Jâan 13
13
Jezü djütu da adjisîpili ndə̂ yê
1Lö balë ndə̂kə̂ pa a mbo kpülü ndə̂ Pâke, Jezü wûnsə̂ nə̈ pä dalo ndə̂ yê wûtu nə̂ ndə̂kə̂ pa tche gbotə̂ tchêbêche âtə, kə̂ ka pu Bha nə̈. Jezü lâme ndə̂ tche nyîndə̂ azü ndə̂ yê logbɛ̂ pâ cho âtə, tche ânyində̂ andjê käko ndjoa ëtə̂ manə̈. 2Jezü la adjisîpili ndə̂ yê sə̂ lakə̂ zɨ kɨ̈zɨ̂ ndə̂ tchêndə̂gölo. Dëkë Jâbolo zâ rə̂ nə̂ tə̂ su Jüdâse, modô ndə̂ Chemön Ïsïkärïyôte, ndə̂kə̂ pa tche yosə̂ Jezü. 3Jezü wünsə̂ nə̈ pä Bha nə̈ gbôtə̂ arə nə̂ gbɛ̂ ëtchânə̂ yê, kə̈ wûn ndjë sə̂nə̈ pä tche tö alême bhândə̂ Ndjapä, tchê kä doadje ndjë tə̂ yê pu Ndjapä. 4Jezü âlafô tə̂ ma kɨ̈zɨ̂ nə̈, kə̈ zû krʉ lə̂ba ndə̂ yê, kə̂ zâ ngâ kʉ̈kʉ̂-lə̂ba kə̈ î tchə̂lə̂ yê la rə̂. 5Pânə̈ tche sû ngû lə̂ gbölö chembë, kə̈ jêtə̂ kə̂ djutu da adjisîpili ndə̂ yê la rə̂, ânyë kə̈ trô rə̂ la kʉ̈kʉ̂-lə̂ba ndə̂ tche î tchêpâ lə̂ba ndə̂ yê la rə̂ lâme. 6Jezü wûtu ëtə̂ Chemôn-Pîêre, tche tô rə̂ sə̈ Jezü päkëdə̂: «Gbölö Gbïɛ̈, momö, mo nyïndə̂ kə̂ djutu da mê?» 7Jezü tô rə̂ sə̈ tche päkëdə̂: «Rə ndə̂ mê mbo rə̂ âtə, mô wun-abô sə̂ rə lə̂nə̈ angaâtə tee-a, praâbalë mô djeadje tchə̂lə̂ nə̈ tə̂ngâlo.» 8Pîêre tô rə̂ ndə̂nə̈ sə̈ tchë päkëdə̂: «Âdəabô käko balë tee-a, mô djutuabô da mê tee-a!» Jezü tô rə̂ sə̈ tchë päkëdə̂: «Âdə mê âdjutuabô da zə̈ djûtu, dëkë ngâ rə balë ndə̂ âkä pâla mê la mö wabô tee-a.» 9Chemôn-Pîêre tô rə̂ sə̈ tchë päkëdə̂: «Gbölö Gbïɛ̈, ârə̂ âdə käko, amö djutuabô kütû da mê djûtu-î, praâbalë amö djutu ndjë akönô mê la küma mê!» 10Jezü tô rə̂ sə̈ tchë päkëdə̂: «Akrə ndə̂ tche djûtu kʉ̂tê yê nə̂, tche kä wâbo ndə̂kə̂ djutu kʉ̂tê yê-a, praâbalë tche wä kütû ndə̂kə̂ djutu da yê, bëte tche grô nə̈ gbɛ̂. Dëkë kʉ̂tê nyê grô nə̂, praâbalë âdə̂âbo nyënyê gbɛ̂-a.» 11Bëte Jezü wûnsə̂ akrə ndə̂ tche wâ ndə̂kə̂ yosə̂ yê nə̂, bëte rə̂ kä tche tô rə̂ päkëdə̂: «Âdə̂âbô nyënyê gbɛ̂ kä ndə̂ kʉ̂tê nyê grô lâme-a.»
