A Zã koe‑noogo 6

A Zeezi kɩtame tɩ bur lebg wʋsgo

(Mat 14.13-21, Mark 6.30-44, Luk 9.10-17)

1Rẽnda poore, a Zeezi kẽnga Galɩle ko-kãsengã sẽn boond tɩ Tiberyaad rʋʋnde. 2Neb kʋʋng dag n pʋgda bãmba, b sẽn yãt bõn-bãn nins a Zeezi sẽn maand n maagd bãad-dãmbã yĩnga. 3A Zeezi rʋʋ tãngã n zĩnd be ne b karen-biisã.

4La Zʋɩf-rãmbã tigr b sẽn boond tɩ Pakã dag n kolgame.

5A Zeezi zẽka b nenga, la b yãnda neb kʋʋng sẽn wat bãmb nengẽ, la b yeela a Filip yaa: «Tõnd na n daa bur yɛɛnẽ tɩ nin-kãensã paam rɩɩbo?» 6A Zeezi goma a woto n na n mak a Filip n gese. Bala, b meng rag n mii b sẽn na n maan bũmb ninga. 7A Filip leoka bãmb n yeel tɩ deniye kobsi bur ka tõe n sek tɩ ned fãa paam bur-gɩrg ye. 8A Zeezi karen-biig a yembre, a Sɩmo Pɩyɛɛr ba-biig a Ãndere yeela bãmb yaa: 9Bi-ribl bil n be ka n tar Oorz bur a nu ne zĩm a yiibu. La rẽnda yaa bõe ne neb sõor a woto? 10A Zeezi yeelame: «Kɩt-y tɩ nebã zĩndi.» Mood n dag n be zĩ-kãng wʋsgo. Dẽ, nebã zĩndame, la raopã sõor tata tus a nu. 11A Zeezi deega burã, n pʋʋs Wẽnnaam barka, n pʋɩ neb nins sẽn dag n be-b be wã. B maana a woto me ne zĩmã, tɩ ned fãa deeg a sẽn dat tɛka. 12Nebã sẽn dɩ n tɩge, a Zeezi yeela b karen-biisã tɩ b wʋk rɩ-zersã sẽn kellã, tɩ bũmb baa a yembr da pa n sãam ye. 13Dẽ, b wʋka Oorz bur a nu wã gɩrsã, nebã sẽn dɩ tɩ kellã, n pids pet piig la a yiibu.

14Nin-kãens sẽn yã bõn-bãn nins a Zeezi sẽn maanã, b yeelame yaa: «Sɩd yaa bãmb la Wẽnnaam no-rɛɛs ning sẽn da tog n wa-a dũni pʋgẽ wã.» 15A Zeezi sẽn mi tɩ nebã na n waa n yõka bãmb n tɩ maan b rĩmã yĩnga, b yii be n leb n dʋ tãngã zug b yembre.

A Zeezi kẽnda koom zugu

16Zaabr sẽn ta, a Zeezi karen-biisã sigame n ta ko-kãsengã noore. 17Bãmb kẽe koom koglg pʋgẽ n na n kẽng Kapɛrnaom, ko-kãsengã rʋʋnd a to wã. Zĩigã rag n zoe n sobga zãnga, la a Zeezi dag n ka wa b nengẽ ye. 18Sebg n dag n fugd ne pãng hal wʋsgo, la ko-pɛmã dag n zẽkdame. 19Karen-biisã sẽn dugs koglgã n zãag sẽn zems kɩlo a nu bɩ a yoobe, b yãnda a Zeezi sẽn kẽnd ko-kãsengã zug n kolgd koom-koglgã. La rabeem yõk-b lame. 20La a Zeezi yeel-b lame: «Da maan‑y rabeem ye yaa maam.» 21Karen-biisã dag n dat n dɩka a Zeezi ne koom-koglgã, la tao-tao bala, koom-koglgã rʋʋga tẽnga. Bala, b taa b sẽn dag n dabdẽ wã. Koom-koglg sobg sẽn lengda.

Neb baoo a Zeezi

22Vẽkembeoogo, neb kʋʋngã sẽn dag n yals ko-kãsengã rʋʋndã tẽegame tɩ dag n yaa koom-koglg a yembr tãa n dag n be be, la t'a Zeezi dag n ka kẽ kogl-kãng ne b karen-biisã ye, la tɩ karen-biisã b yeyn-yeyn n looge. 23La koom-kogend a taab yii Tiberyaad n wa n yals zĩig sẽn pẽ ne zĩig ning a Zeezi sẽn ning burã bark n kõ neb kʋʋngã tɩ b wãbã. 24La kʋʋngã sẽn yã t'a Zeezi bɩ b karen-biisã ka be be wã, b mensã kẽe koom-kogendẽ wã n kẽng Kapɛrnaom n na n tɩ bao a Zeezi.

