लुका 5

येसुआ सुम्‌कापाङ अ़चुकाखेङ्‌पाचि म़बुत्‍तुचिओ

मत्‍ति ४:१८-२२; मर्कुस १:१६-२०

1अ़क्‌लेन येसु गनेसरेत्‌निओ धियाङ्‌वामाओ अ़च़क्‌दा म़एवाङाहिदा ब़द्‍धे म़नाचि निनाम्‍हाङ्‌ओ अ़चुय़ङ एन्‍सि छ़न्‍काछुछुरुप लियाङ्‌सा म़ता। 2खोन्‍कि धियाङ्‌वामाओ अ़च़क्‌दा ह्‍वातात नावाचि म़युङाङाओ येसुआ म़खाचि। ङा कालाप्‍पाचि अ़चुनावाचिदाङ्‌का म़लोन्‍ताकि अ़चुबोप्‍छ़क्‌चि वाम़धाप्‍तुङुचि। 3मो नावाचिएदा अ़क्‌तात सिमोन्‌ओ ओ। येसु मो नावादा म़वाङाकि “ओदाङ्‌का अ़क्‍चित ह्‍यात्‍नि वाक्‍तु”नि सिमोन अ़लोवा। खोन्‍कि खोक्‍को मो नावादा म़युङाकि म़नाचि म़चिन्‍तुचि।

4म़चिन्‍तुचिउचिकि येसुआ सिमोन अ़लोवा, “नावा ग़ङ्‌याङ्‌ओदा खात्‍तु खोन्‍कि आम्‍बोप्‍छ़क वेत्‍तुकि ङा लावा।”

5खोन्‍कि सिमोन्‌आ येसु लो, “काचिन्‍पो आन्‍कान्‍काआ ना नाम्‍तात्‍लो काचि मुन्‍काकिछाङ दित्‍छाङ मान्‍लाप्‌दान्‍का। मेन खानानिन त़य़ङिन्‌येन्‌ओसा अ़ङ्‌का बोप्‍छ़क वेत्‍तुङ्‌ने।” 6खोन्‍कि खोक्‍कोसाआ म़य़ङाओवात्‍निङा बोप्‍छ़क वेत्‍तुहिदा ब़द्‍धे ङाचि म़धाकि मोचिओ अ़चुबोप्‍छ़क्‌ङा पेत्‍माखात्‍मा मुवाङा। 7खोन्‍कि मोचिआ नि नावादा म़याआङाओ अ़चुयावाचि “ओया बानानिन्‌कि फानि”नि अ़चुछुक्‌आ म़बुत्‍तुचि। खोन्‍कि मोचि म़बानाकि ह्‍वातात्‍माङ नावाचि ङाचिआ म़भेम्‍सुचि खोन्‌ओसा मो नावाचि वालुम्‍माखात्‍मा मुवाङाचि।

8ओ खाकि सिमोन पत्रुस्‌आ येसुओ अ़चुलाङ्‌दा बोम्‍सान्‍चिन्‌कि “हाङ्‌पो! अ़ङ्‌काएदाङ्‌का अ़थाया खारानिन। देकिनालो अ़ङ्‌का हेवामि ओ”नि य़ङा। 9ओन ब़द्‍धे ङाचि म़लाउचिओदा सिमोन खोन्‍कि खोसोओ झारा अ़यावाचि दोम्‍तुदोचि। खोन्‌ओसा खो ओवात्‍नि य़ङाओ। 10मोवात्‍निङा जब्‍दियाओ अ़छाचि याकुब खोन्‍कि युहन्‍नाछाङ दोम्‍तुदोचि। मोचि सिमोन्‌एनान अ़क्‍नि काचि कामु अ़यावाचि याआङाचि।

येसुआ सिमोन अ़लोवा, “मान्‍क़दा, हान्‌दाङ्‌का खाना ङाचि माआङ, मेन म़नाचि अ़ङ्‌काएदा त़तारुचि।” 11खोन्‍कि मोचिआ अ़चुनावाचि बाखादा म़लोत्‍तुचि खोन्‍कि झारा अ़चुसामाचि म़छिरुदोचि खोन्‍कि येसु अ़त़ङ्‌ता।

