Jẹnẹsisi 27
27
Isi Nke Ẹsa Kwasị Ọgụn
Jekọpụ A Tụnarịn Isọ Ọkwa Nwa-ibuzọ
1Ogẹn Aziki gi kagụ ẹgẹdi, kaye ẹnya, ọ nọ kpọ nwa a hụn kanị wụ Isọ, sị a, “Nwa m”; Isọ nọ za a, “E lee m ebeni.” 2Ọ nọ sị Isọ, “Y'a hụngụọ a nwan nị a kagụọ m ẹgẹdi; amarịn m ụhụọkịn m k'a nwụnhụn. 3Weri nwan ụta ị lẹ ẹkpa ọbara ị, ihiẹn ndị i gi a chụ nta, n'i jẹn ọfịa d'e gbuhẹni m anụ. 4N'i gi ẹ mẹmẹni m ihiẹn-oriri sụọnị, ụdị hụn a sụọnị m; y'e buhẹni m'ẹ, nị m ri — kẹni m hụn ụzọ gọzi i m gini d'a nwụn.”
5Kẹ Aziki rị a gwa Isọ okuni, Rebika hụ e gọn ntịn. Ogẹn Isọ gi nwan jẹnmẹ d'a chụ nta kẹni o gbuhẹ anụ, 6Rebika nọ sị Jekọpụ nwa a, “M nụ kẹ nẹdi i rị a sị nwẹnẹ i wụ Isọ, 7‘D'e gbuhẹni m anụ imẹ ọfịa, n'i gi shini m ihiẹn-oriri sụọnị, nị m ri — kẹni m ye i ngọzi m idẹnya Osolobuẹ m gini d'a nwụn.’ 8Nwa m, mẹ nwan ihiẹn m jẹnkọ d'a gwa ị kikẹnni: 9Jẹn nwan imẹ igunrun anụ ẹnyi d'a nwụnhannị m ụmụ ewu ẹbụọ rị mma, nị m gi shini nẹdi i ihiẹn-oriri sụọnị — ụdị hụn a sụọn'a; 10y'e buru ẹ jẹnni nẹdi i, n'o ri, n'ọ hụn ụzọ gọzi i o gini d'a nwụnhụn.”
11Kanị Jekọpụ nọ sị Rebika nnẹ ẹ, “Lee, ẹhụ Isọ nwẹnẹ m mẹ ẹṅẹnrẹn-ẹṅẹnrẹn, kanị ẹhụ mmẹ nwẹn riẹn eriẹn. 12Nẹdi m nwọn ikẹn rịra m ẹka, o weri ẹ nị m bịa d'a kpari ẹ — ogẹn ahụn, e sehẹni m enwẹn m ọnụ-ẹsọn, ẹlẹzi ngọzi.” 13Nnẹ ẹ nọ sị a, “Dodo nwa m, ọnụ o k'a bụ ị ya nọ m isi bụn, ka mẹ ihiẹn m gwa ị: d'e wẹhẹni m ewu ndị ahụn.”
14Ya ọ nọ jẹn d'a nwụnhannị nnẹ ẹ wụ Rebika ewu ndị ahụn; Rebika nọ shi ihiẹn-oriri sụọnị, ụdị hụn a sụọ Aziki nẹdi wẹ. 15Ya Rebika nọ kịrị ẹkwa Isọ kachanrịn mma, hụn rị mmụlọ ebẹhụ ọ rị, yimẹ nwa a hụn nta wụ Jekọpụ; 16Ya ọ nọ weri akpụkpọ ụmụ ewu ndị ahụn mẹ ẹṅẹnrẹn-ẹṅẹnrẹn fụma Jekọpụ ẹka lẹ ebe ẹṅẹnrẹn rịlẹni olu ẹ. 17Ọ nọ buye nwa a wụ Jekọpụ ihiẹn-oriri ahụn sụọnị lẹ brẹdi o mẹmẹ.
18Ya Jekọpụ nọ jẹn d'e kunrun nẹdi ẹ, sị a, “Baba-ee!” Nẹdi ẹ nọ za, “Ee nwa m; elee nwa m rọ?”
