Jẹnẹsisi 24
24
Isi Nke Ẹnọ Kwasị Ọgụn
Aziki Lẹ Rebika A Lụrụ
1Ebraham a kagụọ nwan ẹgẹdi, kakpụkpọgụ ọhụnma-ọhụnma; Osolobuẹ a gọziọlẹ a ihun lẹ azụụn. 2Ya kẹ Ebraham nọ sị odibo ẹ hụn kanị, hụn e lepụn'a ihiẹn ile o nwọn ẹnya, “Bu ẹka che m okpuru ọgbọdọgbọ, 3n'i kunni m Osolobuẹ, Chuku hụn ke elu-igwee lẹ ụwa nị y'a lụhakọnị Aziki nwa m onyẹ Kenaanị, ndịnị m bi alị wẹ. 4Kama, n'i k'e jẹn alị m, y'a nọ ebọn m lụhanị nwa m nwunyẹ.”
5Ya odibo hụ nọ sị a, “Omẹni okpoho ahụn jụ n'o sọnlụakọ m alịnị, ọ hụghọ mma nị m kinhẹn nwan d'e weri nwa ị jẹn alị ị gha bịa?” 6Ya Ebraham nọ sị a, “Mba! Hụnkwọ a nị y'e wekinni nwa m ebẹhụ! 7Osolobuẹ, Chuku hụn rị elu-igwee, hụn gha iwe nẹdi m lẹ alị wẹ nọ mụ m wepụha m, hụn gwa m oku, kun enwẹn ẹ gi kwe m nkwa, sị, ‘M k'e ye ụmụ ị alịnị’, ịya jẹnkọ d'e zi mmọn-ozi ẹ n'ọ kwan'ị ụzọ, y'a hụn ụzọ lụhanị nwa m nwunyẹ ebẹhụ. 8Kanị, omẹni okpoho ahụn ekweni sọnmẹ i, ya wụ nị ihiẹnni i k'e kunni m egbukọ ị; ka ewekinkwọlẹ nwa m ebẹhụ!” 9Ya kẹ odibo ahụn nọ bu ẹka che Ebraham okpuru ọgbọdọgbọ, kunn'ẹ Osolobuẹ n'o k'e mẹ kẹ wẹ ku.
10Ya odibo ahụn nọ buru anyịnyan-mkpukpuke iri imẹ nke di-nwọnn'ẹ, werizi ihiẹn ile rị mma nna buye ẹ w'e ye ịhịan; o nọ buli, jẹnmẹ alị Aram-Naharaịm. O ru ebẹhụ, ọ nọ shi obodo nwẹnẹ Ebraham wụ Nahọ. 11O ru ẹ, ọ nọ mẹ anyịnyan ndị ahụn makpuru ẹhụ ọmị rị mkpẹnrẹn obodo hụ; ogẹn ẹnyasị rọ, ogẹn ikpoho gi a bịa d'a dọrị mirin.
12Ọ nọ mẹ ekpere, sị, “Euu Osolobuẹ, Chuku di-nwọnni m wụ Ebraham, dodo mẹ ijẹnni m bịa n'ọ gha — n'i gi ẹ ghọsị nị di-nwọnni m wụ Ebraham wụ onyẹ nke i. 13M wuzo nwan ẹhụ ọmịnị; ikpoho ndị alịnị hụ a bịa d'a dọrị mirin: 14dodo, nwagbọọ hụn m k'a sị ‘Dodo, huye m mirin rị imẹ ite i ra’, ọ sị m, ‘Ra; nị m ye anyịnyan ndịnị i bu ra’ — ya wụrụ hụn ị dọnmẹni odibo i wụ Aziki; ọhụn kẹ m'e gi marịn nị y'e mẹọlẹ nna m wụ Ebraham rịkẹ onyẹ nke i.”
15O ke kugụ a hụ, e lee Rebika nwa Bẹtuẹlụ! Bẹtuẹlụ nẹdi Rebika wụ nwa Mil'ka nwunyẹ Nahọ nwẹnẹ Ebraham. Rebika bu ite-mirin isi uvun lala d'a dọrị mirin! 16Nwagbọọ hụ ma mma ọda-ọda, nwagbọọ kelẹni marịn okẹnnyẹ. Ya ọ nọ ghafe, shi ọmị ahụn, gbajun ite-mirin ẹ. Ọ pụla, 17ya kẹ odibo Ebraham nọ gbaburu ẹ, sị a, “Dodo mẹye m mirin hụ i bu imẹ ite ra.”
