मत्ती 20
20
ज्यालादारी काम करुइयन
1येशू मनैन सिखैना क्रमम कल, “स्वर्गक राज्य जग्गक एकठो मालिकअस हो। एक दिन बिहान्नी उ मालिक आपन अङ्गूरबारीम काम कराइक लाग ज्यालादारी मनैन ख्वाज निक्रल। 2ऊ हुँक्र एक दिनम पैना ज्याला तिर्ना बातम सहमति होक हुँकन आपन अङ्गूरबारीम काम कर पठैल।
3“ऊ नौ बजेओर बजार गैल त, कत्रा मनैन बिनकामक ओस्तहेँ ठह्र्याइल देख्ल। 4ऊ हुँकन कल, ‘यदि टुह्र जाक म्वार अङ्गूरबारीम काम कैदेबो कलसे, मै टुह्र पाइपर्ना ज्याला टुँहन देहम।’ 5हुँक्र कामम गैल।
“ऊ बाह्र बजेओर ओ तीन बजेओर बाहर निक्रल ओ औरजहन फे ओसहेँक कैक कामम लगैल। 6ऊ पाँच बजेओर बाहर निक्रल त औरजहन फे बिनकामक ओस्तहेँ ठह्र्याइल देख्ल। ऊ हुँकन कल, ‘काजे टुह्र यिहाँ बिनकामक ओस्तहेँ ठह्र्याइल बाटो?’
7“हुँक्र जवाफ देल, ‘हमन कुई फे काम नैदेल हो।’
“ऊ हुँकन कल, ‘टुह्र फे जाक म्वार अङ्गूरबारीम औरजन्हक सँगसँग काम करो ना त।’
8“सन्झ्या हुइल् त, उ अङ्गूरबारीक मालिक आपन काम करुइयन्हक नाइकेह कल, ‘ज्यालादारी मनैन बलाक हुँकन्हक ज्याला देओ। देहबेर पाछ आइल मनैनसे सुरु करो ओ आघ आइल मनैन पाछ देहो।’#लेवी १९:१३; व्य २४:१५
9“हुँक्र सबजन अइल, पाँच बजे कामम लागल हरेक जन दिनभरिक पूरा ज्याला पैल। 10सुरुम कामम लागल मनै ‘हम्र औरजहनसे धेर पैबी’ कैक विचार कर्ल, तर हुँक्र फे हरेक जन दिनभरिक पूरा ज्याला केल पैल। 11ज्याला पैल त हुँक्र जग्गक मालिकक् विरोध कर्टी कल, 12‘पाछ आइल यी मनै एक घण्टा केल काम कर्ल, हम्रजुन दिनभर घाम मु-मु काम कर्ली। तर अप्नहुँकन फे हमन देहल बराबर ज्याला देली!’
13“उ मालिक हुँक्रमध्ये एकजहन कल, ‘हेरी सङ्घारी, मै अप्नह कुछु अन्याय नैकर्लहुइटुँ। का अप्न महीसे पूरा एक दिनक ज्यालम काम कर्ना प्रतिज्ञा नैकर्लही? 14आपन पैना ज्याला लेक जाई। यी पाछ अउइयन फे मै अप्नह देहल बराबर ज्याला देह चाहटुँ। 15का आपन मन लागल मनैयह आपन सम्पत्ति देना म्वार अधिकार नैहो? मै हुँकन्हक भलो कर्नु त अप्नह रिस लागल कि का?’
16“उहओर्से आजकाल सबसे उच्च रहल धेर मनै पाछ सबसे टर्का दर्जम रहहीँ, ओ आजकाल सबसे टर्का दर्जम रहुइयन धेर मनै पाछ सबसे उच्च हुइहीँ।”#मत्ती १९:३०; मर्क १०:३१; लूक १३:३०
येशू आपन मृत्युक बारेम तीसर फ्यारा बट्वइलक
मर्कूस १०:३२-३४; लूका १८:३१-३४
17यरूशलेमओर जाइबेर येशू आपन बाह्र जन चेलन एकओँहर बलाक कल, 18“हेरो, हम्र यरूशलेम जाइटी। मै मनैयक छावा मुख्य पूजारीन्हक ओ शास्त्रीन्हक हाँठम सुम्प्वापैम, ओ हुँक्र महीह मृत्युदण्ड पाइपर्ना दोषी ठह्रैहीँ, 19ओ महीह गैरयहूदीन्हक हाँठम सुम्पदेहीँ। हुँक्र महीह हिस्यैहीँ, कोर्रा लगैहीँ, ओ क्रूसम टङ्गाक मुवैहीँ। तर तीसर दिनम मै मुवलमसे फेदोस्र जिजैम।”
डाईक बिन्ती
मर्कूस १०:३५-४५
20तबदोस्र जब्दियक गोसिन्या आपन छावन, याकूब ओ यूहन्नह लेक येशूकठे अइली। ऊ येशूक पाउ पर्क बिन्ती कर्ली, “महीह दया करी।”
21उहाँ हुँकहीन पुछ्ल, “टुँहीन का चाहल?”
