मर्कुस 16

येसु म़सुवादाओदाङ्‌का म़खोन्‍तालोन्‍ताओ

मत्‍ति २८:१-८; लुका २४:१-१२; युहन्‍ना २०:१-१०

1सावातोम्‍खा-लेन खाराकि मग्‍दला सहरादाओ मरियम, याकुब्‌ओ अ़मा मरियम खोन्‍कि सलोमिआ खात्‍माकि येसुओ अ़चुस़पोक्‌दा सोप्‍मा निकिना नाम्‍नुवाङाओ आक्‌वा अ़खिरा। 2खोन्‍कि नाम्‍लेन्‌ओ लेन अ़वाय़ङ नाम लोन्‍ताङाहिदा मोचि एप्‍मादा म़खारा। 3मोचि लाम्‌दा म़खाराङाहिदा, “एप्‍माओ अ़दो दिप्‍खा लुङ्‌ताक आन्‍को निकिना साङ्‌आ म़ध़खान प़?”नि अ़क्‍छा निएदा सेन्‍कासेन म़मुवाङा। 4मेन मोचिआ एप्‍माह्‍यात्‍नि अ़खाहिदा बुयाङा लुङ्‌ताक ह्‍यात्‍नि ध़साखाइसायुङ्‌सा। मो अ़न्‍नुनु अ़धिवाङ मुवाङा। 5खोन्‍किना मोचि एप्‍माहुत्‌दा म़वाङाहिदा मोचिआ छोक्‍छोक्‍छोक्‌वाओ तित हुम्‍साङाओ अ़क्‍छा सावाछा अ़चुचुप्‍ताङ्‌लिप्‍पा युङाङाओ अ़खाकि मोचि म़क़सा। 6मेन खोसाआ मोचि लोचि, “मान्‍दोम्‍दादानिन, खानानिन क्रुस्‌दा अ़ख़न्‍तासेराओ नासरत्‌ओ येसु त़लामुम्‌योम। खोक्‍को म़सुवादाओदाङ्‌का म़खोन्‍तालोन्‍तायुङ्‌सा! खोक्‍को ओदा मात्‍द़ङ्‌चि। मोचिआ खोक्‍को अ़युङ्‌साओदा खानुम! 7हान खारानिन्‌कि, खोक्‍कोसोओ अ़चुकाखेङ्‌पाचि खोन्‍कि पत्रुस खाएत्‍तानुम, ‘खोक्‍को खानानिन्‌एदाङ्‌का आम्‍नुओ बुबु गालिल्‌ह्‍यात्‍नि म़खात्‌याङ। खोक्‍कोसाआ खानानिन ऩलोन्‌ओवात्‍निङा मोदा त़धिरुम।’” 8खोन्‍किना मोचि एप्‍माहुत्‌दाङ्‌का म़लोन्‍ताकि म़लोरा, देकिनालो मोचि अ़चुक़माआ खोन्‍कि दोम्‍मादामाआ धुन्‍तुङुचि। खोन्‍कि मोचिआ साङ्‌छाङ देत्‍छाङ मान्‍लोम़दोचि, देकिनालो मोचि म़क़सायुङ्‌सा।