येसुआ क़माधामा सारिमाआ लाउओ म़ना अ़नुसाओ

मत्‍ति ८:१-४; मर्कुस १:४०-४५

12येसु अ़क्‌तात सहरादा म़युङाङाहिदा क़माधामा सारिमाआ थ़क्‍तुखात्‍तुओ अ़क्‍छा म़ना येसुआ अ़धिरा। मो म़नाआ येसु खाकिना बाखादा बोम्‍सान्‍चिन्‌कि खोक्‍को लो, “हाङ्‌पो, खानानिन त़मिनिन्‌नालो अ़ङ्‌का सेङ्‌मा त़ऱङाऩङ।”

13खोक्‍कोसाआ अ़चुछुक अ़फेसाकि खो अ़नोप्‍ता, खोन्‍कि अ़लोवा, “अ़ङ्‌का मिन्‍ङाङा, खाना नुवालावा!” खोन्‍कि मोन्‍ग़रिङा खोसोओ अ़क़माधामा सारिमादाङ्‌का नुवाखारा। 14खोन्‍कि येसुआ मो अ़लोवा, “ओ य़ङ साङ्‌छाङ खामान्‌एत्‍दोचि! मेन खारा, खोन्‍कि आप्‍पि काब़क्‍पाएदा खाङ्‌मुसान्‍चिन, खोन्‍कि निनाम्‍हाङ्‌य़ङ खाकालु मोसाआ लोमाय़ङ्‌ओ हेन्‍खोक्‌वा प़, खोन्‍कि म़नाचिओ निम्‍पाङ सालुम्‍स़ङ लिने।” 15खोन्‍नुछाङ येसुओ अ़तुक्‌वादाओ य़ङ्‌चि बुयादाङ्‌का च़लोक म़ऱङाखारा, खोन्‍कि ब़द्‍धे म़ना मुक्‍लाचि खोक्‍कोसोओ अ़चुताया एन्‍सि खोन्‍कि अ़चुसारिमाचिदाङ्‌का नुसि म़कोवान्‍चिन। 16मेन येसु लेक्‍लेक्‍लेक्‌वाओदा यामात्‍सि खात्‌याङ्‌सा म़मुवाङा।

ख़न्‍माखात्‍मा सारिमाआ लाउओ म़ना अ़नुसाओ

मत्‍ति ९:१-८; मर्कुस २:१-१२

17अ़क्‌लेन येसुआ म़नाचि म़चिन्‍तुङुचिहिदा अ़क्‍चित #५:१७ फरिसिचि : यहुदिचिओ अ़क रुहुप। ख्रिस्‍त युङाङाहिदा मोचि म़छोसाङा। मो यहुदिचि झारा य़ङ्‌हुप नुलोक याङ्‌मा म़लामाङा। खोन्‍किना मोचि आप्‍पि निनाम्‍हाङ्‌ओ अ़मिन्‍मावा काच़नि म़मित्‍तान्‌यान्‍चिन। अ़देङ्‌या य़ङ्‌सिवा अ़तुक्‌वाऩङ्‌दा ‘फरिसिचि’ लामानुम।फरिसिचि खोन्‍कि #५:१७ य़ङ्‌हुप काचिन्‍पाचि : य़ङ्‌हुप काचिन्‍पाचि निनाम्‍हाङ्‌य़ङ खाकालु मोसाआ छाप्‍तुओ छाप्‍लाखाचि चिन्‍मा खोन्‍कि सोत्‍मा पाङ्‌कातोक म़नाचि ओ। मोचिआ ब़द्‍धे मोसाआ छाप्‍तुओ छाप्‍लाखा अ़खिप्‍ताङा। मोचि मो य़ङ्‌हुप्‌दा याआङाओवात्‍नि अ़न्‍नुनु च़मा म़लामाङा। अ़देङ्‌या य़ङ्‌सिवा अ़तुक्‌वाऩङ्‌दा ‘य़ङ्‌हुप’ लामानुम।य़ङ्‌हुप काचिन्‍पाचि येसुओ अ़चुच़क्‌दा म़युङाङा। मोचि गालिल खोन्‍कि यहुदिया धिखाहुप्‌दाओ झारा तेन्‍चिदाङ्‌का खोन्‍कि यरुसलेम सहरादाङ्‌का म़तायुङ्‌सा। येसुएदा कातुक्‌चि नुमा निनाम्‍हाङ्‌ओ अ़चुसावा याआङा। 18अ़क्‍चित्‌कापाङ म़नाचिआ ख़न्‍माखात्‍मा सारिमाआ लाउओ अ़क्‍छा म़ना अ़इम्‍खाएनान अ़खुयातारा। मोचिआ मो अ़खुयाखात्‍ताकि येसुओ अ़चुबुदा तात्‍मालामा अ़लाप्‍ता। 19मेन म़ना मुक्‍लाचिओसाआ येसुएदा खोचिआ मो म़ना तात्‍मालामा मान्‍ऱअ़दा। खोन्‍कि मोचिआ खिम्‌ओ अ़दुङ्‌दु कातुक्‍पा अ़वाक्‍ता खोन्‍कि खिम्‍बोप्‍खा अ़होङ्‌साकि अ़इम्‍खाएनान्‌ङा म़ना मुक्‍लाहुत्‌दा येसुओ अ़चुबुदा अ़धान्‍ता। 20मोचिओ अ़चुसाकोङ्‌छ़ङ अ़खाकि येसुआ मो अ़लोवा, “यावा, अ़ङ्‌का आम्‍हेवाचि लेत्‍नायुङ्‌ना।”