Bur sẽn kõt vɩɩm

25B yãnda a Zeezi ko-kãsengã rʋʋnd a to wã, n sok-b yaa: «Karen-saamba, yãmb waa ka rabʋre?» 26A Zeezi leoka bãmb n yeele: «Mam yeta yãmb sɩd-sɩd tɩ yãmb sẽn baood maamã, ka bõn-bãnã yãmb sẽn yã wã yĩng ye, la yaa yãmb sẽn wãb burã n tɩgã yĩnga. 27Da tʋm-y rɩɩb sẽn sãamdã yĩng ye. Tʋm-y rɩɩb ning sẽn paad vɩɩm sẽn kõn sa wã yĩnga: Ninsaal Bi-riblã n na n kõ-a yãmba. Bala, yaa ba a Wẽnnaam n yãk yẽnda.» 28Nebã soka a Zeezi yaa: «Bõe la tõnd na n maan n tʋm Wẽnnaam tʋʋmdã?» 29A Zeezi leoka bãmb n yeele: «Wẽnnaam tʋʋmde, yaa tɩ yãmb tẽ a soab ning bãmb sẽn tʋmã.» 30La b yeela a Zeezi yaa: «Bõe bõn-bãnd la yãmb maand tɩ tõnd na n yãnd n tẽ yãmba? Bõe tʋʋm la yãmb tʋmda?» 31#Yik 16.4,15, Yɩɩn 78.24Tõnd ba-rãmbã dɩɩ man we-rasempʋɩɩgã pʋgẽ wa b sẽn gʋls n yeel tɩ: «A Moyiis kõo bãmb bur sẽn yit arzãn tɩ b wãbe.»

32A Zeezi yeela bãmb yaa: «Mam yeta yãmb sɩd-sɩd tɩ ka a Moyiis n kõ yãmb bur sẽn yi arzãnã ye, la yaa m ba n kõt yãmb bur sɩd-sɩd sẽn yi arzãnã. 33Bala, Wẽnnaam burã, yaa soab ning sẽn yit-a arzãn n sigda, n kõt dũni neb vɩɩmã.» 34La nebã yeela a Zeezi yaa: Zu-soaba, kõt-y tõnd bur kãng daar fãa. 35A Zeezi yeela bãmb yaa: Maam la bur sẽn kõt vɩɩmã. Ned ning fãa sẽn wat-a mam nengẽ, Kom kõn leb n yõk yẽnda ye, la ned ning fãa sẽn tẽed-a maam, ko-yũud kõn leb n yõk yẽnda abada. 36La mam yeela yãmb tɩ yãmb yãnda maam la y ka tẽed ye. 37Neb nins fãa m ba sẽn kõt maamã na n waa mam nengẽ, la mam kõn dig ned baa a yembr sẽn wat mam nengẽ ye. 38Bala, mam sẽn yi arzãn n sigã, ka tɩ maan m sẽn dat ye, la yaa tɩ maan sẽn tʋm-a maamã raabo. 39La sẽn tʋm-a maamã raab la woto: Yaa tɩ m da bas ned baa a yembr bãmb sẽn kõ maamã tɩ menem ye, la mam na n vʋʋg-a-la yaoolem daarã.#6.39 A Zeezi waoongã daare, nin-sõamyã vʋʋgr daare. 40Sɩd me, ad m ba raabo: Yaa tɩ ned ning fãa sẽn yã Bi-riblã n tẽ bãmb na paam vɩɩm sẽn kõn sa. La mam na n vʋʋg-a-la yaoolem daarã.

41Zʋɩf-rãmbã dag n yẽgemda ne taab a Zeezi poorẽ, bala, a Zeezi yeelame tɩ bãmb la bur sẽn yi arzãn n sigã. 42Nebã yeelame yaa: Ka yẽnda la a Zeezi wɛɛ, a Zozɛf bi-riblã, tɩ tõnd mi a ba ne a ma wã la? La yaa a wãn t'a yetẽ tɩ yẽnda yii arzãn n sigi? 43A Zeezi leoka bãmb n yeele: Da yẽgm-y ne taab ye. 44Ned baa a yembr ka tõe n wa mam nengẽ, tɩ sã n ka m ba, sẽn tʋm-a maamã n tak a soab n wa ne ye. La mam na n vʋʋg-a-la yaoolem daarã. 45#Eza 54.13A Gʋlsa Wẽnnaam no-rɛɛsdbã sɛbẽ tɩ: «B fãa na n deega zãmsg Wẽnnaam nengẽ.» Ned ning fãa sẽn wʋm m ba koɛɛg la a reeg bãmb zãmsgã wata mam nengẽ. 46Ka rat n yeel tɩ ned n zoe n yãnd d ba wã ye, sã n ka soab ning sẽn yi-a Wẽnnaam nengẽ wã. Soab‑kãng yẽ yãnda d ba wã. 47Mam yeta yãmb sɩd-sɩd tɩ ned ning sẽn tẽedã tara vɩɩm sẽn kõn sa. 48Mam yaa bur sẽn kõt vɩɩm. 49Yãmb yaab-rãmbã rɩɩ mand we-rasempʋɩɩgẽ wã, la b kiime. 50Bur ning sẽn yit-a yĩngrã yell la woto: Ned ning sẽn dɩt-a kõn ki ye. 51Maam, mam yaa bur-vɩɩg sẽn yi arzãn n sigi. Ned sã n dɩ bur‑kãngã, a na n vɩɩmda wakat sẽn kõn sa. La bur ning mam sẽn na n kõ dũni wã vɩɩm yĩngã, yaa mam yĩngã.

