A Luk koe‑noogo 17
17
Bũmb nins sẽn wat ne lʋɩɩse
(Mat 18.6-7, Mark 9.42)
1A Zeezi yeela b karen-biisã yaa: Bũmb nins sẽn wat ne lʋɩɩsã ka tõe n ka wa ye. La ned ning sẽn na n wa-a ne-bã na paam toogo. 2B sẽn na n loe ned kokor ne neer kugr n lob-a ko-kãsengã pʋg n são a yĩnga, n yɩɩd a sẽn na n kɩt tɩ kom-bãooneg kãens ned a yembr lʋɩ. 3#Mat 18.15 Gũus-y y mense.
Fo ba-biig sã n maan yel-wẽnde, bɩ f leng-a, la a sã n kos sugri, bɩ f kõ-a. 4La a sã n beeg foom naoor a yopoe daar a yembre, n lebg n wa fo nengẽ naoor a yopoe n yet t'a kota sugri, bɩ f kõ-a sugri.
Karen-biisã kota a Zeezi tɩ b paas bãmb tẽebo
5Tẽn-tʋmdbã yeela Zu-soabã yaa: Paas-y d tẽebã. 6La Zu-soabã yeelame yaa: «Yãmb sã n dag n tarẽ tẽeb sẽn zem siin-bila, yãmb na n yeela wom-sɛ-kãngã t'a vik n tɩ sel ko-kãsengã pʋga, la a na n saka yãmba.»
Tʋmtʋmd sẽn tog n maane
7Ãnda n be yãmb sʋkã n tar tʋmtʋmd sẽn kood wall sẽn gũud rũmsi, t'a sã n yi weoog n lebg n wa bɩ a yeel tʋmtʋmdã: kell n wa zĩnd n dɩ? 8Yẽnda ka na n yeel tʋmtʋmdã tɩ: «Segl dɩɩb n kõ-ma, ning fuug n tall rɩɩbã n wa n kõ-m tɩ m dɩ la m yũ. Rẽ poore fo na yaool n dɩ la f yũ.» 9Yẽnda na n pʋʋsa tʋmtʋmd-kãng barka, a sẽn maan bũmb ningã b sẽn yeel-a t'a maanã yĩng sɩda? 10Woto me, yãmb sã n maan bũmb nins fãa b sẽn yeel yãmb tɩ y maanã, bɩ y yeele: Tõnd yaa tʋmtʋmdb sẽn ka yõod ye, d maana tʋʋmd ningã tõnd sẽn da tog n maanã bala.
A Zeezi maaga wãoob piiga
11A Zeezi sẽn wa n dabd Zeruzalɛm, bãmb da tũuda Samaari soolem ne Galɩle sʋka. 12Bãmb sẽn kẽed tẽn-bil a yembr pʋga, neb piig yĩn-gãong bãas sẽn tar waa n sega bãmba. Bãmb yaasa yɩɩg n zẽk b koees n yeele: 13Zeezi, Zu-soaba, zoe-y tõnd nimbãanega. 14#Mk 14.1-32A Zeezi sẽn yãnd-bã, b yeel-b lame tɩ b kẽng n tɩ wilg b mens maan-kʋʋdbã. La bãmb sẽn dabd be wakate, bãmb kell n lebga yɩlma. 15Bãmb sʋka ned a yembr sẽn yã t'a paama maagre, yẽ lebg n pʋga a nao, n zẽk a koɛɛg n pẽgd Wẽnnaam. 16Yẽnda wõgemda a Zeezi taoore, n fõgen a neng tẽnga, n pʋʋs bãmb barka. A dag n yaa Samaari neda. 17A Zeezi gomame n yeel yaa: «Bãmb piiga fãa ka lebg yɩlma sɩda? La neb a wɛ wã bee yɛ? 18Yaa sãan-kãngã bal n lebg n wa n na n kõ Wẽnnaam waoogre? 19Dẽ a Zeezi yeel-a lame yaa: yik n looge. Fo tẽeb n fãag foom.»
Wẽnnaam soolem waoongo
(Mat 24.23-28)
20Fariizẽ-dãmbã soka a Zeezi n dat n bãng Wẽnnaam soolmã sẽn na n wa wakat ninga. A Zeezi leok-b lame yaa: Wẽnnaam soolmã ka wate, n yaa wa bũmb ned sẽn tõe n gẽnes ye. 21B ka na n yeel tɩ ges-y-yã! Wẽnnaam soolem bee ka wall a bee ka sẽnẽ ye. Bala, ad-y Wẽnnaam soolmã bee yãmb sʋka.
22La a Zeezi yeela b karen-biisã yaa: Wakat n wat tɩ yãmb na n dat n yãnd Ninsaal Bi-riblã rayã daar a yembr la yãmb kõn yã ye. 23B na n yeela yãmb tɩ b bee ka, wala b bee ka sẽnẽ. Da kẽng-y be ye, la y ra babs-b ye. 24A wa sa-yãgb sẽn yit kɩreng a yembr n yãg n tɩ ta kɩreng a to wã, Ninsaal Bi-riblã me na n yɩɩ a woto b waoongã daare. 25La yaa tɩlɛ tɩ bãmb deng n nams wʋsgo, la tɩ zamaan‑kãnga nebã zãgs bãmba.
26 #
Sɩng 6.5-8
Bũmb ning sẽn zĩnd a Nowe wakatã na n zĩnda Ninsaal Bi-riblã waoongã wakat me. 27#Sɩng 7.6-24Nebã rag n dɩtame la b yũuda, la b kẽed kãadem, la b kõt b kamb sɩdba, hal tɩ ta daar ningã a Nowe sẽn kẽ koom koglgẽ wã. Sa-kẽengã wa n sãama bãmb fãa. 28#Sɩng 18.20—19.25A na n yɩɩ wa a Lot wakatã. Nebã rag n dɩtame la b yũuda, n daadẽ la b koosdẽ, n bʋtẽ la b metẽ. 29La daar ning a Lot sẽn yi Sodom tẽngã, bugum yii yĩngr n ni wa saaga, ne kidbri n sãam bãmb fãa. 30Na n yɩɩ a woto me daar ning Ninsaal Bi-riblã sẽn na n puk b mengã.
31 #
Mat 24.17,18, Mark 13.15,16 Badaare, bɩ ned ning sẽn be roog zug t'a teed be roogã pʋg ra sig n dɩgs-b ye. La bɩ ned ning sẽn be pʋtẽ da lebg n leb poorẽ me ye. 32#Sɩng 19.26Tẽeg-y-yã a Lot pagã yelle. 33#Mat 10.39, 16.25, Mark 8.35, Luk 9.24, Zã 12.25Ned ning sẽn na n bao tɩ gũ a vɩɩm, a na n menes-a lame, la ned ning sẽn na n bas a vɩɩm na n paam-a lame. 34Mam yeta yãmb tɩ baraar yʋngo, neb a yiib sẽn na n gõe gãag a yembr zugu, b na n dɩka a ye, n bas a ye. 35Pagb a yiib sẽn na n werd neerẽ ne taaba, b na n dɩka a yembr n bas a ye. 36[Raop a yiib sẽn na n be pʋʋgẽ, b na n dɩka a yembr la b bas a ye.] 37Karen-biisã soka a Zeezi yaa: «Zu-soaba, na n yɩɩ zĩ-bʋgo? La a Zeezi leokame tɩ dɩgr sẽn be zĩig ninga, yɩbrend tigimda beenẽ.» Pagb a yiib sẽn werd neerẽ.
Currently Selected:
A Luk koe‑noogo 17: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