18Rebika nọ sị a, “Diọkpa, n'ị ra.” O ziẹn ite mirin hụ ozigbo, mẹye odibo Ebraham mirin ra. 19O yegụ a ra, ọ nọzị sị a, “M k'a dọhazị hụn anyịnyan ị k'a ra d'e ru n'a ragụ wẹ.” 20O hu mirin họdụ imẹ ite ẹ ye imẹ ihiẹn anyịnyan ndị ahụn gi a ra mirin, ozigbo-ozigbo; ọ gbashi isi ọmị d'a dọhazị; ẹrịra k'ọ mẹ d'e ru ni anyịnyan ile okẹnnyẹ ahụn bu a ragụ mirin. 21Okẹnnyẹ hụ a gba nkịtịn, e lee ẹ n'ọ marịn kẹ Osolobuẹ e yegụọ a ihiẹn ọ chọha.
22Ogẹn anyịnyan ndị ahụn gi ragụ mirin, okẹnnyẹ ahụn nọ we ọla-imi goru ṅanrannị lẹ ihiẹn-ẹka goru kadẹ ọhụn a ṅanran ye ẹ. Goru ọla-imi ahụn wụ ahanmahan shẹkẹlụ ohu nchaịn! Ihiẹn-ẹka ahụn wụ gram goru mmẹbụọ kwasị ọgụn ẹtọ nchaịn!! 23Ọ nọ sị Rebika, “Onyẹ mụ ị? Dodo, mmughẹ hụ iwe nẹdi i hụn mmẹ lẹ ndị mmẹ lẹ wẹ wị k'a ranhịn?”
24Ya nwagbọọ ahụn nọ sị a, “M wụ nwa Bẹtuẹlụ, Bẹtuẹlụ nwa Mil'ka hụn ọ mụnị Nahọ.” 25Ọ nọ sịzị, “Ẹnyi nwọn ẹfịfịa ọhụnma-ọhụnma: kẹ ẹfịfịa-ọkpọnkụn anụ gi e dinẹ kẹ ẹfịfịa-oyiyi anyịnyan e ri; mmughẹ ịhịan k'a ranhịn hụzị a.” 26Ya kẹ okẹnnyẹ ahụn nọ kụ isi alị, kpanmịn Osolobuẹ, 27sị, “Ịja-mma ya rịnị Osolobuẹ, Chuku Ebraham nna m, n'ọ zọnị ghọsị n'o furu wẹ gi e dọn ẹnya, ọ zọnị mẹ nna m kẹ onyẹ nke ẹ! Mmẹ nwẹn, Osolobuẹ e dugụọ m ijẹnni, duhẹ m nke umunẹ nna m!”
Kẹ Wẹ Dọn Nabanhan Odibo Ebraham
28Ya nwagbọọ ahụn nọ gbashi iwe wẹ, shi mmụlọ iwe nnẹ ẹ d'a gwachanrịn wẹ ihiẹn ile mẹni.
29Rebika nwọn nwẹnẹ okẹnnyẹ w'a kpọ Labanị; ya Labanị nọ gbashi isi ọmị d'a hụn okẹnnyẹ ahụn — 30makẹni ọ hụnọlẹ ọla-imi ahụn lẹ ihiẹn-ẹka Rebika nwẹnẹ ẹ yi, nụzịkwọ ihiẹn Rebika ku nị ịya kẹ okẹnnyẹ ahụn gwa a. O ru ẹ, ọ nọ hụn a ebe o turuyeni anyịnyan-mkpukpuke ndị ahụn ụsụọ ọmị ahụn. 31Ọ nọ sị a, “Bịa nị ẹnyi shi imẹ ụlọ, ezigbo ịhịan Osolobuẹ gọzi; k'ị nọdịnị nwan ogbe, bụ e dọnmechanrịngụọnị m'ị mmughẹ lẹ ebe anyịnyan ị k'a nọdị?!”
32Ya okẹnnyẹ ahụn nọ sọn ẹ lashi iwe wẹ. Labanị nọ tọtusọnmẹ ibu anyịnyan ndị ahụn bu, kpọnyeni anyịnyan ndị ahụn ẹfịfịa-ọkpọnkụn wẹ e gi dinẹ lẹ ẹfịfịa-oyiyi wẹ k'e ri; o kuyezi ẹ mirin kẹni ya lẹ ndị ya lẹ wẹ wị gi chanpụ ụkụ. 33Ya wẹ nọ bupụhanị wẹ ihiẹn-oriri. Okẹnnyẹ ahụn nọ sị, “Erikọ m ihiẹn-oriri, mmanị m kugụ ihiẹn m bịanị.” Ya Labanị nọ sị a, “Kumẹ nwan.”
