लुका 21

मेन्‍मित्‍माओ अ़छुक्दाम

मर्कुस १२:४१-४४

1कातोक म़नाचिआ अ़चुछुक्‍दाम निनाम्‍हाङ ब़क्‍खाखिम्‌दाओ छुक्‍दाम पाक्‍खादा अ़पाआङाओ येसुआ अ़खा। 2खोक्‍कोसाआ अ़क्‍छा मान्‍तोक्‍कादा मेन्‍मित्‍माआ मोदा ताबोओ ह्‍वातात अ़चुप्‍पा फेक्‌वाचि पाउङुओछाङ अ़खा। 3खोन्‍किना येसुआ म़लोचि, “अ़ङ्‌का अ़नुछ्‍या खानानिन लोनानिन, ओ मान्‍तोक्‍कादा मेन्‍मित्‍माआ नि झाराचिदाङ्‌का ब़द्‍धे पाउयुङ्‌सु। 4ओ झारा म़नाचिआ च़लोक अ़चुतोक्‍मादाङ्‌का अ़क्‍चिलोक अ़पाआ, मेन ओ मेन्‍मित्‍माआ अ़मान्‍तोक्‍दामादाङ्‌का झारा ओएदा युङाङाओ अ़ह़ङ्‌खा लाम्‌ङा पाउयुङ्‌सु।”

निनाम्‍हाङ ब़क्‍खाखिम लुक्‍खात्‍निओ अ़तुक्‌वादा बुया खाअ़लुसाओ

मत्‍ति २४:१-२; मर्कुस १३:१-२

5खा-खाक्‍को येसुओ अ़चुकाखेङ्‌पाचिआ खान्‍नुओ-खान्‍नुओ लुङ्‌ताक्‌चि खोन्‍कि छुक्दाम्‌दा म़प़चिओ सामाचिआ चोङ्‌सायुङ्‌साओ निनाम्‍हाङ ब़क्‍खाखिम्‌ओ अ़तुक्‌वादा म़हान्‍ताङा। मेन येसुआ म़लोचि, 6“खानानिन्‌आ ओन्‍ग़रि त़खाम्‌योम्‍च़म्‌ओ ओ झारा खिम्‌चि अ़क्‌तात लुङ्‌ताक्‌दुङ्‌दु नितात लुङ्‌ताक अ़याक्‍निन्‍लो ओचि झारा म़भुङ्‌खान!”

दुखाओ ग़रिओ बुन्‌चि

मत्‍ति २४:३-१४; मर्कुस १३:३-१३

7मोचिआ अ़सेना, “काचिन्‍पो, ओ झारा देम्‍खा म़लि? खोन्‍कि य़ङ्‌चि लिमा म़मुयाङ्‌हिदा दि-दि बुन्‌चि म़लि?”

8खोक्‍कोसाआ मोचि म़लासुलोचि, “चाप्‍चेत्‍तानिन्‍चिन, साङ्‌आछाङ खानानिन ऩथेम्‍सिमिन्‍ने। देकिनालो ब़द्‍धे म़नाचि अ़ङ्‌ऩङ्‌दा ‘अ़ङ्‌का ख्रिस्‍त ओ!’नि य़ङ्‌सा म़ता। खोन्‍कि ‘ग़रि ताचिआयुङ्‌सा!’नि म़य़ङ। मेन मोचि मान्‍त़ङ्‌दानुम्‍च़म। 9खानानिन ङेन खोन्‍कि खिमाम्‍हुमा य़ङ्‌चि त़एनुम्‍च़म्‌हिदा मान्‍क़दानिन। देकिनालो ओ झारा य़ङ्‌चि बुया लिमाङादोत, मेन अ़लुक्‍मा तामा ना हान्‍छाङ युङ्‌याङ।” 10खोन्‍किना खोक्‍कोसाआ मोचि म़लोचि, “हेन्‍कोप्‌ओ अ़देङ्‌सालाप्‍पादा हेन्‍कोप पुक्‍लोन, खोन्‍कि हाङ्‌होन्‌ओ अ़देङ्‌सालाप्‍पादा हाङ्‌होन पुक्‍लोन। 11खोन्‍कि झारादात्‍नि अ़धिवाङ लुत्‍लिचि म़खात, स़ङ्‌साक्‌वाचि खोन्‍कि चाअ़त्‍लो म़हाम्‌ओ सारिमाचि म़लु। क़माकात्‍तुओ काचिचि खोन्‍कि अ़धिवाङ बुन्‌चि नाम्‍छ़ऱदु म़दात।