21मोसाओ अ़य़ङ्‌हुप काचिन्‍पाचि खोन्‍कि फरिसिचिआ अ़चुमिन्‍मादा मित्‍मा अ़पुङ्‌सा, “ओक्‍को म़ना साङ ओ? ओसाआ ना निनाम्‍हाङ्‌ओ अ़चुसाया पेप्‍तुङु! निनाम्‍हाङ्‌दाङ्‌का नि साङ्‌आछाङ हेवाचि लेत्‍मा म़ऱनिन!”

22मोचिओ अ़चुमिन्‍मादा अ़मित्‍ताङाओ य़ङ अ़सिन्‍ताकि येसुआ मोचि म़सेनुचि, “देकि खानानिन आम्‍नुओ साकोङ्‌वादा ओवाको य़ङ्‌चि त़मित्‍तुम्‌योम्‍च़म? 23खाक्‍को नुसुम्‍पेन्‍ता मुयाङ, ‘आम्‍हेवाचि लेत्‍नायुङ्‌ना’नि य़ङ्‌मा हे ‘पुवालोन्‍ताकि कोला’नि य़ङ्‌मा? 24मेन म़नाओ अ़छाएदा#५:२४ म़नाओ अ़छा : येसुआ आप्‍पि अ़याङाओ अ़क्‌तात ऩङ। ओक्‍को ऩङ बुयाओ साम्‍कालिन्‌दा निनाम्‍हाङ्‌य़ङ खाकालु दानिएल्‌आ याङुयुङ्‌सु (दानिएल ७:१३)। येसु म़युङाङाओ ग़रिदा साम्‍कालिन काखिप्‌चिआ ओक्‍को ऩङ्‌ओ अ़तुप्‍माय़ङ मसिह (कालेन्‍पा) नि अ़सिन्‍ताङा, मेन नि ब़द्‍धेकापाङ्‌चिआ मान्‍सिन्‌अ़दाङा। हेन्‍खामादाहेवाचि लेत्‍मा पाङ युङ्‌याङ निकिना खानानिन्‌आ सिन्‍मादोत।” खोन्‍किना येसुआ ख़न्‍माखात्‍मा सारिमाआ लाउओ म़ना अ़लोवा, “अ़ङ्‌का खाना लोना, पुवालोन्‍ता खोन्‍कि आम्‍थ़ङ्‌खा ओक्‍तुकि खारा!”

25म़नाचिआ अ़खाङाहिदाङा मो म़ना च़क्‍नि पुवालोन्‍ताकि अ़थ़ङ्‌खा ओक्‍तुकि निनाम्‍हाङ्‌ओ अ़चुओ ऩङ चोन्‌याङ्‌सा अ़खिम खारा। 26मोचि झारा दोम्‍तुदोचिकि निनाम्‍हाङ्‌ओ अ़चुओ ऩङ अ़चोन्‍ता। खोन्‍कि मोचि अ़चुक़माकात्‌याङ्‌सा म़य़ङा, “आय़ आन्‍कान म़दोम्‍दाओ काचि खाम!”

