मर्कुस 8

येसुआ चार हजारकापाङ म़नाचि म़चान्‍तुचिओ

मत्‍ति १५:३२-३९

1मो लेन्‍चिदा अ़धिवाङ म़ना मुक्‍लाचि येसुएदा म़कोवान्‍चिन। मोचिएदा चामायु मात्‍द़ङ्‌याङ, खोन्‌ओसा येसुआ अ़चुकाखेङ्‌पाचि खोक्‍कोएदा म़बुत्‍तुचिकि मोचि म़लोचि, 2“अ़ङ्‌का ओ म़ना मुक्‍लाचि अ़ङ्‌का ब़द्‍धे सोमातुक्‍तुङ्‌च़ङ, देकिनालो ओचि अ़ङ्‌काएनान म़युङ्‌याङ्‌ओ आय़ सुम्‌कालेन लिसायुङ्‌सा, खोन्‍कि ओचिएदा अ़चुचामायु दित्‍छाङ मात्‍द़ङ। 3खोन्‍कि अ़ङ्‌का ओचि मान्‍चा अ़चुखिम छुत्‍तुङ्‌च़ङ्‌नालो लाम्‌दाङा ओचि म़फेखात। देकिनालो खा-खाक्‍कोचि ना ब़द्‍धे अ़थायाङ्‌का म़तायुङ्‌सा।”

4खोन्‍किना अ़चुकाखेङ्‌पाचिआ खोक्‍को अ़लासालोवा, “मेन ओ अ़कुय़ङ्‌दा ओन ब़द्‍धे म़ना मुक्‍लाचि चान्‍मायु ब़द्‍धे पेम्‍पाक आन्‍कान खादा तोक्‍मा?” 5येसुआ मोचि म़सेनुचि, “देम्‌कातात पेम्‍पाक खानानिन्‌एदा युङ्‌याङ?” “सात्‌कातात पेम्‍पाक”नि मोचिआ अ़लोवा। 6खोन्‍किना येसुआ म़ना मुक्‍लाचि नागिदा युङ्‌म़मेत्‍तुचि। खोन्‍कि खोक्‍कोसाआ मो सात्‌कातात पेम्‍पाक अ़क़क्‍ताकि निनाम्‍हाङ आलाङ अ़पुवा, खोन्‍कि पेम्‍पाक अ़धाङ्‌साकि म़नाचि म़हात्‍तुप़चिने निकिना अ़चुकाखेङ्‌पाचि म़प़चि, खोन्‍किना मोचिआ म़ना मुक्‍लाचि म़हात्‍तुचि। 7मोचिएदा अ़क्‍चिलोक अ़चुप्‍पो ङाचिछाङ म़युङाङा, खोन्‍किना येसुआ ङाचिओ निकिछाङ निनाम्‍हाङ आलाङ अ़पुवा, खोन्‍कि मो अ़चुकाखेङ्‌पाचि हाम़मेत्‍तुचि। 8खोन्‍कि झारा म़नाचिआ अ़चाकि अ़चुसोम्‍सुवा। खोन्‍कि हेनाओ अ़चेत्‌वाचि मोचिआ सात्‌काखेङ भेप्‍लो अ़कोवा। 9मोदा आप्‍फात चार हजारालेका म़नाचि म़याआङा। खोन्‍कि अ़चाचिआकि येसुआ मोचि अ़चुखिम म़छुत्‍तुखाइसुचि। 10खोन्‍किना येसु मोन्‍ग़रिङा अ़चुकाखेङ्‌पाचिएनान नावादा म़वाङा, खोन्‍कि दलमनुथा धिखाहुप्‌दात्‍नि म़खारा।

