Luki Sɛbɛ 24

A JEEJU KŨU-PƲƆ-IRFƲ

(Mat 28.1-10, Mar 16.1-8, Jã 20.1-10)

1A jɩmaasɩ bibir dayen, a pɔɔbɔ bala ca na ir de a mɔ-nyuu ala ba na dãa gbɛɛrɩ̃ cenʼɩ̃ a yaa pʋɔ. 2Ba nyɛ na a yaa kubir ʋ bilĩ ɩ̃ cɛ a yaa nʋɔr bar, 3a ba kpɛ, ɩ̃-cɛ baa nyɛ a kũu wa. 4Ɩ̃ a mɩnɛ ba na cãa tɩɛrɛ ma bɔ̃w a par wa, dabsɩ ayi na su cẽcene na nyɩnyɩlɛ nyɩr ba na, 5a dãbɩ̃ɛ nyɩrɩ̃ nyɔw ba a ba surĩ a jur. A dabsɩ bala yel ba:

“Bõ ɩnɛ nyɩ bʋɔrɔ a ʋlɔ na ɩ a nɩ-mimir a kũusɩ sɔ̃w? 6ꞌWaa be a ka wa; ʋ irʼã a kũu pʋɔ. Nyɩ́ tɩɛr bɔ̃w nɩ a ala ʋ na yel nyɩ a mɩnɛ ʋ na dãa cãa be a Galile, 7a á sɛw na a ba na nyɔw a *Nɩbɛ Bie ƴɔ̃w a maal-faar deme nurɩ̃, á ba na kpa ʋ na yaal a nɩ-kʋ-daa juu, ɩ̃ a bibie ata dayen á ʋ na irʼã a kũu pʋɔ.”

8Ɩ̃ a pɔɔbɔ tɩɛrʼã yuo a *Jeeju ƴɛrɩ̃sɩ, 9ɩ̃ lɩɛb kulʼɩ̃ man a ala a jaa, kʋ a *par-tuurbe pie-nɩ-bõ-ƴen, nɩ a ba tɔ deme ba jaa. 10A bala na man a ƴɛrɩ̃ ʋlɔ ɩ na a Madala Maarɩɩ, nɩ a Jaan, nɩ a Maarɩɩ na ɩ a Jakɩ mã. A pɔɔbɔ bala ba na lãa be nɩ taa, mɩ manʼã a ʋna ƴɛr-bõ-ƴen kʋ a *nɩ-tʋnɩsɩ, 11ɩ̃-cɛ a nɩ-tʋnɩsɩ ma sɔw wa, a-na-ɩ ba tɩɛrʼã á burbur ba ƴɛrɛ. 12Ɩ̃-cɛ a Pɩɛr irʼã jɔ cen a yaa par, ɩ̃ a mɩnɛ ʋ na muul ꞌwuor ʋ nyɛ na a kũu cẽcene tɛw, a ko ʋ nʋɔr ʋ lɩɛb kule tɩɛrɛ nɩ a ala na ta.

A PAR-TUURBE AYI NA CERE A EMAYISI

(Mar 16.12-13)

13A ʋna bibirʼãa, *par-tuurbe ayi dãa na cere tẽ-bile kãw pʋɔ ba na bʋɔlɔ a Emayisi. A be nɩ a Jerujalɛm ɩ na kilo pie-nɩ-bõ-ƴen. 14Ba dãa na mana taa cere nɩ a yele ala a jaa na dãa ta. 15A mɩnɛ ba na mana taa sooro nɩ taa, a *Jeeju mɩ̃ɛ pɔw ba na lãa cere nɩ. 16A ba mimie nyɛ ʋ na, ɩ̃-cɛ baa tʋɔ bɔ̃w a ala ʋ na ɩ wa. 17A Jeeju soor ba:

“Bõ ƴɛrɩ̃sɩ nyɩ mana taa cere nɩ?” A ni-sɔbaa kpɛ ba a ba ɩraa, 18ɩ̃ a bõ-ƴen ba na bʋɔlɔ a Kilopasɩ yel ʋ:

“A fʋ̃ʋ tɛw be a Jerujalɛm ma bɔ̃w a ala na dãa ta a be a yɛ̃yɛ̃ na wa mɩɩ?” 19Ʋ soor ba:

“Yel bõ nʋmɔ ʋ?” A ba yel ʋ:

