लुका 8

येसु काफा मेत्‍छामाचि

1अ़क्‍चित्‌कि येसु निनाम्‍हाङ्‌ओ अ़चुहाङ्‌होन्‌ओ अ़तुक्‌वादा नुय़ङ्‌खान खालुयाङ्‌सा, खाएत्‌याङ्‌सा सहराचि खोन्‍कि तेन्‌चिदात्‍नि म़हुवा। बारकापाङ अ़चुकाखेङ्‌पाचि खोक्‍कोएनान अ़क्‍नि म़याआङा। 2खोन्‍किना चाकावालावाचिकि सारिमादाङ्‌का म़नुवाओ नि देम्‌कापाङ मेत्‍छामाचिछाङ म़याआङा। मोचिएदाङ्‌का अ़क्‍छा मग्‍दालादाओ मरियम याआङा, मोएदाङ्‌का येसुआ सात्‌कातात चाकावालावाचि म़लोइसुचिओ। 3खोन्‍कि #८:३ हेरोद : ओ हेरोद तोक्‍पो हेरोद्‌ओ अ़छा हेरोद एन्‍तिपास ओ। हेरोद हाङ्‌ओ अ़खिम काचि काखाङ खुजास्‌ओ अ़खिम्‍हाङ्‌मा योअन्‍ना खोन्‍कि सुसन्‍ना खोन्‍किना नि ब़द्‍धेचिआ आप्‍पिओ अ़चुछेन्‍बि म़प़चिकि येसु खोन्‍कि अ़चुकाखेङ्‌पाचि म़फासुङुचि।

बिउ कावेत म़नाओ अ़तुक्‌वादा दोय़ङ्‌ला

मत्‍ति १३:१-९; मर्कुस ४:१-९

4अ़क लेन सहरा-सहरादाङ्‌का म़नाचि म़ताङा खोन्‍कि तोक्‍पो म़ना मुक्‍लाचि म़कोवान्‌यान्‍चिन्‌ओचि येसुआ दोय़ङ्‌ला खाम़एत्‍तुचि 5“अ़क्‍छा बिउ कावेत बिउ वेत्‍सि खारा। बिउ वेत्‍तुङुहिदा अ़क्‍चित बिउचि लाम्‌दात्‍नि म़छुक्‍ता, म़नाचिआ अ़नेप्‍ता, खोन्‍कि नाम्‍छ़ऱदुओ छोङ्‌वाचि म़ताकि मो बिउ अ़चाखात्‍ता। 6अ़क्‍चित बिउचि लुङ्‌छ़ङ्‌दुङ्‌दाओ बाखादा म़छुक्‍ता, खोन्‍कि मोदा खेक्‍मा ना खेक्‍तुचि, मेन बाखा अ़चिवाङ मात्‍द़ङ्‌याङ्‌ओसा म़युलासुवा। 7अ़क्‍चित बिउचि त़ङ्‌खोक्‌वालादा म़छुक्‍ता, खोन्‍किना मोएनान अ़क्‍नि त़ङ्‌खोक्‌वा ताङ्‌चि म़पोयालोन्‍ताकि मो बिउचि म़उप्‍तुदिसुचि। 8मेन अ़क्‍चित बिउचि अ़नुवाक बाखादा म़छुक्‍ता। मोचि म़पोयाकि वेत्‍माय़ङ्‌दाङ्‌का सयेकास़रो च़लोक सिया।” येसुआ ओ दोय़ङ्‌ला खाम़एत्‍तुचिउचिकि अ़धिवा य़ङ्‌आ म़लोचि, “साङ्‌को अ़एन्‍खा नाबाक याक्‌याङ, मोसाआ एनुने!”