फरिसिचिआ बुन अ़दोत्‍ताओ

मत्‍ति १६:१-४

11फरिसिचि येसुएदा म़ताकि दुम्‌तुमा अ़पुङ्‌सा। मोचिआ येसु चिन्‍माखाङ्‌मा निम्‍पाङ खोक्‍को निनाम्‍मादुङ्‌काओ अ़क्‌तात बुन अ़दोत्‍ता। 12ओ अ़एनाकि येसुआ ओन्‍भान्‍लो अ़चुकोङ्‌हुत्‌या ह़त्‍पा म़लुवाकि म़लोचि, “देकि ओ दुङ्‌दाओ म़नाचिआ म़दोम्‍दाओ बुन खाङ्‌मा म़लाम्‌याङ? अ़नुछ्‍या अ़ङ्‌का खानानिन लोनानिन, ओ दुङ दिसु बुन्‌छाङ अ़ङ्‌का खाङ्‌अ़मेत्‍ऩङ।” 13खोन्‍किना येसुआ मोचि म़छिरुदोचिकि नावादा म़लासावाङा, खोन्‍कि धियाङ्‌वामाओ अ़ह्‍याउधेत म़खारा।

फरिसिचिओ खमिरा खोन्‍कि हेरोद

मत्‍ति १६:५-१२

14खोन्‍कि अ़चुकाखेङ्‌पाचिआ पेम्‍पाक बात्‍मा अ़मान्‍ताखाइसा, खोन्‍कि नावादा अ़क्‌तात ओन्‍ङा पेम्‍पाक खोचिएदा याआङा। 15खोन्‍कि खोचिआ वाताम्‍खा अ़धेराङाहिदा येसुआ चाप्‍म़चेत्‍तुचि खोन्‍कि मोचि म़लोचि, “चाप्‍चाप्‍चाप्‌वायुङ्‌निन! फरिसिचि खोन्‍कि हेरोद आन्‍तिपास्‌ओ खमिरादाङ्‌का रात्‍तानिन्‍चिन।” 16“आन्‍कान पेम्‍पाक मान्‍बात्‌दोम्‌ओसा खोक्‍को ओवात्‍नि म़य़ङ्‌याङ”नि य़ङ्‌सा खोचि अ़क्‍छा निएदा दुम्‍छ़न्‍मा अ़पुङ्‌सा। 17मोचि म़चेवाङाओ य़ङ येसुआ अ़सिन्‍ताकिना खोक्‍कोसाआ मोचि म़लोचि, “खानानिनएदा पेम्‍पाक मात्‍द़ङ्‌ओ अ़तुक्‌वादा अ़क्‍छा निएदा देकि दुम त़छ़रिन्‌येन? दि खानानिन हान्‍छाङ त़सिन्‍तिमिन्‌येन माङ्‌लो खात़तुप्‍तिमिन्‌येन? दि आम्‍नुओ साकोङ्‌वाआ तुप्‍मा अ़ऱन्‌योन? 18आम्‍नुओ म़क याक्‌याङ खोन्‍नुछाङ दि खानानिन त़खान्‍मिन्‌येन? खोन्‍कि आम्‍नुओ नाबाक याक्‌याङ खोन्‍नुछाङ दि खानानिन त़एनिमिन्‌येन? दि खानानिन त़मित्‍तिमिन्‌येन? 19पाच्‌कातात पेम्‍पाक ओरुङ्‌कि पाच हजारा म़नाचि चान्‍तुङ्‌च़ङ्‌हिदा खानानिन्‌आ हेनाओ पेम्‍पाक्‌ओ अ़चेत्‌वाचि देम्‍का खेङ खानानिन्‌आ त़कोउम्‍च़म?” मोचिआ खोक्‍को अ़लोवा, “बारकाखेङ!” 20“खोन्‍कि अ़ङ्‌का सात्‌कातात पेम्‍पाक्‌चि ओरुङ्‌च़ङ्‌कि चार हजारा म़नाचि चान्‍तुङ्‌च़ङ्‌हिदा खानानिन्‌आ हेनाओ पेम्‍पाक्‌ओ अ़चेत्‌वाचि देम्‍का खेङ खानानिनाआ त़कोउम्‍च़म?” मोचिआ खोक्‍को अ़लोवा, “सात्‌का खेङ!” 21खोन्‍किना येसुआ मोचि म़लोचि, “हान्‍छाङ दि खानानिन त़तुप्‍तिमिन्‌येन?”