34Ya odibo Ebraham nọ sị, “M wụ odibo Ebraham. 35Osolobuẹ e mẹgụọnị di-nwọnni m ọhụnma ọda-ọda; ọdanfịn k'ọ wụ kikẹnni; Osolobuẹ e yegụọ a igunrun atụnrụn, ye ẹ igunrun efin; o yegụọ a siliva, ye ẹ goru; o yegụọ idibo-ikẹnnyẹ, ye ẹ idibo-ikpoho; o yegụọ a anyịnyan-mkpukpuke, ye ẹ Jaki. 36Sẹra, nwunyẹ Ebraham nna m, gi ẹhụ ẹgẹdi mụn'a okẹnnyẹ. Nna m e yechanrịngụọ nwa a ihiẹn ile o nwọn.
37“Nna m mẹ m kunn'ẹ Osolobuẹ, sị m, ‘Hụnkwọ a nị y'a lụyeni Aziki nwa m okpoho onyẹ Kenaanị, ndịnị m bi alị wẹ. 38Kama, i k'e jẹn alị m, nọ ebọn m lụhanị Aziki nwa m nwunyẹ’ 39Ya m nọ sị a, ‘O mẹ nwan nị okpoho ahụn a jụ n'o sọnlụakọ m alịnị?’ 40Ya ọ nọ sị m, ‘Osolobuẹ hụn m rị e bini k'e zi ndị mmọn-ozi ẹ nị wẹ sọn i kẹni ijẹn i hụn ụzọ gha. Ebọn ẹnyi, iwe nẹdi m daị, kẹ y'a nọ lụhanị nwa m nwunyẹ. 41Kanị i ruhụ ebọn ẹnyi, Osolobuẹ i kunni m egbukọ ị, ọsụọn'a nị eyeni wẹ i okpoho ahụn, o gbukọ ị.’
42“Ogẹn m gi nwan ru isi ọmị ahụn tannị, m nọ mẹ ekpere, sị, ‘Euu Osolobuẹ, Chuku Ebraham nna m, dodo mẹ ijẹnni m bịa n'ọ gha! 43E lee m ebe m wuzo isi ọmịnị; mẹ ẹ n'ọ wụrụ nị nwagbọọ pụha n'ọ dọrị mirin, hụn m k'a sị, “Dodo, ye m mirin ri imẹ ite i ra ẹkẹrẹ”, 44nị nwagbọọ hụ a sị m, “Ra; m k'e yezi anyịnyan ị ra” ya wụrụ hụn Osolobuẹ dọnmẹni nwa nna m.’
45“M gini d'e kugụ ihiẹnni imẹ obi m, e lee Rebika k'o bu ite-mirin ẹ uvun gha imẹ obodo pụla, ọ nọ shi isi ọmị d'a dọrị mirin; m nọ sị a, ‘Dodo ye m mirin ra!’ 46Ozigbo-ozigbo, ọ nọ butu ite-mirin o bu isi uvun, sị m, ‘Ra; m k'e yezi anyịnyan ndị i bu, ra.’ Ya m nọ ra, ọ nọ yezi anyịnyan ndị ahụn ra.
47“Ya m nọ sị a, ‘Nwa onyẹ k'ị wụ?’ Ọ nọ sị, ‘Nwa Bẹtuẹlụ, Bẹtuẹlụ nwa Mil'ka, hụn ọ mụnị Nahọ.’ Ya m nọ yimẹ ẹ ọla-imi ahụn, gbụ ihiẹn-ẹka ahụn gbụye ẹ ẹka ẹbụọ. 48Ebahụn kẹ m nọ gbu osekpu, kpanmịn Osolobuẹ, ja Osolobuẹ Chuku Ebraham nna m mma, hụn o gi ghọsị m ụzọ, duhẹ m nke nwẹnẹ nna m d'a lụhanị nwa nna m nwa-nwẹnẹ nna m. 49Ya wụ, omẹni ụnụ k'e mẹni nna m ihiẹn run'ẹ nọkẹ onyẹ nke ụnụ, gwa nị m; omẹni ụnụ emẹkọn'a ya, gwa nị m, nị m marịn azụụn m'e shi.”
