यूहन्ना 8
8
व्यभिचारम पक्राउ परल जन्नीमनैया
1येशूजुन जैतून पर्वत्वम गैल। 2द्वासर दिन बिहान्नी येशू मन्दिरम गैल। सब मनै उहाँकठे अइल। उहाँ बैठ्ल ओ हुँकन शिक्षा देहलग्ल। 3उहब्याला शास्त्री ओ फरिसीहुँक्र व्यभिचार कामम पक्राउ परल एकठो जन्नीमनैयह अन्ल, ओ ओहीह मनैन्हक माझम ठह्र्यादेल। 4हुँक्र उहाँह कल, “गुरुजी, यी जन्नीमनैया व्यभिचार कामम पक्राउ परल। 5मोशक व्यवस्थम असिन जन्नीमनैन् पत्थ्रले मार्क मुवादेहपर्ठा कैक हमन आज्ञा देरख्ल। याकर बारेम अप्न का कहटी?”#लेवी २०:१०; व्य २२:२२-२४ 6हुँक्र उहाँक जाँच करक लाग, ओ उहाँह दोष लगाइ सेक्जाई कि कैक असिक कलह।#८:६ येशूह दुनुओर्से दोष लगाइ सेक्जैना रह। यदि येशू “ओहीह पत्थ्रले मार्क मुवादेओ” कट कलसे, उहाँ रोमी सरकारक विरोधम ब्वालल् अर्थ लग्नेरह, काकरकि किहुह मृत्युदण्ड देना अधिकार रोमी सरकार बाहेक और केक्रो नैरह। ओ यदि येशू “ओहीह पत्थ्रले जिन मारो” कट कलसे, उहाँ व्यवस्थक विरोधम ब्वालल् अर्थ लग्नेरह, जौन व्यवस्था परमेश्वर मोशाद्वारा इस्राएलीहुँकन देलह। तर येशू लिहुर्क भूइँयम अङ्ग्रीले लिख्ल।
7हुँक्र उहाँह घरीघरी पुछ्टीरल। तब उहाँ ठह्रेइल ओ हुँकन कल, “टुह्रमध्येम जे कबु पाप नैकर्लहो, उह सबसे पैल्ह यी जन्नीमनैयह पत्थ्रले मारऽ।” 8येशू फेदोस्र लिहुर्क भूइँयम अङ्ग्रीले लिख्ल।
9जब हुँक्र यी बात सुन्ल, तब बरा मनैसे सुरु कैक छोटीसम एक पाछ और कर्टी ओठसे गैल। आखिरम ओठे येशू ओ उ जन्नीमनैया केल रलह। 10येशू ऊ जन्नीमनैयह हेर्क कल, “बाबु, हुँक्र कहाँ गैल? का कुई फे टुँहीन दण्ड नैदेहल?”
11ऊ कली, “प्रभु, कुई फे महीह दण्ड नैदेहल।”
येशू कल, “मै फे टुँहीन दण्ड नैदेहम। आब जाओ, ओ फेदोस्र पाप जिन करो।”]
संसारक ज्योति येशू
12येशू मनैन कल, “संसारक ज्योति मै हुइटुँ। म्वार पाछ लगुइयन् अन्धकारम न्याङ्ग नैपरहीन्, तर हुँक्र जीवनम पुग्ना ज्योति पैहीँ।”#मत्ती ५:१४; यूह ९:५
13तब फरिसीहुँक्र उहाँह कल, “अप्न आपन बारेम त गवाही देहटी। अप्नक गवाही सत्य नैहो।”#यूह ५:३१
14येशू हुँकन कल, “मै आपन बारेम गवाही देठुँ, तर फे म्वार गवाही सत्य बा। मै कहाँसे अइनहुँ, ओ मै कहाँ जाइटुँ कना बात महीह थाहाँ बा। तर मै कहाँसे अइनहुँ, ओ मै कहाँ जाइटुँ कना बात टुँहन थाहाँ नैहो। 15टुह्र त मनैन्हक हिसाबले न्याय कर्ठो। तर मै केक्रो न्याय नैकर्टुं। 16तर यदि मै न्याय करम कलसे फे, म्वार करल न्याय सत्य ठहर्ठा। काकरकि न्याय करुइया मै अकल्हे नैहुइटुँ, तर महीह पठुइया बाबा फे म्वारसँग बाट। 17टुन्हक व्यवस्थम फे दुइ जन मनैन्हक कहल बात मिलल् कलसे, उ बात सत्य ठहर्ठा कैक लिखल बा। 18म्वार बारेम गवाही देना एकठो त मै अपन्हे हुइटुँ, ओ औरजुन महीह पठुइया बाबा हुइट।”
19तब हुँक्र उहाँह पुछ्ल, “अप्नक बाबा कहाँ बाट?” येशू जवाफ देल, “टुह्र ना त महीह ना त म्वार बाबह चिह्न्टो। यदि टुह्र महीह चिह्न्टो कलसे, म्वार बाबह फे चिन्ह्नेरलहो।” 20यी सब बात येशू मन्दिरक भेटी उठैना बाकस रहल ठाउँम कलह। तर कुई फे उहाँह नैपक्रल, काकरकि उहाँक समय आम्ही नैअइलरलहन।
21उहाँ फेदोस्र हुँकन कल, “मै यिहाँसे जाजैम। टुह्रजुन महीह खोज्बो, तर टुह्र आपन पापक क्षमा बिना पैल मुबो। मै जैना ठाउँम टुह्र आए नैसेक्टो।”
22यी सुन्क यहूदी अगुवाहुँक्र अप्न-अप्न कल, “यी मनैया ‘मै जैना ठाउँम टुह्र आए नैसेक्टो’ कठा। यी त आत्महत्या करक लाग बा कि का?”