येसु मरियम मग्‍दलिनिएदा खाङ्‌म़मुनान्‍चिन

मत्‍ति २८:९-२०; लुका २४:१३-५३; युहन्‍ना २०:११-२३; छाम्‍माय़ङ १:४-११

9[येसु नाम्‍लेन्‌ओ लेन अ़वाय़ङ्‌ङा म़खोन्‍तालोन्‍ताकि बुया मरियम मग्‍दलिनिएदा खाङ्‌म़मुसान्‍चिन, मोएदाङ्‌का खोक्‍कोसाआ सात्‌कातात चाकावालावाचि म़लोइसुखाइसुचिओ। 10मो खाराकि येसुओ अ़चुकाखेङ्‌चि ओ य़ङ लोचि, मोचि येसुएनान अ़क्‍नि म़युङाङाओ, मोचिओ अ़चुराक सुवाकि म़खावाङा। 11मेन खोचिआ येसु म़ह़ङालोन्‍ताओ, खोन्‍कि मरियम्‌आ खाचिउओ अ़एनाकि खोचिआ मो य़ङ साकोङ्‌छ़ङ मान्‍मुअ़दा। 12खोन्‍किना ह़वाङ अ़चुकाखेङ्‌चि तेन्‌ह्‍यात्‍नि खाराङाचिहिदा येसु मान्‍सिन्‍दान्‌ओवा कारालो खोचिएदा खाङ्‌म़मुसान्‍चिन। 13खोन्‍कि खोचि लासाखाराचिकि नि अ़चुकाखेङ्‌चि खाअ़एत्‍ताचुचिन, मेन अ़चुकाखेङ्‌चिआ खोचिओ अ़चुय़ङ साकोङ्‌छ़ङ मान्‍मुअ़दा। 14आदेङ एघारकापाङ अ़चुकाखेङ्‌पाचि चा चासि म़युङाङाहिदा खोचिएदा येसु खाङ्‌म़मुसान्‍चिन। खोन्‍कि खोचिओ अ़चुसाकोङ्‌छ़ङ मान्‍मुदामा खोन्‍कि अ़चुओ ऱफोक्‌वादा मोचि याम़सान्‍तुचि, देकिनालो खोक्‍को म़खोन्‍तालोन्‍ताओ काखाङ्‌चिओ अ़चुय़ङ्‌छाङ मोचिआ साकोङ्‌छ़ङ मान्‍मुअ़दा। 15खोन्‍कि येसुआ मोचि म़लोचि, “झारा हेन्‍खामादा खारानिन, खोन्‍कि झारा म़नाचि नुय़ङ्‌खान खाएत्‍तानुम्‍च़म! 16खा-खाक्‍को साकोङ्‌छ़ङ म़मुकि बप्‍तिस्‍मा म़लोक मोचि म़लेन, मेन खा-खाक्‍को साकोङ्‌छ़ङ ऩमुनिन मोचि निनाम्‍हाङ्‌आ म़ह़त्‍तुचि। 17खोन्‍कि अ़ङ्‌का साकोङ्‌छ़ङ कामुचिआ ओ बुन्‌चि म़मुचि, मोचिआ अ़ङ्‌ऩङ्‌दा चाकावालावाचि म़ऱसुखाइसुचि, खोन्‍कि मोचि अ़ऩङ्‌वा य़ङ्‌चिदा म़चेप। 18मोचिआ प़चि म़लाउचि, खोन्‍कि म़सेत्‌ओ छ़क म़दुङ खोन्‍नुछाङ मो छ़क्‌आ मोचि देत्‍छाङ अ़मुन्‍चिन। खोन्‍कि कातुक म़नाचिएदा अ़चुछुक्‌चि म़युङ्‌सुचि, खोन्‍कि मोचि म़नुखात।” 19खोन्‍किना हाङ्‌पा येसु अ़चुकाखेङ्‌चिएनान म़चेवाचिआकि खोक्‍को निनाम्‍मादुत्‍नि अ़थेन्‍ताखात्‍ता, खोन्‍कि खोक्‍को निनाम्‍हाङ्‌ओ अ़चुप्‍ताङ्‌छुक्‌लिप्‍पा म़युङा। 20खोन्‍कि मोचि झारादात्‍नि म़खाराकि नुय़ङ्‌खान खाअ़लुसा। हाङ्‌पा खोचिएनान काचि म़मुवा, खोन्‍कि बुन्‍चिलाम्‍पा खोक्‍कोसोओ अ़चुय़ङ अ़छ़ङ म़मुचि।]

Currently Selected:

मर्कुस 16: bap

Highlight

Copy