येसुआ दोप्‍म़क म़ना अ़नुसाओ

22येसु अ़चुकाखेङ्‌पाचिएनान बेथसेदादा म़ताला, खोन्‍कि म़नाचिआ अ़क्‍छा दोप्‍म़क म़ना खोक्‍कोएदा अ़तारा, खोन्‍कि मोचिआ “ओ नोप्‍तानुसानुम”नि खोक्‍को अ़लोवा। 23येसुआ मो दोप्‍म़क म़नाओ अ़छुक्‌दा अ़क़क्‍ताकि तेन्‌दाङ्‌का बुङ्‌खाया अ़लोत्‍ता। खोन्‍कि मो म़नाओ अ़म़क्‌दा अ़थुक्‍ता, खोन्‍कि अ़चुछुक मोएदा अ़युङ्‌सा, खोन्‍कि येसुआ खो अ़सेना, “दि खाना दि-दि त़खाङु?” 24खोन्‍कि मो म़ना धात्‍नि खाचोवाकि य़ङा, “अ़ङ्‌का म़नाचि खाङ्‌च़ङ, मोचि ह्‍यात्‍नि-ओह्‍यात्‍नि म़कोन्‌याङ्‌ओ स़ङ्‌ताङ्‌चिवा म़कात्‌याङ।” 25खोन्‍किना येसुआ मो म़नाओ अ़म़क्‌दा अ़चुछुक अ़लासायुङ्‌सा, खोन्‍कि मो म़नाआ नुलोक खा, खोन्‍कि खो लामाखाखाङ्‌मा रुवा, खोन्‍कि खोसाआ झारा नुलोक खाचि। 26खोन्‍कि येसुआ “तेन्‌दा मान्‍लावाङ्‌माङ खारा”नि लोयाङ्‌सा अ़खिम अ़छुत्‍ताखाइसा।

येसु साङ म़युङ्‌याङ?

मत्‍ति १६:१३-२०; लुका ९:१८-२१

27खोन्‍किना येसु अ़चुकाखेङ्‌पाचिएनान कैसरिया फिलिप्‍पि तेन्‍चिदा म़खारा। खोचि लाम्‌दा म़खाराङाहिदा खोक्‍कोसाआ अ़चुकाखेङ्‌पाचि म़सेनुचि, “म़नाचिआ अ़ङ्‌का साङ्‌नि ऩलोङाङा?” 28मोचिआ अ़लासालोवा, “खा-खाक्‍को य़ङ्‌याङ बप्‍तिस्‍मा काप़ युहन्‍ना, खा-खाक्‍को #८:२८ एलिया : इस्राएल्‌दाओ अ़क्‍छा बुयाओ सावापोरि निनाम्‍हाङ्‌य़ङ खाकालु।एलियानि म़य़ङ्‌याङ, खोन्‍कि मोदाङ्‌का निचिआ निनाम्‍हाङ्‌य़ङ खाकालुचिएदाओ अ़क्‍छानि म़य़ङ्‌याङ।” 29खोक्‍कोसाआ मोचि म़सेनुचि, “मेन खानानिन अ़ङ्‌का साङ्‌नि त़लोङाङाऩङ?” पत्रुस्‌आ खोक्‍को लासुलो, “खानानिन #८:२९ ख्रिस्‍त : ग्रिक य़ङ्‌दा ‘आक्‌वाआ थोक्‍माय़ङ म़ना’, माङ्‌नालो ‘छेन्‍माय़ङ म़ना’। अ़देङ्‌या य़ङ्‌सिवा अ़तुक्‌वाऩङ्‌दा ‘ख्रिस्‍त’ लामानुमख्रिस्‍त ओ।” 30खोन्‍किना खोचि खोक्‍कोसोओ अ़चुतुक्‌वादा साङ्‌छाङ खामान्‌एत्‌दानुम्‍च़म निकिना येसुआ अ़चुकाखेङ्‌पाचि चाप्‍म़चेत्‍तुचि।

