Marko 3
3
1Na wingilaga hangi mu sinagogo mbati, na wavagiko munhu wagwa kukono. 2Na vamwitegelaga ulu akumupizya ha sabato, kigele vamuvule. 3Na uyu alimuwila munhu wagwa kukono, Wime henaha hagati! 4Na alivawila, Guli mwiko ha sabato kuvezya kasoga ninga kavi, kuzipizya myuye ninga kuzivulaga? Alisi avo vahulikaga sele. 5Na aho wavalolaga na kisila malwande gose, kwisi wasayaga kunguno ya kulendelezya myoyo yavo, wamuwila munhu mwenuyo, Ugolole kukono kwako! 6Na wakugololaga, na kukono kwakwe kwapilaga. Na Vafarisayo vafumaga, na itungo lili valomaga ndaka hamohene na Vaherode ya kumuvulaga.
7Na Yesu wasyokaga hamohene na vahemba vakwe ku nyanza, na mbuto nhanya ya vanhu kufuma Galilaya na Uyahudi vamulondaga, 8na kufuma Yerusalema na ku Idumaya na kumwambu na Yordani na ku magunguli ga Tiro na Sidoni vizaga kuwakwe, mbuto nhanya, aho vigagwa gose genaya witaga. 9Na wavawilaga vahemba vakwe ati, kunguno ya mbuto ya vanhu, wato vumo vuve tayari kuwakwe, valeke kumupinehezya. 10Kwisi wavapizaja vingi, syenisyo vose vasatu vamufitengʼhezaja muno, kigele vamukumye. 11Na avo vavagi na migavo ya zoma vamupinehezaja na valilaga, vuhaya, Hoveve uli Mwana wa Mulungu. 12Na wavadakilaga, valeke kumukumucha.
13Na alilina ku lugulu na alivitana hawakwe venavo 14wavasogolaga, navo vizaga hawakwe. Na mugati navo wavalahaga ikumi na vavili vave hamohene 15nawe, kigele avatumizye kutanizya Mhola, na vave na vukovozi wa kuyifumya migavo. 16Na avo vavagi: 17Simoni homwene wamupaga lina lya Petro; na Yakobo, mwana Zebedayo, na Yohana, muduguye wamwa Yakobo, wavapaga lina lya Boanergo, nguno yalyo: 18vana va kuhilima; na Andrea, na Filipo, na Bartolomayo, na Mateo, na Tomas, na Yakobo, mwana Alfayo, 19na Tadayo, na Simoni muna Kana, na Yudas Iskarioti, homwene wamugambaga.
20Na wingilaga mu numba, na mbuto vivilingaga hangi, syenisyo venekili vavagi vakakovolile kulya chakulya. 21Na aho vaduguye vayigagwa, vafumaga kumudima, 22kwisi vayombaga, Uyu wahuganile. Na vamanicha fitabu, vatelemukile kufuma ku Yerusalema, vayombaga, Ali na Beelzebul, na aliyifumya migavo mu nguzu zya mutwale wa migavo. 23Na Yesu wavitanaga na wavawilaga mu mikolani, Lumehoki Shetani alikovola kumupezya Shetani? 24Na ulu vutemi vumo vuligogana muwavo wenekili, vutemi wenuvo vukakovolile kujama. 25Na ulu numba yimo yiligogana nayo yenekili, numba iyo yikakovolile kujama. 26Na ulu Shetani aligomela mwenekili na aligogana, haho uyu akakovolile kujama, sumbwa uzimila. 27Alisi kuduhu munhu alikovola kwingila mu numba ya wa nguzu na kufisonza fiseme fyakwe, sumbwa amutunge hambele wa nguzu, na haho akuyisonza numba yakwe. 28Loleyene ndimuwila inwe, Vana va vanhu vakutondolwa mavukenaguzi 29gose na mafusano hogene valafusane, alisi homwene alimufusa Roho Nsondo, akavile na vutondolwa kusika 30hanahana, alisi ali na musango gwa myaka de; kunguno vayombaga, Ali na mugavo gwa zoma.
31Na nina na vaduguye vizaga na vimaga hanze na vatumizaja kumwitana. 32Na mbuto ya vanhu vikalagaho valimupilima; vamuwilaga. Lolaga, noko na vaduguyo valikwitana hanze. 33Na uyu wavitavukaga, 34uhaya, Nani ali mayu na vanani vadugu vane? Na wapilimaja minso na wavalolaga vose hovene vamupilimaga, 35uhaya, Lolagi mayu na vadugu vane! Homwene alikimazya kikowa cha Mulungu, mwenuyu ali mudugu wane na ilumbu lyane na mayu.
Currently Selected:
Marko 3: Nym51
Highlight
Share
Copy
Want to have your highlights saved across all your devices? Sign up or sign in
Nyamwezi New Testament © Bible Society of Tanzania, 1951.