12Pânə̈ ndə̂ Jezü djûtu da andjê gbɛ̂ âkâ, tche kâ yû lə̂ba ndə̂ yê ëngbânə̈, ânyë kə̈ kâ atə̂ ma kɨ̈zɨ̂ nə̈. Tche tô rə̂ sə̈ andjê päkëdə̂: «Nyë wûnsə̂ dju rə ndə̂ më mbô rə̂ tə̂ nyê âtə nə̂? 13Nyë ë mê pä ‹Earə̂ kə̂ nyisə̂ rə› la ‹Gbölö Gbïɛ̈›, nyë tö rə̂ la köbo nə̈, bëte mëmê kä tə̂ lëge nə̈. 14Âdə mëmê ndə̂ më wâtə̂ Gbölö Gbïɛ̈ la Earə̂ kə̂ nyisə̂ rə âdjutu da nyê, nyënyê ndjë gbɛ̂ äwäpä nyë djutu da nyê lə̂ gbâtə̂ nyê la angâ nyê. 15Më nyïsə̂ nə̈ sə̈ nyê käko, ndə̂kə̂ pa nyë mbo ndjë rə̂ käko, batə̂ rə̂ ndə̂ më mbô rə̂ tə̂ nyê. 16Ɛn-ɛn, tə̂ lëge nə̈ më tö rə̂ sə̈ nyê, earə̂ kua wâbo gbölö kə̈ rô gbölö akrə ndə̂ yê-a, âdəndjë badjângele wâbo gbölö kə̈ rô akrə ndə̂ tche wân tchë-a. 17Nyë kä la mômô, âdə nyê âwunsə̂ arə lâme, ânyë kə̈ mbô rə gundə̂sə̂ nə̈. 18Mê tôâbo pö âtə bëte nyënyê gbɛ̂-a. Më wünsə̂ andjanə̈ ndə̂ më dɨ̂ andjê. Praâbalë äwäpä pö lə̂ Mbëtï Ndjapä mbo tə̂ lëge nə̈ ndə̂ âtô rə̂ päkëdə̂: ‹Akrə ndə̂ ârâ la tchë zɨ̂ rə balë, tche wätə̂ earə̂ kə̂ kosə̂ mê#13.18 Nyë dɨ̈ Aps 41.10..› 19Më tö rə̂ sə̂ nyê angaâtə, dokʉ̈tchê ânyë rə nə̈ wutu ndə̂kə̂ pa âdə rə lâme âsə̈ wutu, nyê gamba rə̂ pä ‹Më kä tâ›. 20Ɛn-ɛn, tə̂ lëge nə̈ më tö rə̂ sə̈ nyê, akrə ndə̂ tche zâ ngâ akrə ndə̂ më wân tchë bhândə̂ yê, dëkë mëmê kä tche zâ mê la tə̂ mê bhândə̂ yê. Akrə ndə̂ tche zâ mê bhândə̂ yê, tche zâ akrə ndə̂ tche wân mê bhândə̂ yê nə̂.»
Jezü tö rə̂ pä Jüdâse yoadje sə̂ anyê
21Pâ pö lâme, su yê wâ ngbɨ̂ɨ̂, tche tô rə̂ kraâ päkëdə̂: «Ɛn-ɛn, tə̂ lëge nə̈ më tö rə̂ sə̈ nyê, ngânə̈ balë lə̂ gûtə̂ nyê yoadje sə̂ mê.» 22Adjisîpili sə̂ lakə̂ wun angâ andjê, kə̈ sə̂ lakə̂ yutə̂ andjê lə̂ gbâtə̂ andjê ndə̂kə̂ wunsə̂ akrə ndə̂ tche tô pö ndə̂ yê lâme. 23Ngâ djisîpili lə̂ gûtə̂ andjê ndə̂ Jezü nyîndə̂ yê tə̂ gbölösə̂nə̈ sə̂ ndrotə̂ Jezü. 24Chemôn-Pîêre mbô könô yê sə̈ tchë ndə̂kə̂ pa tche yu Jezü pä, tchabâ kä ndə̂ tche tô pö ndə̂ yê lâme? 25Djisîpili ndə̂ tche sə̂ ndrotə̂ Jezü nə̈ lâme yû tchë päkëdə̂: «Gbölö Gbïɛ̈, tchabâ kä?» 26Jezü tô rə̂ sə̈ tchë päkëdə̂: «Akrə ndə̂ mê ndroadje ndöma mâpa lə̂ sâpu ânyë kə̂ zadje rə̂ sə̈ tchë, dëkë tchetchë kä.» Pânə̈ Jezü zâ ndöma mâpa ndə̂ tche ndrô rə̂ lə̂ sâpu lâme, kə̈ zâ rə̂ sə̈ Jüdâse, modô ndə̂ Chemön Ïsïkärïyôte. 