Rebika E Kweri N'o K'a Lụ Aziki
50Ya Labanị lẹ Bẹtuẹlụ nọ sị a, “Ẹka Osolobuẹ rị imẹ ihiẹnni, kị ẹnyi k'a sị ị nwan?! 51Lẹhụ Rebika; weri ẹ nwan lama, kẹni nwa nna ị lụma a nọkẹ kẹ Osolobuẹ dọn ku.” 52Ogẹn odibo Ebraham gi nụ oku-ọnụ wẹ, ọ nọ kụnị Osolobuẹ isi alị. 53Ya odibo Ebraham nọ kpọnpụha ihiẹn-mma rị ichẹn-ichẹn, kẹ ihiẹn siliva kẹ ihiẹn goru, kpọnpụhazịkwọ ẹkwa, kpọn wẹ ye Rebika. Ọ nọ yezi nwẹnẹ Rebika hụn okẹnnyẹ lẹ nnẹ wẹ ihiẹn ichẹn-ichẹn a ṅanrannị.
54Ya kẹ odibo Ebraham lẹ ndị ya lẹ wẹ wị nọ nwan ri, ra, ranhịn nị eki fọn. E tẹnhin wẹ ụtụntụn, ọ nọ sị, “Ha nị m ụla, nị m laburu nna m.” 55Ya nwẹnẹ Rebika hụn okẹnnyẹ lẹ nnẹ wẹ nọ sị, “Hatu ni Rebika nị ẹnyi lẹ ya nọdịzị ẹkẹrẹ, ọsụọdẹn'a akpọhịn iri sụọ k'ọ nọ, o kebe lama.”
56Kanị odibo Ebraham nọ sị wẹ, “Dodo ni, ẹlẹ hụn m'e gi tọ ebeni, ebe o mẹ ni Osolobuẹ e mẹgụọ ijẹn m n'ọ gha; hatu ni m nwan nị m laburu nna m.” 57Ya wẹ nọ sị, “Nị ẹnyi kpọ nwan nwata okpoho, jụ a hụn o ku.” 58Ya wẹ nọ kpọha Rebika; wẹ nọ sị a, “N'i sọn okẹnnyẹni la?” Ya ọ nọ sị, “Ẹghẹẹ, nị m sọnghọ a.” 59Ya wẹ nọ hapụ Rebika, ya lẹ okpoho e yen'ẹ ẹka wẹ gi du ẹ lẹ odibo Ebraham lẹ ikẹnnyẹ ya lẹ wẹ wị bịa, wẹ ile nọ wịrị lama. 60Wẹ nọ gọzi Rebika n'o d'a lama, sị a,
“Nwẹnẹ ẹnyi,
i k'a mụ nnụ-nnụ lẹ ijẹri-ijẹri;
ụmụ ị k'e mẹri ndị-iṅẹnrẹn wẹ,
kị wẹ.”
61Ya Rebika lẹ idibo-ikpoho ẹ ile nọ nwan kwademẹ, nyinrinsọnmẹ anyịnyan-mkpukpuke ndị ahụn, sọnmẹ odibo Ebraham. Ẹrịra kẹ odibo Ebraham dọn weri Rebika, ban ụzọ, jẹnmẹ ebe o jẹnkọ.
62Ogẹnni ihiẹnni gi rị e mẹ, Aziki a ghagụọ Biẹ-Lahaị-rọị o jẹn lụaha. Imẹ atụ Nẹgẹvụ k'o bi ogẹn ahụn. 63Ogẹn ẹnyasị, ebe ọ rị ogige a ghahunmẹ, e ro iroro, ọ nọ lee ẹnya, legha anyịnyan-mkpukpuke ndị lalanị. 64Rebika lẹ enwẹn ẹ e lee ẹnya, ogẹn o gi legha Aziki, ọ nọ gha elu anyịnyan tụtu, 65sị odibo Ebraham, “Onyẹ wụ okẹnnyẹ ahụn rị imẹ ogige hụn jẹnla d'e kunrun ẹnyi?” Odibo ahụn nọ sị a, “Di-nwọnni m rọ.” Ya kẹ Rebika nọ weri ẹkwa o gi e kpumẹ ihun ẹ kpumẹ ihun.
66E ru wẹ, odibo ahụn nọ gwachanrịn Aziki k'o jẹn lẹ ihiẹn ile o mẹ. 67Ya Aziki nọ webanhan Rebika iwe nnẹ ẹ wụ Sẹra. Aziki nọ lụrụ Rebika; ihiẹn ẹ sụọ Aziki ọhụnma-ọhụnma. Aziki nọ gi ẹ nwọnrin nrọkọ-obi banyeni ọnwụn nnẹ ẹ.
Currently Selected:
Jẹnẹsisi 24: ikkBI
Highlight
Share
Copy
Want to have your highlights saved across all your devices? Sign up or sign in
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.
