Jâan 14
14
Jezü wätə̂ köbo ndə̂ âe atə̂ndə̂ Bha
1Jezü tö rə̂ päkëdə̂: «Su nyê djïngɨliabô djîngɨli-î! Nyë zä su nyê sə̈ Ndjapä, kə̂ za ndjë su nyê sə̈ mê. 2Bhâ tchâalê ndə̂ Bha mê, sə̂ tchô ngbä tə̂ gbölösə̂nə̈. Ârə̂ âdəabô də̂ käko, dëkë mê toabô rə̂ sə̈ nyê alême pä mê eadje ndə̂kə̂ nyikrə ngâ tchô bëte nyê tee-a. 3Âdə më âe kə̂ nyikrə tchô bëte nyê, mê kadje ngbâ mê ndə̂kə̂ kʉ nyê potə̂ mê, ânyë sə̂ tchô ndə̂ mê sə tâ, nyënyê ndjë gbɛ̂, nyê sə ndjë tâ. 4Sə̂ tchô ndə̂ mê e tâ âtə, nyë wûnsə̂ köbo nə̈ nə̂.» 5Tomä tô rə̂ sə̈ tchë päkëdə̂: «Gbölö Gbïɛ̈, ârâ wûn-âbo sə̂ tchô ndə̂ mo e atə̂ tâ lâme-a. Ârâ âwunsə̂ köbo nə̈ tchïtchïnə̈ atöko?» 6Jezü tô rə̂ sə̈ tchë päkëdə̂: «Më wätə̂ köbo nə̈ la lëge pö la tchîsûwu. Ngâ akrə balë wâbo ndə̂kə̂ e pu Bha mê lə̂ ngâ köbo ngbî-a, kütû lə̂ köbosə̂ mê. 7Âdə nyê âwunsə̂ mê, nyê wun-adje ndjë sə̈ Bha mê. Ätö tə̂ tchô angêta, nyë wûnsə̂ yê nə̂, kə̈ wûn ndjë tchë nə̂.»
8Fïlîpe tô rə̂ sə̈ tchë päkëdə̂: «Gbölö Gbïɛ̈, amö nyisə̂ Bha sə̈ ârâ ânyë tə̂ ârâ kra.» 9Jezü tô rə̂ sə̈ tchë päkëdə̂: «Fïlîpe, ndə̂ mê gû lə̂ gûtə̂ nyê nə̂, mo wûn-âbo sə̂ mê dämba? Akrə ndə̂ tche wûn mê, dëkë tche wûn Bha mê nə̂. Bëte giamâ mo yû mê päkëdə̂: ‹Amö nyisə̂ Bha sə̈ ârâ›? 10Mo gâmbabô rə̂ dämba pä më kä balë la Bha mê, ânyë Bha mê kä ndjë balë la mê? Apö ndə̂ mê to rə̂ sə̈ nyê tôâbo bhândə̂ mê la tə̂ mê-a. Bha ndə̂ tche wâ balë la mê kä ndə̂ âmbo kua ndə̂ yê la tə̂ yê. 11Äwäpä nyë gämba pö ndə̂ më tô rə̂ päkëdə̂: Më kä balë la Bha mê, ânyë Bha mê kä ndjë balë la mê. Âdə nyë âgambabô rə̂ gâmba, praâbalë äwäpä nyë gamba rə̂ lə̂ köbosə̂ akua ndə̂ më mbô rə̂. 12Ɛn-ɛn, tə̂ lëge nə̈ më tö rə̂ sə̈ nyê: Akrə ndə̂ tche zâ su yê sə̈ mê, tchê mboadje arə ndə̂ më mbô rə̂ lâme. Tchê âkä mbo rə̂ âro anə̈ âtə, bëte mê âgûgü atə̂ ndrotə̂ Bha mê. 13Rə gbɛ̂ ndə̂ nyê yuadje kû nə̈ la rə̈ mê, mê mboadje rə̂ ndə̂kə̂ pa azü lusə̂ Bha mê lə̂ köbosə̂ Modô nə̈. 14Âdə nyê âyukû ngâ rə la rə̈ mê, mê mboadje rə̂.»