27Pânə̈ ndə̂ Jüdâse zâ ndöma mâpa nə̈, Satäa lî lə̂ yê. Jezü tô rə̂ sə̈ tchë päkëdə̂: «Rə ndə̂ mo nə̂ ndə̂kə̂ mbo rə̂ lâme, amö mbo rə̂ wândâ wändä.» 28Ngâ akrə balë lə̂ gûtə̂ azü nə̈ ndə̂ andjë sə̂ ma kɨ̈zɨ̂ nə̈ lâme, ndə̂ tche djê tchə̂lə̂ pö ndə̂ Jezü tô rə̂ lâme sə̂âbo-a. 29Batə̂ rə̂ ndə̂ Jüdâse wâtə̂ earə̂ kə̂ wun tchô pâ kədjâ-makətche ndə̂ andjê gbɛ̂, käko angâ adjisîpili wûntî pä Jezü wän tchë ndə̂kə̂ yo kɨ̈zɨ̂ bëte kpülü nə̈, âdəndjë ndə̂kə̂ pa tche kʉ ngâ rə sə̈ a-earə̂ yûkü. 30Ndə̂ Jüdâse zâ ndöma mâpa lâme, tche wûtu gasa-ê, dëkë tchô bû nə̂.
Täfo ndïɛ̈
31Ndə̂ Jüdâse rô etə̂, Jezü tô rə̂ päkëdə̂: «Angaâtə a lûsə̂ Modô ndə̂ Akrə nə̂, ânyë a lûsə̂ Ndjapä lə̂ köbosə̂ yê nə̂. 32[Âdə a âlusə̂ Ndjapä lə̂ köbosə̂ yê,] Ndjapä luadje sə̂ Modô ndə̂ yê lə̂ yê la tə̂ yê angangaâtə. 33Abechë ndə̂ mê, gbô mê kä po lə̂ gûtə̂ nyê ngbâ kpîɛ̂kpîɛ̂ lö. Nyê puadje mê. Pö ndə̂ më tô rə̂ sə̈ ajuîfu alême, më tö ndjë rə̂ sə̈ nyê gbɛ̂ päkëdə̂: ‹Sə̂ tchô ndə̂ mê e tâ, nyë wâbo ndə̂kə̂ e tâ-a.› 34Më âza ngâ täfo ndïɛ̈ sə̈ nyê, äwäpä nyë nyïndə̂ angâ nyê lə̂ gbâtə̂ nyê. Batə̂ rə̂ ndə̂ më nyîndə̂ nyê, äwäpä nyë nyïndə̂ angâ nyê lə̂ gbâtə̂ nyê. 35Âdə nyê ânyində̂ angâ nyê lə̂ gbâtə̂ nyê, käko azü gbɛ̂ wun-adje sə̂nə̈ pä nyë wätə̂ adjisîpili ndə̂ mê.»
Jezü tö rə̂ pä Pîêre vuadje sə̂ anyê
(Mat 26.31-35; Mar 14.27-31; Luk 22.31-34)
36Chemôn-Pîêre yû tchë päkëdə̂: «Gbölö Gbïɛ̈, mo âe atə̂ tchêbâ?» Jezü tô rə̂ ndə̂nə̈ sə̈ tchë päkëdə̂: «Sə̂ tchô ndə̂ mê e tâ, mo wâbo ndə̂kə̂ za tchêngbâ mê angangaâtə-a, tə̂ngâlo ânyë mô zadje tchêngbâ mê.» 37Pîêre yû tchë päkëdə̂: «Gbölö Gbïɛ̈, bëte giamâ mo tô rə̂ pä më wâbo ndə̂kə̂ za tchêngbâ zə̈ angangaâtə? Më kä ësə̂ kə̂ tchu bëte mö.» 38Jezü tô rə̂ sə̈ tchë päkëdə̂: «Mo wä ësə̂ kə̂ tchu bëte mê? Ɛn-ɛn, tə̂ lëge nə̈ më tö rə̂ sə̈ mö, dokʉ̈tchê ndə̂kə̂ pa kö ngötö kɨ, mô vuadje sə̂ mê sûsunə̈ vötaâ.»
