Marko 6

1Na wafumaga kwenuko na wasikilaga kwigunguli 2lyavo, na vahemba vakwe vamulondaga. Na ha sabato wavukizaja kuhembeka mu sinagogo; na avo vamwigagwa vakumaja na vayombaga, Uyu wapivilwa genaya kuhe? 3Na ngelo ki uyu wapivilwe? Na milimo iyi migaka yiliveziwa na makono gakwe? Uyu akavile muselemala, mwana wamwa Maria, na muduguye wamwa Yakobo na Yose na Yuda na Simoni? Na valumbuye vakavileho henaha mugati niswe? Na vamugayilizaja. 4Na Yesu wavawilaga, Mufumbuzi akagayivagwa isima, sumbwa mu kaya yakwe na mugati na vaduguye na mu numba yakwe. 5Na kwenuko wavagi akakovolile kuvezya mugaka ninga gumo, sumbwa wavatulilaga makono gakwe vasatu vado duhu na wavapizaja. 6Na wakumaja kunguno yʼivengwe lyavo. Na wayumbayumbaga mu makaya alihembeka.

7Na wavitanaga ava ikumi na vavili na wavukizaja kuvatumizya vavili vavili, na wavapaga vukovozi kwigulya na migavo ya zoma; 8na wavalagilaga valeke kujana kinhu ku nzila, sumbwa mulanga duhu, ngʼo 9mukate, ninga ngʼo mufuko, ninga ngʼo mapesa mu musipi, alisi vazwale filatu, na vakitunge ngʼo myenda ivili. 10Na wavawilaga, Uko mukukingila mu numba, mwenumo mudile kusika mulifuma kwenuko. 11Na ulu va mukaya yimo kuvanukula ngʼo ninga kuvadegeleka ngʼo, mufume kwenuko na mugungʼhumule luvuvu ku magulu ginwe luve vusangilwaho kuwavo. 12Na ava vafumaga na vatanizaja Mhola, vanhu vapiluke moyo, 13na vayifumaja migavo mingi na vavavilaga vasatu vingi maguta na vavapizaja.

14Na mutemi Herode wigagwa kunguno yamwa Yesu, kwisi lina lyakwe lyakumukile, na wayombaga, Yohana Moja wahembukile ku lufu, na kunguno yeniyi nguzu zyenizi zilitumama muwakwe. 15Vangi vayombaga, Uyu ali Elia, na vangi, Uyu mufumbuzi; ali kitisi umo wa vafumbuzi. 16Alisi Herode aho wayigagwa wayombaga, Yohana mwenuyo namutinaga mutwe wahembukile ku lufu. 17Kwisi Herode waliwatumizya kumudima Yohana na kumutunga mu jela kunguno yamwa Herodia, mukima wa muduguye Filipo, kunguno wamutolile. 18Kwisi Yohana wamuwilaga Herode, 19Guli mwiko kuwako kuvi na mukima wa muduguyo. 20Alisi Herodia wamusyulukagwa na wakovaga kumuvulaga, alisi wavagi akakovolile, kunguno Herode wamogohaga Yohana, kwisi wamumanikaja ati ali munhu mugololoku na musondo, na wamulindilaga; na ulu wamudegelekaga wavagi na miganiko mingi, hangi wamwigagwa na kudeha. 21Na aho lusiku lwamuvelelaga lwafikaga, aho Herode ha sikukulu ya kuvyalwa kwakwe wavavezezaja mayeye vanachalo vakwe na 22vatwale na vahanya va Galilaya; na aho mwanike wamwa Herodia wingilaga na wanegulaga wamutogezaja Herode na venavo vikalaga hamohene nawe hakulila. Mutemi wamuwilaga mwanike, Unilomhe icho 23ulikova, nane nkukupa veve; na wamulahilizaja, Icho ulikova nkukupa ninga kusika nusu ya vutemi wane. 24Na uyu wafumaga na wamuvuzaja nina, Nalombeki? 25Alisi uyu wayombaga, Mutwe gwamwa Yohana Moja. Na itungo lili wingilaga wangu ku mutemi, walombaga, uhaya, Ndikova umpe itungo lili mu lubehe mutwe gwamwa Yohana Moja. 26Na mutemi wasayaga munogwene, alisi kunguno ya mulahi gwakwe na vageni wavagi akakovolile kumwima. 27Na itungo lili mutemi wamutumizaja mulugaluga na walagilizya kuleta mutwe gwakwe. 28Na uyu wajaga na wamutinaga mutwe mu jela, na waguletaga mutwe gwakwe mu lubehe na 29wamupaga mwanike, nawe wamupaga nina. Alisi aho vahemba vakwe vigagwa, vizaga na vagusolaga mulambo gwakwe na vagutulaga mu kivimbi.

