Luku 24

Isi Nke Ẹnọ-kwasị-ọgụn

Jesu A Gha Ọnwụn Lihi

(Mat 28.1-10; Mak 16.1-8; Jọn 20.1-10)

1Kanị, ụzụtụntụn biribiri ụhụọhịn ibuzọ imẹ izuka#24.1 Ụhụọhịn Sọnde., ikpoho ndị ahụn nọ weri ihiẹn ndị ahụn e shin ọhụnma wẹ chọtọ, shi ili hụ. 2Wẹ nọ hụn a nị e nupụgụọ wẹ ọmụma wẹ te gi nukin ọnụ ili hụ. 3A banye wẹ ẹ, ahụnnị wẹ ẹhụ Di-nwọnni-ẹnyi wụ Jesu. 4Ebe wẹ rị e ro ihiẹnni, ikẹnnyẹ ẹbụọ ẹwuru wẹ rị e be nwaịn-nwaịn nọ wuzoyeni wẹ idẹnmizi. 5Okẹn egun nọ tụma wẹ, ya wẹ nọ bu ihun kọma alị. Ikẹnnyẹ hụ nọ sị wẹ, “Kị ụnụ rị a chọnị onyẹ rị ndụn imẹ igunrun ndị nwụnnị? 6Ọ rịzị ebeni; ọ ghagụọ ọnwụn lihi. Nyanhan nị k'ọ dọn gwa ụnụ k'ọ rị Galili, sị, 7‘Wẹ jẹnkọ d'e bu Nwa nke Ịhịan che ẹka ndị njọ, a kpọgbu wẹ ẹ; kanị hụn m'ẹ akpọhịn ẹtọ, o k'a gha ọnwụn lihi.’ ”

8Ya kẹ ikpoho hụ nọ nyanhan ihiẹn Jesu ku. 9A gha wẹ ili ahụn lụa, wẹ nọ gwa ndị-ozi mmanaị hụ pụ-ichẹn lẹ ndị ọzọ ile họdụnị. 10Ikpoho hụ jẹn ili ahụn wụ Meri onyẹ Magidala lẹ Juana lẹ Meri nnẹ Jemisi; uwẹ lẹ ikpoho ndị ọzọ wẹ ile wị gba gwa ndị-ozi hụ pụ-ichẹn ihiẹn ndịnị. 11Kanị, ndị-ozi hụ pụ-ichẹn egini oku wẹ dọn makẹni wẹ weri ẹ kẹ oku nwọnlẹni isi.

12Kanị Pita nọ lihi ọtọ, gbashi ili ahụn; o hulụa alị, nyọnye, ọ nọ hụn ẹkwa linẹ hụ sụọ, ẹkwa hụ we te gi kwama ozun Jesu. Ọ nọ pụ, e ro ihiẹn rị e mẹni.

Jesu E Kunrun Ndị nsọnmazụụn A Ẹbụọ Jẹnkọ Ẹmaụsụ

(Mak 16.12-13; Luk 24.44-47; Jọn 20.19-23)

13Ụhụọhịn ahụn daị, ndị nsọnmazụụn Jesu ẹbụọ jẹnkọ obodo ohu mẹ ẹkẹrẹ w'a kpọ Ẹmaụsụ. Gha Jerusalẹm d'e ru Ẹmaụsụ wụ ihiẹn rị kẹ maịlị ẹsa. 14Wẹ hụ e ku oku ihiẹn ndị hụ ile mẹni. 15Hụn ahụn wẹ rị e ku, e shi inyẹnrẹn, Jizọsị lẹ enwẹn ẹ nọ nọchimẹ wẹ, sọn wẹ jẹnkọ; 16kanị Osolobuẹ anịnị wẹ kọma a ẹnya. 17Ya Jizọsị nọ sị wẹ, “Elee inyẹnrẹn kẹ ụnụ shikọ ihiẹnni ile jẹnkọ?”

Wẹ nọ biwuzo, rọnmẹ ihun. 18Ya onyẹ ohu imẹ wẹ ẹfan a wụ Klopasị nọ sị a, “Ọ nọkẹ sị yụ sụọ imẹ ndị ile bịa Jerusalẹm marịnlẹni ihiẹn ndị mẹ ebahụn kete ụhụọhịnnị?”