23येशू हुँकन कल, “टुह्र टरक हुइटो, तर मै उप्परसे अइनहुँ। टुह्र यी संसारक हुइटो, तर मै यी संसारक नैहुइटुँ। 24उहओर्से मै ‘टुह्र आपन पापक क्षमा बिना पैल मुबो’ कनहुँ। यदि टुह्र ‘मै ज्या हुइटुँ उह हुइटुँ’ कैक महीह विश्वास नैकर्बो कलसे, टुह्र आपन पापक क्षमा बिना पैल मुबो।”
25हुँक्र उहाँह पुछ्ल, “अप्न के हुइटी त?”
येशू हुँकन कल, “मै टुँहन सुरुसे ज्या कटिबाटुँ, मै उह हुइटुँ। 26मै टुँहन कह सेक्ना ओ टुन्हक न्याय कर सेक्ना बात त धेर बा, तर मै नैकहम। काकरकि जे महीह पठैलह, मै उहाँसे सुनल बात केल संसारह कठुँ, ओ उहाँ सत्य बाट।”
27येशू यी बात आपन स्वर्गक बाबक बारेम कलह कैक हुँक्र नैबुझ्ल। 28उहओर्से येशू हुँकन कल, “जब टुह्र मै मनैयक छावह उठैबो, तब ‘मै ज्या हुइटुँ उह हुइटुँ’ कैक टुह्र थाहाँ पैबो, ओ मै आपन खुशीले कुछु फे नैकर्टुं, तर बाबक सिखाइल बात बोल्ठुँ कैक जन्बो। 29महीह पठुइया म्वारसँग बाट। उहाँ महीह अकल्हे नैछोर्लहुइट, काकरकि मै सड्डभर उहाँह खुशी लग्ना काम कर्ठुं।” 30उहाँ यी बात बोल्टीरलह त धेर मनै उहाँकम विश्वास कर्ल।
छुट्कारा देना सत्य
31येशूम विश्वास करल यहूदीहुँकन उहाँ कल, “यदि टुह्र म्वार वचन मन्टिरठो कलसे, टुह्र जाट्टीसे म्वार चेला हुइटो। 32तब टुह्र सत्य का हो कैक थाहाँ पैबो ओ उ सत्य टुँहन छुट्कारा देनेबा।”
33हुँक्र उहाँह कल, “हम्र अब्राहामक सन्तान हुइटी, ओ कबु फे केक्रो कमारा नैहुइलहुइटी। तब हमन ‘टुह्र छुट्कारा पैबो’ कैक कसिक कहसेक्ठी?”#मत्ती ३:९; लूक ३:८
34येशू हुँकन जवाफ देल, “जाट्टीसे मै टुँहन कहटुँ, पाप करुइया हरेक व्यक्ति पापक कमारा हो। 35कमारा सड्डभर घरक सदस्य नैरहट्, तर छावा त सड्डभर घरक सदस्य रठा। 36उहओर्से यदि मै, परमेश्वरक छावा टुँहन छुट्कारा देहम कलसे, टुह्र जाट्टीसे छुट्कारा पैबो। 37टुह्र अब्राहामक सन्तान हुइटो कना बात महीह थाहाँ बा। तर फे टुह्र म्वार ब्वालल् वचन सह नैसेक्क महीह मुवाइ खोज्ठो। 38मै आपन बाबक उपस्थितिम द्याखल बात बोल्ठुँ ओ टुह्रजुन आपन बाबसे सुनल काम कर्ठो।”
39हुँक्र उहाँह कल, “हमार बाबा त अब्राहाम हुइट।”
येशू हुँकन कल, “यदि टुह्र अब्राहामक सन्तान रटो कलसे, अब्राहामक करलअस काम कर्नेरलहो। 40मै परमेश्वरसे सुनल सत्य बात टुँहन जनादेरख्नु, तर टुह्र महीह मुवाइ खोज्ठो। अब्राहाम त असिन काम नैकर्ल। 41टुह्र आपन बाबक करल काम कर्ठो।”
हुँक्र उहाँह कल, “हम्र व्यभिचारम जन्मल् नैहुइटी! हमार बाबा त एक्कठो बाट, उहाँ परमेश्वर हुइट।”