दोय़ङ्‌लाओ अ़तुप्‍माय़ङ

मत्‍ति १३:१८-२३; मर्कुस ४:१३-२०

9येसुओ अ़चुकाखेङ्‌पाचिआ खोक्‍को अ़सेना “ओ दोय़ङ्‌लाओ अ़तुप्‍माय़ङ दि ओ?” 10येसुआ मोचि म़लासुलोचि, “खानानिन निनाम्‍हाङ्‌ओ अ़चुहाङ्‌होन्‌ओ अ़कोङ्‌दुम्‌ओ तुप्‍खाताया ऩप़न्‌युङ्‌सिन, मेन निचिएदा दोय़ङ्‌लाचिदा चेप्‍ङा, मोचिआ चोप्‍मा ना अ़चोप, मेन ऩखान, एन्‍मा ना अ़एन, मोचिआ अ़एन्‍कि ऩतुप्‍तुन।”#यसैया ६:९

11 “दोय़ङ्‌लाओ अ़तुप्‍माय़ङ ओङा ओ: बिउनिओ निनाम्‍हाङ्‌ओ अ़चुय़ङ ओ। 12लाम्‌दा छुक्‍ताओ बिउआ दि खाङ मुसुनालो साङ्‌चिआ निनाम्‍हाङ्‌ओ अ़चुय़ङ अ़एन, मेन सैताना ताकि अ़चुसाकोङ्‌वादाङ्‌का निनाम्‍हाङ्‌ओ अ़चुय़ङ ङाप्‍तुखात्‍तुचि, मोचि साकोङ्‌छ़ङ मुमा ऩऱनिन्‌कि ऩलेत्‍निन। 13लुङ्‌खावादा म़छुक्‍ताओ बिउचि ओङा ओ: साङ्‌आ निनाम्‍हाङ्‌ओ अ़चुय़ङ एनुकि अ़ऩङानुयाङ्‌सा मो लोउ। मेन मोसोओ अ़भेन अ़मेत्‍तुन्‌ओसा मोसाआ निनाम्‍हाङ थुत्‍मेत्‍लो ओन्‍ङा साकोङ्‌छ़ङ मु, मेन चिन्‍माखाङ्‌माओ ग़रिदा अ़साकोङ्‌छ़ङ्‌दाङ्‌का देङ्‌ला। 14त़ङ्‌खोक्‌वालादा म़छुक्‍ताओ बिउचि ओचिङा ओ: साङ्‌आ निनाम्‍हाङ्‌ओ अ़चुय़ङ एनु, मेन मो म़ह़ङ्‌याङ्‌हिदा हेन्‍खामादाओ मिन्‍राक्‌चि, चासुम्‍छेन्‍बि खोन्‍कि अ़चुताकावा युङ्‌माचामाआ उप्‍तुदिसुचि, खोन्‍किना मोचिओ अ़चुसिवा चात्‍मा अ़ऱनिन। 15मेन अ़नुवाक बाखादा छुक्‍ताओ बिउचि मोङा ओ: साङ्‌आ निनाम्‍हाङ्‌ओ अ़चुय़ङ अ़नुवाक खोन्‍कि सेङ्‌याङ्‌ओ साकोङ्‌वाआ एनुकि निनाम्‍हाङ्‌ओ अ़चुय़ङ अ़मिन्‍मादा मित्‍तु खोन्‍कि हुङ्‌याङ्‌सा ब़द्‍धे अ़सिवा सिसु।

खाउप्‍खाओ अ़तुक्‌वादा

मर्कुस ४:२१-२५

16 साङ्‌आछाङ खाउप्‍खा ओङ्‌सुकि ब़आ अ़दिप्‍तुन ना इम्‍खा भेन्‌युङा युङ्‌सु, मेन खिम्‍हुत्‌या कावाङ्‌चिआ साम अ़खाङ्‌ने निकिना खाउप्‍खा युङ्‌खाचोक्‌दु युङ्‌सु। 17झारा कुम्‍माय़ङ य़ङ्‌चि म़दात माङ्‌लो झारा सुकुलादाओ य़ङ्‌चि अ़सिन्‌कि अ़खाङ। 18खोवात्‍निओसा देत्‍नि खानानिन्‌आ त़एनुम, मो य़ङ्‌दा नुलोक मिन्‍मा पाक्‍तानुम। साङ्‌एदा युङ्‌याङ मो च़लोक प़, खोन्‍कि मोएदा ब़द्‍धे लि। मेन साङ्‌एदा मात्‍द़ङ, मोएदा युङ्‌याङ्‌ओछाङ मोएदाङ्‌का अ़ङाप।”