12 मेन ओ झारा काचि लिमा बुया म़नाचिआ खानानिन ऩलाविन्‌कि दुखा ऩप़न, खोन्‍कि खानानिन छ़ङ छेइसि यावायोक्‍खिम्‌चिदा ऩतारिन्‍लान, खोन्‍कि छेक्‍खाखिम्‌चिदा ऩछेक्‍तिन। खानानिन अ़ङ्‌का कात़ङ्‌चिओसा हाङ्‌चि खोन्‍कि हाङ्‌कामुचिओ अ़चुबुदा ऩसारिन्‍खात्‍तिन। 13मोन्‍ग़रि खानानिन्‌आ अ़ङ्‌तुक्‌वादा खालुमा अ़वाखाम त़तोक्‍तुम। 14खोन्‌ओसा रात्‍मान्‍चिन्‌ओ निकि दे य़ङ्‌माओ निकिना बुया खानानिन मिन्‍राक मान्‍मुदानिन। 15देकिनालो अ़ङ्‌का खानानिन चेप्‍मा सिवा खोन्‍कि ताया प़नानिन्‍कि खाक्‍कोछाङ आम्‍नुओ ङेङ्‌चिआ ना आम्‍नुओ य़ङ लामा अ़ऱ, ना आम्‍नुओ दुम क़प्‍माङा अ़ऱ। 16मेन आम्‍नुओ मामा पापाचि खोन्‍कि बुवा, निछाचि, नि आम्‍नुओ म़नाचि खोन्‍कि यावाचिआछाङ खानानिन ऩधान्‍तिन्‌कि खा-खाक्‍कोचि ऩसेरिन। 17अ़ङ्‌का कात़ङ्‌चिओसा झारासा खानानिन ऩङाऩछिरिन। 18मेन आम्‍नुओ ताङ्‌दुओ अ़क्‌य़ ताङ्‌मुवाछाङ अ़मानिन्‍खात्‍निन। 19मिन्‍माआ चालो त़लिसिन्‌युङ्‌सिन्‌नालो खानानिन्‌आ ह़ङ्‌म़ङ त़तोक्‍तुम।

यरुसलेम लुक्‍खात्‍निओ अ़तुक्‌वादा बुया खाअ़लुसाओ

मत्‍ति २४:१५-२१; मर्कुस १३:१४-१९

20 खोन्‍कि रात्‍खामिचिआ यरुसलेम अ़ऱङ्‍ओ त़खाम्‌हिदा मोसोओ अ़लुक्‍मा तादिसानि खानानिन्‌आ त़सिन्‍तुम। 21खोन्‍किना खा-खाक्‍कोचि यहुदियादा म़युङ्‌याङ, मोचि भ़ऱचिदुत्‍नि म़फुङ्‌ने। खोन्‍कि यरुसलेम सहराहुत्‌दा कायाक्‌चि मो सहरा अ़छित्‌दानेकि तेन्‌दा कायाक्‌चि मो सहराहुत्‌दा ऩवाङ्‌निन्‍ने। 22देकिनालो मो निनाम्‍हाङ्‌आ दन्‍दा प़खा लेन ओ, खोन्‍कि साम्‍कालिन्‌दा छाप्‍ताओ झारा य़ङ्‌चि तामालामादोत। 23मो लेन ता, मोन्‍ग़रि बुक्‍खुन्‍दि मेत्‍छामाचि, खोन्‍कि उन्‍दादाओ नुनु नुवासि कादुङ छामाचि देम चाअ़त्‍लो म़लि! देकिनालो हेन्‍खामादा अ़धिवाङ दुखा ताकि यहुदि रावाचिएदा ब़द्‍धे निनाम्‍हाङ्‌ओ अ़चुमाइसुङ कात। 24निरावाचिआ मोचि बान्‍छोन्‌आ म़सेरुचि, खोन्‍कि झारा हेन्‍कोप्‌चिदा म़लाउखात्‍तुचि। निरावाचिओ अ़चुग़रि मान्‍तालायुक्‌तारि मोचिआ अ़चुलाङ्‌आ यरुसलेम अ़नेङ्‌खान।