52Gom-kãng poorẽ, Zʋɩf-rãmbã wẽe no-koeemd ne taab wʋsg n yeele: Nin-kãngã na n yɩɩ wãn n kõ tõnd a yĩngã tɩ d wãbe?

53A Zeezi yeela bãmb yaa: Mam yeta yãmb sɩd-sɩd tɩ yãmb sã n ka wãb Ninsaal Bi-riblã nemdo, la yãmb sã n ka yũ a zɩɩmã, yãmb ka tar vɩɩm y pʋsẽ ye. 54Ned ning sẽn wãbd mam nemd la a yũud mam zɩɩm tara vɩɩm sẽn kõn sa, la mam na n vʋʋg-a-la yaoolem daarã. 55Bala, mam nemdã yaa rɩɩb sɩd-sɩda, la mam zɩɩmã yaa bõn-yũudl sɩd-sɩda. 56Sẽn wãbd-a mam nemd la a yũud mam zɩɩmã paada mam pʋgẽ, tɩ mam paad yẽnda pʋgẽ. 57A wa m ba wã sẽn vɩ, n tʋm maam, tɩ mam vɩ m ba wã maasem yĩngã, woto me, ned ning sẽn dɩt maam na n vɩɩ mam maasem yĩnga. 58Ada la bur sẽn yi arzãn n sigi. A ka wẽnd bur ning yãmb ba-rãmbã sẽn wãbã ye: Bãmb kiime. Sẽn dɩt-a bur‑kãngã wã na n vɩɩmda wakat sẽn kõn sa. 59Yaa woto la a Zeezi gom wakat ning b sẽn dag n zãmsd nebã Kapɛrnaom karen-doogẽ wã.

Vɩɩm sẽn kõn sa goamã

60A Zeezi karen-biisã sẽn wʋm bãmb goamã, wʋsg yeelame yaa: Zãms-kãngã reegr yaa toogo. Ãnda n tõe n sak-a? 61A Zeezi sẽn mi b yamẽ tɩ b karen-biisã yẽgemda gomdã poorẽ, b yeela bãmb yaa: Yõwã tuka yãmb sũur la? 62La yãmb sã n yãnd Ninsaal Bi-riblã t'a zẽkd n lebd a sẽn dag n beẽ wã, na n yɩɩ a wãna? 63Yaa Sɩɩg-sõng n kõt vɩɩm. Yĩngã ka sõngd ne baa fɩ. Goam nins mam sẽn togs yãmbã wata ne Sɩɩg-sõng la vɩɩm. 64La neb kẽer n be yãmb sʋkã n ka tẽed ye. Bala, hal sɩngr wẽndẽ, a Zeezi dag n mii neb nins sẽn ka tẽed bãmba, la ned ning sẽn na n zãmb-a bãmb n yõk n kõ wã. 65A Zeezi gomame n paas n yeele: «Dẽ n kɩt tɩ mam yeel yãmb tɩ ned baa a yembr ka tõe n wa mam nengẽ, tɩ sã n ka m ba n kõ-a noor ye.»

66Sẽn sɩng ne wakat-kãnga, bãmb karen-biis wʋsg leba poorẽ, n bas n ka leb n tũud a Zeezi ye.

67Dẽ, a Zeezi yeela b karen-biis piig la a yiibã yaa: La yãmb yẽ, yãmb ka rat n loog la? 68#Mat 16.16, Mark 8.29, Luk 9.20A Sɩmo Pɩyɛɛr leoka bãmb n yeele: «Zu-soaba, tõnd na n kẽnga ãnda soab nengẽ? Yãmb tara vɩɩm sẽn kõn sa wã goamã. 69La tõnd tẽeme, la tõnd bãngame tɩ yãmb yaa sõmblem soab sẽn yi Wẽnnaam nengẽ.» 70A Zeezi leoka bãmb n yeele: Ka maam n tũus yãmb piig la a yiibã wɛ? La yãmb ned a ye n yaa zĩnã. 71Bãmb dag n gomda a Sɩmo Iskaryo biig a Zʋdaas yelle. Bala, yaa yẽnda, bãmb piig la a yiibã sʋk ned ning sẽn da na n zãmb-a bãmbã.

Currently Selected:

A Zã koe‑noogo 6: MPBU

Highlight

Copy