Jan 14

Jesu n tie yaa sanu n caa Baa kani

1Yin da yagi mani yi yama. Daani mani U Tienu, daani mani mini moko. 2N Baa diegu nni pia i yekaani boncianla. Li yàá bi tie yeni, n bi baa waani yi. N caa ki baa n ŋanbi yi po u kaanu. 3N yaa gedi ki ban ŋanbi yi po u kaanu yeni, n baa guani ki cua ki taa yi tin yegi, ke min ye naani, yimoko baa yaa ye lankani. 4Yi bani min caa naanpo, ki go bani lipo sanu.»

5Toma den yedi o: «N Daano, tii bani ŋan caa naanpo, ti baa gaa lede ki bandi lipo sanu?» 6Jesu den yedi o: «Mini n tie u sanu, i moamoani leni li miali. Oba kuli kan pundi Baa kani, li yàá tie mini yaa po. 7Yi yaa bi bani nni, yi bi baa yaa bani n Baa. Moala liiga yi bani o, yi laa o.»

8Filipi den yedi o: «N Daano, waani ti Baa, lani bebe baa dagidi ti po.» 9Jesu den yedi o: «Filipi, ba ke n waagi ki ye leni yi, a daa bani nni? Yua n laa nni kuli, laa Baa. Be yaa po ke a yedi min waani yi Baa? 10Ŋaa daani ke n ye Baa niinni, ke Baa moko ye n niinni yo? Min maadi yi yaa maama yeni, maa ñani n yaa kani ka. Li tie Baa yua n ye n niinni n tuuni o tuona. 11Daani mani nni ke n ye Baa niinni, ke Baa moko ye n niinni. Lani yaa ka daani mani kelima a naa tuona po.

12N yedi yi i moamoani ke yua n daani nni kuli, o moko baa yaa tuuni min tuuni yaa tuona, ki go yaa tuuni ba ya n cie yeni, kelima n caa Baa po. 13Yin baa mia yaala kuli n yeli nni, n baa tieni la, ke Baa n baa ti kpiagidi kelima Bijua po. 14Yi yaa mia bonliba kelima n yeli nni kuli, n baa tieni la.

Jesu niani ke o baa soani U Tienu Fuoma Yua

15Yi yaa bua nni moamoani, yi baa kubi n bali maama. 16N baa mia Baa U Tienu, wan pa yi toa, yua n baa yaa tie yi Todika ki yaa ye leni yi hali yaa yogunu kuli. 17Wani n tie i moamoani Fuoma. Ŋanduna yaaba kan fidi ki gaa o cangu, kelima baa nua o, baa bani o mo. Ama yinba wani, yi bani o kelima o ye leni yi, ki baa ki ye yi niinni. 18N kan ŋaa yi yi bebe nani a kpienbila yeni, n go baa cua yi kani. 19Li yaa go pugini waamu, ŋanduna kan go le nni. Ama yinba wani, yi baa le nni kelima n fo ki ye, yimo baa yaa fo ki ye. 20Landaali yi baa bandi cain ke n ye n Baa niinni, ke yi ye n niinni, ke nmo ye yi niinni. 21Yua n tuo ki gaa n bali maama, ki go kubi ma, wani n tie yua n bua nni moamoani. Yua n bua nni yeni, n Baa baa bua o, nmoko baa bua o, ki doagidi o po min tie yua.»

22Jude, laa tie Judasi Isikarioti ka, den buali o: «N Daano, be teni ke a baa doagidi a yuli ti po, ki nan kan doagidi li ŋanduna po wani?» 23Jesu den guani ki yedi o: «O nilo yaa bua nni moamoani, o baa kubi n maama. Lani, n Baa baa bua o. Ti baa cua o kani ki yaa ye o deni. 24Yua n kaa bua nni kan tuo ki yaa kubi n maama. Yin gbadi yaa maama yeni, maa ñani mini yaa kani ka, mi ñani Baa yua n soani nni yaa kane.

25N maadi yi lani kuli hali ke n da ye leni yi. 26O Todika, U Tienu Fuoma Yua, Baa n baa soani yua n yeli nni yeni, wani n baa bangi yi li bonla kuli, ki tiadi yi min waani yi yaala kuli. 27N ŋaa yi po mi yanduanma. N puni yi n yaa yanduanme. Mii puuni yi ma nani ŋanduna n puuni maama ka. Yin da yagi yi yama, yin da jie mani.

28Yi den gbadi ke n yedi yi ke n baa gedi ki ŋaa yi, ki go baa guani yi kani. Yi yaa bi bua nni moamoani, yi bi baa yaa mangidi yi pala ke n caa Baa po, kelima wani n cie nni. 29N tuodi ki waani yi lani kuli moala hali ke li daa pundi, ke yaa daali ke laa bonla kuli baa tieni, yin daani nni. 30N kan go maadi leni yi boncianla, kelima ŋanduna bado kpendi. Waa pia n po baliba kuli. 31Ama li tie tiladi ke ŋanduna kuli n bandi ke n bua Baa, ki tiendi wan puogi nni yaala. Fii mani tin fuadi nekanba!

Currently Selected:

Jan 14: BGP

Highlight

Copy