Currently Selected:
Jâan 13: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
Jâan 13
13
Jezü djütu da adjisîpili ndə̂ yê
1Lö balë ndə̂kə̂ pa a mbo kpülü ndə̂ Pâke, Jezü wûnsə̂ nə̈ pä dalo ndə̂ yê wûtu nə̂ ndə̂kə̂ pa tche gbotə̂ tchêbêche âtə, kə̂ ka pu Bha nə̈. Jezü lâme ndə̂ tche nyîndə̂ azü ndə̂ yê logbɛ̂ pâ cho âtə, tche ânyində̂ andjê käko ndjoa ëtə̂ manə̈. 2Jezü la adjisîpili ndə̂ yê sə̂ lakə̂ zɨ kɨ̈zɨ̂ ndə̂ tchêndə̂gölo. Dëkë Jâbolo zâ rə̂ nə̂ tə̂ su Jüdâse, modô ndə̂ Chemön Ïsïkärïyôte, ndə̂kə̂ pa tche yosə̂ Jezü. 3Jezü wünsə̂ nə̈ pä Bha nə̈ gbôtə̂ arə nə̂ gbɛ̂ ëtchânə̂ yê, kə̈ wûn ndjë sə̂nə̈ pä tche tö alême bhândə̂ Ndjapä, tchê kä doadje ndjë tə̂ yê pu Ndjapä. 4Jezü âlafô tə̂ ma kɨ̈zɨ̂ nə̈, kə̈ zû krʉ lə̂ba ndə̂ yê, kə̂ zâ ngâ kʉ̈kʉ̂-lə̂ba kə̈ î tchə̂lə̂ yê la rə̂. 5Pânə̈ tche sû ngû lə̂ gbölö chembë, kə̈ jêtə̂ kə̂ djutu da adjisîpili ndə̂ yê la rə̂, ânyë kə̈ trô rə̂ la kʉ̈kʉ̂-lə̂ba ndə̂ tche î tchêpâ lə̂ba ndə̂ yê la rə̂ lâme. 6Jezü wûtu ëtə̂ Chemôn-Pîêre, tche tô rə̂ sə̈ Jezü päkëdə̂: «Gbölö Gbïɛ̈, momö, mo nyïndə̂ kə̂ djutu da mê?» 7Jezü tô rə̂ sə̈ tche päkëdə̂: «Rə ndə̂ mê mbo rə̂ âtə, mô wun-abô sə̂ rə lə̂nə̈ angaâtə tee-a, praâbalë mô djeadje tchə̂lə̂ nə̈ tə̂ngâlo.» 8Pîêre tô rə̂ ndə̂nə̈ sə̈ tchë päkëdə̂: «Âdəabô käko balë tee-a, mô djutuabô da mê tee-a!» Jezü tô rə̂ sə̈ tchë päkëdə̂: «Âdə mê âdjutuabô da zə̈ djûtu, dëkë ngâ rə balë ndə̂ âkä pâla mê la mö wabô tee-a.» 9Chemôn-Pîêre tô rə̂ sə̈ tchë päkëdə̂: «Gbölö Gbïɛ̈, ârə̂ âdə käko, amö djutuabô kütû da mê djûtu-î, praâbalë amö djutu ndjë akönô mê la küma mê!» 10Jezü tô rə̂ sə̈ tchë päkëdə̂: «Akrə ndə̂ tche djûtu kʉ̂tê yê nə̂, tche kä wâbo ndə̂kə̂ djutu kʉ̂tê yê-a, praâbalë tche wä kütû ndə̂kə̂ djutu da yê, bëte tche grô nə̈ gbɛ̂. Dëkë kʉ̂tê nyê grô nə̂, praâbalë âdə̂âbo nyënyê gbɛ̂-a.» 11Bëte Jezü wûnsə̂ akrə ndə̂ tche wâ ndə̂kə̂ yosə̂ yê nə̂, bëte rə̂ kä tche tô rə̂ päkëdə̂: «Âdə̂âbô nyënyê gbɛ̂ kä ndə̂ kʉ̂tê nyê grô lâme-a.»