येसुओ अ़चुमा खोन्‍कि अ़चुनिछाचि

मत्‍ति १२:४६-५०; मर्कुस ३:३१-३५

19येसुओ अ़चुमा खोन्‍कि अ़चुदुवाछा निछाचि येसु तुप्‍सि म़ता। मेन म़ना मुक्‍लाचिओसा मोचि येसुओ अ़चुच़क्‌दा तामालामा मान्‍ऱचि। 20अ़क्‍छाआ येसु लो, “आम्‍नुओ मामा खोन्‍कि आम्‍नुओ दुवाछा निछाचि खानानिन्‌एनान तुप्‍मा मिन्‍माआ बुङ्‌खाया म़एप्‌याङ।”

21येसुआ मोचि म़लासुलोचि, “साङ्‌आ निनाम्‍हाङ्‌ओ अ़चुय़ङ एनु खोन्‍कि मोवात्‍निङा च़, मोचिङा अ़ङ्‌मा अ़ङ्‌निछाचि ओ।”

येसुआ कुह़क्‍मा अ़सेम्‍ताओ

मत्‍ति ८:२३-२७; मर्कुस ४:३५-४१

22अ़क्‌लेन येसु खोन्‍कि अ़चुकाखेङ्‌पाचि नावादा म़वाङा खोन्‍कि येसुआ अ़चुकाखेङ्‌पाचि “आन्‍कान धियाङ्‌वामाओ अ़ह्‍याउधेत खारिन्‍ने” नि म़लोचि। खोन्‍कि मोचि म़खारा। 23मोचि म़खाराङाहिदाङा येसु म़इम्‍सादा। धियाङ्‌वामादा क़माकात्‍तुओ कुह़क्‍मा बाना, खोन्‍कि नावा चाक्‌वाआ भेप्‍मा पुक्‍तुकिना मोचि ब़द्‍धे क़माआ ताप्‍तुतारुचि।

24खोन्‍किना अ़चुकाखेङ्‌पाचि येसुएह्‍यात्‍नि म़खाराकि ओवात्‍नि य़ङ्‌सा खोक्‍को अ़थिन्‍ता, “काचिन्‍पो, काचिन्‍पो, आन्‍कान वालुम्‍माखात्‍मा मुन्‌येन!” खोन्‍कि येसु म़थिन्‍तालोन्‍ताकि ह़क खोन्‍कि म़धुङ्‌साङाओ अ़लोङ्‌वात्‌चि म़रेन्‍तुचि, खोन्‍कि मोन्‍ग़रिङा सिप्‍ताकि सेम्‍ताखारा। 25येसुआ अ़चुकाखेङ्‌पाचि म़लोचि, “खाउ, आम्‍नुओ साकोङ्‌छ़ङ?” मोचि म़क़साकिना दोम्‍तुदोचि खोन्‍कि अ़क्‍छा निएदा सेन्‍कासेन म़मुवा, “ओक्‍को साङ ओ? मोवात्‍नि ह़क खोन्‍कि धियाङ्‌वामाआछाङ खोक्‍कोसोओ अ़चुलोमाय़ङ य़ङ्‌चि म़काङ्‌याङ!”