19Jesu nọ sị, “Kịnị mẹ?”

Wẹ nọ sị a, “Oku Jesu onyẹ Nazarẹtị: Okẹnnyẹ hụn gi ọrụn a lẹ oku-ọnụ a ghọsịchanrịn n'ọ wụ okẹn onyẹ-amụma, kẹ ebe Osolobuẹ rị kẹ ebe ịhịan rị — 20lẹ oku ihiẹn ndị-isi nchụn-ẹjan lẹ ndị-isi ẹnyi mẹ — kẹ wẹ dọn we ẹ ye wẹ d'a ma a ikpe-ọnwụn kpọgbu; 21bụ ẹnyi te rị a tụ ẹnya nị ịya jẹnkọ d'a gbapụha Izrẹlụ!

“O mẹgụọdẹ nwan akpọhịn ẹtọ ihiẹn ndịnị mẹ. 22Ọzọzị, o nwọn ikpoho ndị itu ẹnyi mẹ ihiẹn tụ ẹnyi ẹnya: wẹ jẹn ili ẹ ụzụtụntụnnị, 23ahụnnị wẹ ẹhụ a. E kinhẹn wẹ, wẹ nọ gwa ẹnyi nị wẹ hụndẹ ndị mmọn-ozi gwa wẹ n'ọ hụ ndụn. 24O nwọn ndị itu ẹnyi jẹn ili hụ, wẹ nọ hụn a n'ọ rịchanrịn kẹ ikpoho ndị hụ dọn ku; wẹ nwẹn ahụnzịkwọn'a.”

25Ya Jizọsị nọ sị wẹ ẹbụbụọ, “Ụnụ e zuzukẹ! Ihiẹn ile ndị-amụma ku imẹ Ẹkụkwọ-nsọ a fụka ụnụ ọrụn okweri! 26Ẹkụkwọ-nsọ ekugụọn'a nị Onyẹ-nzụọpụha Ahụn Osolobuẹ Tumẹ#24.26 Mezaya. wụ Kraịstị jẹnkọ d'a tagụ afụnfụn ndịnị o kebe nwọnrin ọghọ a?” 27Ya Jizọsị nọ gha ihiẹn Mozizi de imẹ Ẹkụkwọ-nsọ lẹ ihiẹn ndị-amụma ile de kọwachanrịn nị wẹ ihiẹn ile Ẹkụkwọ-nsọ ku banyeni enwẹn ẹ.

28Hụn wẹ gi rumẹ ẹhụ obodo hụ wẹ jẹnkọ, Jizọsị nọ mẹ rịkẹ sị ọ ghafekọ aghafekọ; 29wẹ nọ rịọ a ọda-ọda, sị a, “Dodo, du ẹnyi nọdị, nị ọhị a gbamagụọ, ụhụọhịn tannị a gụmagụọ.” Ya ọ nọ banye d'e sọn wẹ nọdị.

30Ogẹn ya lẹ wẹ gi nọdị alị nị wẹ ri ihiẹn-oriri, ọ nọ weri brẹdi ahụn wẹ jẹnkọ d'e ri, kpanmịn Osolobuẹ; ọ nọ bebe ẹ, we ẹ ye wẹ. 31Ebẹhụ kẹ ẹnya wẹ nọ shịapụ, wẹ nọ marịn nị ịya rọ. Ya ọ nọ fori!

32Wẹ nọ sị ibe wẹ, “Ẹhẹn! Ịya haịn obi gi rị a nụ ẹnyi ọkụn ogẹn o gi rị a gwa ẹnyi oku, a kọwanị ẹnyi Ẹkụkwọ-nsọ kẹ ẹnyi rị ụzọ!”

33Ya wẹ nọ lihi ọtọ ozigbo hụ, kinzi Jerusalẹm; wẹ nọ hụn ndị nsọnmazụụn a mmanaị hụ lẹ ndị ọzọ rị itu wẹ kẹ wẹ zu, 34a sị, “Ezioku rọ! Di-nwọnni-ẹnyi e lihigụọ, Saịmọnụ a hụngụọ a!”