12Pânə̈ ndə̂ Jezü djûtu da andjê gbɛ̂ âkâ, tche kâ yû lə̂ba ndə̂ yê ëngbânə̈, ânyë kə̈ kâ atə̂ ma kɨ̈zɨ̂ nə̈. Tche tô rə̂ sə̈ andjê päkëdə̂: «Nyë wûnsə̂ dju rə ndə̂ më mbô rə̂ tə̂ nyê âtə nə̂? 13Nyë ë mê pä ‹Earə̂ kə̂ nyisə̂ rə› la ‹Gbölö Gbïɛ̈›, nyë tö rə̂ la köbo nə̈, bëte mëmê kä tə̂ lëge nə̈. 14Âdə mëmê ndə̂ më wâtə̂ Gbölö Gbïɛ̈ la Earə̂ kə̂ nyisə̂ rə âdjutu da nyê, nyënyê ndjë gbɛ̂ äwäpä nyë djutu da nyê lə̂ gbâtə̂ nyê la angâ nyê. 15Më nyïsə̂ nə̈ sə̈ nyê käko, ndə̂kə̂ pa nyë mbo ndjë rə̂ käko, batə̂ rə̂ ndə̂ më mbô rə̂ tə̂ nyê. 16Ɛn-ɛn, tə̂ lëge nə̈ më tö rə̂ sə̈ nyê, earə̂ kua wâbo gbölö kə̈ rô gbölö akrə ndə̂ yê-a, âdəndjë badjângele wâbo gbölö kə̈ rô akrə ndə̂ tche wân tchë-a. 17Nyë kä la mômô, âdə nyê âwunsə̂ arə lâme, ânyë kə̈ mbô rə gundə̂sə̂ nə̈. 18Mê tôâbo pö âtə bëte nyënyê gbɛ̂-a. Më wünsə̂ andjanə̈ ndə̂ më dɨ̂ andjê. Praâbalë äwäpä pö lə̂ Mbëtï Ndjapä mbo tə̂ lëge nə̈ ndə̂ âtô rə̂ päkëdə̂: ‹Akrə ndə̂ ârâ la tchë zɨ̂ rə balë, tche wätə̂ earə̂ kə̂ kosə̂ mê#13.18 Nyë dɨ̈ Aps 41.10..› 19Më tö rə̂ sə̂ nyê angaâtə, dokʉ̈tchê ânyë rə nə̈ wutu ndə̂kə̂ pa âdə rə lâme âsə̈ wutu, nyê gamba rə̂ pä ‹Më kä tâ›. 20Ɛn-ɛn, tə̂ lëge nə̈ më tö rə̂ sə̈ nyê, akrə ndə̂ tche zâ ngâ akrə ndə̂ më wân tchë bhândə̂ yê, dëkë mëmê kä tche zâ mê la tə̂ mê bhândə̂ yê. Akrə ndə̂ tche zâ mê bhândə̂ yê, tche zâ akrə ndə̂ tche wân mê bhândə̂ yê nə̂.»
Jezü tö rə̂ pä Jüdâse yoadje sə̂ anyê
21Pâ pö lâme, su yê wâ ngbɨ̂ɨ̂, tche tô rə̂ kraâ päkëdə̂: «Ɛn-ɛn, tə̂ lëge nə̈ më tö rə̂ sə̈ nyê, ngânə̈ balë lə̂ gûtə̂ nyê yoadje sə̂ mê.» 22Adjisîpili sə̂ lakə̂ wun angâ andjê, kə̈ sə̂ lakə̂ yutə̂ andjê lə̂ gbâtə̂ andjê ndə̂kə̂ wunsə̂ akrə ndə̂ tche tô pö ndə̂ yê lâme. 23Ngâ djisîpili lə̂ gûtə̂ andjê ndə̂ Jezü nyîndə̂ yê tə̂ gbölösə̂nə̈ sə̂ ndrotə̂ Jezü. 24Chemôn-Pîêre mbô könô yê sə̈ tchë ndə̂kə̂ pa tche yu Jezü pä, tchabâ kä ndə̂ tche tô pö ndə̂ yê lâme? 25Djisîpili ndə̂ tche sə̂ ndrotə̂ Jezü nə̈ lâme yû tchë päkëdə̂: «Gbölö Gbïɛ̈, tchabâ kä?» 26Jezü tô rə̂ sə̈ tchë päkëdə̂: «Akrə ndə̂ mê ndroadje ndöma mâpa lə̂ sâpu ânyë kə̂ zadje rə̂ sə̈ tchë, dëkë tchetchë kä.» Pânə̈ Jezü zâ ndöma mâpa ndə̂ tche ndrô rə̂ lə̂ sâpu lâme, kə̈ zâ rə̂ sə̈ Jüdâse, modô ndə̂ Chemön Ïsïkärïyôte. 