चाकावालावाआ लाउओ म़ना अ़नुसाओ

मत्‍ति ८:२८-३४; मर्कुस ५:१-२०

26येसु खोन्‍कि अ़चुकाखेङ्‌पाचिआ धियाङ्‌वामा अ़धेराकि गेरासेनस धिखाहुप्‌दा म़ताला, मो गालिल धिखाहुप्‌दाङ्‌का ह्‍याउधेत्‌या छुक। 27खोन्‍कि येसु नावादाङ्‌का धियाङ्‌वामाओ अ़केम्‌दा म़लोन्‍ता मोन्‍ग़रि, मो सहरादाओ अ़क्‍छा चाकावालावाआ लाउओ म़ना येसु तुप्‍सि ता। मो म़ना ब़द्‍धेकालेन बुयादाङ्‌का तित मान्‍हुम्‌याङ, खोन्‍कि खिम्‌दाछाङ मान्‌युङ्‌याङ, मेन एप्‍मालाचिदात्‍नि युङालुक्‍ता। 28मो म़नाआ येसु खाकि चिलिलिवा पारा, खोन्‍कि खोक्‍कोसोओ अ़चुबुदा बोम्‍सान्‍चिन खोन्‍कि अ़धिवाङ य़ङ्‌आ पात्‌याङ्‌सा, “झारादाङ्‌का तोक्‍पो निनाम्‍हाङ्‌ओ अ़चुछा येसु, खानानिन्‌आ अ़ङ्‌का दे मुमा त़लाप्‍ङाङाऩङ ओ? अ़ङ्‌का खानानिन्‌एदा अ़ङ्‌छुक फाङ्‌तुङ्‌योङ, दुखा मान्‍प़दानि।” 29बुयाङा येसुआ मो पोप्‍ताओ लावा, “मो म़नादाङ्‌का लोन्‍ताखारा!”नि अ़लोवाओसा मो म़ना ओवात्‍नि य़ङाओ। ब़द्‍धेकादु चाकावालावाआ मो लाउयुङ्‌सुओसा म़नाचिआ काकाराओ चोक्‍माय़आ मोसोओ अ़लाङ-अ़छुक अ़छ़साकि अ़हुङाङा। खोन्‍नुछाङ मो म़नाआ काकाराओ चोक्‍माय़ फुत्‍तुङु, खोन्‍कि चाकावालावाआ मो लेक्‍लेक्‍लेक्‌वाओदा खात्‍तुङु।

30येसुआ मो अ़सेना, “आम्‍ऩङ दि ओ?” खोन्‍कि खोसाआ “#८:३० रुहुप : ब़द्‍धे चाकावालावाचि अ़क रुहुप माङ्‌नालो अ़क भुङ म़लिसाकि मो म़ना अ़लावाओसा ओवात्‍नि अ़ऩङ लिसाओ। रुहुप”नि खोक्‍को लासुलो। देकिनालो मोएदा ब़द्‍धे चाकावालावाचि म़याआङा। 31खोन्‍किना चाकावालावाचिआ अ़दु-अ़दु येसु अ़बुआ, “आन्‍कान्‍का #८:३१ अ़थेन मात्‍द़ङ्‌ओ हुत : ओ अ़अ़त्‍पा लावाचि दन्‍दा प़खा खोन्‍कि छेक्‍खा ओ। अ़थेन मात्‍द़ङ्‌ओ हुत्‌यु खारानिननि मान्‍लोदानि।” 32मो भ़ऱदु अ़धिवाङ अ़लोका भाक्‌चि म़चान्‍ताङा। चाकावालावाचिआ, “मो भाक्‌ओ अ़लोकादा वाङ्‌मा प़नि”निकिना येसु अ़बुआ। खोन्‍किना येसुआ मोचि खात्‍मा म़प़चि। 33खोन्‍किना चाकावालावाचि मो म़नाएदाङ्‌का म़लोन्‍ताकि भाक्‌चिहुत्‌दा म़वाङा, खोन्‍कि भाक्‌ओ अ़लोकाचि ह्‍वाल़ङ्‌मादाङ्‌का धियाङ्‌वामा ह्‍युत्‍नि ह़क्‍ह़क्‍ह़क्‌वा म़लोराधाकि वाम़लुम्‍तासुवा।

