MI CILIMA 14
14
1Laa yogunu Sineala yaa bado Amilafela, wani leni Gojima yaa bado Tideali, 2bikuli den taani ki tuogi bu toabu leni Sodoma yaa bado Bela leni *Gomola yaa bado Bilisa leni Adima yaa bado Sineaba leni Tiseboyima yaa bado Semebela leni Bela, yaa dogu n go yi Tisoala yaa bado. 3Sodoma yaa bado leni o lieba kuli den taani Sidima yaa joaloangu nni, yaagu n tie mi ñincianyaama moala. 4Kedolaomela den paadi ki diedi ba hali piiga n bina lie yaa banlu. Ama li piiga n bintaali, bi den fii ki yie opo. 5Li piiga n binnaali nni, Kedolaomela leni yaa badiba n den ye leni o den fii ki cuo u sanu ki paadi Lefayima yaaba, Asitelota-Kalinayima yaa dogu nni ki go paadi Susima yaaba Hama yaa dogu nni ki go paadi Emita yaaba Safe-Kilijatayima yaa dogu nni. 6Ki go paadi Hola yaaba bi juali Seyila kani ki deli ba ki gedini hali hali Palana yaa sena tibu, yaabu n ku leni mi fanpienma kani. 7Lanwani bi den goa lebidi ki gedi Eyini Misipata, yu n go yi Kadesa, ki paadi Amaleki yaaba bi yaa diema nni kuli, ki go paadi Amola yaaba, yaaba n kaa Hatisatisoni-Tamala. 8Lanwani Sodoma yaa bado leni Gomola leni Adima leni Tiseboyima leni Bela, yu n go yi Tisoala kuli yaa badiba den taani ki bogini bu toabu Sidima yaa joaloangu nni, 9ki baa tuogi leni Elami bado Kedolaomela leni Gojima yaa bado Tideali leni Sineala yaa bado Amilafela leni Elasala yaa bado Ajoka. Badiba naa den tuogi leni badiba muu. 10Sidima yaa joaloangu den pia ki tinga sinboanma yaa caana boncianla, Sodoma yaa bado leni Gomola yaa bado den sani ki bua ciadi bu toabu po, ki den baa a caana yeni nni. Yaaba n sieni den sani ki gedi a juana po. 11Yaaba n den paadi ba den fagi Sodoma leni Gomola yaa piama, leni bi bonjekaala kuli ki ban caa. 12Bi go den cuo Abalama waalo bijua *Loto yua n den kaa Sodoma, leni o piama kuli ki ban caa.
13Niyendo yua n den fidi ki sani ki cia den cua ki waani Ebilu yua Abalama yaala n den tieni kuli. O mo den kaa Mamile, sena tiidi yaa kani. Mamile den tie Amola yua ki tie Esikola leni Aneli yaa kpelo. Bani n den pia o *ŋantaado leni Abalama. 14Abalama den gbadi ke bi den cuo o kpiilo. O den taani o naacenba yaaba n den mali o yaa diegu nni kobitaa n piiga n niba nii yaaba yaa pala n pa. O den teni ba ti toatiadi ki fii ki ŋoadi bi badiba hali Dana yaa dogu. 15O den boagidi o toatieba ke wani leni bani n pua bi badiba ku yagisiigu. O den pua ki paadi ba ki deli ba ki gedini ba hali Hoba, yu n ye Damasa dogu ganu po. 16O den taa ki guani mi piama kuli ki go guani Loto o kpiilo leni o piama leni bi puoba leni ban den cuo yaa niba kuli.
17Abalama n den paadi Kedolaomela leni yaa badiba n den ye leni o ki goa kuni, Sodoma yaa bado den ñani ki baa tuogi o Safe yaa joaloangu nni, yaagu n tie o bado yaa joaloangu.
18Salema yaa bado *Melikisedeki den teni ke bi cuani dupen leni duven. O den tie Tanpojoma Tienu, yaa kopadiciamo.
19O den gaali Abalama ki yedi:
«Tanpojoma Tienu,
Yua n tie tanpoli leni ki tinga yaa canbaa,
Wan seligi Abalama.
20Tanpojoma Tienu, n baa ti pagidi,
Wani yua n den mubini a yibalinba a nuu nni.»
Abalama den puni o *dim wan den baa yaala kuli yaa siiga.#Ebl 7.1-10
21Sodoma yaa bado den yedi Abalama: «Pa nni bi niba ki taa mi piama kuli a yuli po.»
22Abalama den goa ki yedi Sodoma yaa bado: «N yugidi n nuu ki poli Li Miali Diedo, Tanpojoma Tienu, yua n tie tanpoli leni ki tinga yaa tagido nintuali, 23ke n kan ga yaala n tie a yaa yaala kuli yaa siiga baa gaalifanu ki buali gbansiama, ke ŋan da ti faa ki yedi ke fini n teni ke Abalama tua piado. N kan ga puu n yuli po. 24Ama ŋan pa nni n jawaaba n den dini yaala leni yaa jaba n den yegi leni nni yaa biinu, Aneli, Esikola leni Mamile yeni. Bani wani baa ga bi yaa biinu.»
U Tienu kuani o ŋantaado leni Abalama
Currently Selected:
MI CILIMA 14: GUX03
Highlight
Share
Copy
Want to have your highlights saved across all your devices? Sign up or sign in
Gulmancema Bible © Bible Society of Burkina Faso, 2003.