19Jekọpụ nọ sị nẹdi ẹ, “Mmẹ Isọ nwa ibuzọ ị rọ, e mẹgụọ m ihiẹn ị sị m mẹ; dodo lihi n'ị nọdị alị, ri anụ m gbuhẹ, kẹni i gọzi m.” 20Ya Aziki nị sị a, “Nwa m, nanị ị dọnzi hụnkẹnrin ẹ gbu!” Ya Jekọpụ nọ sị a, “Osolobuẹ wụ Chuku i ye m ẹwẹrẹ.” 21Ya Aziki nọ sị Jekọpụ, “Dodo, nọzụnhan nị m hụn ụzọ rịra ị ẹka, nị m lele kẹ yụ wụ Isọ nwa m ra ẹlẹ yụ.”
22Ya Jekọpụ nọ nọkunmẹ Aziki nẹdi ẹ; nẹdi ẹ a rịra a ẹka, ọ nọ sị a, “Olu Jekọpụ rọ, kanị ẹka ẹbụbụọnị wụ nke Isọ.” 23Aziki a sanị ẹka marịn nị Jekọpụ rọ makẹni ẹka a ẹbụọ mẹ ẹṅẹnrẹn-ẹṅẹnrẹn nọkẹ nke Isọ nwẹnẹ ẹ, ya ọ nọ gọzi ẹ. 24Kanị ọ nọ jụgụ a, “Yụ wụkwọ Isọ nwa m?” Ọ nọ sị a, “Mmẹ rọ.” 25Ọ nọ sị a, “Buzuhanị m anụ ahụn i gbuhẹ — nị m ri anụ nwa m gbuhẹ, nị m gọzi i.” Ya ọ nọ buzuhann'a ya, ọ nọ ri ẹ; o wẹhẹn'ẹ manya, ọ nọ ra.
26Ya Aziki nẹdi ẹ nọ sị a, “Nọzụnhan d'e susu m ọnụ, nwa m.” 27Ya Jekọpụ nọ nọkunmẹ nẹdi ẹ, susu ẹ ọnụ; ẹwuru Isọ ndị Jekọpụ yi nọ kunye nẹdi ẹ imi, ọ nọ nwan gọzi ẹ, sị,
“Euu, ishin nwa m nọhụ
kẹ ishin ọfịa Osolobuẹ gọzi!
28Osolobuẹ ya hukpu i igirigi elu-igwere;
ya mẹ alị mẹn'i ihiẹn ọhụnma-ọhụnma;
ya mẹ i nwọn ihiẹn-oriri lẹ ihiẹn w'a ra
ọhụnma-ọhụnma.
29Ndị alị ichẹn-ichẹn
wẹ wụrụ idibo i,
alị ichẹn-ichẹn
wẹ kụn'ị isi alị;
umunẹ i wẹ rị okpuru i —
ẹghẹẹ, ụmụ ile nnẹ i mụ
wẹ kụn'ị isi alị.
Ọbụbụ-ọnụ ya rịnị onyẹ ọwụlẹ
hụn k'a bụ ị ọnụ;
ngọzi ya rịnị onyẹ ọwụlẹ
hụn k'a gọzin'i.”
Isọ A Kwan Mmanị
30Aziki a gọzigụ Jekọpụ, hụn Jekọpụ gihụ gha ebe Aziki nẹdi ẹ rị pụ, Isọ nwẹnẹ ẹ nọ gha ebe o jẹn ọfịa anụ lụaha. 31Ya nwẹn nọ shizikwọ ihiẹn-oriri sụọnị, bu ẹ jẹnni nẹdi ẹ. Ọ nọ sị nẹdi ẹ, “Baba, lihi n'i ri anụ nwa ị gbuhẹ, n'ị gọzi m.” 32Ya Aziki nọ sị a, “Onyẹ rọ?” Ya ọ nọ sị a, “Mmẹ wụ Isọ, nwa ibuzọ ị.” 33Ẹhụ nọ mama Aziki nni ọda-ọda, ọ sị, “Onyẹ wụ nwan onyẹ ahụn gbuhẹni m anụ n'ị d'a banhan? E rigụọ m anụ ahụn, gọzigụ onyẹ ahụn n'ị d'a banhan! A gọzigụọlẹ m'a; ngọzi ahụn k'e sọn ẹ!”
