Jẹnẹsisi 8
8
Isi Nke Ẹsatọ
Okẹn Mirin Hụ A Kụsị, Tama
1Kanị Osolobuẹ hụ a nyanhan Nụa lẹ anụ-ọfịa lẹ anụ-ụlọ ile ya lẹ wẹ gba rị imẹ ụgbọ ahụn. Ya kẹ Osolobuẹ nọ zi ufere ye elu-ụwa, gi ẹ mẹ okẹn mirin ahụn tama — 2mẹ isi-mirin ile rị imẹ alị lẹ oghe ile mirin rị igwere gha e zuetu kpukin; mirin gha elu-igwere e zuetu e zuebehi. 3Mirin ahụn jun elu-ụwa nọ tama. Ogẹn o gi zu akpọhịn iri kwasị ọgụn-ẹsa ahụn, mirin ahụn jun elu ụwa a tamagụọ ọda-ọda — 4nke akpọhịn mmẹsa imẹ ifọn nke ẹsa, ụgbọ ahụn pụ ichẹn nọ deri elu ugu Araratị.
5Mirin ahụn hụkwọ a tahị d'e ru ifọn nke iri. Ụhụọhịn ibuzọ imẹ ifọn nke iri ahụn, wẹ nọ leghama mkpọnụnụ ugu ichẹn-ichẹn.
Nụa A Kwademẹ Nị Wẹ Pụha
6Ogẹn o gi zu akpọhịn ọgụnnaị, Nụa nọ kpọpụ windo ahụn ọ rụnye ụgbọ ahụn, 7zipụ uroko#8.7 Orebu kẹ w'a kpọ a asụsụ Hibru; Ravẹni kẹ w'a kpọ a ọnụ ebo., nnụnụ e ri ihiẹn ile. Nnụnụ hụ nọ fehunmẹmẹ d'e ru mgbe mirin rị elu-ụwa gi tachanrịn; o kinhẹnni. 8Nụa e zipụ nduru n'ọ hụn ụzọ marịn omẹni mirin a tahịgụọ. 9Kanị, echẹn ke mirin rịkwọ alị, nduru ahụnnị ebe o k'e beri, ọ nọ felụa d'e kunrun Nụa, Nụa nọ tịnpụ ẹka, nwụnbanhan a imẹ ụgbọ. 10Ya Nụa nọ cherizi akpọhịn ẹsa, ọ nọ zipụzị nduru ahụn. 11Ogẹn ẹnyasị kẹ nduru ahụn gi lụakinhẹn d'e kunrun Nụa. Ogẹn o gi lụaha, ẹkụkwọ olivu o gihẹ nke ọhụn rị a ọnụ. Nụa nọ marịn nị mirin rị alị a tahịgụọ. 12O cherizi akpọhịn ẹsa ọzọzị, ọ nọ zipụzị nduru ahụn, kanị nduru ahụn ekinhẹnzini d'e kunrun ẹ.
Nụa Wẹ A Pụha Imẹ Ụgbọ
13Ogẹn Nụa gi rị nwa ahụa ohu kwasị ọgụn-iri kwasị nnụ, ụhụọhịn ibuzọ imẹ ifọn nke ibuzọ, mirin ahụn a tamigụọ. Nụa nọ kpupụ okpukpu ụgbọ ahụn, lehunmẹ ẹnya, ọ nọ hụn a nị alị hụ a kọrọ. 14Ogẹn o gi ru akpọhịn ẹsa kwasị ọgụn imẹ ifọn nke ẹbụọ, akpakalị ile a kọrọchanrịngụọ.
15Ya kẹ Chuku nọ sị Nụa, 16“Gha nị imẹ ụgbọ pụha, yụ lẹ nwunyẹ i lẹ ụmụ ị lẹ inyẹnmẹ ụmụ ị, hụn yụ lẹ wẹ rị. 17Wepụhachanrịnzịkwọ ihiẹn ile rị ndụn yụ lẹ wẹ rị imẹ ụgbọ, kẹ nnụnụ kẹ anụ ndị ọzọ kẹ ihiẹn ile a rịhunmẹ alị, kẹni wẹ ma jun elu-ụwa, mụ ụmụ, ba ụba imẹ ụwa.” 18Nụa nọ gha imẹ ụgbọ pụha, ya lẹ ụmụ a lẹ nwunyẹ ẹ lẹ inyẹnmẹ ụmụ a. 19Anụmanụ ile lẹ ihiẹn ile a rịhunmẹ akpakalị lẹ nnụnụ ile — ya wụ, ihiẹn ile rị ndụn elu ụwa nọzị pụhachanrịn imẹ ụgbọ ahụn, onyẹ-lẹ-ụdị-a onyẹ-lẹ-ụdị-a.
Ẹjan Nụa Chụn
20Nụa nọ rụnnị Osolobuẹ ukpo wẹ n'a chụn ẹjan, werisọnmẹ anụ lẹ nnụnụ imẹ igunrun ndị ahụn Chuku sị wẹ asọlẹ, gi wẹ chụnnị Osolobuẹ ẹjan elu ukpo ahụn.
21Osolobuẹ a nụ ishin ẹjan ahụn, ọ nọ sụọ a; ọ nọ sị enwẹn ẹ, “Onwọnzini ogẹn m'e gi bụzị akpakalị ọnụ makẹ ufiri ịhịan, ọsụọn'a nị eje-ihiẹn eje-ihiẹn kẹ ịhịan e ro ghakwọrị ebe ọ rị nwata lala; onwọnzikwọnị ogẹn m'e gi tikpọ ihiẹn ile rị ndụn kẹ m dọn mẹ. 22Ụwanị e we gụ, ogẹn ọkụnkụn lẹ ogẹn ọghịghọ k'a rịsọnmẹ; ogẹn oyi lẹ ogẹn uwowo k'a rịsọnmẹ; ogẹn ọkọkị lẹ ogẹn udu-mirin k'a rịsọnmẹ; uhinhin lẹ efinnaị k'a rịsọnmẹ.”
Currently Selected:
Jẹnẹsisi 8: ikkBI
Highlight
Share
Copy
Want to have your highlights saved across all your devices? Sign up or sign in
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.
