana, vamwitanaga, na lina lyamwa ise, Zakaria. 60Na nina witavukaga, uhaya, Byololo, sumbwa akwitanwa Yohana. 61Na vamuwilaga, Kuduhu umo mugati na vaduguyo homwene alitanwa na lina lyenili. 62Na vamupalizaja ise, na lina ki alikova itanwe. 63Nawe walombaga lubavo na watonaga, Yohana lili lina lyakwe. 64Na vose vakumaja. Na itungo lili mulomo gwakwe gwatungukaga, hamohene na lulimi lwakwe, na wayombaga na wamugongolaga Mulungu. 65Na vose hovene vikalaga bihi navo vingilagwa na vova, na mihayo yeniyi yakumukaga mwigunguli lyose lya malugulu ga Uyahudi. 66Na vose hovene vayigagwa, vayikomekezaja mu myoyo na vayombaga, Imba yilave kinahe ku mwana mwenuyu? kwisi kukono kumwa Guku kwavagi hamohene nawe.
67Na ise Zakaria wokazivagwa na Roho Nsondo na wafumbulaga, uhaya,
68Ikuzyo kumwa Guku, Mulungu wʼIsraeli,
69Kunguno wavilolelaga na kisa, na wavakomolaga vanhu vakwe,
Na watukindikilaga ipembe lya vupizya mu numba yamwa Davidi,
70Mukumba wakwe, kitisi wayombage vukumbu kale ku milomo ya vafumbuzi vasondo vakwe,
71Kutupizya ku vanisi viswe na ku makono ga vose hovene valitugaya,
72Na kuvavezezya kigongo vansiswe na kukwizukila kuswana kwakwe kusondo kwa mulahi,
73Hogwene wamulahililaga Abrahamu,
Vava wiswe,
74Kutupa iswe vukomolwa ku makono ga vanisi,
75Kigele tumutumamile vuduhu kogoha mu vusondo na vugololoku hambele nawe nsiku ziswe zyose.
76Na veve mwana ukwitanwa mufumbuzi wa Mwenuyu ali kwigulya muno;
Kwisi veve ukutongela hambele na vusyu wamwa Guku kuzivezelezya nzila zyakwe,
77Kuvapa vanhu vakwe vamaniche vupizya mugati na kutondolwa kwa mavukenaguzi gavo.
78Kunguno ya kigongo cha Mulungu wiswe,
Mugati nacho mwanga gwa kwigulya gwatufikilaga kuvezya venava valikala mu giti na mu mudaka gwa lufu,
79Na kugatonga magulu giswe mu nzila ya kuhola.
80Alisi mwana wakulaga na wajamaga nguzu mu Roho, na wavagi mwibalangu kusika lusiku lwa kwigela kwakwe hambele nʼIsraeli.
Currently Selected:
Lukasi 1: Nym51
Highlight
Share
Copy
Want to have your highlights saved across all your devices? Sign up or sign in
Nyamwezi New Testament © Bible Society of Tanzania, 1951.
