A Zã koe‑noogo 13

A Zeezi waasa b karen-biis nao wã

1Sẽn deng Pakã tigrã, a Zeezi sẽn mi tɩ bãmb wakat taame tɩ yi dũni‑kãngã n kẽng b ba nengẽ wã, bãmb nonga b nebã sẽn dag n be dũni pʋgẽ tɩ bãmb nongẽ wã, hal ne nonglem tɛkẽ.

2Rɩɩbã wakate, rẽ tɩ Sʋtãanã dag n ninga a Sɩmo biig a Zʋdaas sũurẽ t'a zãmb a Zeezi n yõk n kõ. 3A Zeezi sẽn mi tɩ b ba wã ninga bũmb fãa bãmb nugẽ, la b mi tɩ bãmb yii Wẽnnaam nengẽ n wa, la tɩ b leb n lebda beenẽ wã, 4b yik n basa rɩɩbã, n yees b futã, la b rɩk peend n sẽbg b sɛɛga. 5Rẽ poore, b pʋdga koom laagẽ, n sɩng n waasd b karen-biisã nao la b yẽesd-b ne peendã sẽn sẽbg bãmb sɛɛgã. 6Bãmb taa a Sɩmo Pɩyɛɛre, la a yeela bãmb yaa: Zu-soaba, yãmb n na n waas mam nao wã? 7A Zeezi leoka yẽnda n yeele: Fo ka wʋmd mam sẽn maandã võor moasã ye, la sã n yɩ bilfu, f na yaool n wʋme. 8A Pɩyɛɛr yeela a Zeezi yaa: Ayo! Yãmb kõn waas mam nao abada! A Zeezi leoka yẽnda n yeele: Mam sã n ka waas foom, fo kõn leb n paam baa fɩ mam nengẽ ye. 9A Sɩmo Pɩyɛɛr yeela bãmb yaa: Zu-soaba, ka mam nao wã bal la y na n waas ye, yaa ne m nusã la m zugã me. 10A Zeezi yeela a Pɩyɛɛr yaa: Sẽn so-a koom ka leb n baood soobo, sã n ka nao wã waasg bal ye. Bala, a yĩngã tõr yaa yɩlemde. Yãmb yaa yɩlma, la ka yãmb fãa ye. 11Sɩd me, bãmb dag n mii ned ning sẽn na n zãmb-a bãmbã. Dẽnda n kɩt tɩ bãmb yeel tɩ ka karen-biisã fãa n yaa yɩlmã ye.

12 # Luk 22.27 A Zeezi sẽn waas b karen-biisã nao n sɛ, la b lebs n yeelg b futã, b leb n zĩnda rɩɩbẽ wã n yeel b karen-biisã yaa: Yãmb wʋma mam sẽn maan yãmbã võore? 13Yãmb boonda maam tɩ karen-saamba la Zu-soaba, la yãmb sẽn yetã zemsame, bala, mam sɩd yaa a boto. 14Dẽ, mam sẽn yaa Zu-soab la Karen-saambã sã n waasa yãmb nao. Wã, yãmb me tog n waasa taab nao wã. 15Bala, yaa mamsg la mam kõ yãmba, tɩ yãmb me na maan wa mam sẽn maan yãmbã. 16#Mat 10.24, Luk 6.40, Zã 15.20Mam yeta yãmb sɩd-sɩd tɩ tʋmtʋmd ka yɩɩd a zu-soab ye, la tẽn-tʋmd me ka yɩɩd sẽn tʋm-a yẽnda wã ye. 17Yãmb sã n mi rẽnda, yãmb yaa sũ-noog rãmba, yãmb sã n maand a woto.

18 # Yɩɩn 41.10 Ka yãmb fãa yell la mam sẽn gomdã ye. Mam mii neb nins mam sẽn tũusã. La yaa tɩlɛ tɩ bũmb ning sẽn gʋls Wẽnnaam gʋls-sõamyã pʋgẽ wã pidsi. B yeela be tɩ: «Ned ning sẽn wãbd-a bur ne maamã wẽneg n zabda ne maam.» 19Mam pĩnd n togsa yãmb moasã, sẽn deng a pidsgu, t'a sã n wa n pidsi, bɩ yãmb tẽ tɩ mam yaa m sẽn ya. 20#Mat 10.40, Mark 9.37, Luk 9.48, 10.16Mam yeta yãmb sɩd-sɩd tɩ ned sã n deeg mam sẽn tʋm a soaba, a reega maam, la sẽn deeg-a maam deega sẽn tʋm-a maamã.