म़नाओ अ़छाओ अ़चुय़मा ग़रि

मत्‍ति २४:२९-३१; मर्कुस १३:२४-२७

25 नाम, लादिप्‍मा खोन्‍कि साङ्‌केन्‍माचिदा बुन्‌चि म़दात। खोन्‍कि धियाङ्‌वामाओ अ़मुक्‍माकि अ़लोङ्‌वात्‌चिआ हेन्‍खामादाओ रावाचि मिन्‍राक्‌दा म़छुक्‌कि अ़चुक़माकात। 26म़नाचि हेन्‍खामादा लिमा म़मुयाङ्‌ओ य़ङ्‌चि अ़सिन्‌कि अ़चुक़माआ आक्‍तुदाचि। देकिनालो नाम्‍छ़ऱदुओ सावाचि म़ङाङ्‌खात। 27खोन्‍किना अ़ङ्‌का म़नाओ अ़छा सावा खोन्‍कि तोक्‍पो साम्‌एनान य़वारिदा य़ङाङाओ मोचिआ ऩखाङ्‌ङा। 28ओ य़ङ्‌चि लिमा पुङ्‌सुङुचिहिदा पुवालोन्‍तानिन्‌कि आम्‍नुओ ताङ्‌चि ङोङ्‌सानुम्‍च़म। देकिनालो निनाम्‍हाङ्‌आ खानानिन लेन्‍मा ग़रि च़क्‌दा तायाङ।”

वासिताङ्‌ओ अ़तुक्‌वादा चिन्‍माय़ङ

मत्‍ति २४:३२-३५; मर्कुस १३:२८-३१

29खोन्‍किना येसुआ ओ दोय़ङ्‌ला खाम़एत्‍तुचि। “वासिताङ खोन्‍कि झारा स़ङ्‌ताङ्‌चि खानुम्‍च़म। 30मोचिआ अ़बाक्‌वाचि अ़फान्‌याङ्‍ओ खानानिन त़खाम्‍च़म्‌हिदा उप्‍लाक्‌वा लोन्‍मा मुयाङ निकिना आप्‍पि त़सिन्‍तुम। 31मोवात्‍निङा, खानानिन्‌आछाङ ओ झारा य़ङ्‌चि त़खाम्‍च़म, मोन्‍ग़रि निनाम्‍हाङ्‌ओ अ़चुहाङ्‌होन च़क्‌दाङा युङ्‌याङ निकिना त़सिन्‍तुम। 32अ़नुछ्‍या अ़ङ्‌का खानानिन लोनानिन, ओ झारा य़ङ्‌चि मान्‍तालामाङ ओ दुङ अ़लुक्‍निन्‍खात्‍निन। 33निनाम्‍मा खोन्‍कि हेन्‍खामा लुक्‍खात, मेन अ़ङ्‌य़ङ देम्‍खाछाङ अ़लुक्‍निन्‍खात्‍निन।

चेत्‍चेत्‍चेत्‌वा युङ्‌मादोत

34 खानानिन चाप्‍चेत्‍तानिन्‍चिन, माङ्‌नालोना आम्‍नुओ ताकावा च़मा, खाबात्‌आ सेत्‍मा, खोन्‍कि ‘देत्‍नि ह़ङ्‌मा’नि मिन्‍मा योक्‍माआ आम्‍नुओ मिन्‍मा तिमुखात्‍तु, खोन्‍किना वाय़वात्‍निङा अ़क्‍धुवा मो लेन तालाप। 35हेन्‍खामादा कायुङ्‌चि झाराएदा मो लेन ता। 36खोन्‌ओसा तामा मुयाङ्‌ओ झारा य़ङ्‌चिदाङ्‌का रात्‍मा त़ऱन्‍चिन्‍ने निकि अ़ङ्‌का म़नाओ अ़छाओ अ़ङ्‌बुदा एप्‍मा त़ऱन्‍ने निकिना अ़धुन चेत्‍चेत्‍चेत्‌वा युङानिन्‌कि यामारानिन।”

37अ़खोलेन येसुआ म़नाचि निनाम्‍हाङ ब़क्‍खाखिम्‌दा म़चिन्‍तुङुचि खोन्‍कि अ़खाखुत जैतुन्‌निओ भ़ऱदु म़खाराकि नाम्‌अ़तात्‍ताङा। 38खोन्‍कि खोक्‍कोसोओ अ़चुय़ङ एन्‍सि झारा म़नाचि अ़वाय़ङ निनाम्‍हाङ ब़क्‍खाखिम्‌दा म़ताङा।

Currently Selected:

लुका 21: bap

Highlight

Copy