“A ala na ta a Najarɛtɩ Jeeju. Ƴɛr-hiere ʋ dãa ɩ, ɩ̃ a Naaŋmɩn nɩ a nɩbɛ jaa nyɛ ʋ na, a fãw be a ʋ tʋmɔ pʋɔ nɩ a ʋ ƴɛrɩ̃sɩ pʋɔ. 20Ɩ̃ a sɩ *baar-lo-nɩ-bɛrɛ nɩ a sɩ ni-dierbe nyɔw ʋ na tɩɩr a ba ƴɔ̃w ʋ a kũu ƴɛrɩ̃, ɩ̃ kpa ʋ yaal a nɩ-kʋ-daa juu. 21A sɩmɩ, sɩ dãa na tɩɛrɛ a ʋlɔ nɔɔ faa *Ɩsɩrayɛl nɩbɛ. Ɩ̃-cɛ aa ɩ a ala tɛw ʋ wa; a bibie ata nɩ a dɩnaa a yele ala na ta. 22Ɩ̃-cɛ a pɔɔbɔ ŋmɛɛ na be a sɩ pʋɔ ko sɩ na nʋɔr. Ba ca na ir cen a yaa pʋɔ a dɩnaa 23ɩ̃-cɛ baa nyɛ a kũu wa. Ba mɩ lɩɛbʼã wa na man sɩ a Naaŋmɩn sɩ-tʋnɩsɩ nyɩr ba na, ɩ̃ yel kʋ ba áa Jeeju ɩ na nɩ-mimir. 24A sɩ tɔ deme ŋmɛɛ cenʼã a be a yaa pʋɔ na ba nyɛ a yele a jaa a be a mɩnɛ a pɔɔbɔ na dãa yel. Ɩ̃-cɛ baa nyɛ a ʋlɔ tɔr jaa wa.”

25A be jie, a Jeeju yel ba:

“Nyɩ faa na yɛ̃! Nyaa sɔw nɩ puor a ala a jaa a Naaŋmɩn ƴɛr-hierbe na yel wa. 26Aa dãa sɛw a *Kirisi na nyɛ a hʋʋr a lɛ ɩ̃ pãa yi a yuor wa mɩɩ?” 27Ɩ̃ ʋ man ba na a yele ala na be a Naaŋmɩn Sɛbɛ pʋɔ a ʋ ɩnɛ, nyɔw nɩ a sɛbsɩ ala a Mowisi na sɛb, cen na de nɩ a Naaŋmɩn ƴɛr-hierbe sɛbsɩ a jaa.

28A mɩnɛ ba na tara a tẽw ʋlɔ pʋɔ ba na cere, a Jeeju maalʼã wɔ̃ taa nɩ ʋ poro na. 29Ɩ̃-cɛ ba gɔw ʋ na ɩ̃ yel:

“Gã a ka a sɩ jie a-na-ɩ a jaanʋɔr gɔrʼã ta ɩ̃ a wɩɛr liwre,” ʋ kpɛ a be a ba jie. 30A mɩnɛ ʋ na lãa jɛ nɩ ba a dɩb dɩfʋ jie, ʋ de na a buru, ɩ̃ puor a Naaŋmɩn, ɩ̃ nyɔw ŋmaa kʋ ba, 31a mimie yuo ba a ba bɔ̃w ʋ, ɩ̃-cɛ ʋ bɔrʼã a ba nii-sɔw a jie naan. 32Ba yele na kʋrɔ taa:

“Má a nũɔ dãa na nyɔw sɩ a lɛ ʋ na ƴɛrʼɩ̃ sɩ a sɔr juu ɩ̃ man sɩ a Naaŋmɩn Sɛbɛ ƴɛrɩ̃ par,” 33a ba ir a jie naan lɩɛb cen a Jerujalɛm. A be ba nyɛ na a par-tuurbe pie-nɩ-bõ-ƴen na kpaarɩ̃ taa nɩ a ba tɔ deme. 34Ba yelʼã kʋ a bala ayi na ta:

“A Nɩ-kpɛ̃ɛ sɩrɩ̃ na ir a kũu pʋɔ! Ʋ nyɩrʼã a Sɩmɔ̃.” 35A ayi bala mɩ man kʋ a par-tuurbe a ala na dãa ta ba a sɔr juu, nɩ a mɩnɛ ba na dãa bɔ̃w a Jeeju a lɛ ʋ na ŋmara a buru.