येसुआ अ़चुदुखा खोन्‍कि अ़चुस़माओ अ़तुक्‌वादा म़य़ङाओ

मत्‍ति १६:२१-२३; लुका ९:२२-२७

31खोन्‍किना येसुआ अ़चुकाखेङ्‌पाचि “म़नाओ अ़छाआ ब़द्‍धे दुखा आङ्‌मादोत, अ़धुवाचि, मुलो काब़क्‍पाचि, खोन्‍कि य़ङ्‌हुप काचिन्‍पाचिआ ऩङाअ़छित, खोन्‍कि अ़सेत, मेन सुम्‌कालेन्‌दा लाखोन्‍लोन्‌नि लोयाङ्‌सा खोचि चिन्‍मा म़पुक्‍तुचि।” 32येसुआ ओ य़ङ्‌ओ अ़तुक्‌वादा नुलोक अ़चुकाखेङ्‌चि खाम़एत्‍तुचि। खोन्‌ओसा पत्रुस्‌आ खोक्‍को अ़चित ह्‍यात्‍नि खात्‍तुकि यासान्‍मा पुक्‍तु। 33मेन येसु म़हुसान्‍चिन्‌कि अ़चुकाखेङ्‌चि म़खाचिकि खोक्‍कोसाआ पत्रुस अ़रेन्‍ता, “सैताना! अ़ङ्‌बुदाङ्‌का खारालावा! देकिनालो आम्‍मिन्‍मा निनाम्‍हाङ्‌दाङ्‌काओ माआङ, मेन म़नाएदाङ्‌काओ ओ।”

काखेङ्‌आ मुमादोत्‌ओ काचिओ अ़तुक्‌वादा

मत्‍ति १६:२४-२८; लुका ९:२३-२७

34खोन्‍किना येसुआ अ़चुकाखेङ्‌चिएनान म़ना मुक्‍लाचि खोक्‍कोएदा म़बुत्‍तुचि, खोन्‍कि मोचि म़लोचि, “साङ अ़ङ्‌का त़ङ्‌मा स़याङ्‌नालो खो आप्‍पि अ़मित्‍चिऩङ छित्‍मादोत, खोन्‍कि अ़क्रुस खुन्‍माकि अ़ङ्‌का त़ङ्‌मादोत। 35देकिनालो साङ्‌आ अ़ह़ङ्‌म़ङ लेन्‍मा लाप्‍तु, मोसाआ मो मासु, मेन साङ्‌आ अ़ङ्‌को खोन्‍कि नुय़ङ्‌खान्‌ओ निम्‍पाङ अ़ह़ङ्‌म़ङ मासु, मोसाआ अ़नुछ्‍याओ ह़ङ्‌म़ङ तोक्‍तु। 36म़नाआ झारा हेन्‍खामा तोक्‍तुकिछाङ अ़ह़ङ्‌म़ङ मासुनालो खोसाआ दि तोक्‍तु कि? 37माङ्‌लो म़नाआ अ़ह़ङ्‌म़ङ्‌ओ अ़फान्‌दा दि प़मा ऱ? 38खाक्‍को ताङ्‌लान कामु खोन्‍कि हेवामि ओ दुङ्‌दा अ़ङ्‌कादाङ्‌का खोन्‍कि अ़ङ्‌य़ङ्‌दाङ्‌का अ़लेजो कात, अ़ङ्‌का म़नाओ अ़छाओछाङ अ़चुपापाओ अ़साम्‌दा म़सेङ्‌याङ्‌ओ निनाम्‍हाङ काफाचिएनान लाय़हिदा मोएदा अ़लेजो कात।”

Currently Selected:

मर्कुस 8: bap

Highlight

Copy