34Ogẹn Isọ gi nụ ihiẹn nẹdi ẹ ku, ọ nọ dọbepụ oro, kwan ụya, sị nẹdi ẹ, “Dodo, gọzi m; euu Baba, dodo, gọzi mmẹ nwẹn!” 35Ọ nị sị a, “Nwẹnẹ i gi aghịghọ bịa; o werigụọ ngọzi i.” 36Ya Isọ nọ sị, “Ẹlẹ ya haịn wẹ gi gụn a Jekọpụ? Hụnnị mẹpụ mgbe ẹbụọ o gi aghịghọ napụ m ihiẹn wụ nke m: ọ napụgụ m ọkwa nwa-ibuzọ, hụn wụ nke m, ọ napụzị m nwan ngọzi m!”
Ya Isọ nọ sị nẹdi ẹ, “Onwọnni nwan ngọzi i latọnị m?” 37Aziki nị sị Isọ, “E gigụọlẹ m'a họnrin di-nwọnni i; gi umunẹ ẹ ile họnrinsọnmẹ ndị idibo ẹ; ye ẹ ihiẹn-oriri lẹ ihiẹn-ọrịra hụn o gi bi; kẹ m k'e mẹzini i nwan, nwa m?”
38Isọ a sị nẹdi ẹ, “Euu Baba, ya wụ ngọzi ohu sụsụọ k'i nwọn? Euu Baba, gọzi m; gọzizi mmẹ nwẹn!” Ya Isọ nọ kwan ezigbo ẹkwan, a nụ wẹ olu ẹ. 39Ya kẹ Aziki nẹdi ẹ nọ sị a,
“Lee ẹ, ebe i k'e bi
ẹlẹ ebe alị a nọ mẹ ihiẹn ọhụnma-ọhụnma
mọbụ ebe wẹ n'e nwọnhẹn igirigi elu-igwere.
40Ọpịa-agha ị kẹ y'e gi bi;
ị k'a wụ odibo nwẹnẹ i —
kanị, ogẹn ndụn elu i e gi gụ ị,
ị k'a lụbepụ agbụn a olu i.”
41Ize Jekọpụ hụ e ze Isọ ufiri ngọzi ahụn nẹdi ẹ gọzi Jekọpụ, ya Isọ nọ sị enwẹn ẹ, “Ọ họdụ ẹkẹrẹ nị nẹdi m nwụnhụn, ẹnyi kwangụ a, e gbu m Jekọpụ.”
42Kanị wẹ nọ gwa Rebika ihiẹn nwa a hụn kanị wụ Isọ rị e ku; ọ nọ zi wẹ d'a kpọhan'a hụn nta wụ Jekọpụ. Ọ nọ sị Jekọpụ, “Lee ẹnya, Isọ nwẹnẹ i rị e gi oku igbun'i a rọkọ enwẹn ẹ obi. 43Nwa m, mẹ nwan ihiẹn m k'a gwa ị: gbashi alị Haranị ozigbo d'e kunrun nwẹnẹ m okẹnnyẹ wụ Labanị, 44y'e du ẹ nọdị ẹkẹrẹ, d'e ru mgbe olulu nwẹnẹ i rọ — 45d'e ru mgbe olulu nwẹnẹ i rị e bun'i rọchanrịn, n'ọ zọchanrịn ihiẹn i mẹ ẹ; ogẹn ahụn, e zi m wẹ welụa ị. Nanị kẹ ụnụ ẹbụọ e gizi akpọhịn ohu nahịn m?”
46Omẹgụ, Rebika nọ sị Aziki, “Ndụn ikpoho Hẹti ndịnị a gụgụọ m! Jekọpụ lụrụzị okpoho Hẹti, okpoho alịnị, nke m a gụ!!”
Currently Selected:
Jẹnẹsisi 27: ikkBI
Highlight
Share
Copy
Want to have your highlights saved across all your devices? Sign up or sign in
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.