34मो भाक काचान्‌चि मोवात्‍नि लिसायुङ्‌साओ अ़खाकि लोत्‌याङ्‌सा म़खाराकि सहरा खोन्‍कि तेन्‌दाओ म़नाचि मोचिआ मो य़ङ खाम़एत्‍तुचि। 35खोन्‍कि म़नाचि दे लिसा निकिना खाङ्‌सि म़खारा। मोचि येसु म़युङाङाओदा म़तालाहिदा मोचिआ मो म़नाएदाङ्‌का चाकावालावा लोन्‍ताखारायुङ्‌साओ अ़खा। मोन्‍ग़रि मो नुवाकिना तित हुम्‍साकि येसुओ अ़चुबुदा युङाङाओ अ़खा, खोन्‍किना मोचि झारासोओ अ़चुक़माकारा। 36काखाङ्‌चिआ मो चाकावालावाआ लाउओ म़ना देत्‍नि नुवा निकिना झारा य़ङ म़नाचि खाम़एत्‍तुचि। 37खोन्‍कि मो गेरासेनस धिखाहुप खोन्‍कि ऱङ्‌कोप्‍नि धिखाहुप्‌चिदाओ झारा म़नाचि “आन्‍कान्‍काएदाङ्‌का लोन्‍ताखारानिन”नि खोक्‍को अ़लोवा। देकिनालो मोचिओ अ़न्‍नुनु अ़चुक़माकारा।

खोन्‌ओसा येसु नावादा म़वाङाकि म़खारालावा। 38चाकावालावादाङ्‌का फोङ्‌माय़ङ म़नाआ खोक्‍कोएनान अ़क्‍नि खात्‍मा निकिना बुउ, मेन येसुआ मो ओवात्‍नि अ़लोवाकि अ़छुत्‍ताखाइसा, 39“आम्‍खिम लासाखारा खोन्‍कि निनाम्‍हाङ्‌आ आम्‍को निकि देम अ़धिवाङ काचि ऩमेत्‍तापुवाओ दुम खाएत्‍तुचि।” खोन्‍किना मो म़ना खारालावा खोन्‍कि येसुआ खोसोओ निकि अ़मेत्‍तापुवाओ अ़धिवाङ काचिओ अ़तुक्‌वादा सहरा भेप्‍लो खालुसु।

याइरस्‌ओ अ़छा मेत्‍छाछा छा खोन्‍कि अ़क्‍छा तुवाङाओ मेत्‍छामा

मत्‍ति ९:१८-२६; मर्कुस ५:२१-४३

40हान येसु धियाङ्‌वामाओ ह्‍याउधेत्‌याङ्‌का म़लासाताहिदा म़ना मुक्‍लाचिआ खोक्‍को साया अ़मेत्‍ता। देकिनालो मोचि झारासाआ खोक्‍को अ़हुङाङा। 41खोन्‍कि याइरस अ़ऩङ मुवाङाओ म़ना मोदा ता। खोक्‍को यावायोक्‍खिम्‌दाओ बुसुवा मुवाङा। खो येसुओ अ़चुलाङ्‌दा बोम्‍सान्‍चिन खोन्‍कि अ़खिम्‌दा खोएनान खात्‍मा निकिना बुउ। 42देकिनालो खोसोओ अ़क्‍छा ओन्‍ङा ओ बारकादोङ लेका बात्‍तुङुओ अ़छा मेत्‍छाछा छा स़मादामा मुवाङा।

येसु याइरस्‌ओ अ़खिम्‌दा म़खाराङाओ ग़रि म़ना मुक्‍लाचि येसुओ अ़चुऱङ्‌कोप्‍नि रोम्‍पोङ्‌पोङ्‌वा म़लिसा। 43खोन्‍कि बारकादोङ बुयादाङ्‌का ह़ सोन्‍मायुङ्‌मा सारिमाआ लाउओ अ़क्‍छा मेत्‍छामा मो म़ना मुक्‍लादा युङाङा, मेन मो मेत्‍छामा साङ्‌आछाङ नुमा मान्‍ऱअ़युक्‍ता। 44मोसाआ अ़चुदेङ्‌याङ्‌का ताकि येसुओ अ़चुतित्‌ओ अ़चोम्‌दा नोप्‍तु, खोन्‍कि च़क्‍नि मोसोओ ह़ सोन्‍मा सारिमा छेक्‍ता।