A Zeezi togsame tɩ ned n na n zãmb bãmba

(Mark 14.18, Luk 22.21-23)

21A Zeezi sẽn gom woto n sa, sũ-sãang yõka bãmba, la b yeelame yaa: Sɩd-sɩda, mam yeta yãmb tɩ yãmb ned a yembr n na n yõk maam n kõ. 22Bãmb karen-biisã dag n geta taab n sokd a Zeezi sẽn gomd ned ningã yelle. 23A Zeezi karen-biig a yembre, soab ning bãmb sẽn dag n nongã dag n kɩɩ kãntɩɩg rɩɩbã zĩigẽ n yegl a Zeezi. 24A Sɩmo Pɩyɛɛr kamsa yẽnda n yeel-a t'a sok a Zeezi tɩ yaa ãnda yell la bãmb sẽn gomdã. 25Karen-bi-kãng kɩlla a Zeezi yãoogẽ n yeel-b yaa: Zu-soaba, yaa ãnda? 26A Zeezi leoka yẽnda n yeele: Yaa ned ning mam sẽn na n suk bur-gɩrg n kõ-a wã. Bãmb suka bur-gɩrgã n kõ Iskaryo Sɩmo biig a Zʋdaase. 27A Zʋdaas sẽn deeg burã bal la Sʋtãanã sẽn kẽ yẽnda. A Zeezi yeel-a lame: Fo sẽn na n maan bũmb ningã, maan-a tao-tao. 28La neb nins sẽn dag n zĩ be n dɩtẽ ã, baa a yembr ka wʋm a Zeezi sẽn yeel a Zʋdaas woto wã võor ye. 29Sɩd me, sẽn dag n yaa a Zʋdaas n zãad bãmb ligdã, kẽer tagsame t'a Zeezi yet-a lame t'a ra bũmb nins bãmb sẽn tog n paam tigrã yĩnga, wall t'a kõ naong rãmbã bũmbu. 30A Zʋdaas deega bur-gɩrgã n kell n yik n yi. Dag n yaa yʋngo.

Tõ-paalga

31A Zʋdaas sẽn yi, a Zeezi yeelame yaa: Ninsaal bi-riblã paama waoogr moasã, la Wẽnnaam paama waoogr bãmb pʋgẽ. 32Wẽnnaam sã n paam waoogr bãmb pʋgẽ, Wẽnnaam me na n waooga bãmb b mengã pʋgẽ, la keta bilf bal tɩ b waoog-ba.

33 # Zã 7.34 M kom-bãoonego, mam sẽn ket n be ne yãmbã, yaa wakat bilf bal yĩnga. Yãmb na n baoo maam, la a wa mam sẽn dag n yeel Zʋɩf-rãmbã tɩ bãmb ka na n tõog n wa mam sẽn dabdẽ wã, mam yeta yãmb woto me moasã. 34#Zã 15.12,17, 1Zã 3.23, 2Zã 1.5Mam kõta yãmb tõ-paalga: «Nong-y taaba. Nong-y taab me wa mam sẽn nong yãmbã. 35Yãmb sã n nong taaba, nebã fãa na bãng tɩ yãmb yaa mam karen-biisi.»

A Zeezi pĩnd n togsa a Pɩyɛɛr kɩɩsgo

(Mat 26.31-35, Mark 14.26-31, Luk 22.31-34)

36A Sɩmo Pɩyɛɛr yeela bãmb yaa: «Zu-soaba, yãmb dabda yɛ?» A Zeezi leokame n yeele: «Fo ka tõe n pʋgl maam n kẽng m sẽn dabdẽ wã moasã ye, la kaoosg pʋgẽ, fo na pʋgl n wa.» 37A Pɩyɛɛr yeela bãmb yaa: «Zu-soaba, bõe yĩng tɩ mam ka tõe n pʋgl yãmb moasã? Mam na n saka kũum yãmb yĩnga.» 38A Zeezi leokame n yeele: «Fo na n saka kũum mam yĩnga. Sɩd-sɩdã, mam yeta foom tɩ no-raoog kõn kelem tɩ fo ka kɩɩs naoor a tãab tɩ f ka mi maam ye.»

Currently Selected:

A Zã koe‑noogo 13: MPBU

Highlight

Copy