35Wẹ ẹbụbụọ nọ nwan gwa wẹ ihiẹn mẹ ụzọ lẹ kẹ wẹ dọn ghọha nị ya rọ ogẹn o gi bebe brẹdi.

Ndị nsọnmazụụn Jesu A Hụn Jesu K'ọ Ghagụ Ọnwụn Lihi

(Mat 28.16-20; Mak 16.14-18; Jọn 20.19-23; Ọrụn 1.6-8)

36Ebe mmadụ ẹbụọ hụ rị a gwa wẹ ihiẹnni, ya kẹ Jizọsị lẹ enwẹn nọ turu imẹ igunrun wẹ idẹnmizi, sị wẹ, “Udọn ya rị nị ụnụ.”

37Wẹ ile nọ jụsọhị, okẹn egun nọ tụma wẹ; wẹ ro n'a hụn wẹ onyẹ-mmọn. 38Ya ọ nọ sị wẹ, “Kị egun rị a tụnị ụnụ? Kị ụnụ rị e nwọnni obi-ẹbụọ? 39Lee ni ẹka m lẹ ụkụ m: Mmẹ rọ! Hụatụ nị m ẹka nị ụnụ hụn a nị mmẹ rọ; onyẹ-mmọn ara nwọn uru lẹ ọkpụkpụ ụnụ rị a hụn m ẹhụ.”

40Ọ hụ e ku ihiẹnni, ọ hụ a ghọsị wẹ ẹka a ẹbụbụọ lẹ ụkụ a ẹbụbụọ. 41Ufiri ni ekwerini wẹ makẹni ọ tụka wẹ ẹnya lẹzi makẹni ịghọghọ jun wẹ obi, Jesu nọ sị wẹ, “Ụnụ e nwọnghọ ihiẹn-oriri ọwụlẹ ebeni?” 42Wẹ nọ ye ẹ mkpikpi azụn wẹ shi, 43ọ nọ narịn wẹ ya ri idẹnya wẹ.

44Ya ọ nọ sị wẹ, “Ihiẹn ndịnị kẹ m gwa ụnụ ogẹn mmẹ lẹ ụnụ gi rị: nị ihiẹn ile wẹ de banyeni m imẹ Iwu Mozizi lẹ imẹ ihiẹn ndị-amụma de lẹ imẹ Ẹbụ-ọma jẹnkọ d'e mẹrịrị.”

45Ya ọ nọ shịapụ wẹ obi kẹni wẹ saẹka ghọta Ẹkụkwọ-nsọ, 46sị wẹ, “Ọnwan wụ ihiẹn wẹ de: nị Onyẹ-nzụọpụha sikọ d'a nwụnhụn, nke akpọhịn ẹtọ ọ gha ọnwụn lihi; 47nị wẹ jẹnkọ d'e gi ẹfan a zi ndị alị ile ozi w'e gi rogharị kẹni Osolobuẹ gbagharị wẹ njọ; nị Jerusalẹm kẹ wẹ jẹnkọ d'a gha bidọn. 48Ụnụ nwọn shịa ẹri ihiẹn ndịnị ile. 49Lee n'ẹ, m zilanị ụnụ Mmọn-nsọ ahụn Nẹdi m kwe nkwa a. Ka cherikwọ nị imẹ obodo ebeni d'e ru n'e yimẹgụ wẹ ụnụ ikẹn ahụn gha Elu-igwee bịa.”

Jizọsị E Shi Elu-igwee

(Mat 28.19-20; Ọrụn 1.9-11)

50Ọ nọ gha imẹ obodo hụ we wẹ rukwọrị Bẹtani; e ru wẹ ebẹhụ, ọ nọ kịshi ẹka elu, gọzi wẹ. 51Ebe ọ rị a gọzi wẹ, ọ nọ gha imẹ wẹ buli, Osolobuẹ nọ we ẹ shi elu-igwee. 52Ya wẹ nọ kụn'a isi alị, gi okẹn ịghọghọ lakin Jerusalẹm. 53Wẹ hụ a nọ imẹ Ụlọ-nsọ ogẹn ile, a ja Osolobuẹ mma.

Currently Selected:

Luku 24: ikkBI

Highlight

Copy