GIING'EETA 17
17
Ghasmeahooda was gwadeagooda neajeeda
1Iimuchu nea gaba Abramu gweanyeew seedam ea damashageash ghwahidu NG'UTAMIIDA heeda Abramu, ak gwayeesha, “Aniini geewooschi ASEETA Hoauur; una asheedeawanean nea meeyeateeweey ghuut. 2Ak gaydasin neajeedeanyu aba dageascheedeanyu ea daang'u, ak gaydagoonyi jeata haw.” 3Hean ghoabeada Abramu ak gwatkuy ak gwayeesha ASEETA Abramu; 4“Ng'ula, neajeedeanyu eagoonyeey ang'iing'i, gayhuuwa ghweanda eemoojiga saang'a. 5Asi maygudu eeguureewaneey gicha Abramu, gheawungaagu gajeeguura Abrahamu; aba gideaba naanung' huwa ghweanda eemoojiga saang'a. 6Gaydagoonyi diibiga saang'a; ak gaydasin eemoojiga aba badaydaang'u, ak gaygwarina headaang'u sugoodiga. 7Ak gaydasin neajeedeanyu sea jeacheangaagu galanya aba seaygoojiga nyaawa aba neajeeda maygamuudean, ak gaydoaw ASEETA aba headaang'u ea aba jeacheangaagu. 8Ak gaydagoonyi ang'iing'i, ea jeacheangaagu, ng'eanyiini ghamneawa uwoosi rabascheandean, ng'eanyiisean bea Ganaani, ak gaydoaw deang'wa damanda manda muudeanooda; ak gayghoah ASEETA nyaawa.”
9Ng'ata gwayeesha ASEETA Abrahamu, “Ak ang'iing'i, gajang'waanya neajeedeanyu, ang'iing'i sea jeacheangaagu aba jeeda seaygoojiga nyaawa. 10Nih neajeedeanyu jea ang'waanya, mida dageascheedeanyu ea daang'u ea jiilnangaagu: Gilinyoo ea orjeeda gil mida jeedeang'wa gajeayaat ghasmeahooda. 11Asi gajeayaanyi ghasmeahooda ak geeyiilnyi ak gayghoah gwadeagooda neajeeda aba dageascheedeanyu ea daang'u. 12Orjeeda bea eawooji sis aba jeedeang'wa gajeayaat ghasmeahooda eeyiil; giliwas orjeeda aba jeeda seaygoojigaagu, iideepa eeji aba gheang'u, ghana ea soomjeanda sishaaha lapiya leabu darooraka, ak ea maba jeeda ghaheang'wa, 13ea dea sijiilsa jeedeaba gheang'u ea dea ishaahi lapiyeadaang'u, gajaada ghasmeahooda eeyiil. Ak abeeda neajeedeanyu aba headaang'u ea maygwanda muudeanooda. 14Siida wassean miyeayaat ghasmeahooda eeyiil gajeeheeli buuneadaanyi; aba gideaba ninuus neajeedeanyu.”
15Ng'ata gwayeesha ASEETA Abrahamu, “Ghang'eada ghamneawa gatmoadaang'u was Sarayi mayguduguureewana gheawungaaschi Sarayi gaygureewana gheawungaaschi Sara. 16Gaydaadaw niny ghawooda, ak gaydagoonyi orjeeda aba niny; ak gaydaadaw niny ghawooda, ak gayghoah gheamata eemoojiga; ak gaygwarina headaanyi sugoodiga.” 17Ng'ata ghoabeada Abrahamu ak gwatkuy ak ghwaak reari, ak gwayi aba jeadaanyi, “Gaygwaji baleanda siida gweanyeeka apughala? Ak gaygwaji baleanda Sarayiheeda mideawa gweanyeew seedam ea damanamughuush?” 18Ng'ata gwayeesha Abrahamu ASEETA, “Anda minung' ghoah Shumwaheeli siida jea gwahearanan!” 19Iidu gwayeesha ASEETA, “Manda, gaygwajiilneey Sarayiheeda was gatmoadaang'u baleanda, ak gayguureewana gheawungaaschi Isaka. Ak gaydasin neajeedeanyu sea niny was neajeeda maygamuudean aba jeacheangaaschi. 20Ak ea naayiinyi gidirgu aba badayda Shumwaheeli; ng'ula, gaydaadaw ghawooda ak ghaanung' ghwasaang'ayiit jeacheangaaschi; ak gayghoah ghweanda sugoodi damaniyeenya, ak gaydanung' ghoah eemeeda haw. 21Ak gaydasin neajeedeanyu sea Isaka, was dea jea gwajiilneey Sara gweanyiin damani.”
22Iidu nea ghoahiit baloolda sea niny, ghabeawa ASEETA heeda Abrahamu. 23Hean ghwaat Abrahamu orjeedaanyi was Shumwaheeli sea soomjooga sean sijiilsa jeedeaba gheanyi ghasmeahooda ghana gea shaaha lapiyeadaanyi, ak gooyiil giliwas ng'eedeeda aba jeedeaba gheanyi, gawuurji gidarukusiinda ASEETA. 24Abeeda Abrahamu gaba gweanyeew seedam ea damashageash damanda siyaada ghasmeahooda eeyiil. 25Nea abeeda Shumwaheleeda was orjeedaanyi gaba gweanyeew damasamwagu damanda siyaada ghasmeahooda ak geeyiil. 26Abrahamu ea Shumwaheleeda was orjeedaanyi geeyeaduudayi ghasmeahooda ak geeyiil eaweecheanjagi; 27sea headiga sean mida jeedeaba gheanyi, was gea sijiilsa jeedeaba gheanyi ea fuga was soomjooga ak geeyiiluudayi sea niny.
Currently Selected:
GIING'EETA 17: BG15
Highlight
Share
Copy
Want to have your highlights saved across all your devices? Sign up or sign in
The Bible in Datooga © Bible Society of Tanzania, 2015.