ऊ उहाँह कली, “अप्न राजा हुइबी त म्वार यी दुनु छावनमध्ये एकठो अप्नक दाहिन ओ और अप्नक बाउँ पाञ्जर बैठ पैहीँ कना म्वार बिन्ती बा।”
22तर येशू जवाफ देल, “टुह्र का माङ्गटो उ बात टुह्र नैजन्टो। मै पियपर्ना दुःखक तीत घुट्का का टुह्र पियसेक्बो?”#२०:२२ दुःखक तीत घुट्का पिना कलक येशू क्रूसम मुवबेर सहपर्ना चरम यातना हो।
हुँक्र कल, “सेक्बी।”
23तब येशू हुँकन कल, “मै सहपर्ना दुःखकष्ट टुँहन फे सहहीपरी। तर म्वार दाहिन ओ बाउँ पाञ्जर बैठ देना म्वार अधिकारक बात नैहो। यी त ज्याकर-ज्याकर लाग तयार कैगिल् बा, हुँकन्हक लाग केल हो।”
24यी बात सुन्क और दश चेलावँ उ दुइ जहनसे रिसैल। 25तब येशू हुँकन सबजहन एक्कठे बलाक कल, “टुँहन थाहाँ बा, कि गैरयहूदी मनैन्हकम शासन करुइयन मनमानी शासन कर्ठ, ओ ठुलाठालीहुँक्रजुन हुँकन्हकम अधिकार जमैठ।#लूक २२:२५-२६ 26तर टुह्र ओसिन जिन करहो। टुह्रमध्ये सबसे बरा हुइखोजुइया टुन्हक सेवाचाक्री कर,#मत्ती २३:११; लूक २२:२६ 27ओ आघ सर खोजुइया सबजन्हक कमारा बन। 28मै मनैयक छावह, हेरो ना। मै सेवा पाइक लाग नाहीँ, तर सेवा करक लाग, ओ और धेर जहन पापक दण्डसे छुट्कारा देहक लाग आपन प्राण देह आरनु।”
दुइ जन आन्धर मनै चोखैलक
मर्कूस १०:४६-५२; लूका १८:३५-४३
29तबदोस्र उहाँहुँक्र यरीहो सहरओर्से जाइबेर, मनैन्हक भारी भीड उहाँहुँकन्हक पाछ लागल। 30डगरीक पञ्ज्र आँख नैदेख्ना दुइ जन मनै बैठलरलह। हुँक्र येशू यिह डगर आइट कना सुन्ल त जोरसे चिल्लाक कहलग्ल, “हे प्रभु, दाऊदक सन्तान, हमन दया करी!”
31भीडमक मनै हुँकन “चूप लागो” कैक हप्कैल, तर हुँक्र झन् जोरसे चिल्लाक कहलग्ल, “हे प्रभु, दाऊदक सन्तान, हमन दया करी!”
32येशू नेङ्ग्टी-नेङ्ग्टी टक्कसे ठह्र्यागैल ओ हुँकन बलाक कल, “टुह्र का चाहटो? मै टुन्हक लाग का कैदीऊँ?”
33हुँक्र उहाँह कल, “हे प्रभु, हम्र देख्नाहा हुइ चाहटी।”
34हुँकन देख्क येशूह स्वाग लग्लन ओ उहाँ हुँकन्हक आँख छुदेल। तबहेँ हुँक्र देख्नाहा होगैल, ओ येशूक पाछ लाग्गैल।
Currently Selected:
मत्ती 20: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