येसुआ लेबि अ़बुत्‍ताओ

मत्‍ति ९:९-१३; मर्कुस २:१३-१७

27खोन्‍किना मोदाङ्‌का म़खाराङाहिदा येसुआ लेबि अ़ऩङ मुवाङाओ अ़क्‍छा दाम्‍दु कालात्‍पा म़ना दाम्‍दु लात्‍खादा युङाङाओ अ़खा, खोन्‍कि खो अ़लोवा, “अ़ङ्‌का त़ङ्‌ताङ।” 28खोन्‍कि लेबिआ झारा अ़सामाचि छिरुदोचिकि पुवालोन्‍ता खोन्‍कि खोक्‍को त़ङ्‌तु।

29खोन्‍कि लेबिआ अ़खिम्‌दा येसुओ निम्‍पाङ अ़धिवो खाबाचा पाआ। मोदा ब़द्‍धे दाम्‍दु कालात्‌चि खोन्‍कि नि ब़द्‍धे म़नाचिछाङ खोक्‍कोएनान अ़क्‍नि म़चाङा। 30फरिसिचि खोन्‍कि फरिसि भुङ्‌ओ य़ङ्‌हुप काचिन्‍पाचिआ छुऩङ्‌वा मुयाङ्‌सा येसुओ अ़चुकाखेङ्‌पाचि म़सेनुचि, “देकि खानानिन दाम्‍दु कालात्‌चि खोन्‍कि हेवामिचिएनान अ़क्‍नि त़चान्‌येन खोन्‍कि त़दुङिन्‌येन?”

31येसुआ मोचि म़लासुलोचि, “म़नुयाङ्‌ओ म़नाचि ओक्‍तोकामेत अ़दोत्‍निन, मेन कातुक्‌चि ओन्‍ङा दोत। 32अ़ङ्‌का साम्‌योक्‍मिचि माआङ, मेन हेवामिचि लामाचि निम्‍पाङ बुत्‍सि ताङ्‌ओ।”

मान्‍चामाङ युङ्‌माकि यामात्‍माओ अ़तुक्‌वादा सेन्‍माय़ङ

मत्‍ति ९:१४-१७; मर्कुस २:१८-२२

33खा-खाक्‍को म़नाचिआ येसु अ़लोवा, “युहन्‍नाओ अ़काखेङ्‌पाचि अ़धुन मान्‍चामाङ याम़मात। फरिसिचिओ अ़चुकाखेङ्‌चिछाङ मोवात्‍निङा म़च़। मेन आम्‍नुओ काखेङ्‌चि ना म़चायुङ खोन्‍कि म़दुङ्‌युङ।”

34येसुआ मोचि म़लासुलोचि, “सायाकाकाम्‍पा तावाङ्‌चिएनान अ़क्‍नि युङ्‌तारि दि मोचि मान्‍चामाङ म़युङ कि? 35मेन मो लेन ता, मोन्‍ग़रि सायाकाकाम्‍पा मोचिएदाङ्‌का अ़खात खोन्‍किना मोन्‍ग़रि मोचि मान्‍चामाङ म़युङ।”

36येसुआ निछाङ अ़क्‌तात दोय़ङ्‌ला खाम़एत्‍तुचि, “साङ्‌आछाङ अ़ऩङ्‌वा तित्‌दाङ्‌का अ़क्‍धाङ रेउकि अ़पेत्‌वा तित अ़भोक्‍तुन। मोवात्‍नि भोक्‍तुनालो अ़ऩङ्‌वा तित्‌छाङ रेउखाइसु खोन्‍कि अ़ऩङ्‌वा तित्‌दाङ्‌का रेआओ अ़धाङ अ़पेत्‌वा तित्‌एनान्‌छाङ अ़तोङ्‌निन। 37खोन्‍कि साङ्‌आछाङ बुयाओ साहोक्‌वाओ बेखादा अ़ऩङ्‌वा अङ्‌गुरा माङ्‌वा अ़पाउन। पाउनालो मो अङ्‌गुरा माङ्‌वाआ साहोक्‌वाओ बेखा भ़ङ्‌सुभोउकि अङ्‌गुरा माङ्‌वा थोक्‍खात खोन्‍कि साहोक्‌वाओ बेखा लुक्‍खात। 38खोन्‌ओसा अ़ऩङ्‌वा अङ्‌गुरा माङ्‌वा अ़ऩङ्‌वा साहोक्‌वाओ बेखादा युङ्‌मादोत। 39साङ्‌आछाङ बुयाओ अङ्‌गुरा माङ्‌वा दुङ्‌कि अ़ऩङ्‌वा अङ्‌गुरा माङ्‌वा दुङ्‌मा अ़स़निन। देकिनालो ‘बुयाओ अ़ङ्‌गुरा माङ्‌वा चानु’नि य़ङ।”

Currently Selected:

लुका 5: bap

Highlight

Copy