27Pânə̈ ndə̂ Jüdâse zâ ndöma mâpa nə̈, Satäa lî lə̂ yê. Jezü tô rə̂ sə̈ tchë päkëdə̂: «Rə ndə̂ mo nə̂ ndə̂kə̂ mbo rə̂ lâme, amö mbo rə̂ wândâ wändä.» 28Ngâ akrə balë lə̂ gûtə̂ azü nə̈ ndə̂ andjë sə̂ ma kɨ̈zɨ̂ nə̈ lâme, ndə̂ tche djê tchə̂lə̂ pö ndə̂ Jezü tô rə̂ lâme sə̂âbo-a. 29Batə̂ rə̂ ndə̂ Jüdâse wâtə̂ earə̂ kə̂ wun tchô pâ kədjâ-makətche ndə̂ andjê gbɛ̂, käko angâ adjisîpili wûntî pä Jezü wän tchë ndə̂kə̂ yo kɨ̈zɨ̂ bëte kpülü nə̈, âdəndjë ndə̂kə̂ pa tche kʉ ngâ rə sə̈ a-earə̂ yûkü. 30Ndə̂ Jüdâse zâ ndöma mâpa lâme, tche wûtu gasa-ê, dëkë tchô bû nə̂.
Täfo ndïɛ̈
31Ndə̂ Jüdâse rô etə̂, Jezü tô rə̂ päkëdə̂: «Angaâtə a lûsə̂ Modô ndə̂ Akrə nə̂, ânyë a lûsə̂ Ndjapä lə̂ köbosə̂ yê nə̂. 32[Âdə a âlusə̂ Ndjapä lə̂ köbosə̂ yê,] Ndjapä luadje sə̂ Modô ndə̂ yê lə̂ yê la tə̂ yê angangaâtə. 33Abechë ndə̂ mê, gbô mê kä po lə̂ gûtə̂ nyê ngbâ kpîɛ̂kpîɛ̂ lö. Nyê puadje mê. Pö ndə̂ më tô rə̂ sə̈ ajuîfu alême, më tö ndjë rə̂ sə̈ nyê gbɛ̂ päkëdə̂: ‹Sə̂ tchô ndə̂ mê e tâ, nyë wâbo ndə̂kə̂ e tâ-a.› 34Më âza ngâ täfo ndïɛ̈ sə̈ nyê, äwäpä nyë nyïndə̂ angâ nyê lə̂ gbâtə̂ nyê. Batə̂ rə̂ ndə̂ më nyîndə̂ nyê, äwäpä nyë nyïndə̂ angâ nyê lə̂ gbâtə̂ nyê. 35Âdə nyê ânyində̂ angâ nyê lə̂ gbâtə̂ nyê, käko azü gbɛ̂ wun-adje sə̂nə̈ pä nyë wätə̂ adjisîpili ndə̂ mê.»
Jezü tö rə̂ pä Pîêre vuadje sə̂ anyê
(Mat 26.31-35; Mar 14.27-31; Luk 22.31-34)
36Chemôn-Pîêre yû tchë päkëdə̂: «Gbölö Gbïɛ̈, mo âe atə̂ tchêbâ?» Jezü tô rə̂ ndə̂nə̈ sə̈ tchë päkëdə̂: «Sə̂ tchô ndə̂ mê e tâ, mo wâbo ndə̂kə̂ za tchêngbâ mê angangaâtə-a, tə̂ngâlo ânyë mô zadje tchêngbâ mê.» 37Pîêre yû tchë päkëdə̂: «Gbölö Gbïɛ̈, bëte giamâ mo tô rə̂ pä më wâbo ndə̂kə̂ za tchêngbâ zə̈ angangaâtə? Më kä ësə̂ kə̂ tchu bëte mö.» 38Jezü tô rə̂ sə̈ tchë päkëdə̂: «Mo wä ësə̂ kə̂ tchu bëte mê? Ɛn-ɛn, tə̂ lëge nə̈ më tö rə̂ sə̈ mö, dokʉ̈tchê ndə̂kə̂ pa kö ngötö kɨ, mô vuadje sə̂ mê sûsunə̈ vötaâ.»
Currently Selected:
:
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.