45येसुआ म़सेनुचि, “अ़ङ्‌का साङ्‌आ अ़नोप्‍ताङ?” मोचि झारासाआ, “आन्‍कान्‍का साङ्‌आछाङ मान्‍नोप्‌युक्‍नि”नि अ़लोवाङाहिदा पत्रुस्‌आ लो, “काचिन्‍पो, खानानिन्‌ना म़ना मुक्‍लाचिआङा ऩऱङिन्‌कि ऩछ़रिन्‌येन।”

46मेन येसुआ म़लोचि, “साङ्‌आ अ़ङ्‌का अ़नोप्‍ताङ्‌ओङा ओ। देकिनालो अ़ङ्‌काएदाङ्‌का अ़ङ्‌सावा लोन्‍ताखाराओ अ़ङ्‌का सिन्‍तुङ।” 47हान मो मेत्‍छामाआ कुम्‍मायुङ्‌मा अ़नुनिन्‌नि सिन्‍तुकिना धुन्‌याङ्‌सा ताकि येसुओ अ़चुबुदा बोम्‍सान्‍चिन। खोन्‍कि देकिना मोसाआ येसु नोप्‍तुओ, खोन्‍कि देत्‍नि खोक्‍को नोप्‍तुङुवा नुवाओ दुम झारा म़नाचिओ अ़चुबुदा खालुवा। 48खोन्‍कि येसुआ मो अ़लोवा, “अ़ङ्‌छा ओ, आम्‍साकोङ्‌छ़ङ्‌आ खाना त़नुसायुङ्‌सा। हान सेवाङ्‌नि खारा।”

49येसु म़चेवाङाहिदाङा यावायोक्‍खिम्‌दाओ बुसुवा याइरस्‌ओ अ़खिम्‌दाङ्‌का अ़क्‍छा म़ना ताकि खो लो, “आम्‍नुओ मेत्‍छाछा छा ना सुवादाचिआ! हान काचिन्‍पा दुखा मान्‍प़दानुम।”

50मेन येसुआ ओ अ़एनाकि याइरस अ़लोवा, “मान्‍क़दा। साकोङ्‌छ़ङ ओन्‍ङा मुवा। आम्‍छा नु।”

51याइरस्‌ओ अ़खिम्‌दा येसु म़तालाकि येसुआ पत्रुस, युहन्‍ना, याकुब खोन्‍कि मो छाओ अ़पाअ़माचिदाङ्‌का निचि साङ्‌छाङ खोक्‍कोएनान खिम्‍हुत्‌दा वाङ्‌मा मान्‍प़म़दोचि। 52मेत्‍छाछा छा सुवादाओसा झाराकापाङ ओत्‌ओत्‌ओत्‌वा खाप्‌याङ्‌सा सोखा म़मुवाङा। मेन येसुआ मोचि म़लोचि, “मान्‍खाप्दानिन, मो ना मान्‍स़दायुक, इम्‍सादा ओन्‍ङा ओ।”

53मोचिआ येसु अ़इत्‍ता। देकिनालो मोचिआ मो मेत्‍छाछा छा सुवादा निकिना अ़सिन्‍ताङा। 54मेन येसुआ मोसोओ अ़छुक्‌दा अ़क़क्‍ताकि अ़बुत्‍ता, “छाओ, पुवालोन्‍ता!” 55मो मेत्‍छाछा छाओ अ़साक्‍मा लासाताकि मोक्‍को मोन्‍ग़रिङा पुवालोन्‍ता। खोन्‍किना येसुआ मो छा दि-दि चामायु प़म़मेत्‍तुचि। 56मो छाओ अ़माअ़पाचि दोम्‍तुदोचि, मेन येसुआ “ओ य़ङ साङ्‌छाङ खाएत्‍माइ मान्‌एत्‌दानुम्‍च़म” नि म़लोचि।

Currently Selected:

लुका 8: bap

Highlight

Copy