42येशू हुँकन कल, “यदि परमेश्वर टुन्हक बाबा रट कलसे, टुह्र महीह प्रेम कर्नेरलहो, काकरकि मै परमेश्वरकठेसे अइनु ओ आब मै अठे बाटुँ। मै आपन इच्छले अइलक नैहुइटुँ, तर उहाँ महीह पठैलह। 43म्वार कहल बात टुह्र काजे नैबुझ्टो? काकरकि टुह्र म्वार वचन सुन्ना फे सुन नैचहटो। 44टुह्र आपन बाबा शैतानक सन्तान हुइटो, ओ टुह्र आपन बाबक कहल अनुसार करक लाग तयार बाटो। ऊ त सुरुसे जो हत्यारा रह, ओ सत्य बातसे वाकर कुछु मतलब नैहुइटस। काकरकि वाकरम कुछु सत्य नैहुइटस। ऊ त आपन स्वभावअनुसार झूट बोल्ठा, काकरकि ऊ झूट बोलुइया हो ओ झूट बोलुइयन्हक बाबा हो। 45तर मै सत्य बोल्लक कारणले टुह्र महीह विश्वास नैकर्टो। 46टुह्रमध्ये के महीह पापक दोष लगाइसेक्ठा? यदि मै सत्य बोल्ठुँ कलसे, काजे टुह्र महीह विश्वास नैकर्टो? 47जे परमेश्वरक हो, ऊ परमेश्वरक बात सुन्ठा। टुह्र परमेश्वरक नैहुइटो, उहओर्से टुह्र उहाँक बात नैसुन्टो।”
अब्राहामसे येशू महान
48यहूदी अगुवाहुँक्र उहाँह कल, “हमार कहल ठीक हो! टैँ सामरी हुइट्या, ओ टोहीह भूत्वा लागरहल।”
49येशू कल, “महीह भूत्वा लागल नैहो, मै आपन बाबक आदर कर्ठुं, तर टुह्र म्वार अनादर कर्ठो। 50मै अपन्हे आपन आदर नैखोज्टुँ, तर महीह आदर कर खोजुइया ओ म्वार न्याय करुइया और बाट। 51जाट्टीसे मै टुँहन कहटुँ, यदि कुई म्वार कहल मानी कलसे, ओहीह कबु फे मुव नैपरहिँस।”
52यहूदी अगुवाहुँक्र उहाँह कल, “आब हमन पक्का थाहाँ हुइल्, टुँहीन भूत्वा लग्लक्क हो। अब्राहामक मृत्यु हुइलन, अगमवक्ताहुँक्र फे मुल, तर टुँ ‘म्वार कहल मनुइयह कबु फे मुव नैपरहिँस’ कैक कठो! 53का टुँ हमार पुर्खा अब्राहामसे फे महान् हुइटो नि? अब्राहामक मृत्यु हुइलन, ओ अगमवक्ताहुँक्र फे मुल। टुँ अपन्हेह का सोँच्रख्लो?”
54येशू कल, “मै आपन आदर खोज्टुँ कलसे, म्वार आदर बिना कामक हुइनेरह। तर म्वार आदर करुइया त म्वार बाबा हुइट, जेहीह टुह्र ‘हमार परमेश्वर’ कठो। 55टुह्र उहाँह चिन्हा फे नैचिन्टो। मै त उहाँह चिन्ठुँ। यदि मै उहाँह नैचिन्टुँ कैक कटुँ कलसे, मै फे टुन्हकअस झूटा ठहरने रनहुँ। तर मै उहाँह चिन्ठुँ ओ उहाँक कहल बात मन्ठुँ। 56टुन्हक पुर्खा अब्राहाम म्वार अइना दिन देख्ना धेर इच्छा कैरख्लह। ऊ देख्ल ओ आनन्दित हुइल।”
57यहूदी अगुवाहुँक्र उहाँह कल, “टुँ आम्ही पचास वर्ष फे नैपुग्ल हुइटो, त कसिक टुँ अब्राहामह देख्लो?”
58येशू हुँकन कल, “जाट्टीसे मै टुँहन कहटुँ, अब्राहाम जन्मनासे आघहेँ मै पलबाटुँ।” 59तब हुँक्र येशूह मारक लाग पत्थ्रा उठैल। तर उहाँ नुक्गैल ओ गुपचुपम मन्दिरमसे गैगिल।
Currently Selected:
यूहन्ना 8: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