30Na Vatume vivilingaga hamwa Yesu na vamupozezaja gose hogene vitaga na vahembekaga. 31Na uyu wavawilaga, Nzugi inwe mwinene henaho haduhu vanhu, na mwisuhye hado; kwisi vavagi vingi hovene vavagi valiwiza na valija, na vavagi vakavile nʼitungo 32lya kulya ngʼo. Na vajaga vinene mu wato uko kuduhuko vanhu. 33Na vanhu vavavonaga vajileko, na vingi vavamanikaja na ku makaya gose vapelelagako hamohene na vavatongelaga kufikako. 34Na aho wafumaga wayivonaga mbuto nhanya ya vanhu, na wasativagwa lusungu kuwavo, kunguno vavagi kitisi ngʼholo zikavile na mudimi, na wavukizaja kuvahembeka mingi. 35Na limi lya mhindi vahemba vakwe vamwegelaga, 36vuyomba, Henaha ibalangu na limi lililoka, uvadahye, kigele vaje mu makaya na tukaya twa kumhelo vakigulile venekili chakulya. 37Alisi uyu witavukaga na wavawilaga, Inwe muvape chakulya. Navo valimuwila, Kinahe, tuje tugule mikate ku denari magana 38avili, na tuvape chakulya? Nawe wayombaga, Mikate zinga muli nazyo, muje mukalole. Na aho vamalaga 39kulola, valiyomba, Itano na masomba avili. Na wavalagilaga vavikazye vose hasi mavanza mavanza ha maswa madoto. 40Na vikalaga misululu misululu igana na kusika makumi atano. 41Na uyu wazisolaga mikate itano na masomba avili, walangamilaga kwilunde, wazidosaja luvango, wazimegulaga mikate na wavapaga vahemba vakwe, vavoneche; na aga masomba avili wavagavanaja vose. 42Na vose valyaga na vigutaga, 43na vagasolelaga matonge gokalaga matala ikumi na avili na tumanda twa masomba. 44Na avo valyaga mikate vavagi vagosya fihumbi fitano.

45Na itungo lili wavakungilizaja vahemba vakwe kwingila mu wato, vatongele kumwambu ku Betsaida aho aliyidahya mbuto ya vanhu. 46Na aho wamalaga kuvadahya wajaga ku lugulu kukalomba. 47Na aho limi lyamalaga kuloka, wato wavagi hagati na nyanza, na uyu wavagi inene hanguka. 48Na aho wavonaga kitisi vadukaga mu kuvuka, kwisi muyaga gwavagi gufumile uko vajile, wizaga kuwavo ha zamu ya vunne ya vuziku alisimiza kitisi alikova kuvavitila. 49Aho vamuvonaga alisimiza kwigulya na nyanza viganikaga ali muzimu, na valilaga muno, kwisi vose vamuvonaga na vakangagwa. 50Alisi itungo lili wavayombaja, uvawila, Idibagi moyo, 51honene mwene. mukogohe ngʼo! Na wingilaga kuwavo mu wato, na muyaga gwadekanaga, 52na vagengemalaga vuliko; kwisi vavagi vakagumanikizye muhayo kunguno ya mikate, kwisi myoyo yavo yavagi milambu.

53Na aho vamalaga kwambuka hanguka vafikaga mu Genesareti na vatungaga wato. 54Na aho vafumaga mu wato, itungo lili vanhu vamumanikaja na vamupelelaga hose mwigunguli lyenilo, 55na vavukizaja kuvafila kuwakwe ku mavulili avo vasatu kwenuko vigagwa aliko. 56Na kose uko wingilaga mu tukaya ninga makaya ninga mwihala, vavatulaga valwile mu magulilo na vamulombaga valikumye ibomho lya mwenda gwakwe duhu, na vose hovene valikumaja vapizivagwa.

Currently Selected:

Marko 6: Nym51

Highlight

Copy