A JEEJU NA MIIL-Ɩ̃ A Ʋ MƖ̃Ɛ A Ʋ PAR-TUURBE

(Mat 28.16-20, Mar 16.14-18, Jã 20.19-23, Ntt 1.6-8)

36A mɩnɛ ba na cãa ƴɛrɛ a lɛ, a *Jeeju mɩ̃ɛ ta na ɩraa a ba sɔ̃w ɩ̃ yel ba:

“Su-ɓaar ú be nɩ nyɩ.” 37A pʋlɩ̃nyɛ vʋ̃ɔ ba a ba tɩɛr beeka nɩ-kpɩɩn ʋ. 38Ɩ̃-cɛ ʋ yel ba na:

“Bõ ɩnɛ a suur dama nyɩ a nyɩ baala ma a nyɩ pʋ̃ɔ? 39Nyɩ́ ꞌwuor nyɛ a ɩ̃ nur nɩ a ɩ̃ gbɛɛ, ɩ̃ bɔ̃w ka maa ʋ, sɩrɛ jaa. Nyɩ́ sɩɩr ma nyɛ, a-na-ɩ a nɩ-kpɩɩn maa tɛrɛ nɩn nɩ a kɔbɔ a ɩ̃ kaarɩ̃ wa.” 40Ɩ̃ na ʋ miilʼɩ̃ ba a fala na be a ʋ nur nɩ a ʋ gbɛɛ pʋɔ. 41A nũɔ tɩɩ na nyɩrɩ̃ nyɔw ba a baa bɔ̃w sɔw nɩ puor sɛr wa, ɩ̃ ɩraa a nɔɛ ko ba. Ala-ɩ̃-sɔ a Jeeju soor ba a ala ɩ bõ-dɩraa be na be, 42a ba kʋ ʋ jɩm-bir ŋmãa ba na cɩ̃ɩ, 43ʋ de ꞌwɔb a ba nii-sɔw.

44A ala ɩ̃ baar, ʋ yel ba na:

“Nyɩ́ nyɛ a ala ɩ̃ na ma dãa yele nyɩ a mɩnɛ ɩ̃ na dãa cãa be nɩ nyɩ. Ɩ̃ yelʼã áa ala a jaa na sɛb a ɩ̃ ɩnɛ a Mowisi ƴɛr-kpɛn sɛbɛ pʋɔ, nɩ a ƴɛr-hierbe sɛbsɩ pʋɔ, nɩ a Pɛwfʋ sɛbɛ pʋɔ, a sɛw na a na ta a lɛ.” 45Ɩ̃ ʋ caarɩ̃ na a ba sube a ba bɔ̃w a Naaŋmɩn Sɛbɛ ƴɛrɩ̃ par, 46miilʼɩ̃ ba a mɩnɛ a na sɛb a Naaŋmɩn Sɛbɛ pʋɔ áa *Kirisi sɛw na na nyɛ hʋʋr kpi, ɩ̃ pãa ir a kũu pʋɔ a bibie ata dayen. 47Áa mɩ sɛw na ba de a ʋ yuor cenʼɩ̃ na hier kʋ a nɩbɛ, á bá lɩɛb a ba yɛ̃ a Naaŋmɩn na de a ba maal-faar bar kʋ ba. Á bá nyɔw be a Jerujalɛm ɩ̃ cen na ta nɩ a nɩ-bʋrɔ bʋrɔ ba jaa jie. 48Ɩ̃ ʋ lɛ yelʼã go:

“A nyɩmɩ na nyɛ a yele a mɩnɛ a na ta, nyɩmɩ na man kʋ a nɩbɛ. 49Ɩ̃ a maa, ɩ̃ na tʋ̃ na a ʋlɔ a ɩ̃ Sãa na pʋlɩ̃ nɩ nyɩ, ɩ̃ a nyɩmɩ, nyɩ́ jɛ a Jerujalɛm-tẽw pʋɔ wa ta nɩ a daar ʋlɔ a saa juu fãw na suure pɔwrɔ nyɩ.”

A JEEJU NA DO A NAAŊMƖN TẼW

(Mar 16.19-20, Ntt 1.9-11)

50A ala ɩ̃ baar, ʋ tɛrɛ na a ʋ *par-tuurbe cenʼɩ̃ a Betani-tẽw loor, ɩ̃ tur a nur sʋɔr a Naaŋmɩn sũofʋ ƴɔ̃w ba. 51Ɩ̃ a mɩnɛ ʋ na cãa sʋɔrɔ ƴɔnɔ ba, ʋ ŋmaa na yi a ba sɔ̃w duoro a Naaŋmɩn tẽw. 52Ɩ̃ a bala, a mɩnɛ ba na puor ʋ baar, nũɔ ƴala ba na a ba lɩɛb kul a Jerujalɛm, 53ɩ̃ ma cere a Naaŋmɩn puor-yir kpɛ̃ɛ pʋɔ a daar a jaa na pɛwrɛ a Naaŋmɩn.

Currently Selected:

Luki Sɛbɛ 24: BNT93

Highlight

Copy