Jezü tö pö ndə̂kə̂ wan Kpɨ̂ki Yingö
15«Âdə nyê ânyində̂ mê, kə̂ batadje andïɛ̈ ndə̂ mê. 16Mê yuadje Bha mê ndə̂kə̂ pa tche za ngâ akrə ngbî, tche za könô sə̈ nyê ânyë kə̂ sə ndrotə̂ nyê pïï etə̂. 17Tche wätə̂ Yingö ndə̂ tche to lëge pö, ânyë azü tchêbêche wâbo ndə̂kə̂ gamba pö ndə̂ yê-a, bëte andjë wûn-âbo tchë-a, ânyë kə̈ wûn-âbo sə̂ yê-a. Praâbalë nyënyê ndə̂ nye nə̈, nyë wûnsə̂ yê nə̂, bëte tche kä ndrotə̂ nyê ânyë tche kä lə̂ nyê. 18Mê gboabô tə̂ nyê tə̂ awüntə̂wün tee-a, mê kadje pu nyê. 19Lə̂ kpîɛ̂kpîɛ̂ lö, azü tchêbêche kä wun-abô mê tee-a. Praâbalë andə̂ nye nə̈, nyê wun-adje mê. Bëte më kä la tchîsûwu, nyënyê ndjë gbɛ̂, nyê wadje la tchîsûwu. 20Âdə lo nə̈ âwutu nə̂, nyê wun-adje sə̂nə̈ pä mëmê la Bha mê, ârâ wä balë ânyë nyë wâ balë la mê, ânyë më wâ ndjë balë la nyê. 21Akrə ndə̂ tche nyîndə̂ mê, tche də̈ akrə ndə̂ tchê bata andïɛ̈ ndə̂ mê, ânyë kə̂ mbo rə gundə̂sə̂ nə̈. Bha mê nyiadje ndə̂ akrə ndə̂ tche nyîndə̂ mê. Mëmê ndjë gbɛ̂ mê nyiadje ndə̂ yê, kə̂ madje tə̂ mê sə̈ tchë.»
22Jüdâse, ndə̂ tche wâ ngbî tə̂ Ïsïkärïyôte, tô rə̂ sə̈ tchë päkëdə̂: «Gbölö Gbïɛ̈, bëte giamâ mo nyîndə̂ nə̈ pä kütû ârâ kä ndə̂ mo matə̂ zə̈ sə̈ ârâ, ânyë kə̈ mâbô tə̂ zə̈ mâ sə̈ azü tchêbêche-ê?» 23Jezü tô rə̂ sə̈ tchë päkëdə̂: «Âdə ngâ akrə ânyində̂ mê, tchê mboadje rə gundə̂sə̂ pö ndə̂ mê. Bha mê ndjë gbɛ̂ nyiadje ndə̂ yê, mëmê la Bha mê, ârâ eadje ndə̂kə̂ sə bhândə̂ yê. 24Akrə ndə̂ tche nyîâbô nyîndə̂ mê, tchê mboabô rə gundə̂sə̂ pö ndə̂ mê tee-a. Pö ndə̂ nyë djê rə̂ âtə, âtôâbo bhândə̂ mê-a, ätö bhândə̂ Bha mê ndə̂ tche wân mê. 25Më tô pö âtə sə̂ nyê alême nə̂, ndə̂ gbô mê sə̂ ndrotə̂ nyê. 26Praâbalë earə̂ kə̂ za könô sə̈ nyê, ndə̂ tche də̂ Kpɨ̂ki Yingö ndə̂ Bha wan-adje tchë la rə̈ mê, tchê nyiadje sə̂ arə gbɛ̂ sə̈ nyê, ânyë kə̂ mboadje rə̂ pä arə gbɛ̂ ndə̂ më nyîsə̂ nə̈ alême sə̈ nyê sə̂nə̈ te lə̂ nyê.
27«Më gbötə̂ zɨtɨ su sə̈ nyê, zɨtɨ su ndə̂ më wâ la rə̂ kä ndə̂ më zâ rə̂ sə̈ nyê. Më zâbo rə̂ sə̈ nyê batə̂ rə̂ ndə̂ tchêbêche za rə̂ sə̈ nyê-a. Âwâbo pä tchə̂lə̂ küma nyê djingɨli-a, ânyë su nyê wäbô ndjë wâ la wawa-ê. 28Nyë djê rə̂ ndə̂ më tô rə̂ alême nə̂ päkëdə̂: ‹Mê âgu, praâbalë mê kadje pu nyê.› Âdə nyê ânyində̂ mê alême, nyê wadje la mômô tə̂ pö ndə̂nə̈ ndə̂ mê gû atə̂ndə̂ Bha mê, bëte Bha mê wä gbölö kə̈ rô mê. 29Më nyïndə̂ kə̂ to pö ndə̂ arə lâme sə̈ nyê angaâtə, dokʉ̈tchê ânyë arə nə̈ wutu, ndə̂kə̂ pa âdə rə nə̈ âsə̈ wutu, nyê gamba rə̂ la pö nə̈. 30Mê kä toabô pö tə̂ gbölösə̂nə̈ sə̈ nyê tee-a, bëte makündji ndə̂ tchêbêche âtə kä lə̂ köbo. Tche wâbo la gbôgbô balë pâ mê-a, 31praâbalë më mbö arə gundə̂sə̂ kə̂ zama ndə̂ Bha mê, ndə̂kə̂ pa azü tchêbêche wunsə̂ nə̈ pä më nyïndə̂ Bha. Nyë älafô, azə̈ gbô tchâtə-ê!»
Currently Selected:
Jâan 14: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
